PU K. SUANTHANG PTC GHQ PRESIDENT TOH HOULIMNA
Interviewed by David Son for Zogam.com

Kum dangte banglou deuh in tukum Paite Tribe Council (PTC) General HQ Election Paite mipi bildoh mahmah khat ahi. Mata khua ah kitelna neihzoh ahihtoh kiton in telching a omte'n amau sung ah panmun ding kitelna neisawn uhi. Huai ah Pu K Suanthang PTC GHQ President ding in telching uhi. Amah kua hi hiam? Makai thakpa’n bang tup-le-ngim nei hiam chihte houlimpihna Zogam.com palai David Son toh houlimna taklang ni:

Zogam.com: PTC in kum paisate et in "policy” zuih kichian taktak neilou batna om a, tup paipih kichian nou term apan na nei uhia?

PTC President: Tua term ma a term beisa geihpen ah makaite'n Paite nam in policy kinei tuamlou a Zomi policy kizui ahi chih a gen uh kizakha hi. Nam khat in policy leh goal i neih keileh tulai khovel a social, economics leh politics a kidemna leh kitaitehna lak ah mite makhelh leh sikden in ki-om ding kia hilou in mite nungdelh ding in i omta hi. Huaiziak in i nam in tup-le-ngim kichian neih poimoh hi.

Zogam.com: PTC election a ki-candidate ding na sawmlai in bang tup leh awlmoh nei a ding na hiam? Tua chingta na hihman in na tupte bangchi a sepsuah na sawm a?

PTC President: Three Bills i buaipih lai in sihna tuakte lak ah Paite kampau kitampen napi JAC-AATB apan a PTC a ki-withdraw chiang in kuapeuh lungphawng in, kipona in, lamdang kisa in khasiathuai leng kisa hi. Paite namte ading a PA dinmun len a kingai PTC in a tate gum ngamlou a taisan ahihna ah hihkhial kisa in, ami-asate gum ngamding khop a PTC puahphat ngai ahihdan muh in om hi.

Tu in bel kong bangkim ah PAITE priority in kikoih a, Paite nam adia poimoh leh kul hi a theihte theihtawp suah in kisem ding hi. Paite nam a bit a, a dam ding ahi.

Zogam.com: Bang pentak sepsuah masak na sawm a?

PTC President: Sepding tam mahmah a, PTC unit leh block tamzawte term beisa, unit khenkhat term beinung kum 10 valta leng om a, Paite nam awlmohna omlouhna ziakmah a hun hichitan ngaihsak louh a ana omleng hikha ding ua, tuate a baihthei pen a election neih hoihding hi. Block 13 lak ah block 4, unit 111 lak ah unit 98 ah election neih ding kisamlai hi.

Ban ah term masa a heutute na patsa Committee on Protection of Churachandpur District toh kisai, Sialkal Range Development Council toh kisai leh a tuamtuam sepzui ding om hi.

Zogam.com: Tulel a issue Wildlife Sanctuary & Hill House Tax, hausate dinmun, PTC in bangchi kalsuan (role) na sawm ua?

PTC President: Hiaite kum 10 val paita a thu omsate ahi ua, heutu masate kalsuannasate etzuitouh a i bit nading a kalsuan ding in ka kikoih hi.

Zogam.com: PTC mipi muhdan niamtak a ompen bangchi panlak a dopsang a hoih dia? Mipi'n bang lam-en / lunggulh in na thei a?

PTC President: PTC pen mipi kingaknatak organisation ahih poimoh masa a, bitna leh adik a kivaihawmna i lunggulh uh hi in ka thei.

Zogam.com: YPA toh kaal gen-le-sak om neneuhte pen na muhdan leh panlak tuak na sakdan n'on genthei diam?

PTC President: YPA in PTC election fair leh siangthoutak a neih a deihpen hi in ka thei a, election neih a hita a, term thak ahihtoh kiton in hiai kalthu vengta hi in ka ngaihsun hi.

Zogam.com: Zomi hih in Paite hihna niamsak a, dopkang ngai chih ngaihdan neite kiang ah bang na gen nuam a?

PTC President: Zomi hihna in Paite i hihna a niamsak tuankei a, himahleh guptuam nei a Paite sung sawk-le-toh ahih chiang in Paite sung ah kituahlouhna leh kiakniamna tun hi in ka theizaw hi. Huaiziak in PTC mi leh sa hiloute Paite namvai ah hong kigolh nakkei le uh nam chidam zoding hi. Ahi a, Paite namsung mah ahleng kithutuak leh hattak a i omding deihlou pawl leng om kha thei hi. Gensa bang in, Zomi sung a nam tuamtuam omte amau nambing chiat ah pumkhat leh kithutuak in om le uh, Zomi ading in masawnna leh hatna hi zoding in ka gingta hi. Paite nam maban ding Paite mah in a ngaihtuah ding ahi.

Zogam.com: Paite politics a hat leh Zomi politics hat chih ngaihdan nei tampi omzel ua, bang ngaihdan na nei a hiai thu ah?

PTC President: Kei ngaihdan in khotang hoih nading innkuan a hoih phot a ngai a, innkuan sung a ginat keileh khotang chidam om theilou hi. Tuabang mah in Paite kia hilou in Zomi niliap nuai a om nambing tuamtuamte, amau sung a kituahna leh kipumkhatna a hong om chiang in Zomi hong hatsem ding chih ka muhdan leh ngaihdan ahi.

Zogam.com: Hmar bial a teng mite bubit a teng thriphthrep, ei Guite Kual kiam hulhul mawk pen bang ngaihdan leh panlak hoih nasakdan n'on genthei diam?

PTC President: Ka na theihdan in Hmar-te ahihleh hun sawtpek apan in objective leh policy hoihtak nei in na kivaipuak ua, kuapeuh in makaih leh leng huai objective apan piallou uh hi in ka mu. Amau sung a student organisation, saptuam a heutute leh a nam makaite uh pangkhawm siausiau uh hi in ka mu. Kei theihna ah February 1988 in HSA Leader’s Retreat, Haflong, Assam ah nei ua, huai ah Rev. Dr Rochunga Pudaite leh L Keivom-te leng a nupa un tel ua, midang 62 val leng tel in a nam uh dopsan nading kikupkhawmna nei uhi. Huai retreat a teldingte deihtui mahmah in qualification ding chi 44 pe hial uhi. Hiai in gahsuah hoihtak nei in kong bangkim a i nung delh ding a suakta uh hi in ka thei. Manipur ah Pherzawl District a neita ua, MDC election nawn chiang in District dangte bang in ADC a phut ngeiding uhi. Full ADC a mupah kei tazong un a muh hun chiang in MDC 20 val in huai district a mimal khat chiat puahta le uleng development liantak hiding hi.

Guite Kual ah bel i singtang lou nna sep a nekmuhna hiam kingakna tham pha nawnlou ahihna ah sum-le-pai leh nekzonna baihlamzawkna Lamka khopi kidelhhuan hang a, huaiziak in i singtang khuate lawi hiaihiai hi hang. Singtang a i khuate i taihsan naziak generalise theih mawk hilou ahihman in poi sa mahlehang a solution ding gen haksa ka sa hi.

Zogam.com: Guite Kual ah singtang lou nasep nekmuhna tham pha nawnlou na chihpen Hmar bialte a nek piangzaw deuh chi a ngaihsun ding i hiam? I kivaipuakdan uh leh Insurgency factor khawng dan a gen kizatam a?

PTC President: Kivaipuakna leh siamsinna leh Health Care gina tak omlouh ziak, insurgency ziak bang leng hithei hi.

Zogam.com: Migration issue bangle khota apan Lamka pemlut, Singtang a education system toh kisai bang, etc ngaihdan gen mai hilou a, research hoihtak bawl a finding/suggestion omkha hia? Nam heutute hong kikup ua, sepsuah chih dante omthei diam?

PTC President: Tua bang a research hiam finding/suggestion kibawl omlam ka theikha kei hi. Singtang apan phaizang a i pemlutna ziak factor tuamtuam omding a, singtang a i basic needs- communication, health leh educational facilities ginat louh ziak a khopi kizuan hipen ding in ka gingta hi. Singtang apan khopi a pemlut chih pen ei Paite nam kia problem ahi kei a, mun teng a thiltung hi in ka ngaihtuah hi.

Zogam.com: Lai leh sepna lam a sangtak tungkhin na hihna ah, research i chi hia, nam toh kisai thilsuite a poimohdan leh a zatdidan na ngaihtuah kha ngeidi'n hon kigingta ahi a, ahihleh, tuadan a ngaihtuah khak a nana neih ngeileh, research based a nam masawn nadi'n bang chi panlak na sawm a? Research bawltuak na sakdiak chih bang om hia?

PTC President: Nidang apan namlam thu ah aspiration ka na nei ngeikei a, tuabang in suiluat in ka na nei ngeikei a, hiai dotna hon dawng theilou phot ka hi.

Zogam.com: Nang mimal tanchin n'on genthei diam?

PTC President: March 5, 1964 in Phaibok Munlian, Vangai Tang ah (L) Kamkhogin leh Vialzaniang kal-a goutan masapen ding in ka piang hi. Ka pa government teacher ahihman in Suangdoh, Mualtam chih khawng ah ka tengkha ngei uhi. 1980 in Matric ka pass a, 1984 in Lamka College apan ka graduate hi. October 1982 apan January 31, 1987 tan die-in-harness scheme nuai ah Teacher nna ka sem a, Feb 2, 1987 in State Bank of India ah Probationary Officer in ka lut a, June 4, 2011 tan ka sem hi.

Bank a ka sep sung in Manipur, Meghalaya, Mizoram leh Assam ah ka posting kha hi. Bank apan ka khawl nung in Paite pau a monthly The Lamka Chronicle kichi, Pu Thangzalian Thomte, Editor, The Lamka Post publish na in November 2012 a ki pankhia in, founding editor in ka pang hi. March 2015 apan in tunitan in Tongluang monthly editor in ka pang hi. Laigelh ka lunglutna ahih man in ka laigelh khenkhatte SSPP Annual Magazines, Saphu, Tangsam, Tongluang, The Teenager leh SBI in-house magazine khawng ah suakkha ngei hi.

Ka zi, Theizavung, toh ta thum ka nei ua, amau teng leh ka nu toh tu in Convention Road, New Lamka ah ka khosa lel uhi.