18th Anniversary Message
Date 09 March 2021
Amasa pen in kum 18 muthei dia hon pi i biak uh Israelte pathian Yahweh tuh thupina tengteng ka pe masa uhi. Aman hon pi lou hi leh satan khemna in kapuk ding ua, kum 18 mel i muthei kei ding uhi.
Anniversary teng in niamchik leh tualniamtak a Zogam.com a hong kipatdan ngaihtuahna ah hong lut sek hi. Huai lai in computer le neizoulou in, Cyber Cafe ah computer zatman pia in Zogam.com ana kipan hi. Mualdawn khuak neutuanlou ana hi ngei ding a, ei sang a nam changkang zaw lusei, naga leh meiteite bang in abawldan ana theihlouh lai un, ei Zomite kithuzaktuahna ding in Zogam.com 2003 kum March 09 in ana kibawl khia hi.
Huai hunlai in tua social media tuamtuam i neihte – Facebook, WhatsApp, Twitter, Youtube chihte ana om naikei hi. Huchi bang ahih man in, Zomite kia lou ei singtangmi tengteng a ding in Zogam.com pen kithuzaktuahna platform hoihtak in pang a, mi tampi in ana phattuampih mahmah ua, tutan in leng i phattuampih lai ngei uh gintak huai hi.
Website etkol i chih thil baihlam hilou hi. Zogam.com hong omkhiak nung in eilak ah leng website tuamtuam hong kisekkhesek mah leh kuitung zou tatak tamlou hi. Mi tuamtuam, nam tuamtuam omkhawmna ahih man in, dohzawhna leh kuhkalna poimoh mahmah hi. Zogam.com bel hattak in pai fefu kei mahleh, amah pai ngeingei in paitou in kum tampi mel ana muta hi. Sum leh pai senna thutuam hita leh soiselna leh demna tampi bang leng ana kikhutou gige hi. I thilbawl leh nasep thilhoih ahih nak leh member a lakh a sim phial omna a mi teng kipahna bawl zou ding in ka kikoih himhim kei uh hi.
News leh kithuzaktuahna platform ahih kawmkawm in, Zogam.com in social awareness ngai poimoh mahmah a, Zogam.com tungtawn in i society ua thil hoihlou leh dikloute a vangkim in kiphoulak zel hi. Hiaite ziak in mipite lak ah awareness hong pung in, i gam a thil paidan kikhek thei bang om in, i khektheih nailouh leng tampi omlai hi. Media khenkhat in ngaihdan agen ngamlouh lai un, Zogam.com in mipi a dia ngaihdan gentheihna platform honsak gige hi.
Information technology khang hita ahih man in, miteng in i khut a information muhtheihna leh thehzaktheihna vanzat i tawi chiatta uh hi. Hiai thilhihtheitak vanzat i zatsiam uh poimoh mahmah hi. I zatkhelh leh nam leh nam kikal ahih kei leh mimal kikal a kinakna bang tungsakthei ahih man in, thu i sim leh i suahte khensiam (filter) dan i siam ua, kua peuhmah hiai toh kisai pilvang ding leh responsible citizen hi chiat ding in ngetna ka hon bawl uhi.
Kum 18 melmuthei a i om uh Zogam.com it leh ngaina member te’n na hon nungthuap ziak uh ahi. Na hon panpihna leh hasotnate ziak un tha ka mu ua, tutan kipaitou theilai hi. Mailam a leng pangkhawm tou zel ni.
Zogam.com damsawt hen la, a khankum khua hong sawt hen!
Admin teng sik leh tang in,
Ginza Vualzong,
Admin and Founder, Zogam.com.