Senvual

Poems | Friday, 25 May 2012 23:27 | Pau Lian | Hits: 913

Senvual

Senlai ngai a tang duang kakuai lai in.
Muikhua zing e maimit laukha toh hual ing.
Lengvan mualkuam akai na hi e.
Kei lungzuan aw ngoumei ching abang e.

Siang ah vualmel ka muding sa'ng e.
Sen a vual deih lung a ka tuahpih sakmel.
Siang ah lah vual mel ka mulou e.
Muikho ziin in albang kadah na lun e.

Kumchin puanbang athak leh kei zuanna hi.
Khokhang lenli vei in lungzuan phawng e.
Khokhang munzang a lengthe akhuan leh.
Vual toh ka lenni a lengthei khuan phawk veng.

Vumpi tangmual kitawi tung ah maw.
Sen a vual toh galkhua vadon veng e.
Ka don nawn louh ding vumpi tangmual tung ah.
Lung ah gampa nuhsawl in liah tah e.

Ka chiahlam a ka thukling kung hawi aw.
Kon loh louh ding aw ken pamlua sa'ng.
Na lamphei katot nawnlouh ding hi e .
Sialluang phungching in na kung ahawi lai na'm?.

Sapkik theihlou senhun leh ka vual ngaih toh .
Sen a vual toh heina galmual ka don ni'n na e.
Pangek mual a vual toh liimsuang kabelh aw.
Pangek mualsuang singbang napou lai na'm?

Vualtoh tong kisang leng,amual kal ah.
Vual mel kamuh na ding in dawh tam leh chi'ng e.
Dawhtam lai ah vual aw ikim lai na'm?
Kimlou laihang ka sen a vualte apal heu hi e.