KHOVEL HIIPI TOH KIZUI KIAL LEH TAK MABAN DING.
~ Rev. T Thangzasiam
THUMASA : 'Lungsim ngaihtuah a tawl chiangin, genkhiak zel a tawldam huai zaw hi. Nonna pawm uhia, pawmpih kei uhiam ahizong in. Ngaihdan kon luikhiak honna simsak dingin kon ngen masa hi'. Khovel in hiipi bangzah vei hiam ki tuakta hi; tuate 1). Black Death (1331-1353) ah mihing maktaduai 75-200 velsi a theih ahi a, a huaise pen a theih ahi. 2) Plague in Roman Empire.(0075-0200) ah mihing maktaduai 5-10 si in a vaihawmtu leengpa hialleng si hi. 3) Spanish Flu (1918-1919) ah mihing maktaduai 50-100 a si a. 4) European Plague (1361-1480) ah mihing maktaduai tampi a si ua, England- kia ahleng mihing 50% sizou kichi hi. 5) Plague Pandemic (1855) China akipan ah maktaduai 10 vel si in. 6) Asian Flu (1957-1958) leng China mah ah kimu masa in maktaduai -2 vel si uhi. 7). Covid-19 (2019-till date), Wuhan, China akipan a theih ahi a, mihing bangzah si a, hiipi lengin bangtan daihding chih theih ahi naikei hi. Hiai hii leng ten sihna mulkim huai taktak a tut banah, kial leh tak ziak asihna mulkim huaitak a ken tel ziakin, malam hunding toh kisai siamna biknei hikei mahleng lungsim a suakte kon gelhkhia ahipen mai hi:
COVID-19 KIAL DOUDIA KISAK KHOLHNA: Hiai natna mihing bangzah in sihpih laiding, bangtan a sawt hiai natna a omlai dia ? chih theihchet hikei mahleh, natna a beinung chiangin economy dinmun a siatding dante, khosakna hon suk khak dingdante i ngaihtuah chiangin, lung-ap huai chihlouh gending tam ki theilou hi. Gam tamtak ah expert committee te a phuankhia ua, nek leh dawn a maban ding ngaihtuah khawmna a neipanta uh. India ah state khenkhat ah kial dou dingin committee dinsuah pawl om uhi. Punjab in Planning Commission, Vice Chairman lui Mr. Montek Singh Alhluwalia chairman na nuai ah, expert committee dinkhia in Dr. Manmohan Singh. Ex-PM (Tu lel a AIMS a hospitalised) tuh over all Supervisor dingin guang uhi. India buh leh bal a vaktu Punjab, Haryana, Madhya Pradesh ichihte Bihar leh Jharkhand nasem tute (labourers) aki nga tangpi ahi uh, Bihar kia inleng state dang a kiloh maktaduai 2.5 vel sawlkhia uhi, hiai lou neituten a deihzah uh manpower muzou lou dia a om man un India maban ding muhkholh sa bangtan hiam hon pe thei hi. Lou neitu tamtakte a labour te uh paikik ziak in buhsang a tui tam poimoh louzaw pat (cotton) leh adangdang uangbawl zawksem tum pawl om uh kichi hi. Hiai state te akipan buh leh bal a pian keileh i gil a kial dia, i buaise dia, hiamgamna i maban ahikha ding hi.
TAWMGNGAIH NA; I NAM ETLAWMNA AHI: I pipute hun apan nam ki it theitak ihi uh, ankhing tuibuk kikhol tuahte ihi ua, neih leh lam thupi neikei mahleuh anteh bawkkhat lel zanga Itna sulangte ana hi uhi. Huai tuh i nam etlawmna ahi, huan tagah meithai i ki kankuah dante a etlawm a, koimah namdang lak ah hiai bang ki itna omtam lou hi. Ahia, Singtang dawn akipan khopi zaw deuh ah i pemlut ua, bangkim ah masawnna muhding a omta. Toupa hoihna ziak ahi. Himahleh, i nam etlawmna i genten awl a hon taisan hiaihiai ahita diam chih theihna mun om khasek hi. Tu khangthak hunah mimal dikna leh tanvou dingkia etna ziakin, kituahna in i nam taisanta ahih manin poi petmah hi. Poitak ahi.
Eilawi bang a Gospel mu hilou Karnataka a unau nihte nasep a thupi ngeimai !. Mr Tajammul Pasha leh Muzammil Pasha, Kolar a omten a gam uh ₹ 25 Lakhs a zuakin, gilkial dangtakte nekding ann a pia uhi, a thupi uh chihlouh gending a om tuankei hi. Dr. Shifa M. Mohammed . Pariyaram Medical College Hospital. Kerela a semnu tanchin leng a ngaihnuam petmah hi, Dubai sumdawng hausa Mr. Anus Mohammed toh March 29, 2020 a kitengdia bangkim gelfel sa himahleh, a pasal neih niding hongtun in moupuan man tamtak silhsangin, Corona veite etkolna puan PPE silhin a sepna hospital ward sung a om a tel zaw hi, a seppih ten moupuan hoihtak sang a PPE silh atelzawk tuh kipah pihthu gen sauhsauh mai uhi. Gospel tellou sapsap ding in thilnih i tak latten lungsim a luah in, chouna lianpi honpia hi.
I GAM A PIANGTE MAH PIBAWL HUNTA: Gam kilkawi tak a omte tanpha i patau chiat uh, chikchiang in natna in hon sukha dia, chikchiang in ann ka ngolkha dia chih ngaihtuahna ten nu leh pa lungsim a zou mahmah. Hiai bang hunin insak inkhangte, khotang leh saptuamte hoihna ziaka ngollou akihih manin kipah huai lua hi, Pathian pina toh i pal galkai ngei lametna ahi. Kong bangkim a ki toudelh zouloute ihi uh, i gam in revenue muhsuah a neikei a, i economy tuh service sector a kinga ahimai hi. Ni danglai bang a hakai khong peuh toh khosa thei ihih nawnlouh man in, mipi dam khosuah pihna dingin sorkar leh makaite panlak ding atam hi. Post covid-19 crisis ding roadmap gelsa bangbang a om dia ? sorkar zat manphat dansiam a poimoh a, agriculture leh horticulture department leh adangdangte toh plan gelkhawm a poimoh lua. I gam a lou haichi tuh hun, tulaitak (April-May vel) ahihman in, panlak hunlai tak ahikei maw !.
Loumun gamding omlou na chi hia ?. I kho hausa suanhuai taktak te tungtawn in nikum tulbek puah in buh leh bal, vaimim, bekan, nahtang etc tanpha chingdia ki chousuah a hun hi. Tuivai leh tuiliamte ziklum tamsem piangkhe dia panlak a, Kaihlam allu tanpha thonkhe zoudia ki chousuah tuh mahni ki toudelhna hoihtak hi ding hi. Upaten kialkum in ankam alimse achih uh bangin i gam a piangte nek theih vualjawlna ahi, I gam product te phatsiam poimoh in ka thei. Zogam apiang nahtang-um leh anteh louhing ten calcium a hauhdan leh sungna adia damna ahih dan bang, singthupi, singzual leh khangkhuh te khovel a perfume hoih pen ‘Laura Ashley No-1’ sang a namtui zaw ahihdan te, tuivai tengkol ten iron a hauhdan i gentam zoh chiangin value a neiding uhi. Lam tuamtuam ah bangchi dinkhosuah ding hiam chih zonsiam tuh damna poimoh tak ahi ding hi.
PHAT TUAK TUH PHAT UN: Khovel ah nam naupang tak himahleng, ei mite ki itna bang itna koiah imu dia ?. Haksatna i tuah hunin meithai tagah suansam thei dinmun a omte sorkar apan, pawl tuamtuam leh saptuam te a kipan relief kihawm zelte a thupi lua hi. Veng tuamtuam a inkuan khenkhat ten kou zaw kana hithei ta dih uh, kousang a buaizaw a omkha ding uh chia midang aneksik dante uh a thupi dan hon phawksak zel hi. Heutute kipiak zohna zahtak huai isa a, i elected te lahchu sem hoihpen hih kituhna ziakin gen neuhneuh om zel mahleh, bial pawlam tanpha a voters diaspora omte a kankuah dan uh phat thamching isa hi. Delhi CM in ka nasep in vote ka zongding achih bangin, a sem hoihte mipi'n mangngilh lou ding hi lel.
Covid-19 in pi leh pute hun a ki itna bang itna hon chawm hingthak nawn lametna honpia hi. Vangaitang a i mi leh sate leng niambik tuanlou ahih dan uh media ah muh in hong om hi. I singtang mipih khenkhat ten phaizang mite mehding tamtak a tolhlutte uh thiltung vangtak ahi. Kawng bangkim a i etton uh mizo tlawmngaihna media tungtawn a i muhsekte uh, pa khat in a vok vulhlai sehhawm a vengsung inn chih a kholsuak khawng, midang in a huan apan meh theih omteng veng mipi a piaksuak dante, singtang khuaten khopi lockdown nuai a omte mehding a tolhlutte uh, kho khat leh khat tengkol tanpha a ki thot tuah thu uh zak nuam hina e. Nam ki pumkhat ahi ua tagah meithaite adin khamuang huai mahmah ding hi.
THUKHITNA: Ngaihdan tamtak i gelhte ziakin samit huai hiam, Pathian muan zohlouh huai nonsa uhia ?. Huchi ahikei, Bible i etleh kumpite hun leh jawlneite hunlaiin kialpi tamvei tak tung chih kimu hi, mihingte khelhna ziak leh sa leh galziak bang, khokheeng leh natural calamities ichih khaukhup hon leh huihsia ziakte, gialpi leh vuahpi ziak khong ahitangpi hi. Ki ginlokna om manlou in Samari lockdown leh kialpi ah naktak in thuak mahleuh, Aigupta gam kialpi ah Joseph in long-term agricultural policy dettak semsuah man hi. kumpi Pharo in gam pumpi incharge din a koih a, a dinmun leh thuneihna tuh mahni ki sukthauna a zangmai louin, mipi ading sep na in zang hi. Joseph in gamsung a buh leh bal piang tenglak a 20% a kaikhawm a (Gen 41:34), kum-7 kial hongtun in sun khawmna buhbuk kongte hong in, gampumpi'n nekding a tasam kei uh. Huan *gamchih a mite buh leiding in Joseph kiangah a hongzel uh* (Gen 41:57) chih ahi. Joseph kum 30 lelmi tungtawnin Aigupta leh khovel hotkhiak in omta hi. Paunakte 29:18 ah “vision om louhna ah mite a mangthang uh” (KJV) chih a om hi. Pawl tampi om napi a maban ki makaih dingdan mumal omlou a, hongtung kha dandan a phut maituh a ngol huaideuh kei maw. Chinuam dan ihi.