Zogam Thupuak | 14 July, 2012

Zogam Thupuak | Saturday, 14 July 2012 06:20 | dosrap | Hits: 353

Speaker in hunchiam omlou dingin Assembly session khawlsak

Manipur ah ILP koih din Centre ah nget thukim uh

Imphal, July-13: Manipur Assembly Monsoon Session ah ruling party leh Opposition member-te’n Manipur ah phalna beia state dang apan honglut om theihlouhna ding a Inner Line Permit(ILP) zat ahih theihna dingin India govt in ‘the Bengal Eastern Frontier Regulation,1873’ nuaia provision bawlthak ngaite bawlthak ding leh huai Manipur a koih(extend) dingin nget ding chih kilualtak in thukim uhi. June 12, 2012 akipan Manipur Assembly Monsoon Session leng ni 12 sung sitting om nungin Assembly Speaker Th. Lokeshwor Singh in tuni sunnung in hunchiam omlou ding in khawlsak(adjourned sine die) chi’n Manipur Assembly Secretary in thusuak hi.

         Dr I. Ibohalbi Singh, Th. Shyamkumar leh Th. Biswajit in tuni’n Assembly Session ah Private Members’ Business dan in Manipur ah ILP koih theihna dingin   India govt ah ‘the Bengal Eastern Frontier Regulation,1873’ nuaia provision leng Manipur a koih(extend) hihen chi’n Assembly in thupukna bawl hen chih thusun pawlut uh a, Chief Minister O. Ibobi in huai a hilhchetna ah   ILP koih theihna dingin Manipur govt nuaia omlou hi’n gen a, Manipur leh Tripura ah in thuneihna Bengal Eastern Frontier Regulation,1873 zat hilou ahihman in Congress Legislature Party(CLP) leh Cabinet meeting ah huai provision Manipur a zat dingin Centre nget dingin thupukna bawl ahihdan gen hi.

       Manipur Assembly Session ah   tuni’n Rural Dev & Panchayati Raj Minister Francis Ngajokpa in July 10, 2012 a a puaklut ‘The Manipur Pachayati Raj(7^th Amendment) Bill, 2012’ leh Chief Minister O. Ibobi in July 10, 2012 maha a puaklut ‘The Manipur Parliamentary Secretary(Appointment, Salary and Allowances and Miscellaneous Provision) Bill, 2012’ genkhawm nungin voice vote in passed uhi. Huailou in Chief Minister in zan in House a a puaklut ‘the Manipur Appropriation(No. 3) Bill, 2012 leng tuni’n Assembly in passed hi. Appropriation Bill passed ahih tawh kiton in Assembly Session sungin Deptt tuamtuam 50 in March 31, 20913 tana a sumzat ding uh kigawm 78,303,516,000/- zat theih ding chihna hi.

       Tuni’n Parliamentary Secretaries tungtang genkhawm ahih lai in Chief Minister in opposition lam apan soiselna nasatak om dawnna kawmin Parliamentary Secretaries koih hun ah nasepna fel tuan mahmah din gen a, State Minister rank hiding uh chi’n leng gen hi. Hileleng opposition member-te lungkimtuanlou in ’n hahtakin soisel uh a, vote lakma deuh in Dr I. Ibohalbi, M. Kunjo, Th. Shyamkumar, O. Lukhoi,Joykishan, Th. Biswajit leh Samuel Risom pawtkhia uhi. Hileleng huai thu bel voice vote in pass in om veve hi.

       Chief Minister O. Ibobi in July 6,2012 in government bill tuamtuam 4 -1) ‘the Manipur Value Added Tax(1^st Amendment) Bill,2012’;   2) ‘the Manipur Protection of Interests of Depositors(in Financial Establishments) Bill,2012’   3) ‘the Manipur Professions, Trades, Callings and Employments Taxation(8^th Amendment) Bill,2012’ leh   4) ‘the Manipur Municipalities(6^th Amendment) Bill, 2012’ pawlut a, huaite House in July 9, 2012 in passed hi.

     Tutunga Assembly Session om sungin govt bill tuamtuam 7 passed hi a, deptt tuamtuam 50 in March 2013 tana a sumzat ding uh kigawm Rs. 7,530 crores val passed ahih banah Governor thugen kipahpihna(motion of thanks) House in a pom a, member sisa suunna(obituary reference) leng 1 om hi.Huailou in Committee Report 2,Commission Report 1 leh Paper chituamtuam 6 leng House ah luikhiak(tabled) hi a,Calling Attention 12 leh dotna & dawnna 87 vel om hi’n thutut kingah hi.

Culvert bawlna nasep kipan

Lamka, July-13: CCpur Govt College kong laka IB Road-Tipaimukh Road kisuktuahna kimlak Tipaimukh Road ah BRTF pawlin Culvert bawlthak sawm in JCB zangin lamlian a khuatkuakna mun uah tuni apan Culvert bawl dingin nasep pan uh a, JCB in a kuakna muna leisai omte a nawnkhiak banah labour te’n suang pailut in Culvert bawlna dinga nasepna kipan uhi.

ZYA a CEC te’n meeting nei

Lamka, July-13: Simveng a SYO Hall ah tuni sunnung in Zomi Youth Association(ZYA) Gen HQ a Central Executive Committee meeting om a, ZYA constituent unit tuamtuam apan President leh Secretary-te tel uhi. Huai ah ZYA Constitution bawlthak uh a, Unit, Block leh Region makai ding election om hun ah Unit te’n proposal bawl ngai ding a, kum 21 tunglam mi leh political party a tellou mi ahih ding chi’n bawlthak uhi. ZYA HQ a election omdek chiang in Constituent Unit te’n proposal bawl ding leh kum 21 tunglam mi ahihding chi’n leng bawl uhi. ZYA consultant ding in M.Ginzalian, Kamsuanlun, Dr Neng Ngaih Lian leh Thangzamang guang uhi.

Women Constable 50 in join

Lamka, July-13: Women Police constable dinga lakthakte’n a posting mun ding uh District tuamtuam ah joining report pia uh a, CCpur district ading women constable mi 50 in SP/CCpur office ah joining report pia uhi. Women Constable thak mi 50 teng Women SI Ms Chiinneilam in enkai ding a, niteng a zingsang dak 9:30 in SP office ah roll call om ding a, roll call hun ah kuamah absent theilou ding in SP/CCpur in order suah hi.

Finance Committee meeting om

Lamka, July-13: P.Sianzadong, Chairman, Finance Committee, ADC/CCpur office chamber ah tuni in ADC a Finance Committee te’n meeting nei uh a, Ms Mannuamching, CEO/ADC & i/c DC/CCpur ban ah EO/Town leng tel hi. Huai ah khawpi sung a dukan/dawr chi tuamtuam omte registration thu, toll tax leh thu tuamtuam genkhawm uhi.

Diamond Jubilee lopna om ding

Lamka, July-13:Thanlon sub-divn sunga Mualpheng khua in kum 1937 a EBC saptuam kiphuhkhiak nung kum 75 chinna ‘Diamond Jubilee’ lopna Sept 15-17, 2012 sung nei ding uhi. Huai ah Rev. L. Kham Kho Lun, General Secretary, EBC; Rev. D. Kamchinthang, DS, Thanlon leh Rev. L. Khaikhansong, Field Suptd. Manipur Missions Field te’n thugen ding uhi. Huai hun ah Mualpheng khua apan khangkhia mun tuamutuam a pemkhesate banah khawsung mipi tamtheipen tel ding uhi.

Drug Cell te’n No. 4 mukhia

Lamka, July-13: Police deptt nuai a Drug Cell te'n zan nitaklam dak 3:00 velin New Bazar ah Thonkhanmuan(48) s/o Nengdouthang of Zion Veng, New Lamka akipan in No.4 (heroin powder) gram 9 mukhia uh a, amah leh a khamtheih puak Police station ah piakkhiak in om hi. Police te'n tuni'n CJM court ah ding sak uh a, amah tung ah Police in FIR No.70 (7) 2012 ccp-PS U/S 21 DN & PS (Narcotic Drug & Psychotropic Substance) Act registered uhi.

CDSU election omding

Lamka, July-13: CCpur District Students Union (CDSU) makai thakding telna (election) July17, 2012 in om ding hi. Huai ah President, Vice President leh General Secretary tel hiding hi.

June pay lakna din suaikaih ngai

Lamka, July-13: ZEO/CCpur nuai a teacher leh Grade IV teng in Employees Identification Sheet (EIS) form ah suai kaih chiat ngai chihthu om hi. Employees teng in EIS form a suai akaih/bawl khit masiah uh June 2012 khalawh (pay/salary) hawmkhiak theih hilou ding chi’n Cashier, ZEO’s office apan kiza hi.

UCC pawl meeting ding

Lamka, July-13: United Chiefs Committee pawlin July 14, 2012 zinglam dak 11:00 apan in Sielmat Community Hall ah meeting poimawh tak nei ding uh a, huai ah gam leh lei tungtang genkhawm ding uh a, hausa/chief a tamtheipen telding in theisak uhi.

Sunna

Ruth Manhauching (32) w/o K Neng Joel of Zenhang Lamka tuni zingsang dak 3:00 velin diip na in si phut a, nitaklam in Zenhang Lamka hanmual ah kivui hi.

Gam leh building tax lak hiding

Imphal, July-13: Manipur Assembly in July 9, 2012 a a passed ‘the Manipur Municipalities(6^th Amendment) Bill, 2012’ kichi Act a puan nungin Municipality area a gam(land) leh building omte tax/revenue sun ngai ding chihthu om hi.Hun paisa ah huchibang tax lak chih omlou in Imphal Municipal area a Paona bazar ah Municipality in a bikhiahdan holding tax lak hi’n kigen hi.Hileleng huai leh tu a tax/revenue kibanglou hi’n kigen hi. North-east biala state dangteng in huchibang tax/revenue la vek uh a,Manipur kia in la nailou hi’n kigen hi.

‘Public Emergency’ puang

Imphal, July-13: Joint Committee on ILP System pawlin Assembly in Manipur ah Inner Line Permit(ILP) zat dinga thupukna a bawl ding uh phutna in zan nitak zankim lai akipan in tuni zankimlai tan Manipur pumpi ah ‘Public Emergency’ puang uh a, mun tamtak ah dukan,bazar leh hotel a kikhak banah Gari tai muh ding tawm mahleh buaina thiltung bangmah zak leh theih omlou hi.

MPSC in result puangkhia

Imphal,July-13: Pangei a Forensic Laboratory a Scientific Officer(Mobile Forensic Unit) semding lakna ding in Manipur Public Service Commission(MPSC) saina in direct recruitment om hi. Zanin personality/viva voce test om a, huai result zan mah in puankhiak hi a,Shri Inaobi Singh Maibam(Roll No. 04) appointment piak dinga recommend in om hi.

Assembly News:

Gamdangmi 2,297 hongzin

Impohal, July-13: Manipur ah kum 2007-08 akipan tukum May,2012 tan kum 6 sungin gam tuamtuam apan mi(foreigner) 2,297 in Manipur hongpha uh chi’n Tourism Minister O. Ibobi in tuni’n Manipur Assembly session ah Th. Biswajit,MLA in dotna a bawl dawnna pia hi.CM in a gendan in kum 2007-08 sungin gamdangmi 460 hongzin a,kum 2008-09 sungin gamdangmi 271 in Manipur hongpha uhi. Huaizawh kum 2009-10 in gamdang mi 405 hongzin uh a, kum 2010-11 sungin 431 hongzin uhi. Kum 2011-12 sungin gamdang mi 602 hongzin uh a, kum 2012-03 a May, 2012 tan in gamdangmi 128 in Manipur hongpha uhi.

Manipur in Tourism Policy bawllou a, tulelin Manipur Tourism Policy kichi draft a omlel hi’n CM in gen hi.,

Chief Minister in Paper luikhia

Imphal, July-13: Manipur Assembly Session ah Chief Minister O. Ibobi in tuni’n ‘Manipur Medium Term Fiscal Policy Statement, Fiscal Policy Strategy Statement, Macro Economic Framework Statement and Disclosures(July) 2012)’ tawh kisai paper luikhia hi.

Electric meivak ngah dotna bawl

Imphal, July-13: Vungzagin Valte,MLA(Thanlon A/C) tuni’n Assembly session ah Thanlon leh Tipaimukh A/C biala electric meivak ngahzah tungtang dotna a bawl Chief Minister in a dawnna ah Thanlon A/C ah electric meivak piaka om khua khat leng omlou a, Tipaimukh A/C ah bel khua 11 ah electric meivak piak hi uh chi hi.Tu dinmun ah Thanlon A/C ah khua 69 in electric meivak ngahlou uh a,Tipaimukh A/C ah khua 39 in ngahlou uh hi’n leng CM in gen hi. Huai bial(A/C) 2 a electric meivak ngah nailoute March, 2013 tana piak dia tup hi’n CM in gen hi.

Old Age Pension sum dinmun

Imphal, July-13: Dr I. Ibohalbi Singh,MLA in tuni’n Assembly session ah Old Age pension sum tungtang dotna a bawl Social Welfare Minister AK Mirabai Devi in a dawnna ah financial year 2011-12 ading Old Age Pension sum lakkhiak(encashed) hi a,District tuamtuam a Social Welfare Officer te’n a sum in hawmkhe ding uh chi’n gen hi.Minister in a genzelna ah Ukhrul dist a Pensioner-te lakah Old Age pension sum hawmkhiak hi a,district dangte ah leng tukha sunga hawmkhiak hiding in gen hi.

Nagaland bandh beipah din lam-en

Imphal, July-13: Home Minister Gaikhangam in tuni’n Assembly session ah a gendan in Kohima(Nagaland) apan Gari gute matkhiak ahih banah a Gari leng muhkhiak hita a, huaiziakin Nagaland apan Manipur a lut ding Gari ‘bandh’puankhumte’n a tawpsak baih uh gintakhuai chi’n gen hi. Aman a genzeldan in Gari gute leh gari leng Nagaland Police a piakkhiak ding in Director General of Police,Manipur leh Manipur DGP kithuzak touzel uh hi’n gen hi. Bandh bei hunhun in Manipur ah thautui puaklut hiding a, thautui taksapna leng azia om pah ding chi’n Minister in gen hi.