Dougal Tang Di’n i Lawmlou

Poems | Friday, 25 May 2012 21:11 | VzSiam | Hits: 943

Dougal Tang Di’n i Lawmlou

Melmak gam ah laizom
Lungtuak in i hei ding sa’ng e
Theisen  laizom dialdial in
Ma bang i zamkhawm ding sa’ng e
Lungginlouh zalmang a matlouh
Laizom dougal i tang mai aw
Vaimang nau bang a nui ding hi e

    Khawllai ve aw laizom aw
    I kal simthu khau bang suut ni e
    Pianna mimphung khat hi e
    Kil bang khanna vangkhua khat hi e
    Tomkal gi bang khen vang a
    Dougal tangdi’n i lawmlou e
    
Melmak gamlei  kenliang a
Phuhsing bang khauh ding na ngaih leh
Tongdam nem in hou ni e
Laizom zata ham bang huai va’w
Tu’n lah siallum sung ding kawlchiang
Laizom thamna hikhin zou e
Lelliang kua’n ham bang hon huai diam  chi’ng

Sesum na ngaihman hiam aw
Gamlei lou bang na khual vang hiam
Sesum siahtang bang kai chia
Sum bang hon nial tual ah khia chia
Selung khuam bang gelthak dih va’w
Sesum honsing in na sia zong
Laizomlou in selung na muang na’m

    Tuahlouh simthu lentualkhia ni
    Leidou pal bang hon nang
    Lungtuak in dai bang  nawk ni e
    Sal bang suah na’ng lenkawl
    Galsial bang donkhawm ni e

Hilhchetna:

Mi gam ah unau
Lungtuak in i omkhawm ding ka sa a
Kituak tak a nnasemkhawm dialdial ding ka kisa a
Gintaklouh, mang a matlouh
Unau melma i suah zenzen zaw
Vaite’ nuihna ding phet ahi

    Ana khawl lai in unau
    I kalthu damdam in suut ni
    I pianna/i suahna kibang a
    I khankhiatna khua khat hi a
Tomchik sung kikhen ziak
Melma suak ding in i kilawmkei

Migam kense lak a
Det leh kip a om ding na ut leh
Awnem in kihou ni
Unau kihuai dialdial ni
Tun lah hon hunbit ding thau nangawn
Unaute sihna ahi maimah ta
Genthei kua’n ahon huai diam????

Sum na pahtaakman hia
Gamlei na khual man hia
Sum na dong a
Ahon peloute na thah zomah a
Kingaihtuah thak in
Sum tampi na nei ta zong in
Na unau tellou in na lung a muang tuan na hiam

    Kituahlouh na paikhia ni
    Melma hon nang a om leh    
Kituak in doukhawm ni
Suahtaakna  ni hong suak ding gel-et khawm ni…..
    
[I lak a tualgal/namvai a ki-nawkna om phutphut toh kisai in, adiakkhol in Karbi Anglong ah]