GOSPEL MISSIONARY JOURNEY – 2012
(Mr Thangkhanmuan Tonsing toh Houlimna a kipan)
A hinkhua tanchin tomkim: Singmun khua ah 3rd July, 1980 in piang hi. Kum 1997 in unau melhaih ziakin Mualnuam khua a galtai uhi. Singmun a omlai un hotdamna chialpina tuamtuam ah tel zelsam a, naupang lai ahihman adiam lawmte khutlik ziak, ahih keileh ading (stand) ziak ua ana ding zel a piangthak ana kichi. Himahleh, kimuanna taktak omthei lou in, Pathian’ hehpihna ziak leh vangphathuai takin March 2000 kum in Mualnuam EBC Saptuam in, PASAL HOTDAMNA CAMP thupitak honsai ua, Thugentu in Rev. L. Khamkholun leh Rev. S. Ginzam te hongpang uhi. (Pastor M. Thangminlun leng amaute panpihtu dingin hon tonpih uhi.) Huchi’n Laisiangthou Jeremia 2:22 honsim ua, hiai pansan in sermon hoihtak hongen uhi. Huchi’n ah mikhial, Pathian’ mai a khelhna selmang theilou ahihdan kithei in, Pathian maiah ka khelhna thupha tawi in Jesu Krist Hondampa dingin ana sangin, kilankhia hi. Saptuam sunga kizattheihna tantan ah kizangtou zel, a diakin (ama a KTP i chih uh, tua BYF chia i khek uh) Laa lam ah.
Bang pentak in honchou a hiai banga Gospel Missionary Journey 2012 naneih; Saptuam panlakdan/ mimal panlak nadan awlmohhuai sakna naneih ziak hia:
“Kros thu zaw mangthang lelte dingin haina ahi, hotdam tate a dingin thilhihtheihna ahi” Mi khenkhatte ngaihdan a zaw thil haihuaipi himaithei eive maw? Hun sawttak taksa damlouhna ziakin lungkham mangbang in akum a sim kanabuai a, phetlou in 18th February, 2010 in CHAMBER OF COMMERCE, Imphal ah operation in kahong om zomah lai a, huchia ka omlai in, Pathian in Mission nasepna awlmohna leh veina honpia in, hiai Laisiangthou tungtawn in hon houpih hi. (Matthai 6:25-34 – hiai Laisiangthou nidanga kana simsa gige himahleh huai ni in Pathian muanhuaina kathei chiang mahmah ahi.) Nialtheihvual hi a katheihlouh manin damin damkei taleng ka hihtheih tana, Mission nasepna a pangdingin Pathian hatna muangin thupukna kabawl hi. Hiai huna kasum neih tengteng ah 95% vel Missions Nasepna dingin ka lankhia hi. (Pathian min thupina ding a kon taklat ahi) Ki-etkol nang om nawnkei mahleh Pathianin Doctor ngai nawnlou in hon hihdam a, huai ni apantin kalungsim kataksa zangkhai mahmah. Mimawlte nangawn zong aw natel lawmlawm, lamdang in aw a thupi e... (Phil. 4:11-13) Phetlou in mi’ piak bangin tamkei mahleh tunitan ka thupukna khateng a pezou a ka om ziakin Pathian min kaphat ahi. (Isai 40:31, Johan 4:34-35).
Hiaite’ ziaka kipakin EBC Mission field phaksuak a, Missionaryte’ panlakdan/haksatnate vatheih a field a i Kristian pihte (adiak in pianken a vualphaloute) haksatnate vamuh a vatheih a video coverage hoihtak bawl a, album pichingtak bawl a, tua tungtawn a, saptuam mipi ten field omdan leh nasepna lama panlakthak nading leh thathak honla saktu ahih kadeih leh ka lam-et man ahi.
Tulel a saptuamte’ sepdan a hoihkei kachihna ahi kei a, amau nasepna ah keileng kapangtei utman ahi zaw. Director of Missions EBC ah phalna kala a, amau lemsakpihna a zinzel kahi.
Hiai na khualzinna ding toh kisai panpihna muh ziaka nasawm hia, bangzah senna om ding leh a sepsuah dingdan chihte nageldan in:
Katup ahihleh Mission nasepna a mite motivate sawm kahi. Mundang apan panpihna kamukei a, ngetleng kasawmkei hi. Neihziak hilou awlmohna leh veina ziak liauliau banah Pathian hatna muanga kasawmkhiak ahi (Ezra 8:22-23). Abul a kipan pan kahihman in abei dingzah kagen theikei.
Tunitan in mun bangzah naveh ta? Maban ah bangtan zinna ding naneilai a:
Tunitan in Manipur EBC Mission field mun 9 vel kiphazou pan hi. (F/S hun neihdan zilin kikalsuan zel a, station munte kigamla pipi ahihman in deihbang in ki kalsuan kintheilou hi). Ka muhsuah ahihleh Mission nasep ichih Pathian sapna zaloute leh kipiakna taktak neiloute’ a dingin thil hithei hilou ahi kachi. A ziakchuh hinna thutak vahilh a, a sahkhua uh vakhek sawm ahihziak un.
Banah, Missionary ten a ginna uh tungtawn in nna lamdang tamtak semthei uh ahi chih field a gingtu thakte apat muhtheih mahmah hi. (Gen. 22:8-18, Rom. 10:15, I Kum. 18:30-39) I gingtu thakte a kum un upa mahleh uh khalam a naupang chikchik ngen ahih ban uah a om sunsunte a ginna uh thupi leh muanhuai mahmah un kamu a, eilam khonga hongzin khak ua, i omdante uh hongmuh ua, aginna uh abah khak ding bang lauhuai kasa zezen hi. Maban ah, Karbi, Nepal leh Arunachal chihte omlai hi.
Tulai a saptuam nasepna a poimoh nasak pen bang ahia:
Saptuam nasepna a poimoh kasakpen chuh gammial nasepna (missions) ahi, gingtu hi nailoute gingtu suahsak teitei poimoh kasa...I Toupa Jesu Kris inleng ahon thunutsiat hipen in kathei (Matt. 28:19-20, Marka 16:15-16). Tuailai thahat leh lehkhasiam taktak te Missionary dinga hanthawnna leh mimal I pantheihna chiata tualsung mah a, ipan zawksem uh lam-etna ahi. Mimal panlakna hat leh i saptuam/ pawlpi honghat sem di’n kagingta, Mimal te mah pawlpi ihih ziak un.
Laapu nahihna ah - Pathian laa hilou ana sa miten biakna a phatna lapawl asak uh hoih nasa hia:
Pathian laa hilou na chih chuh Zawl laa (love song) na chihna deuh hi’nteh maw...Pathian laa salou te’n biakna leh phatna leh lapawl a tellouh ding chi a gamgi vakhun penpun hoihpen in katheikei. Huaituh amau sia-le-pha theihna ah kanga, amau a lunglutna omnak leh biakna a atam lam sa le uh a poidia hia...hong kikhekna uh ahihkhak leh. Himahleh tuabang a kizang mite’n phatna laa leh lapawl khong a hongtel chiang ua chuh mipite’n bang chidan ade aw! Chihna chuh nei un kathei. Hiaile ahoihpen ahikei. Mi ut a hong kizat nakleh buaipihpih selou in, ahoihnate a phattuak isak leh phat lel a a dang kigengen keile hoih di’n kaging. Tuabang a ngaina a hong chial om leh chuh i nial ngam kholdia hia!!! Eisang a siamzaw tampi om a kuanle honchial khol kenteh na in....hehehe.
Khotang nasep leh Pathian nasep toh kisai:
A nih in poimoh tuaktuak kasa. Saptuam kia a kizat ding ahi chia khotang vai vanelhsiah theih ahikei. Himahleh, i theih dinga kadeih chuh, saptuam lam sang a, thildanga engagement I hauhluatleh abah/buailam kihi ahi (Marka 12:17).
Politics sangin saptuam in ei mite honkhen achih uh:
Maizen! hiai kikhenna nagenpen atheikhial ua ahi. Saptuam in honkhen zaw hi’n kamukei a, a ngaihtuahna/ muhdan uh kibang theiloute’ kikhenna hi’n kamu. Saptuam in honkhen lou a, a kikhente leng hon gawm a, hon pumkhat sak hi ahi. Saptuam omkei leh tuasang mah in kibuaizaw ding ahi, kachi hi (Luka 10:40-42).
Lamka ah saptuam 25 vel om ahi a chi ua, EBC saptuam hilou Saptuam dangte’ Mission field ah kalsuan na sawm hiam:
EBC Mission field lou a dangte ah kalsuan sawmlou phot kahi. A ziak ahihleh Saptuam i chih paidan hoihtak nei ngen kihi ahihman in, saptuam dangte’n honna kipahpih khollou thei uh ahi. Himahleh hon kipahpih leh ngaina a omle bel athu zilin kalsuan theih ahi.
Na tanchin zakha mi khempeuh kiang ah:
Miteng teng gammial a Missionary nnasem dinga sapna tangvek ihikei ding. Himahleh, i omna munchiat ah lam chituam tuam a Missions nasepna a kihel alou theilou hi’n ka ngaihtuah hi. Huaiziakin Pathian gamnna sepna ah mohpuakna inei chiat a i septheih lamchiat ah panghuan leng maw...Eph. 4:11-16 Mihing damsung tom a, iseptheih leng tawm a, Toupa leh a gam a dinga i sepkhakte I Manglukhu ding hilel ding ahihman in ihihtheih tawpchiat in Toupa gamna semni (Eph. 5:16).
Man Singh leh a zi hun bangtan hiam apat mitdel uh ahi ua, mitdel school a akai ua pat kingai in kiteng ua tunichang in gil a gah goutan tapa 2 nei uhi. Atate uh Model English school Jiribam ah ebc saptuam school ah kai ua khatpen Manipur Mission Field EBC in chawm sak uhi, akhatpen ahihleh Vangai Div in chawmsak uhi. Amauten INN nei nailou ua mi inn bahara in luah uhi. Panpihna khut zakkhum nuam omleh chiklaipeuh in Director of Missions EBC bang thuzak le alampi hon kawkmuh thei mahmah ding hi.
{rss uri=https://picasaweb.google.com/zogam.com/ThangkhanmuanTour2012?authkey=Gv1sRgCJqQpNvLjcaXJw limit=50}
Related Article: Gospel Missionary Journey 2012
.