Itna'n Maimit Bang Asuan Hiam

Poems | Saturday, 12 May 2012 14:55 | VzSiam | Hits: 1000

Chiim bang chiim an bang itna'n

Maimit bang asuan hiam chi'ng e
Selung khau bang ka hualhual zong in
Hualhual a hual bansap hi e
Chiim bang chiim an bang itna'n
Sakmel leh duang maimit suanlou e
Nalgo kui dungsun tangliang ke'n zong
Lanu zatamte sinlai ka kuai sam e
Chiim bang chiim an bang itna'n
Sesum leh langlam maimit suanlou e
Tuan a pupa gualgen Khupching in
Sanggah liangthei Ngambawm a itna
Simsing bang gil sial bang lian e
An bang itna melchitna tang hi e
Chiim bang chiim an bang itna'n
Selung va bang pil maimit suanlou e
Selung sok bang mawk zatamte zong
Lungdeih ang ah zal sam uh e
Chiim bang chiim an bang itna'n
Sial bang tat leh nun maimit suanlou e
Sunchin zanchin ninghai kawite zong
An bang it a huai ding bansamlou e
Chiim bang chiim an bang itna'n
Maimit bang asuan hiam chi'ng
Selung khau bang ka hualhual chia'n
Itna achih in suanchiat nei e
Itna achih in suanchiat aneih leh
Ka ngaih lanu itna'n bang asuan hiam aw
Sian in lailung ah tong hon huau ve aw
Lanu' itna tem bang deih ing e
Huan be bang zawl pak bang lou nuam ing

-------------------------------------

Itna taktak in bang a en chih ka ngaihsutsut chiang in le ka ngaihsun khezoukei. Itna taktak in mel a enkei. Kei bang leltak gokung kui bang phet nangawn in leng nungak tampite lung ka kuaisam hi (eichhhh..:D). Neih-le-lam leh sum-le-pai le a en samkei. Khupching in tagah genthei Ngambawm a itna athuuk in azai a, itna chiamtehna (symbol of love) ahong suak hi. Itna in pilna le ateelkei. Mipil ngelloute leng a itte uh ang ah alum sam uh. Itna in gamtat leh mihinzia le a enkei. Sun-le-zan a zu nou tawite zong a it a keem ding a omlou tuankei. Itna in bang pentak en/teel ahia chih ka ngaihsutsut chiang in itna chiat in et tuamchiat nei un ka thei. Huchi ahihleh ka ngaihnou' itna in bang ahia ateel a a-et? Pathian in hon hilh ve aw, ka ngaihnou itna ka deih a, ka kiang ah ka zawl ut a, ka tang nuam.