Shoute Coaching, Heavy Metal leh Jalebi
A Tribute to A Dear Friend: Sir Hauthang
- M T Muanding Guite
January 17, 2022 Seppatni zinglam dak 10 le minit 32 geih ahi. Hipi in a nuaikhak Covid positive, quarantine a om leh Work From Home (WFH) ziaka Office kai theilou pum dim laitak, nasep di tam luat ma in mobile hong ging a, "Tu mahmah in i lawmpa'n hon paisan ta e, kei lah OT room apat pawtkhe thei nailou. Zinglam a buaisia, casualty a hong kipaw lut uh ahi," hon chih ka zak in ka lungtang a sou mai hi. Sunkhua in nna ka sem gina thei nawnkei.
Kum Nih Sung Kithuah - Hinkhua Adia Lawmhoih
Langhauthang Shoute @Sir Hauthang (Shoute Coaching Centre nei pa) toh D.M. College of Science pallut mahmah lai in Class-XI apat ka na kaikhawm pan ua, Lamka lam lawmte hunkhop campus sung a New Boys' Hostel ah om uhi. Kou bel Lamphelpat a tanaute inn beel in, zinglam-le-nitaklam college kuan-le-kik a kiton a houlim kha thei gige ding in ka om uh; lawmpa (L) T. Denial Dengsuanlal @Lalpi le tel in.
Class-XII kon zoh khiak un kai khawm kha nawnlou in aman D.M. mah ah sunzom a, inn lam suti pai theih chiang in va kimuhpih lou in ka kik ngeikei hi. Kum 2 sung kia kithuah kha himah le ung le lawmta kingaihnatna hichibang kaan a om dia hia chih ut huai khop di’n huai hun tomchik ka na zatkhawmte uh ana manpha lotel ahi chih ngaihtuahna ah hong lang thakthak mai.
Hon Aikaih Khat Om
Tunai zek ah kik le, December 24, 2021 Krismas ma ni office kai lai ka innteknu'n "...tukum naupangte winter suti hon puang mawk ua, ticket lak a innlam paidi himai", hon chi guih a, innlam pai sawm hetlou napi December 28, 2021, kum 2 le akim nung, in Lamka ka tungtou uhi. A ni zing a Bungmual va taitou pah ngal in Shoute Coaching Centre ka va hohleh lamlian toh kimat a classroom a tuition la sekte kuamah ana omkei ua-a kikhak bikbek, innsung a lawmpa Hauthang le houpih theih ana hi nawntakei.
Heavy Metal leh A Khutsiamna
Bangchidan ahitel a chih ut huai di khop in heavy metal music ana lunglut mahmah a, Megadeth, Metallica leh Pantera te khawng ana ngai nasa mahmah mai - Imphal a huaite album hong tungte nei kim sipsip in kem hoih chitchat sek hi. Kum 1994-95 vel in Nilaini 8:30 PM chiah MTV channel ah Headbangers Ball program hong suak sek a, black & white TV 14-inch a en di’n kei omna inn ah hong tung khial ngeikei. Ka kitheih ma un Bungmual a a inn huang sung uah tape-record ngaihtak a play in headbanging concert a lawmte toh ana neikha ngei ua, huai hun a limlak khat a kep hoihte lak a hon lak mun penpen ana hi. Huai concert a neihna ua guitar zatdite sing a kibawl amah kisuitawm vek hi a, drum set di le amah bawltawm mah zang uhi.
A khut siam petmah a, a khutgelh (handwriting) dingtang zitzet in poster khawng, t-shirt khawng leh logo tuamtuam design gelh sek hi. A innsung ua frame a kitaak leh a inn bawldi lem (model) khawng amah khut suak ngen hi a, tua a innkong ua Shoute Coaching chih bang le aman ki design ana hi. Huai logo pen kum teng a coaching centre calendar a bawl sek ah tuangsak a, copy khat hong pe mangngilh ngeilou hi.
Shoute Coaching Centre
Sir Hauthang in ana pat Shoute Coaching Centre ama damtheihna in a zoh lai in pai hoih mahmah a, zingkal dak 6 apat skul kuan hun ma, huai ban a skul kaizoh nitaklam dak 3 kiimlak apat dak 6 tan khawng Class-IX apat XII tan Math leh Science tuition la di niteng in batch 6 / 7 bang neizou gige hi. A student te Lamka khopi sung apat kia hilou in, 'Sir Hauthang teaching theihnop leh amah mi laihilh dan siamlua' chi in gamla pipi apat amah va delh tenten tampi om uhi.
Khatvei Thang kiang a Class-X leh XII board exam a Math leh Science question te khawng a theitaai dimdem ta dia aw chia ka dotleh, kou tegel ki-iim neilou a houlim gige ka hih ziak un, midang kianga a gen ut khollouh di khat hon hilh hi. Aman Manipur board question tekhawng akum akum a ana suui taai dimdem ahihziak in expected question a gintakte atamzaw ahihlouh tawp a 70-80% khawng dik sek ahi chih hon hilh hi.
A coaching class a hong kai Molnom nungak khat toh kituak mahmah in hong kiteng ua, tapa nih leh tanu khat nei uhi.
Sir Hauthang – A Brand Name
Kum 2000 zoh lak apat khawng in Lamka ah private School leh College te nasatak in hong pung tou a, kidemna hong nasat ban ah i gam ah Math leh Science teacher siam di kitasam sim hi. School neiten huchibang teacher siamte a kileikhiak sak thoh pian sim vengvung lai un Sir Hauthang le miten a deih mahmah uh khat ana hi hi. Ban ah a sepkhakna munmun a kai ut amah ziak a skul naupang va kisuan hunkhop om uh chih ka na theihkha hi.
A coaching centre leh a sepna mun a sinlai naupang ana sinsak khak mi khat hong suak leh amah tung a kipak nak tam nanchia chi ka ngaihtuah chiang in hiai ana simkha bangzahhiam ten le hi sa di un ka gingta hi.
Mi thupi mahmah leh a damsung hun saulou sunga a theihna midangte kiang a pekhia tam pen khat hi ding in le gingta ingh.
A Tawpna hi Din Ka Koih Kei, Ka Koih Theikei
December 29, 2021 nizing a Thang ka va veh lai in damdawi inn a zatdi lupna special tak a kibawlte ah a lawinu Vavah Shoute in ana enkol hi. A kiim-a-kiang ah machine nih-le-thum ana kitung a, a nakvang leh a taksa apat pipe bangzah hiam kithuah lai hizenpi hon na theichiang mahmah hi in ka thei. A hon houpih sawm nilouh a, lah a aw a pawt chiang theikei, a khut taklam hon taangsak nilouh nawn a ka kichibai uhi.
Vavah in a u Thang gente theihtheih tampi nei a, kum nih pha dek mahmah a u Thang lupna ngak a om ittak leh dohzoutak a ana kep dan ka ngaihtuah chiang in Vavah mi thupi leh chin zou ka sa petmah.
Ka lawmpa adia thumna neihsak in ka kikhenta uh.
Awlmoh luatna ziak le ahikha dia, DM College kaipih lawm dangte le hilh manlou zen in keikia’n ka vehkha a, lawmte toh kong kithuzak u leh a zing December 30, 2021 nitak a va veh khawm nawn di chih thu kon saat uhi.
D M College Kailai
Kum 28 val paita, 1993 (10+2) session kipat apat kum 2 sung mahmah Hauthang toh Humber cycle liante 2nd hand zang tuak in niteng in college ka kuankhawm sek ua, Lamphel apat Sanakeithel lutsuk a Thangmeiband Leikai sung tawn in niteng in
Thang toh thu vantaang gen khawm in college kuan-le-kik minute 40 khawng houlimna hun ka na zangkhawm gige uhi. Lawm kinaihpi dang nei tuanlou akihih ziak in hun awl neih chiang in mahni omna te inn a va kipawt tuah ka hi gige mai uh. Amah ani-agang ten room a pehsak uh lianlou ah tape record leh cassette tampi toh a room baang a poster taak zengzung in om a, amah kiang a i om chiang in heavy metal music ki play bengseng sim lele lung-a-lungmuanhuai leh nuam sakna khat alawmten kinei vek mawk in amah omna va kitung khawm noinoi kha sek hi.
College kaitawp chiang in Thangal Bazar a cassette zuak pa kiang ah heavy metal album hong tungthak om hia chih va kan di khawng in ka taikual maimai sek ua, a khenchiah lah Imphal Talkies a matinee / morning show hiam Asha-Jina cinema hall a film suaksuak khat en di peuh in class ka bunk khawm sek uhi. Ni khat Tribal Colony ah sunkhua a class bunk in amah hoihsak nungak khat ka va helpih ua, kam khat le a paukhiak lam kithei lou napi in tui nou khat a dawn gai. Classmate Meitei nu khat melhoih kisa chiat hiven, nitaklam khat college tawp cycle a ka nung delh u leh Singjamei lamte ahi ngei dia, huai lam gamnuaimi tam uh chi a sau nungzuih ngamlou in BSEM ofis apat ka kik maimah uh.
Hiai thute khawng Hauthang vehdia ana tung masa Dr Seanbawi Vaiphei toh ka gen pah ngamkei ua, lawmpa Douthanlun (D T Lun) Tombing hong tun apat ice-breaking nasatak hon bawl in, hun nuamtak zang in college kailai hunte ka genkhawm thei uhi – hichibang thute Thang toh genkhawm tawpna ahidi chih kuama’n ka theikei uh.
Kei Hon Nangak Ana Hi Maimah
Hauthang apat Whatsapp message ka muh tawp Covid-19 hipi buaisaan kipat ma deuh February 15, 2020 zankimlai zinglam dak 12:39 AM ahi. Huai ni zingkal in a zi dawr tan va khazou lai a, ann nekzoh ana buaisia khophawk lou in huai apat Raj Medicity ana zuan uhi.
Nekzong a khopi khawng a lawm ginatak le neilou a omten a khenchiang in i lawm ngaih mahmahten ei ngaih bangbang a hon ngai khollou uh a diam aw chih hun hon kha sek a, innlam pai a lawmte toh kithuah di ut tuntun hun bang om sek tham hi. Apaita tu kum 2 sung khawng Covid-19 hipi ziak in a loutheilou te kia loungal nekzonna na mun ah ki-om chiat a, himahleh lungtang tawng ah bel innlam a om siamsin pih lawmte mah kichi hi.
Huchibang mah in Thang in le hon ngai mahmah, hiai leitung apat a hon paisan taktak matan hon thuzaak theilou leh thoukhe zou nawnlou pipi kum 1 leh kha 11 sung vingveng lupna a pang teitei in hon na ngak ahi chih Dr Seanbawl in Lamka Damdawi Inn OT room apat “Tu mahmah in i lawmpa'n hon paisan ta e,” hon chih in ka theikhe thak guih a…
A lawinu ka call leh phone la thei di dinmum ana hi nawnta kei. Ofis a bangmah hih mumal thei nawnlou in Megadeth, Metallica, Pantera leh Aerosmith te la Cryin’ khawng ngaihtuahna paisau tak kawm toh ka baan ngaih kual nilouh hi.
A Kampau Nih Mangngilh Nawnlou Ding Te
Tua a tenna inn uh a bawl kipat tuung lai in ni khat suti pai Lamka khosung a vakkhawm in ka kithuah thei ua, singpi dawnkhawm himhim ni chi in PKT Street lutna gei a vaite hotel ah singpi leh jalebi chihtak in kon nekhawm uhi.
Tutung kei kia a ka va veh ni in a thugen theichiang thei kei mahleng a thil duh ka dong a, a lawinu Vavah in ‘nahtang toh jalebi duh’ chi a hon gen ana theithei hi. Hilele a khuh toh jalebi pe utlou chih a lawinu’n hon gen zom a, a zing nitak a lawmte toh ka va pawt un nahtang ka puak thei: a duh mahmah jalebi puak thei nawnlou di ka hi ta...
December 29, 2021 a ka va veh ni in a tate tanchin khawng le a lawinu toh ka houlim ua, a lungsim a puakgik, “U Thang in a poi a sak penpen ahihleh a tate, a diak a Mangboi bang High School kai theita a, midang tate lai ana kihilhhilh, ka tate a hun tak a hilh thei di aka omlouh poi ka sa penpen a chi,” chih hon na genpih in ka lungtang tawng hon dengkha mahmah mai a, sinlai thupi tak mai Sir Hauthang in hon sinsak hi.
Nat-le-Sat Gentheihna Om Nawnlouhna Ah
Stroke a ana kipuk zoh ni apat in a lawinu leh Dr Seanbawi toh kithuzaak tuah den in ka omtou ua, a kisukkhakna a khuak sung tawngnung a sisan a lut man ziak in doctor siamte’n le thumna toh loungal hihtheih neilou ahihdan a gen ban uah kal nih (2 weeks) kaan le hon daih lou mai thei dinmun ahi chih a gen uh hon hilhsuk pah uhi. Huchi pi in le kum 2 phial sung di a vangkim in a limlak leh video khawng hon khak sek uh ka na mu zelzel hi.
Tukhawm, takhawm, houlim khawm a kimu nawn di kisak lai in Thang ka va muh nanung pen hun in a tu zoukei, a ta zoukei, a houlim zoukei – a thuak nat di a gim di khawng leh a ngaihtuahna a om gik mahmah genkhiak ut a tam didan khawng ka ngaituahna in a geel ban kei hi. Amah kemtu a zi, a tate, a nu leh tanau-lainate mahmah le tawl gawp di uh – itna ziak kia a pang teitei uh ahi chih muhtheih in om a, thupi mahmah uhi. Amauten a hihtheih tan ua deih bangtak a kem leh enkol kha man ahihna uah ngaih khat ah lungkim mahmah di un ka gingta hi.
Tu in nat-le-sat gentheihna om nawnlouhna a tawldam di’n hon paisanta.
Tuiduh-dangtak a gilkial leh jalebi duhna himhim om nawnlouhna ah a omta.
Sir Hauthang zaw a tawldam masa ahita.
-----
mtguite | 20220118
[Mimal muhdan a hong kigelh ahi a, gelh khelh leh kua hiam khat ngaihdan hilou deuh gelh khak a om zenzen leh ngaihsiam i kingen hi.]