KITELPINA ZOH HINAWNTA: OUTER & INNER MANIPUR
~ Dr. R. Sanga

Hiai thugelhtu in mimal kua hiam khat demna leh gensiatna a agelh ahi kei;
thil paidan tangpi amuhdan leh awlmoh-le-poimoh a sak thute lak a
tawmchik lel hon gelh ahizaw chih a pulak masa hi.

Thumapi:
    India in Independent August 15, 1947 a angah nung Kitelpina a sawm-le-gukna (the 16th Lok Sabha Parliamentary Constituency Election, 2014) Outer & Inner Manipur ah April 09 & 17, 2014 ni in akizui in kinei a; a hoih-le-hoih lou kizahzen in hiai, Election toh kisai a sum hawm/hawm lou chih vel hun paisate a kitelna mahbang in tutung in zong gen-le-sak neuhneuh atam mahmah hi. ‘Candidate’ tuamtuam, sum hau leh  ahau lou deuh bel aom uh agintakhuai hi. Sum tamtak beisak leh tawm deuh beisak leng aom ngei diing uh chih mipi ngaihtuahna ah bel a omsa ahi bok hi. Huchibang zel in Manipur in MP tulaitak in hau mahmah lel hi. Outer & Inner (Pawsiah & Sunglaitang) Manipur ah telching a om diing khat tuak lel hinapi’n MP ching diing a kikoih Outer Manipur ah mi thum aom lai in, Inner Manipur ah leng mi thum-le-li bang om uhi. Akigawm in tulaitak a Manipur in MP guk/sagih kinei chihna suak  hi. Mihing kuapeuh in “Lametna” kihinpih chiat ahihna ah ‘Vote Counting’ akineih masiah lungsim nuamtak a om chiat uh ahihman in amaute a di’n hoih veve hi.

Thudik Geen Leh Sazang Kaap A Vaal:
    Mipi tamzawte pen mahni mimal deihtelna leh sia-le-pha theihna zangthei dukdak lou a omna khovel ah kikhosa ahihman in; “Thudik Geen Leh Sazang Kaap A Vaal” chih Paunak i pu-le-pate’n ana neihsa pen uh dik toutou lai diing abang maimah hi…! Kitelna toh kisai mun tamtak ah ‘Booth-Captured’ chih thawmging atam petmah hi. Thagum leh Sum thahatna zang a kibeihna kal ah akipak toh adah toh kizahzen a om in, kuate hiam kipaktak a aom lai un, midang kuate hiam dah petmah a om uh ahihman in gen-le-sak, thu tuamtuam tam mahmah lel hi. ‘Indian Political System’ pen Independent angahnung ‘Kitelna’ aom peuhmah chiang in phunchiakna in tunitan zuitouden lai hi. Sabiakna toh kisai Hinduism, Muslim leh Christianity hi in adang dang hitaleh, ettontaak a khosa mahmah om lou, diktatna himhim om lou, kinelhsiahna leh kineksiatna gam ah kikhosa ahi chih kitel mahmah hi. A dik, a dik lou chih himhim lungtang a gelpha lou; mahni mimal deihpen telching a aom theihna diing ahih photleh hihsuk miahmiah mai chihdan a i khovel Electoral-Politics uh pai zenhouh ahih chiang in: Sum a pau chiang a Thudik daai geih zel…. Mailam hun ah MP/MLA/MDC/VA Election khat peuhpeuh ahong omnawn chiang a – “Bangchita Diing…??”  
      Mipi deihtelna dungzui a diktak a ‘Vote’ kikhia hitazenleh kua pen aching diam maw? Aching diing a gintak louh pentak houh hong ching thepthup diing zong hi khamoh lou diing hi. Nang leh kei mimal in i bawlhoih zohvual ahi kei chi in na suangtuah ahi mai thei, Ke’n bel abawldik theihdan lampi om ngei diing in ka gingta lailai hi. Tu hun a akip-a-kawi a genseng ahi kei diing a; himahleh abul pan phot peuhmah le’ng:
Khatna ah: Innsung-pa chiat in mahni mimal Innsung ah Diktatna uang geen in, dik loutak a vualzohna pen Pasian deihdan kalh ahihdan leh kisaktheihna leh hazatna anei mite Pasian in dou a, mi kingainiamte tawisang ahihdan thu bulphuh a nei in naktak in pan lachiat le’ng azia om diing hi lou hiam…!  
Nihna ah: Electronic/Print Media leh Public Awareness Campaign/Program baan ah Facebook chihte khawng ah nasatak in Thudik tangkoupih in, Diktatna in Nam tawisang ahihdan uangtak a puangzaak in ‘Chialpina’ nei peuhmah le’ng khangthakte lungtang leh khuaksung ah a chii kituhkip henla, mailam hun ah phatuam ngei di’n ka gingta bilbel hi. Huchibang hun ahong tun chiang in bel “Thudik Geen Leh Sazang Kaap Vaalnawn Lou Diing Uh Ahi.”   
Thumna ah: Zuaugen tawpsan chiat peuhmah le’ng abul pankhin hi diing hi hangh. Tua baan ah, kimuantuahna (mutual trust) khat-le-khat kaal ah khanletsak ahihtheihna diing in mimal chih diktat photphot le’ng anak hoih in anuam mahmah diing hi. Kikhemna (Cheating) in eite lak ah mun himhim nei kei peuhmahleh i deihpen, ‘Diktatna’ in i mi Nam tawisang in, thudik a vaihawmna hong tangtung thei ngei diing in uphuai hi.

A bul Patdik A kimkhat Zohsa Ahi Petmah Hi:
Koi ah pan le’ng a bul a kipandik hithei diing hi hiam chih ngaihtuahtham ahi. Innkuan/Innsung ah a bul kipanleh adik thei diing hi. Khotang, Saptuam leh State Government kivaihawmna hoih aom taktak theihna diing in bel mimal innsung ah akipat diing kisam hi. Mipi vaihawmna hi in bangchibang Sorkar kivaihawmna hitaleh innsung mah poimoh masa penpen hi. Kipatna bulpi bel Innsung a kipan ahih a, tu-le-tate kichilna hoih leh diktatna thu bulphuh a nei a innsung kizentak a tate keem chiat hi mai zen le’ng bangzahta a Saptuam ngei zong haat a, hoih diing hi hiam? Huchibang zel in khotang leh gamsung kivaihawmna toh kisai in a bul pandik peuhmah le’ng a kimkhat zohsa hitakpi diing hi. Hindu sabiak azui mite lak ah hitaleh Kristian sabiak zuitute hi in Muslim hitaleh amau innsung chiat ah a bul pandik chiat hi maizenle uh tuni a India kivaihawmna bang diing a hichi lawmlawm a “Corruption” uang thei diing hi hiam chih hon ngaihtuahsak mahmah hi…??
Midangte pen genphak louh, Kristian kichite lak ah a bul pandik diing in kihanchiam thei chiat le’ng uthuai hina maizen e...!! Saptuam ah hihna nei, mi poimoh leh mohpuakna liantak nei kuapeuh kingaihtuah hun ahita hi. Pasian thangpaihna i lak ah tunung sawt lou a ahong tun diing thil lauhuai leh mulkimhuai lua ahi. Huaiziak in; “Vaihawmtu Pasian seh ahi” chih theikawm in, huchibang dinmun a laltutphah a tu kuapeuh in theisiam a, amah hihna leh mohpuakna – mipite sik-le-tang a gensaktu, nasemtu leh sikha  makaitu (servanthood leadership) ahihlam mangngilh mai lou a, kilalsak leh kiliansak mai lou in a vaihawm diing lah ahi ngal a.
Mipi ai-oh diing a Inpi Vaihawmna mun a palai diing a telching ahihna pen thupi lua leh mohpuakna sangtak nei ahihna ah MP/MLA/MDC/VA Member(s) kuapeuh in nunglam enkiik a kivelthak zel in, mailam ah adik-a-tang a vaihawm diing in kihanchiam tek di’n deihdakna i pia hi. Mahni mimal angmasialna in mipite saang a mun lianzaw aluah chiang in siatna in azui a, gamsung ah chi-aina atun zel hi. Election hun a Gam leh Nam itna ziak a abul pankhin hinapi, telching ahong hihchiang a thildang thupi bawlzaw leh Gam leh Nam humbit diing pen mangngilh a, mahni mimal gilpi puahphatna diing lel a adinmun poimohtak a zat chiang in mipite hamhaih leh beidong in manohna diing lam zong thei mumal lou in om sek uhi. Tua ahihman in mipite pen makaitu/heutu bei bang mai a om uh ahihna ah khantouhna himhim om thei ngei lou asuak hi.

Thukhitna:
    Khaile, tuni in i Gam leh Nam a diing a “Diktatna” ziak a gensiat a na om chiang in kipak in; himahleh “Corruption” thaang a awk ziak a dem a na omleh kisik in tawpsanta in. Vaihawmtu diing a Pasian hon seh na hihlam kiphawk in diktatna toh vaihawm inla, Lohchinna thupitak in na hinkhua ah hon zui zel diing lah ahi sin ngal a…!!
    Outer & Inner Manipur ah MP nih lel telching a hong om diing ahih toh kiton in, abiktak in, Outer (Pawsiah a om) Manipur singtang mipite ai-oh a Palai hong hi diing penpen in Phualpi Sorkar Inpi ah Mipite dangtaakna leh taksap awnghukna diing in thudik leh poimoh omzeneitak a tangkoupih ngam diing in deihsakna i hlan khol ahi.
    Daan bawl pawlpi lak a mun poimohtak luah a Gam Kivaihawmna toh kisai India Daan Bupi bawllem theitute lak a kihelpha – mi thupi leh poimoh: MP ahih toh kiton a, tualsuak nam tuantualte a diing a hoih leh phatuam diing thugil genkhetu diing ahihna ah, melmakte deihdan a pimang leh sum deihtakna ziak a bumhai a om het lou diing leh hangsantak a thudik gum ngam zel diing in telching a om penpen, Pasian in ompih tawntung di’n i deihsak bok ahi.
    Telching a om penpen in dinmun saangzaw sem leh thuneihna deihluatna ziak a Gam leh Nam itna aneihsa pen kitheihmoh bawl a, melmakte thunuai a lut a, mipite ai-oh ahihna pen leh amah mimal dinmun nangawn mangngilh khop hial a milim biakna leh sum deihtakna thaang a awk mai lou a, amaute mai a kipelut ngei lou leh thudik omsa gum ngam gige mi hangsan, adik-a-tang a vaihawm thei mi hi diing in i deihsak petmah hi.
Pawlpi leh Nam makaite baan ah Voters kuapeuh kingaihtuah taktak hun petmah ahita hi. “Issue Based” a kalsuan a, Tribal Political Aspiration bang hi hiam chih lungtang tawng a puaknatpen a nei leh Gam leh Nam humbitna diing lung-geel pipen a anei mi, mipite sik-le-tang a gensaktu muanhuai, Palai i telching theihna diing in Nam makaitu kuapeuh kibilsih hun petmahta hi.
Manipur singtang mite lak ah nambing khat lel a suahtakna angah zou kuamah om lou diing ahihman in mailam hun a i kalsuantouh zelna ah pilvantuak tampi om diing hi. Lam chiteng leh kong tuamtuam ah i pau-le-ham kibang lou ahihman in ngaihdan kibang kim vek lou diing chih pen thudik ahi. Himahleh, apilpi a phattuamna diing leh gam leitang kepbitna toh kisai baan ah hun hong paitou zel diing mengmuhna nei kawm in, singtang mite’n atuam a kivaihawmna kichian akineih masiah mipite lungmuang taktak thei lou, lauthawngna leh muanmohna toh kinungta toutou diing ahihna ah mailam hun galdotna mumaltak nei a, singtang mite tengteng in  “Common Problem” i neih pen thei kilkel a bohhuan siam a, “Issue-based” a kalsuan chiat a pankhawm kul-le-poimoh petmahta ahi chih Nam makaite leh Pawlpi heutute’n chiamteh in bil ah bat chiat le’ng khatvei tei, eite a di’n zong “Suahtakna Ni” kawl ah hong suak ngei diing in lamethuai hi lou hiam...!!