58 - Churachandpur A/C pen miteng bildohpen ahih manin, mipite decision bawlna panpihtu ding leh candidate te adia platform hi ding in Zogam.com in candidate teng DOTNA 5 kibang ana ki bawl a, a nuai a bang in dawnna Paukhansuan Khuptong akipan ki mu hi.
Zogam.com in Paukhansuan Khuptong lohchinna leh deihsakna lianpen ki pia hi.
Zogam.com Dotna 5te:
1. Bang ziak a hon vote ding ka hi ua? Candidate dangte sang a na hoih zawkna bang a?
Dawnna: Midangte sanga hoih tungtuang kisak ziaka MLA a hong ki candidate ka hi kei a, i gam dinmun awlmohna leh veina ka neih gige, ka sisan a belh leh lungtang a om gige pen in hongsawl teitei ahi zaw hi. Pathian in lem honsakpih a, mipite deihsakna ka tan a leh mimal tak a diktatna leh siangthouna leenkip a, nnasepte ah transparency kembit a, Pathian min thupina ding leh mipite hamphatna ding, top priority in ka koih gige ding hi.
Tribal movement i paipih lel2 leh 9 Martyrs te vai bang leng, ki galsai thoh in solution piangsaklou ding ahi chih ka muhdan ahi. Mipi leh Heutute pangkhawm a issues i neihte leh i demand te uh suk vaiveng poimoh kasa mahmah.
Hun paisa et in, Lamka khopi puahna ah i heutu masate innteekpan zoulou deuh uh ahi diam chih ngaihdan ka nei hi. Huai ziakin Lamka khosung teenna taklou kisuah dekdek hi. Mipite haksatna, lian in neu taleh, thuakpih, phawkpih leh panlakpih kisam kasa mahmah hi.
2. Telching in om le teh na bial ah bang development nna nasem masa pen dia?
Dawnna: Seppah theih leh hun lazek ding bangzah hiam geelsa kanei hi. Ka lunglutna mahmah ahihleh, Town Planning ahi. Hiai toh kisai Ahmedabad a, Institute of Town Planning te toh leng kava genkhawm ua, ka houlimna uh omsate banga sepsuah theih hileh ka ut mahmah hi. I pankhawm siam peuhleh, Lamka pen India a Model Town khat suahsak theihlua ahi. Banah, hun lazek ding himahleh, Skill Development toh kisai nakpitaka panlak hoih kasa hi. Hiai planning dana sepsuah theih ahihma in leng, drainage system, water supply puahphat, etc seppah theih ding in ka gingta hi.
3. Na bial a muanna leh bitna bang chi'n na bawlhoih in na kembit dia?
Dawnna: Pu. L. Keivom in, "Zosuante adia Lamka i Penticostal Town ahi" ana chih dik kasa mahmah. Hiai dinmun theisiam kawm2 a, muanna leh bitna om theihna dia mimal lungputdan a hong kipat ngai hi. Buaina khatpeuh, communal issues lam a en pahpah lou in, law & order issue (dan leh thupiak) dana etdan kizir ngai kasa hi. Bangteng hileh, mipi sukha buaina peuhmah ah Heutu/elected khat in gaal etmai sek keileh, buaina tampi veng baihzaw dia gingta tinten ka hi.
4. Election siangthou tak a om theihna dingin bang chi'n pan na la dia?
Dawnna: Deihsaktute sum leh pai hiam, thagum suah ding hiam in leng ka fuihkha kei a, a diktakin, tunitan ka paitouhna leng amaute thohkhawm ahizaw hi. Nam maban ding, gamsung maban ding, gam leitang kepbit ding lungtang tawng a vei a, ka hong kalsuanna pen kei, kei muh bangbang a hon muh pih a, mimal a ding hilou a mipi leh gam a dia kalsuan a kipan khia, ka Seppihte/worker te thupi kasa mahmah a, a kipiak zohna uh thupi sa in ka khasiat hun a tam mahmah. Ka seppih ten mimal hamphatna hiam, sum-le-pai hiam lametna a kal honsuan pih hi le uh, kua mah in hon zui nawn kei ding uh, ken amaute khut tawi bangmah toh kiksak zoulou ka hih chiang a. Gam-le-Nam awlmohna a a chihtakna uh thupi kasa mahmah.
Pathian nei minam leh Pathian nei mimal i hihna taklat theihna hun hoihpen khat tuh, election ahi chih ngaihdan ka nei hi. Mahni vote chiat khiaka, lawhchinna pen Pathian khut a om ahi, chih ngam tuh hangsanna khat leng hipah in ka thei hi.
5. Na gam leh na mite rights bang chi'n na kembit in na enkol dia?
Dawnna: I rights uh kepbit kia hilou, claimed ngai pawl leng om ahi. Hiai te muhna ding leh a tam theipen i hamphatna ding leh Singtangmite i bit taktakna dia, Political will create ngai hi. Dan bawltu ding khata mipi ten deihsakna na hon piak uh leh Manipur level a Dan leh thupiak kia hilou, huaite tungvum a suahtakna (political survival) poimoh pen in ka koih a, hiai mah top priority/nnasep poimoh pen te laka khat in ka koih hi. Kei mimal a ka sep theih leh tai theih na tantan a tai in, ei mimal kia a sepsuah thil hong hilou ding a hihna ah, heutu tuamtuam te toh ki thuzak in, MLA leh MP tuamtuam te laka lobby bawl ding kei mohpuakna in ka koih hi. Hiai dingin, mipi leh mipite' palaite i pankhawm vek ngai ahi. Table a negotiation bawl i om dia, a kikou pawl i om dia, a sakthoh i om dia, a gelhthoh i om dia, a thumpawl leng i om dia, Assembly leh Parliament a kitom pawl bang leng i om ding uh ahi.
Kei muhna ah Political Status pen hiai-huai, chi a ut teng gamteng, mipi kipahna ding gen mawk pen, khanglui vai ahia, huchia mipi ki ban khemkhem hun hi nawnlou in ka koih hi. Khangthakten khangthak vaitak leh practical taka kalsuan ngai ahi. Political will I create zoh dan leh midang toh i kalsuan zoh dan leh negotiation progress ah thil tampi kinga hi.
Huai kawm2 in mimal takin, a niam pen in, 6th Schedule chih himawklou in "6th Schedule with Territorial Councils" dia theih tawpsuah a panlak hoih kasa hi. Hiai teng i ngahna ding in mimal khat, MLA khat thil hih theih dia ki gen ek-ek pen a lampi omsun dan in ka gingta kei a, himahleh MLA dia telching a ka om leh hiai tangtunna ding in theihtawp suah in, Pathian, mipi leh heutu tuamtuam toh nnasem khawm a mualsuah ngei ka lamen hi.