Zosuante Mainawt
By Dr Sanga R Laingek
Thumapi:
Khangthu sui mite gendan in "Zho or Zo" kichi mihing khat om a, asuan-a-paakte tengteng 'Zosuan' chi a chepteh in om uhi. 'Zohnahthlak' achi lawi zong om hi. China gamsung mun khat ah akigen mangmoh 'Zho Dynasty' kichi hun sawtpi a ana om ahih toh kiton in Kumpi khat, Zho/Zo kichi in vaihawm a, asuan-le-paakte in 1040 – 256 BC kum 800 sung vel bang vaihawm ahi uh chih Chinese History Digest ah chepteh in om hi. Tua hunlai in Zosuante in bangchibang laimal ana mang uh hi hiam chih kitel lou suak hi.
'Western Zho Dynasty' chih leng aom lai hi (Source: http://www.chinesehistorydigest.com/zhoudynasty.html).
Myanmar (Burma) gamsung ah Zosuante hong kithehzaak in, China Kumpi in 'Great Wall of China' kichi kulh-baang thupitak abawl lai a nasemtu diing a Zosuante ahahzat luat ziak a hong lalkhia uh ahi chih tangthu paisawn, tunitan a akigen mang thei lou khat zong om hi. Mihing khangthu pen agelhthoh a om lou pawl zong tampi, akhang-a-khang a kipesawn (cultural & traditional history) om ahihman in, bangtan a kingakna tham hi a, adik mah hi hiam chih bel kitheichian ngel lou hunkhop om ngei di'n zong uphuai hi. Adik leng tampi mah om veve diing in uphuai hi.
Paite, Hmar, Thadou, Vaiphei, Ralte, Guite, Sukte leh adang kiminlohna tuamtuam tampi tuni a nambing, beh-le-phung min a 'Tribe Recognition Orders, 1950 & 1956' India-Phualpi Sorkar in agelhthoh a cheptehna abawlnung siah mituam ahihke'h zaat tuam bang mai a kikoihna uang tektek in, "Kigawmkiik-Nawnna Nasep" (Re-Unification Movement) Zosuante lak ah kum 1960s lak akipan tunitan awl-awl in paitou zel mahleh deih bangtak a lohching nai lou asuak lai hi. Pau-le-ham tuam zekzek mahleh suangtu khat, Tuunsung khat pan piang hi ngeingei hangh e...!!
Zosuante Neekzonna:
Tanglai a Zonsuante neekzonna pipen ahihleh kawl a nisuak sim a leikhuat a buh-le-bal liangkou a pua in, thousi-thouvai, azu-a-ham thuak a Loukhoh a neek zong kihidan ahi. Singtangpa Lou-Neihdan ngeina pen Telsui mite (Scientists) in ngenteltak a sui detdet a, gah tamzaw seem ngah ahih theihna diing a malatu diing Zosuante lak ah kuamah om nai lou lailai asuak hi. Tua ahihman in, tuailai siamsin mite kihanchiam thak le'ng chi in ka hon hasuan nuam hi. Laizil lel laite'n Phualpi Sorkar, Private Company, BPO., & State Sorkar a sepna ngahtheihna diing kia a laizil maw...ahihke'h, mahni mimal kia hi mai lou a, ih mihinpihte baan ah gam-le-nam a diing a neekzonna taktak diing a laizil Zosuante lak ah kua-a-om de aw...??
Neekzonna toh kisai siamna tuambiik nei Zosuante lak ah poimoh lua ahihman in, tulel a mun tuam leh gam tuam a siamsin tuailaite lung geel saupi nei in, Gullu-mual hauhsakna chihbang lungsim a ngaihsutna neikawm in lai hon zil chiat un: Zosuante teenna Zogam mual kitawi, lum-le-vot nuam mahmah lai hiven; Zo-siktui luang deldel, Zo-huihkhi siang nung hiauhiau lak a neekzonna, ih pu-le-pate hunlai akipan tunitan Singtangpa' Lou-neihdan ngeina pen kikhek nai lou, tang-a-tuan a tukawl tawi a thelnah huaikhawm a, mangtom, Lou-Buuk bawl, vuahzu-nisa nuai ah loukhou ngeuhngeuh mai, Buh laak hun chiang a khamkhop nasan piang lou zawmah lai: Agricultural Scientists khat-le-nih beek om le'ng (Manipur context ah) Lou-Neihna lam ah khantouhna thupitak aom lamethuai hi.
Gam-leitang hauhsakna leh leitung-leinuai hauhsaknate tunung chiang a khangsawn-nawnsawn, mi zatamte khantouhna diing a leigou kiselgu tampitak Zosuante kitunding theihna diing a laisiam mipil asawngbawltu diing tulel a laizil tuailaite hong kisiak mahmah un chi in i hasuan hi. Zosuante mainawt a kalsaang tawi in hanchiam tek le'ng zuun louh Zosuante tuallenna, Zogam nuam khangthakte'n hon zuunta diing uhi. Mizoram South, Manipur Barak Valley & Thanlon Sub-Division huapsung a leinuai hauhsakna, Thautui leh Myanmar-Chin State huapsung Gullumual Suangmantam pholhsuah ahih hun chiang in Zo Lia-le-Taang mizatate nunnuam Ngabang leeng in Zosuante Kigawmnawnna (Re-Unification Movement) simthu tuang hong tungta diing lah ahi ngal a...!!
Suahlam Galdot Thilgeel (Look East Policy) ahihke'h Suahlam Thilhih (Act East) leitung gam hausa leh Tumlam gamte nasan in mitsuanpen a aneih lai un, Zosuante in bang lung-geel i nei a...?? Vualzawlna kiningching leh leigou aneitu i biak, Van Pasian hing in i tan hunchiat vualzawlna hon pethei ahihman in Amah thupiakte ahibang geih in zui peuh le'ng Aman ahuntak ah hon domkang ngei diing lah ahi sin ngal a. Tuate tengteng atak ahong suahkhiak theihna diing in unaute kituak diamdiam a omkhawm naakhoih lua leh nuam mahmah ahihchiang in khat-le-khat itna khauhual in kigakkhawm le'ng i chi ahi. Pawlpi lam heutute, khotang vai a heutute, saptuam vai a heutute, tuailai, nungak leh tangvalte baan ah Tribal Movement lam a heutute, simlei vai a amadawk leh mohpuakna nei kuapeuh lungpi geel hun ahita hi.
Zosuante Mahni Deihtelna:
SimleiVai (Politics) toh kisai atuam kivaihawmna lunggulh a Zosuante in 1960s lak vel akipan helna thupitak India, Myanmar (Burma) & Chittagong Hill Tracts tanpha asuk-a-tung a tawnsuak in Zalenna sualkhawm in nungak leh tangval hunkhop in gamnuai beel in thauvui-thautang masuan kawmkawm in ahinna nasan uh ana taanta mahle uh tunitan in mahni deihtelna (self determination) bangmah om thei tuan lou hi. Khovel vaihawmna paizia kikhek zungzung ahihna ah tulai hun a di'n bel MipiVaihawmna (Democracy) mah leitung buppi ah tallangpen ahihman in Zosuante tengteng pankhawm petmah kisam kholdiak hi. Mahatma Gandhi thilgeel thagum-thatang hatna pen hi lou, 'Non-violence Movement' achih mah Zosuante suahtakna diing in kuitungpen di'n uphuai hi.
Khat-le-khat, pau-le-ham tuam zekzek ziak a unau meelhaih hun hong tung zel mahleh, kum zabi 21-na (21st Century) ah kituaklut hialta ahihna ah, tu hun pen Zosuante a diing a hun manpha leh hun poimoh ahihlam i phawk semsem a, mailam hun galdot a kalsuan zia ah pilvanhuai tampi om hi. Ih pauzat tuam zek mahleh suangtu khat, ih pu uh, 'Zo'mah hi chih i pomsiam chiat aleh bel kituah louhna diing himhim om lou hi in ka ngaihsun hi. Suangtu khat i hihlam kiphawk lou a i om nilouh aleh midang melmakte siikden a om tawntung diing hi hangh...!! Huaiziak in, Zomi-Mizo-Chin-Kuki leh adang tampite 'Zosuan' i hi chih theihsiam hun lua petmah hi. SimleiVai a suahtakna leh Zalenna sualkhawm a Zosuante Mainawt hun takzet ahi chih aneu-alian in pomsiam a kiptak a leenden diing in i kihasuan hi. Kim-le-kiang a melmakte SimleiVai paizia, abiiktak in Manipur gamsung kivaihawmna in Singtang mite a diing a hoihlam saang a siatlam nawtzaw ahihdan michih in i theichiang hun tawkta un gintakhuai hi.
Pangkhawm a kalsuan khat a mailam saupi muhkholhna toh Zosuante in Mainawt zel peuhmah le'ng mahni deihtelna dungzui a atuam kivaihawmna chikhat bang hiam beek kingah thei diing hi. Tua diing in Nam makaite leh Pawlpi tuamtuam a makaite lungsim munkhat a luankhawm theih kisam masa hi. I deih leh lunggulh pen (common issue) bang hi hiam chih leh apilpi a i melma (common enemy) bang hi a, kua hi hiam chih kiteltak a theihna leh theihkakna neih teitei diing kisam hi. Ei-le-ei kal ah thil bang hiam neuhneuh bel aom thei mah hi chih theisiam kawmkawm a zapi huap leh apilpi a hon khoihkha thei thil poimohte pen sualkhawm diing ahihlai a, ei-le-ei kal a kihazatna leh kihuatna akhanlet chiang in buaina nasatak maituah thei gige dinmun ah om chiat i hi chih mangngilh louh ahoih hi. Kihazatna in thangpaihna asuang a, thangpaihna in khelhna ah mite apilut naknak sek hi.
Atuam Kivaihawmna:
India Daan Bupi dungzui a gen in atuam kivaihawmna chithum in akhentheih diing hi – (1) Independent Country (2) Statehood (3) Union Territory. Hiai omzia bel India pen Independent gambung khat ahi a, India gamsung pumpi sehkhen - States 29 om a, Union Territories 7 tulel in om hi. Indian Union sung ah Zosuante'n sehkhen khat, Mizoram State kichi nei uhi. Nagate'n zong India gam sehkhen khat, Nagaland State kichi nei uhi. Mizoram State pawlam ah Zosuante hun khop om uh ahihman in amaute SimleiVai dinmun (Political Status) bang hi hiam chih ngaihsuthuai asuak petmah hi. Nagaland State pawlam a om Nagate SimleiVai dinmun (Political Status) ahihleh Indo-Naga Frame-work Agreement August 3, 2015 ni a letme (signed), suaikai uh ahihman in omzia neithei asuak uhi.
Manipur State sung a teeng, Zosuante SimleiVai dinmun (Political Status) delthawng ahihlam mipiching kuapeuh in theihna bangtan hiam ah nei chiat hinapi in ngaihdan kibang lou leh deihdan tuam zekzek om hihtuak hi.
SimleiVai damsakna detdou deih a lunggulh Nam Heutute, Pawlpi Heutute, Saptuam Heutute, Innpi Heutute, Khotang Heutute (NGOs) leh Pawl tuamtuam a Heutute baan ah Mipil-le-siam (Intellectuals) chihte tengteng kibilsih hun ahi chih athak a phawk chiat a; tutkhawm kul leh poimoh petmah ahihman in Pawlpi lam a mohpuakna nei leh heutute in lungpi geel in hon huaihot theile uh phatuam petmah diing in uphuai hi. Lungsim tawng a ngaihsutna thuktak toh chihtakna leh awlmohna taktak anei mite thu kikupkhawm hunlaitak ahi hi. SimleiVai Lamlahna (Political Road-Map) Zosuante'n bawlkhiak diing kisam hi. SimleiVai Lamlahna kichian zuih diing bawlkhit ahih chiang in mipite toh pangkhawm a amadawk deuh diing mi bangzah hiam, mahni mimal sia-le-pha theihna siang zangthei ngen sehkhiak hileh hoih mahmah di'n uphuai hi.
Zosuante SimleiVai Damsakna Detdou (Sustainable Political Solution) tu hun a geeldan siam a, pilvangtak a mainawt hun in hon phanoh ahihman in Salpha tuailai mi 9 (kua) luanghawm, Lamka Damdawi Inn Siluang koihna mun (Mortuary) a om laite lungsim a theikawm in kalsuan zia ah Guulbang a pil a, Vakhubang a nunnem in, milip a di'a phatuam, kivaihawmna tuam bang hiam khat puaksuah theih om ngei diing in lamethuai i sa hi.
Thukhupna:
Leitung maikaih a Zosuante Kigawmnawnna simthu chik chia'n tuang hong tung diing hiam? UN Declaration, 2007 dungzui in gawmna simthu zalmang lel hi lou in tak simthu suakthei takpi hi chih mengmuhna anei mite lungnuam khinkhian in Zosuante Mainawt zel hi hangh...!
1. Tuni a laizil lellel, tuailai, nungak-tangvalte hong kisiak petmah un, adetdou setdet theih diing i minam in thilgeel thupi poimoh lua hi hangh. Nu-tha, pa-tha kheekthei diing in aw.
2. Laisiam mite (Scholars), mipilte (Intellectuals) kuapeuh in siamna leh pilna Pasian in apiak, vualzawlna angah mite in it lou leh chiil lou a ih minam a diing a thohkhawm di'n i kichial petmah hi. Huchibang mite zatdan i siam hunhun in i minam chidam diing a, masawn in khangtou thei diing hi.
3. Neekzonna toh kisai Zosuante in 'Zohuan' (Farming) pibawl kisam takpi hi. Suahlam Galdot Thilgeel & Suahlam Thilhih (Look East Policy & Act East) in hon pumtuam hun hong tungpah diing ahihman in Zosuante nasatak a kisakkholhna kichian neih hun lua hita hi.
4. SimleiVai Lamlahna (Political RoadMap) bawlkhe diing in ih Pawlpi muan mahmah leh misiam, mipilte toh kithuah a bawl diing in thukup hiai laigelh tungtawn in i bawl nuam hi. Mipite lammang lou a, lampi zuih diing kichian bawlkhit ahih chiang in michih pangkhawm a Zosuante Mainawt a kalsuan ziahziah diing in kipumkhatna kembit kawm in seinou vual lungtuakte'n machiang suankhawm diing hi hangh...!!
5. Manipur Sorkar nuai ah Singtang mipite'n bangmah lamet diing kinei mahmah lou asuak hi. Tua ahihman in khangsawn nawnsawnte khualna beek a 'The 3 Anti-Tribal Bills' sualkhawmtou zel a, GamleiVai Damsakna (Political Solution) bang hiam aom masiah tawp lou a pangden diing in kuapeuh i kihasuan thakthak nuam hi.Tunitan District Hospital Mortuary ah Salphate Luanghawm 9 kikoih lailai hi.
6. Vaihawmna Innpi (State Assembly) a mipi ai-oh Palaite leh tunung chiang a Palai hong pangtou zel diing mite Teelna (Election) hun hong tunteng a mipite ih pilvan mahmah uh kisam hi. Mimal deihtelna i neih pen mimal hamphatna omsun ahihman in kinopneh hiam laaksuhsak mai lou a; Daan thei leh pianken a Gam-le-Nam itna anei sitset mite mah mipite in i kiphatmoh uh ahi hi.
7. Pilsinna (Awareness) Hunzeek atam theipen Zosuante teenna munchih-mualchih ah Pawlpite, Innpite leh Pawl tuamtuam kithuzaak a vaisai poimoh lua petmah ahi hi. Tua diing in kihanchiam thakthei chiat le'ng deihhuai i sak luat ziak in Nam Heutute kiang ah thukup hiai laigelh tungtawn in i bawl ngal bok hi.
8. All Political Parties: "The 3 Anti-Tribal Bills Passed" a om pen Phualpi Sorkar ah lemsakpihna (assent) kintak a piak ahihna di'a akisaipih thuneitute kiang ah nohna piak diing ahi chi in Chief Minister makaihna nuai ah May 09, 2016 ni in thupukna bawl uhi. May 16, 2016 ni a Palaite'n Delhi zuan a zin diing chih himahleh, ahun suansau in om phot hi. Ani diing kitheichian nai lou hi.
9. Hill Areas Committee members (i.e., The 20 Tribal MLAs NPF MLAs chihlouh siah) hihkhelh nihveina: All Political Parties thupukna mulkimhuai - GoI in 3 Bills 'assent' apiak theihna diing a Delhi ah Palai sawl diing: Tribal MLAs-te ziak a Manipur Tribal mipite in hichituk a buaina leh haksatna kiphukha ahi; haksatna leh buaina thupizaw seem mailam ah om lai ahi chih hiai All Political Parties Thupukna in taklangh hi.
10. 'The 3 Anti-Tribal Bills Passed' thu toh kisai Manipur State Sorkar hihkhelh ahih toh kiton-ton in Manipur Hill Areas Committee Members mohna ahi chih achiang huntawk mahmah mai hi. Huaiziak in, Zosuante Mainawt in ngatnalam kichiantak neih hun lua hi. Koilam nga a pai diing - Mallam maw, Simlam maw ahihke'h tua omdan lel a lungkim diing maw...?? Khangsawn nawnsawnte khualna beek in ih mit uh keuhsak ve ni aw: Lungtuak simthu suutkhawm in, suahtakna leh zalenna sual in Kigawmkiikna simthu mah khaubang suut in mainawt dih ve ni...!!