SIH DING THUTANNA BANG ZIAK AHI DING ?
Mawi Tombing
Tulai in i gam ah AWKLUM (suicide) chih hong tam mahmah hi. Bang ziaka hiai bang tan tung ding a thutanna hon nei uh ahi ding? Tua bang hangsanna petu tuh Setan nasep ahi i chilou theikei hi. I ta tuailaite lungtang ah nna thupitak sem in, nidang ahong om khak zenzen hun a leng dipkuatna a i neihte, tuhun chiang in' ahi ding mawng bang a ngaihtuahna i gam ah hong tung mai mah hi.
Hiai bang thang a bangziak a okkha a, hiai natna in hon tuamkha ahia ? Bangziak ahi ding chi'n kidong le'ng Innkuan kitamkham (broken family) ziak mah ahi ding i chilou thei kei hi. Pathian in innkuan hon bawlpihna pi'n ei haiman, thulimlouh man in innkuan kitamkham i kiguan uhi. Pathian in abul hon patpih Amah toh pangkhawm a aban sunzawm dia mohpuakna piak a omte ei a nu leh pate ihi uhi.
Tulai hun awl ineihte i ta leh naute zatpih a, kithuahna ding hun teng phone toh kithuahna'n I zang uhi. Phone lawm a nei a, hun awl i neih tate toh kithuahna hun ding teng phone khoihna a zang ihih ziakin Innkuan a kithuah, houlim a tutkhawm chih om nawnlou in eimah a chiat i buaipih uhi. Tuabang a phone a poimawh pen leh aloutheilou bang a ngaihna ziak in, i ta leh naute keplouh, dawnlouh, thuhilh louh a om tampi om ding hi. Pathian thu genpih a, khalam a pitu ding ten i mohpuakna uh i zohlouh ziaka i ta leh inaute kingaisia a, lungkham mangbang a om... kuamah kiang a lah gen ngamlou, nemtu leh panpihtu ding a neih louh ziak ua, hiai bang thil mulkim huai khong ana tum maimah uhia chih hon ngaihtuah sak hi.
Nu leh pate, sanggamte ziak bang, ahihkeileh lawm leh vualte ziak bang i zi/pasal ziak hiam leng hithei ahihna ah, innkuan sung ah haksatna tuamtuam tung theite kitheihpih poimawh lua hi. Amaute'n a lungsim khat uh paipih a hinkhua ana zang uh himaimah kha ding hi. Amau leng ut-thu a zaw utlou ding uh ahi. Lungkham beidawng hinkhua a aom ziak ua alampi ding dang theilou a sih mai deihtel hikha ding uhi. Hinkhua adia a ut huailou pente himahleh sih ding poisakna neilou a mulkimna tawp thutanna i theihlouh kal a ana bawl uh hikha ding hi.
Innkuan sung ah kithuah khawmna hun ineihlouh luat ziak bang, amasa leh apoimawh pen ding masak louh ziaka hiai bang thil hong piang ahi diam hon chisak hi. Huan, Pathian a ki ngakna diktak neilou, Pathian muanna leh pianthakna diktak ana neiloute adi'n tuh tomkhah ngaihtuah a hihphut theih mah hikha ding hi.
I lungkham, kipah hun in Toupa kiang mah ah tai in, i lungkhamnate a khebul ah tun in Toupa toh pangkhawm leng hun haksapen le' nuamtak a pawthei ding ihi. Eikia a hihtheih i neihlouh bang in eikian i puakzawh ding omlouh hi. Laphuaktu'n- 'Ka lungkhamnate Jesu kiang gen ning, ka buainate kei kia'n ka zoulou...' achih bang in; Toupa toh anuam ahaksa ah i hinkhua zangkhawm leng huai tuh amanpha pen ahi.
Simtute Toupa'n hon vualzawl hen aw🙏