NA PATHIAN TUAKDING IN MANSA IN OM IN !

~ Rev. T Thangzasiam

THUMAPI: Tulai thil omdanten lungsim honluah ahih manin genkhak nakin a om hi. Covid-19 ziaka mahni gamchiat zuan a i taikhawm vengvungte uh thutuam hileh, khovel paidan etin buaina apan buaizawk semlam manoh hi a theihna om hi. En un, khovel tuh mi hoihloute vualzohna khovel ahita, leitung khovel in a buaipih virus sangin tulai America te buaina in leitung sawiling zouding bangta hi. Akipatna tuh Americate sum teng 20/- thu leltak ahia, himahleh buaina in meikuang bangin saupi peh zungzung a, Police khut a sipa Floyd a dia justice deih a kiphinna tuh a justice nawnta kei hi. Midikte sangin a diklouten gumtu a hauzaw ta uh, midikte valna khovel ahihdan hon muchian saksem hi.

Laisiangthou ah Jesun ‘Na lungtang uh hih mangbat in om kei hen, Pathian na gingta ua keileng hon gingta un...nou a dia mun bawldia kuan dek ka hi, ka hong kiknawn ding a, ka kiang a na om theihna dingun nou ka hongla ding’(Johan 11;1-3) achih thutuh a khamuan huai ngoihngoih mai hi. Krist in hong paikik ding thu kichian takin hon hilhnung hi, sawltak Peter in zekai lou ding ahih dan gen in (2 Pet 3;9). Jawlnei tenleng Jesu hongpai nawnding thu atangkou pih uh, huan Angel tenleng Krist hongpai nawn ngeiding ahihdan agente uh imu uh. Huaiziakin Krist hongpai kiknawn ding chih thudik ahih manin. Bible in hon sinsak dan tamlou enkhawm leng uthuai isa hi:

THUPI TAKA HONG PAINAWN DING: Paulin ‘ Toupa mahmah kikou Aw toh, Angel tungnung pen Aw toh, Pathian pengkul ging Aw toh van akipan hongpai sukding ahi ngal a’ (I Thes 4:16) achi hi. Krist hongpai masakin sikha banglel himahleh, hongpai nawnna ding zaw kumpi thupitak bang hita ding chih ahi. Ka mihing lungsim toh hichiin ka suangtuah sak seka, Amah Jesu mahmah inleng hongpai nawnding tuh ngaklah tuntun dingin ka gingta hi, a hun masa toh kibang lou ahih manin ngaklah huai mahmah ding hi. Hichiin a gen a ‘mihing tapa a Pa thupina tengteng toh kithuam a hongpai ding ziakin’ (Matt 16;27) achi ahi.

A mah simoh leh ngeibet tute maiah kumpi thupi taka omding uthuai natel inchia maw !. India a pasal khat kum-14 sung vingveng security guard sema nekzong Mr Jothi Ranjan kichi kaza kha ngei hi, a man competitive exam sangpen UPSC hon clear in, IAS officer khat hongsuak ta hi. Nidang a amah simmoh leh musit tute zahtak leh salute in a omta. Toupa Jesu Krist leng tua sangmah a thupi zaw in hongpai nawn ding chih ahi. A pa thupina tengteng a kithuam in, angel tengteng toh chih ahih zawkmah ziakin (Matt 25;31) a thupi dingdan tuh suangtuah phak ahita kei hi. Pathian belamnou tuh Amah kia mai aleng thupisa ahihlai, a Pa thupina tengteng silhsak a omlai ding tuh nak thupi hina tel in chia ka hondampa.

MUH THEIH A HONGPAI GUIH DING: Laisiangthou in Jesu tuh chik lai peuh a hong pai guih thei ahih dan honhilh hi. Tanchinhoih Mathai 24;27 in Krist hongpai nawnna tuh khophia banga hi guihding chiin gen hi. Kilakna ah ‘Ngaiin, guta bangin ka hongpai hi, kiveng leh puan tengsa a om a hampha hi...’’(Kil 16:15) achih manin. Unau; Toupa tuakding in mansa in na om hiam ?. Krist in a nungzuite van a a paitouh sanlaiin, lungleng leh thawmhau de-du maiuh hi dingin ka gingta hi. Vanlam en a, a dakdak laiun Pathian Angel nih akiang uah hong kilak in ‘ nou Galili gam a mite aw, bang achia vanlam en a dakdak na hi ua ? van a apaitouh na muh bangun; Amah mah a hong kiknawn ding ahi’ (Nas 1:11) chihthu va gen hi. Toupa Jesu mit a muh theih ngeingei in ahi hongpai kik ding, huaihun chiangin gingtu leh gingtu hilou tenleng mit in a muchiat dingua, amah sunte (pierced) leh leitung a nam chih tengteng in a kahding uh chih tuh Laisiangthou hon sinsak dan ahi. Simtu it aw, Jesu Krist na mit mahmah toh na muh theih a hongpai nawnding chih ahi. Mansa in na omta hiam ?

Tuin atak i mu naikei a, khalam mit kia a i muh Jesun a khe in Oliv tang hon siksuk dinga, huchiin Olive tang tuh sim leh mal a kikhen in phaizang thupitak suakdingchiin Jawlnei Zakaria in gen hi (Zak 14;4). Krist a ginna kip neiten hondampa tuah hunding ngaklah takin ngak lellel uhi. Khovel a Han (grave) man tamna munpen a kigen tuh Olive tangbul chiin kigen uhi, mikhat kivui theihna alian tuh US dollar $ 25,000/-(India sum in ₹ 26 Lakhs val) manzou dia hisap ahi. Judate tuamun chitchiat a kivui atelna ziak uh bangdang hilou in, Oliv tangtung sika Jesu hong kumsuk chianga tuak masapen hihding lunggulh naziak achi uh. Unau it, Pathian belamnou’ sisan a sawpsiang miten zaw Toupa tuahkal a ngaklah tuntun uhi. Toupa na Pathian tuakdin mansa in na om hiam ?

KIPAH MAN PEDIA HONGPAI DING AHI: Jesu’n ‘Ngaiin, ka hongpai pah ding hi. Michih a thilhih bangzel ua piak dingin ka kiangah ka kipahman a om hi’ (Kil 22;12) achi nawn hi, a ban ah kei Alpha leh Omega abul leh atawp ka hi, chiin ahihna amah leh amah kigen hi. A omzia tuh a thuneihna tawp gen ahi, a khut a om michih kipahman ahawm hunchiangin koimah court hiam, koimah council hiam ah appeal leh complain theih ahikei ding hi. Michih in asep bangbang uh kipahman peding chih ahi. Pathian belamnou vaihawmna tutphah mai a na din chiangin, na thilhoih hih leh dinmun in hon siamtan kei ding a, ganta sisan inleng hon siamtan zoukei ding a, belamnou Krist sisan a sawpsiang na kia in hon siamtan theilel ding hi. ‘Hinna sing a honzot theihna ding uleh, kawngpi tawn a alut theihna ding un, a puan uh sawpsiangte tuh a hampha uhi (Kil 22;15)’ achih manin. Belamnou sisan a sawpsiang hih a poimoh ahi.

Ka lungsim ah ‘The Romanians tradition of the 40 crowns’ kichi hong suaka kon genbeh nuam hi. Romania communist sepaih-40te gingtu hoihtak ahi uh, amaute Rome kumpi Licinius lim mai a khukdin utlouh ziakin mat leh sawisak in a om ua. Himahleuh a ginna uh a tawpsan nuamkei uhi. Phalbi khovot petmah nuaiah Sevastia luitui ah, a ngongtan uh tumin a koih ua. Jesu a taisan ualeh lakkhiak ding, tuilum a kisilsak ding, meilum awisak ding leh promotion piak dingin a chiam uhi. Huchipiin leng amauteng mah Krist a dingkip dingin ki fuih sauhsauh uhi. Thil lamdang tak tungtuh hiai ahi, Pathian angel ten tua sepaih-40 te tungzawn chiat ah lallukhu teselsel (shining) tawiin hong kilak ua, lamdang nawn mahmah a kigen tuh tui honglum in vukkhalte tanpha tuisuak khop in lum kichi hi. Sepaih-40te a hing in a lakhia un, meiphualpi ah hallum in a vu-uh (ash) uh tua lui ah a pai uhi. Tuni tan Romania gamah sepaih-40 te minin March 9 observe den uh kichi hi.

Toupa’ gam nasem a i om laiin, bah leh chauh hunte na tuak hia ?, mihing lamah panpihtu bei kisak hun atam mahmah hi. Tuabang hunah lungkia a na om leh khukdin in thum in Bah leh ngui a ka om a, ‘Nang dia dawilawk mel ka puak chiang’n; Galdoute ding a manglukhu, Aw na bawl pen hon hilhthak zel in’ achih bangin. Khamuanna ngahding hi teh ! Tuni’n nang leng na lutung zawn ah sepaih-40te bangin lallukhu setheilou in hon ngak hi. Na khalam mit toh tua lallukhu se theilou enkawm in paizelin. Toupan hatna honpe ngeingei ding hi. Amen; hong paita in Toupa Jesu (Kil 22:20) chi theidingin na manta hia ?

THUKHITNA: Thukhitna dingin jawlnei Amos tungtawna sapna in zouleng i ut hi. Israel ten vualjawlna atang nasa mahmah ua, sah leng asah khomi petmah uh. Himahleh a hinkhua uah Pathian angkawm sannate ziakin Amos tungtawnin sapkik sawmin. Pathian in gawtna chi nga takin a delhzui hi. Kial leh tak, keuluatna, khaukhup hon, natna hiipi leh melma namsaute zangin delhzui mahleh, kik nuamlou uhi. Sapna khauh zawsem zangin sap a ngaita uhi. ‘Aw Israel, na tungah hichibang in ka hih ding: na tunga hiai ka hihding ziakin, Aw Israel, na Pathian tuakdingin mansa in om in (Amos 4:12)’ achi hi. A omzia tuh a kileh kikkei ualeh ‘pasal leh pasal aw le’ chihna piandeuh sapna khauh ahi. Tulai a i thansak thupuan bawlna ah. Na hichih khachih kei uleh ‘a moh na kipuak ding uh, na tung ua tung bangbang na khase theikei dinguh, bangmah na gen theikei dinguh’ chih pian kivau zuina toh kithuah sapna ahih manin. Sapna lauhuai tak ahi. Tulai huihnung vingvengte ziakin lunglenna leh thawmhau na chikhat lungsim ah hongtung in, vanlam ngaihna leh Pathian ngaihna gingtuten i neichiat uhi. A ni leh hunding theihsak hikei mahleng Krist hongpai kik nawn ngeingei ding chihtuh chiangsa ahi, sawtpi tel a halnawn kei dingchih hon ngaihtuah sak mahmah. Huaiziakin. Unau Toupa, na Pathian tuakding in mansa in na om hiam ? chih tuh i thukhitna ahi. Toupan hon vualjawl hen. Amen