Innkuan Omkhawm a Hun zatkhawm Poimawhna –
Hun zatna ding tamlua kidaihlou tulaia innkuan sung buai. A sia hikei.
Biak S Tawmbing
Tulaia a innkuante kibuai theilua. A sia bel hilou hinapiin innkuan a hun zatkhawm bel poimawh veve hi. Michih buai-in-buai mahleh, kithuahkhawmna ding hun muh teitei tup poimawh mahmah hi. Nulepate’n kisukhalh, kisawizoi, lawm-le-vual tawh kithuahna hun, nasepna a hahpan, ei kichih theihna dinga I hihte uap vek hi.
I hihnop sepnopte hih leh sem kawma innkuante tawh kithuahkhawmna in omkhawma kihou-kikup khawmna dia hun lemtang hon tun ding hi. Tate tawh lunglut zawng kikup khawmna, ahihk’aleh, nupa a thil hihkhawmna in
lunglut na dan khat-le-khat i kisaina ah, ahoihlam a kitheihtuahna ah hong gahsuah ding hi. I ji I pasal leh naupangte tawh hun zatkhawmna tuh innkuan a dinga hun manpha ahi, ahi ding mawnga ngaihlouh hial ding ahi. Tuabang I geenna in, ji leh pasal in a tuam mawnga hun zatkhawm ding, ahihk’aleh, na hun manpha “ka hun” na chih, na lawmte nasan tawh zatlouh ding, I chihna hilou hi. Hun zatdan, hun hawmlual dan siama, pelloua omkhawm a zat khawm theih ding hun manpha muh ding ahi.
Innkuan Hun
Atamdan lam thu hilouin, ahoihna, atakna lam thu ahi. Hun manpha sak in. Hahpan mahmah a nna I sepa, buai mahmah a I om laia hun manphatdan I latsak theih leh malam sawna I paina I totna lampi dik ahi chih kilang hi Atamdan lam thu sangin a hoihna a taktakna poimawh zaw mahleh a hong tam ‘
In-nkuan hoihna, manphatna te
Midangte’ lunglutna leh sep-le-tawlnate na lunglutpihnate’n amaute na ngaihsakna taklang hi. Na ji na pasal in tha-it mahmah a na nasep kipahpih loulua hiam, ahihka’leh, na ngiimdana na lawhchinnna te a na kisaktheihpih hial leng hithei hi. Mi houlimna a na ngaikhetu, ahoihziaka a na kup behlaptu leh ahoulimna a pangtu na vahihna in na ngaihsakna taklang hi. Thukup paisawnsaktu, a thukuma vapang leh a kihelte kizahtuahtak a gamtatna in ei mahmah a etton ding kibawlin innkuan hoih manphatna ding bawl khia hi. Innkuan a mi khat in lunglut zawng a neia, a lunglutdan a latsak leh nangma’ itna leh lainatna ziaka hong kilangkhia ahi.
Innkuan tawndante
Innkuan adinga tawndan kibawlkhiate tate adinga chikmah hun chianga leng mang nawnlou ding ahoihlam mangngilhmawh ding bawlkhetu ahi. Nang siamzawnga thil na hinte’n hon neitu sak in hon innteek sak hi. Innkuan tawndan, chiindan I chihte – Khristmas’ ni thilthawnpiakte bangchik apan na pepan ua, bangchi’n na pia ua, ahihka’leh, Kiginni tenga etnop en gige na hi uhia, chih tak lang hi. Naupangneu leh tutheipan nau neu nei na hihleh, nau sawnna bawm sunga nau tusak na nih ua nau don kawma nuamtaka na hun uh zangkhawmin, houlima kithuah in sunnitum in hun na zangkhawm thei ding hi
Inn sung leh inn kiim a nnate semkhawma na kithuahkhawm chiang un nau neute, amau mawhpuaknate hilhkawm kihi ahi. Nang a team na hihziakin naupangte hongtel in amau hih ding chiat hong hih mai ding uhi. Nu-le-pate a hong kilat chiang un ann huandan, hahsiangthou dan leh naupangte etkoldante in zuihdia hoih tampi hon musak in, khawvel tawh hon kinai sak zawsem hi.
Innkuan hun phattuamnate:
Innkuan khat hi-a hun zatkhawmna in hon inteek sak diak hi. Naupangte’n mahni innsung lou mun dang ah tuabang innteekna lungsim zona leng muh ding hilou hi. Innkuante tawh zatkhawm theihna dinga hun zong teiteia zat khawm teitei sawm ding, mangngilh mawh dinga hun nuam zat khawma nuihkhawm ding ahi. I phone zatlai khawla, TV khawlsaka, computer leh lungsim lathei adangte khawl sak a, ngaihdan houlim khawma, manphatnate geenkhawma, I thil tuahte geen khawm a sinkhawmna hun zat ding ahi. Mawlna vante zanga kimawla, vakkhekhawma, hun-awng bangle zatkhawm ding ahi. Innkuan khat hi a, hun I zat khawmna in, naupangte’n a tunung ua hun haksa zaw hon tuah chiang un a haksatna uleh a lungsimte uh nuamtakin hon hilh thei ding uhi.
Innkuan hun in muanhuaina, gin-omna tun in kipanpih utna lungsim guan hi. I tate khang haat mahmah ahihziak un, hun I neih laite hoihtak a zat ngeingei ding ahi.
Innkuan chituamtuam leh hong piandan kituam pipi om hi. Innkuan khat I chih tuh neitu hihna leh innteek mahmahna a ziak om hetloua ki-itna mun ahi. I omna, innteek I hihna innkuan in naupangte’ lungsim ah midangte tawh kisaina tanpha ah leng thuzawhna lianpi neiin, pha.ttuampih tampi neiin, hindan ding tampi sinkhia uhi