ANGEL TE'N BELAM CHINGTE A VEHNA ZIAK UH
~ Donang Buansing
Jesu pian laiin Belamchingte' kiang vansawltakte va kilaak uhi chih
Luke 2:8-20 ah imu hi.
Bangziak a hiai belamching mimawl, mizawng leh Iaitheiloute lak a kihil kha a diam aw? Hiai belamchingte ichih chiang in innmun a om le a hi kei ua, gamlak a khosa uh a hi, amau nam niam leh mawl deuh, pilna sangtak nei leng ahikei uh. Belamching lak a kigen minthang David bang le a kipuahlouh ziak mah in asam te kiil lingleng leh a unau lak uah le a na tuantual deuh abang hi, himahleh, amaute Pathian thu ngaina mahmah te ahi uh hi.Jesu pian lai a belamchingte leng a hong paiding, a maute Tanpa ding ngak in om uh ahiding.
Tanpa ngak a omte lak ah mibangzahhiam i ensuk ding.
1. Siampu Simeon (Lk 2:25-35) leh Zawlnei Anna (Lk 2:36-38) amaute laisiam ahi ua Laisiangthou simna ua pan in amaute'n Tanpa hong pian ding thu a na theithei uhi. Khangthu in Simeon dan siam minthang, Gamaliel’ pa Hillel, tapa ahi chi hi. Ama’n “Israelte’ Khamuanpa” ding na ngak hi.
2. Suahlam mipilte (Mt. 2:1-12) te'n a Aksi et in amuthei uh hi.Suahlam Mipilte’n, Jerusalem suahlam gam Assuria leh Babulon apan Suria gamkeu kantan a aksi a muh uh zui a, Jerusalem zuan a hong pai uh hihtuak hi.Huaizoh in Bethlehem tanpha zui thei uhi.
3. Belamchingte ahih ualeh bel amau siamna tan a tung a i gente bangin pil zoulou ahi ding ua vansawltak tuh a mit mahmah ua muh theih ding in ahong kilang hi.
Belamching Pathian gingtate hi ding un uphuai hi. Amaute’n hong pai ding Messiah/Tanpa tungtawn a Pathian na gingta khin uh hi ding hi. Vansawltak thugen a pompah uh hi. “Tun ah Bethlehem khaw pha in pai lehang, Toupa’n thu a hon hilh a hong tung i en ding uh” kichi pah thei uhi (Lk 2:15). Amau te'n ginlelhna leh buaina nei hetlou in lamzang tak in Bethlehem zuan in naih vengveng ua Naungek Jesu va mupah chet thei uhi.
Thukhitna:
Siampu, Zawlnei, Mipilte leh Belamchingte’n bel, naungek va mu uh, a tanchin genthang uh, a za peuh in lamdang sa uh, vansawltak gen azak bang un a taktak a a vamuh ziak un kipak a Pathian phat leh pahtawi uh hi.
Mipil te ahausa ua Gift bang a pia ua belamching te'n bel gift piak chih akimu kei, Pathian in i hihtheih zahzah hon ngiat hilel ahi. I vek a ihihtheih i muhpa gen khiat i moh puakna ahi. Belamchingte’n, Hondampa piang mit a vamu, lungtang a Hondampa a sang, kipaktak a kiknawn, hampha lawtel uhi.
Khristmas zang tengteng amaute bang vek lehang ut-huai na mai zen e!
Simtute tengteng Toupan honvualzawl chiat hen!
KHRISTMAS MUAK NUAM