KI SAKKHOLH HUNLAI AHI MAIMAH DIAM?
Lianzamung Tonsing @ Mumung Tonsing
Zoar Veng, Bungmual, Lamka

Hun paisa te ah awlmoh thu, laikhak tuamtuam, puaknat thu leh vei mahmah thu bangzah hiamtak lui khe thei dia ka om man in hamphat huai kasa hi. Tuni in leng lungsim a om mahmah leh hun hongtung ding ah hong tangtung thei dia ka lamet khat ka hon luikhe ding in kong kisa nawn leuleu hi. I thulu i et vengveng chiang in gingtu, Christian sahkhua a ginna nei te ihih man in Jesu Krist hong paikik nawn hun ding gen som bang ka kisa sim hi.

It leh ngaih tampi suun a hipi leng Corona Virus suukpi douzou in i kikoih simta a, lungsim leh ngaihtuahna khamuang dek panta, sorkar leh pawl tuamtuam ten leng a nasep te uh sunzom nawn panpan ta, a minthang mahmah te lak a khat lamka a transport department te mahmah leeng office kai nawn panta uh chi in kipak tak in hun I zang panta uhi. Lungmuang leh khamuang tak a I omlai in numei nauvei bang mai in Covid-19 suukpi nihna in hon pha phut mawk a, ki gingkhol manlou in it leh ngaih tampi ten sihna hanmual hon liamsan jel ua, tampi mahmah hiai hipi ziak a damlou in i omlel uhi.

Delhi khopi I et chiang in hipi leng ziak a misi te luang hal khiak na di mun leh mual, leh a enkai tu ding a ki daih nawnlou in a piil buai uhi. Ei tung ah hiaibang sihna hongtung hileh I kha koi ah apai dia chih bang ngaihtuahna a nei kom in khalam vai mahmah leng kisakkholna poimoh hi. Hichibang hun haksatak lak a I leen lai in maban ding genhak mahmah a, ui sih ak sih a si a, vuitu di leng neilou a lamnawl leh gamlak khong a I luang te som tu ding omlou/kidaihlou a tungleng leh nuaileng te ann di khong ihi maimah diam? Chih leng gen ngam huai lou khop in hinkhua haksa I zang lel uhi. Huai bang kal ah india economy nasatak in niamkiak zomah lai a, tua i dinmun uh a paizom zel leh sorkar nasemtu ten loh a la zom gige zou diam chih khong ngaihtuah huai phial ta hi.

News leh thuthak tuamtuam i sim leh government toh kisai in recruitment process omteng postponed chih na muh khak in om gige hi. Sorkar a nasem tu kidaihlou ahi ngei ding a, department/ministry khatpeuh ah voluntary pension lak ding hitheilou phot in thusuah bawl uhi. VRS la sa te leng sapkik ahih ban uah, zanhal zek khong a news I sim leh Army Chief in army a sem, kum 3 paisa a kipan VRS la medical staff te samkik chih muhtheih in om hi. Full pension te kia khahkhia(release) uhi.

Hiaibang dinmun haksa leh buaihuai ahih leh 2020 in I zang ta ua, 2021 in hong ki sunzom nawn hi. Bangtan ki sunzom ding hiam chih genkhak pi a suak hi. Sorkar nasem tu full pension hunta te tatsatlou a pension pai ziahziah ua, himahleh recruitment thak om hetlou hi. Recruitment notice/exam notice omsa te leng postpone vek ta uhi. Hichibang dinmun haksa tak a i omlai in, mihing te sa a omlai I hih man in nek leh tak zonna kholsan thei kihi lou hi. Huaiziak in, Pathian in hun thoveng hon piak nawn lamen khom in lungput leh ngaihtuahna a hoih lam ki piak ngai veve hi. Huaiziak in:

1. Sorkar in semtu ding hon lak theih uh om ding in lamen ni.
2. Semtu ding hon lak chiang un post awng tam mahmah ding in lamen ni.
3. Post awng a tam zoh peuhleh mass recruitment om ding in lamen ni.
4. Mass recruitment om leh lohchinna ding chance lianzo ding in lamen ni.
5. Mass recruitment om leh cutoff niam zo ding in lamen ni.
6. Sorkar nasemtu a kidaih kei peuh leh result suak baih zo phet ding, calling letter/joining report om baih zo ding in lamen ni.

Lungsim leh ngaihtuahna buai, lungkham leh mangbang kisa a hun I zat lai un, a hoihlam kipe kom in siamsin ten lai hahtak a sim in, sepna zong te hahpan zo sem in, covid in laisim na di hunhoih honpia dan a la in atung a I gen te hong tangtun zenzen leh sepna mu pah ding in kisakhol chiat ni. Huaiteng ban ah, advertisement tuamtuam te en in, qualification ban ah siamna tuam biik poimoh bang om a? chihte en in, hiai hun haksatak I pal sung in a poimoh siamna tuambiik te neih theih dan ngaihtuah kom leng…

Hiaiziak in, tuhun ki sakkhol hun laitak ahi maimah diam?