KRISTIAN GAM LIMLANG
( Jakob 1: 22-25 )
By S.T. Ngaihte
Tuipi gal a pat Tanchinhoih I muhna uh kum 110 bang hitheita. Mihing khang suut dan in suut leng, khang nih(2) chih theih ding hita hi. Tanchinhoih ziak in khalam leh salam ah khantouhna nasatak in I muh phah uh hi. Tanchinhoih ziak in laizilna lam ah mi sangsang mah in I khangtou ua, Churachandpur district literacy 88.65% a tungzou hi. Hiai laisimna lam a khantouh na ziak in, singtang dawn a nekzonna taisan in khopi lam nekzonna ah I kinga zawta hi. I gam ah nekding I piangsak nawn kei ua, solkal pang bel in I khosa vekta uh hi. Sum leh pai, inn leh lou Lamka zang ah muh theih in a khang hulhul. Hiai toh kitawn in Saptuam leng muh theih in sum leh pai ah kum teng in khan lam a manoh hi. Solkal sum hong luanglutte ziak in I saptuam leng maban sawn thei a om ahi. Biak innte hoih deuhdeuh hi. Missioanary hunkhop kumteng phial in I sawl khiak beh thei hi. Kum teng in saptuam budget tamsem in masawn thei hi. Ei mission fields leh partnership a isepnate tungtawn in tanchinhoih puanzakna ah ma I sawn thei zel hi.
Chialpina, home crusade, khawmpite I et chiangin sahkhua ngaihsak lua I bang uh hi. Naupang leh piching Sunday school kai I tamthei mahmah uh hi. Pathian ni leh kiginni kikhop attendance a hoih mahmah lai. Zaan dang kikhopnate nekzawnna kikhatlouh ziak in tamzoulou leng hithei hi. Bangpeuh programs-social leh politics ineihte, inn thak, van thak leh neih leh lam thak I neihte uh Pathian kia’h I laan thei lai uh hi. Zingkal I thoh leh lup chiang bang, ann nek ding chiang bangin thumna I ngaipoimoh ua, practice lou ki-om lou phial ding ahi. Huan ah, niteng a inn sungkuan a Pathian biak khawmna neithei hunkhop ki-om lai ding hi. Sawm-a-khat regular tak a pia leng hunkhop ki-om ding hi. Thohlawm, Missioanry box, Biak inn lamna ding a kiphal mahmah mi tampi ki-om hi.
Hiai bang a muh theih a masawnna salam leh saptuam lam a I neih lai in, lungkham huaitak in, tanchinhoih in mimal, inn sungkuan, khotang leh politics vai ah mun nei nawn lou a diam chih theih in omta hi. Saptuam ngaihsak tengteng tanchinhoih in a hon phuut bang a, tanchinhoih hinpihte hileng, I gam hiai dinmun ah a om diam? chih kidotna poimoh tak a hi. Kristian I hihna, kilim bawlbawl kihita hilou hiam, chih theih ding khop in I omta hi. Kristian kilim bawl I hihna hon taklangtu limlang (mirror) tamlou en ni :
Limlang – 1 : Zu leh sa leh khamtheih hihna gam ahi.
Ni dang in zu dawn leh khamtheih hihte’n mi muh khak ding kiveng ua, a guk a gal in ne in dawn uh hi. Tuchiang in poisakna om nawn lou in lampi zul peuh, mun lai li peuh leh a utna na uah ah hihta uh hi. Hiai in hon etsak ahihleh, zu leh sa leh khamtheih a nuamtal mi pung deuhdeuh, inn sungkuan hiai khelhna in a suk khak tam deuhdeuh. Huaiziak a hiai bang khelhna a milip kingeina seh deuhdeuh, a hihlou te’n leng poisakpih zou nawnlou. Sia leh pha theihna leng hon khoih kha zou nawnlou chihna ahi. Sanggam, innkuanpih, ta nau laina hiai bang khelhna hih zong sang I neih vek phial man ua, kimu mun lua in, kingei naseh kihimai ahi. Thil lamdang hilou hong suak mai mah ahi. Khelhna na ngawn in leng lungtang nasak zoulou Kristian kihita.
Limlang - 2 : Election sianthou louhna gam ahi.
Kristian kilim bawl I hihna uh election chiang in chiang mahmah hi. Vote zuak kitam mahmah ding hi. Langtang a vote khat hiai zah man chih hilou a, vote piakna dia Candidate te lak a, sum ngen a kipei hunkhop om. Candidate te’n vote lam et ziak a sum leh pai, nek leh taak a azawl uh om ding. Volunteerte zang a, thagum a vote khiak, a mi omloute vote khiak sak, dam nawnloute vote khiak sak, vote mun nih/thum a nei, booth capture, adg.adg. tampi om ding. Poisakna neilou Kristiante ihi.
Saptuam election vai ah leng mit siip huai pipi hun om hi. Beh pai, vote campaign pian bawl khawng om thei mawk hi. Pharisai Kristian ihihna ahi.
Limlang - 3 : Development/Contract nna hoihtak a seplouhna gam ahi.
Solkal development nna sepna tuamtuamte a quality compromise petmah chih muh theih in om hi. Bangziak in I chih leh sawt daihlou, se baihthei lua uh. PMGSY lampi bawlna ah. Pucca road bawlna ah. Lei bawlna ah. Nulla bawlna ah. Govt. building bawlna leh adg.adg. Nna sep himhim a semtu in a mah mimal lawk tam theihna dia nna sepna gam ahi. Zulhzau leh gin omlou Krstian ihihna ahi.
Limlang - 4 : Mipite tanvou neksiakna gam ahi.
Nek ding tak ding solkal a pat hawm khiakna ah a mu dingte’n mu lou uh. A mulou ding te’n mu. A mu dia kilawm a mu sunsun in a muh ding zah mulou. Koi hiam khat a heikoi in sum suah. Mi tanvou leh hamphat na laksak poisak louh na uang mahmah hi, chileng kikhial lou ding hi. Kristian din mun hon phoulangtu ahi. PDS, Mid-day meal leh Job Card bang ah leng diktatna kisam mahmah maithei hi. Duham Kristian ihihna ahi.
Limlang – 5 : Income certificate diklou a Student Scholarship muhna gam ahi.
I tate’n scholarship a mu theih na ding un, income certificate dik loupi a la tamtak om a dia tuat ahi. Nu leh pate solkal nna sem hinapi a louna sem kichi mawkmawk hunkhop ki-om hi. Sum kawlvei mi, I tu leh tate’n scholarship/stipend a muh theih na ding ua, income certificate diklou tak a la khiak nag am ahi. Income certificate I lak dan a louna sem taktak hih khak ding leng lauh huai hi. Diktatna neilou Kristian ihihna ahi.
Limlang – 6 : Solkal nna sem hinapi a sem lou a, mi dang goihna gam ahi.
Solkal in a phal a, dan toh kituak a mi guai ihihleh, thil diklou hih ihikei. Huai hilou a, a guk a gal a, solkal theih louh a, sepna mun a heutute toh kithutuak a, mi sem sak in, loh lala ihih leh, Jesu nungzui ihihna compromise ihi chihna ahi. Thohlawm leh sawm-a-khat bang pehoih zozen. Thadah leh khemhat Kristian ihihna ahi.
Limlang – 7 : Office kai ginatlouhna gam ahi.
Solkal nna sem hingal a office kai peih lou. Office nna sem peih lou. Office a huntak a tunglou. Pute thu leng mang lou. Pute mit siip vulvul a om. Saptuam leh Society a, nopni dahni bang a mizat taak leh phatuam mahmah hithep thup. Committee neihna bang ah regular mahmah zel. Gin omlou Kristian ihihna ahi.
Limlang – 8 : Thuneih hih kituhna gam ahi.
Thuneih hih ut ziak a vai hawmkhawm theilou, factions, groupism leh thuneihna kituhna gam ah I omta hi. Angmasial, kiniam khiak ding tuam omlou. Pawlpi kikhen, mipi kina sak, kikeek mah leh, kei President / Chairman / Secretary, adg. adg ka hih nakleh chi a, kisuanglah hetlou a, hihna mun a tu liu liau mai. Mipi hamhaih in masawn thei kei leh leng, poisak hetlouhna gam a hita. Hiai in hon gen tuh, Kristian hihna zediktak(traits) I neikei uh chihna ahi. Angmasial Kristian ihihna ahi.
Limlang – 9 : Nekguk leh golh guk tamna gam ahi.
State solkal kham/nna himhim sum golh guk louh a muh ding om nawnlou chih theih phial hita. Ei mah leng a petu ihih keileh, a latu mah kihi. Contract bill delhna dia, sum piak ngai. Mi’n sum a hon piak kei leh, bill pass thei mawngmawng lou. Bill delh te’n lah nna diktak a seplouh ma’n a bill diklou bawl a muh teitei tum zawmah. Solkal nna semte’n I mohpuakna toh kisai a nna I sepna ah, mi’n kipahman sum hon piak chiang ua, kipahman thilpiak chi a, kisiamtan hunkhop ki-om. Kipahman muh, kipahman lam en a, eina sep ding ngeingei sem hih khak ding lauh huai hi. Kipahman ho’n piak khak louh chiang bang ua, ngui leh mai mual a om ki-om kha ding ahi. Ei nna ginom tak a sem dia Solkal in kha teng a, hauhsakna tham ding bel hilou, khaloh hon pia hi. Sum delh Kristian ihihna ahi.
Limlang -10 : Nekzawnna diklou.
Govt. in a khap, dan in a phallouh thei napi a nezong mi tamtak ki-om hi. Gansa kap, kani(ganja) lou bawl, zu leh khamtheih zuak a khosa tamtak ki-om hi. Nekzonna siangthou a Pathian muangzoulou Kristiate ihihna.
Nang koi limlang in na mel diktak hon kimu sak ?
Hiai a tung kipia limlangte’n tanchinhoih I muh nung kum 110 chin hun ah, I gam sunga mimal leh khotang dinmun diktak hon taklangtu ahi. Limlang bangzah ah na kimu thei a? Na sanggam, u leh naute koi limlang ah a kimuthei ding ua? Na saptuampihte koi limlang ah a kimu thei ding ua? Ut in ut kei lechin, Kristian na hihna bangbang in nang mimal hinkhua hon sukha dia, na inn sungkuan hon sukha dia, na inn sak inn khang hon sukha dia, na saptuam leh na khawtang hon sukha dia, na tu leh tate hon sukha dia, khangsawn-khangsawn tan in hon sukha ding hi. NANG leh KEI, mimal chiat kivel thak in, kibawl hoih leng, inn sungkuan, saptuam leh khotang hong hoih lel ding hi. Kibawl hoih thei chiat ding in Pathian in hon vualzawl hen aw.
Jakob 1 : 22-25 (ESV) “But be doers of the word, and not hearers only, deceiving yourselves. For if anyone is a hearer of the word and not a doer, he is like a man who looks intently at his natural face in a mirror. For he looks at himself and goes away and at once forgets what he was like. But the one who looks into the perfect law, the law of liberty, and perseveres, being no hearer who forgets but a doer who acts, he will be blessed in his doing.”
Gelhtu : S.T.Ngaihte