Zogam Thupuak | 06 July, 2012

Zogam Thupuak | Friday, 06 July 2012 05:58 | dosrap | Hits: 465

DC makaih in RKS Governing Body meeting om

Lamka, July-5: DC/CCpur Ms Jacintha Lazarus, IAS makaihna in tuni sun dak 12:00 in DC office a BRGF Resource Centre ah Rogi Kalyan Samiti(RKS)/ Hospital Management Society Governing Body meeting om hi. Meeting ah Member -Secretary Dr. N. Paulginthang, Medical Suptt, Dist.Hospital in Hospital tawk kisai report bawl a, huaizawh in RKS Governing Body member thak ding in PRI representative din Dr. LFTusing; N. Ginsianlal, Advocate; J. Lhungdim, IRS (retd); Goihzachiin, Principal FHWTS; D. Khuala Vaiphei, Distt Prog. Manager, DHS; Seiboi Mate, Dist Data Manager, DHS, Baria-udin Shah, Dist Finance Manager, DHS leh Mrs. Mannuamching, CEO/ADC guang uhi. RKS Executive Committee a Chairman di’n Dr. N. Paulginthang l leh Member Secretary di’n Dr. Paulunmang , Dy. Suptt/Dist Hospital guang uhi. Huaiban ah RKS Monitoring Committee a Chairman din Dr. Tualkhankham, Med Supdt(retd) leh member Secretary di’n D. Khuala Vaiphei guang uhi. Tuni a member dia guanthak a omteng July 10, 2012 in DC office ah meeting nei ding uh a, huai ah ISO Consultant, Instrument Calibration, staff shortages leh waste management telin thutuamtuam genkhawm ding uhi.

Official 3 in Rayburn College enkhia

Lamka, July-5: Rayburn College in Manipur University(MU) ah permanent affiliation ngah theihna dia ngetna a bawl utawh kisai in MU a College Development Council apan Prof. N. Deva Singh, Head of deptt, Settlement Geog& Agri Geography; Dr. MC Arun, Associate Prof, Social & Culture, Anthropology leh Dr. I. Gambhir Singh, Reader Language (ELT), Sociolinguistics te’n tuni’n Rayburn College pha in thil omdan enkhia uhi. Rev Khen P.Tongbing, Principal Rayburn College leh Rev Vung D.Tombing, Chairman, Managing Board in MU teamte kimuhpih in document tuamtuam a etkhawm ban uah thil omdan genkhawm uhi. Official 3 te’n Geography, English, Sociology leh Commerce stream a Honours subject lak theihna dia Rayburn College apan ngetna on leng enkhia uh a, deptt tuamtuam a faculty-te samkhawm in houlimpih uhi.

Anngawl a thumna om

Lamka, July-5: Tuibuong a ECA church ah tuni zingsang dak 7:30 akipan in Halleluyah Prayer Band makaihna in Town area anngal thumna om hi. Huai ah Rev H.Zengzatun, Chairman HPB Town area in Pathian thu gen a, Hemkhomang, M.Th Lecturer, ECT makaihna in mipi in anngawl a thumna hun zang uhi.

Kipahpihna program om ding

Lamka, July-5: KSO/Samulamlan block te’n July 7, 2012 zinglam dak 11:00 in Lukhumbi Community Hall ah KSO/Samulamlan block sunga KSO member tukum class X & XII examna a 1^st & 2nd divn a passed-te kipahpihna ‘2nd Felicitation Program’ nei ding uh a, Joseph Lalrothang, ZEO/CCpur khuallian hiding hi. Functional President in Peter Lienjela, BDO/Samulamlan pang ding a, Guests of Honour in Thangpi, EO; Reikhupsong Kom, Social Worker leh Pakasana, DI of Schools pang ding uhi. Programme zatna hun ah Rev P.Mangte in lawhchinna ngahteng thumsak ding hi.

Dean Academic building nasepna

Lamka, July-5: SPA 2011-2012 fund zangin CCpur govt collge a Dean academic building 1^st floor nasepna pailel a, nasemtute’n inntung sung lel uhi. 1^st floor nasepna zawh hun in 2 nd foor leng sutzop hiding in kigen a, nasepna lungtunhuai in hoih mahmah chi’n kigen hi.

Microcopist -te meeting pih ding

Lamka, July-5: Dr HL Liensang, CMO/CCpur in July 6, 2012 in Malaria deptt a Microscopist mi 11 meeting neihpih ding hi. Huai ah Microscopist-te amau sepna mun(place of posting) chiat a om ding thu, blood slide etna tawh kisai a haksatna leh thu poimawh dangdang omte genkhawm ding uh hi’n kigen hi.

Khuaibawm ngettheih

Lamka, July-5: CCpur dist ading Khuai bawm (Bee Box) bangzah hiam hongtung a, adeih te'n Dist Hort & SC office ah ngetna gelh in piak theih ding a, a pelut masasa in khuai bawm tangkha masa ding uh hi'n kigen hi.

Police-te’n numei 1 apan No.4 mukhia

Lamka, July-5: Police nuaia Drug Cell te’n tuni sunnung dak 2:00 velin Old Bazar ah Ngaikholhing (45) d/o (late) Siemkhohao of Ukha Gate apan No. 4(heroin powder) gram 2, sum atuat in Rs 2800 vel man ding mukhia in Police Station ah pekhia uhi. Ngaikholhing in bangzahvei hiam No. 4 leh khamtheih dangdang Lamka a hong supply zel hi’n Drug Cell te’n gen uhi. Amau pawlin tuni zinglam in New Bazar a Super Market kibawlthak tung ah No. 4 a kikap hunkhop tuak kha in gawtna a piak zawh un nawhkhia uh hi’n kigen hi. Drug Cell ah tulelin Sub Inspector 1 makaihna in constable 7(pasal 5 leh numei 2) om uhi. Ngaikholhing tung ah Police te’n FIR No. 67( 7) 2012 CCP- PS U/S 21 NDPS (Narcotic Drug & Psychotropic Substance) Act registered uhi.

Speaker in Committee 9 bawlkhia

Imphal, July-5: Manipur Assembly Speaker in kum 2012-2013 sunga dingin Committee tuamtuam 9 bawlkhia hi. Huai dungzui in  1) Committee on Govt Assurances ah Chairman-T. Mangibabu,MLA hi a,member 6 om hi.    2) Committee on Delegated Legislation a Chairman-W. Brajabidhu Singh hi a,member 6 om hi.  3)Committee on Petitions a Chairman-L. Nandakumar Singh hi a, member 6 mah om uhi.   4) Rules Committee ah leng member 6 om a,Speaker in Chairman hihna len hi.   5) Committee on Privileges and Ethics ah Chairman-Dy Speaker hi a,member 6 om uhi.   6)Library Committee ah leng Dy Speaker mah Chairman hi a, member 6 om hi.    7) Committee on the welfare of SC & ST a Chairman-Y. Surchandra Singh hi a, member 6 om hi.    8) General Purpose Committee ah Speaker in Chairman hihna la a,member 6 mah om hi.    9) Committee on welfare of women & children a Chairperson- Smt. O. Landhoni Devi hi a,member 6 om hi.

Mun 2 ah hand-grenade kipaihkhum

Imphal, July-5 : Kakching PS huamsung Kakching Ward No. 1 area a Ningthoupareng mun a om M.Koireng(45) s/o Samu tenna inn ah zan nitak in meltheihlouhte’n hand-grenade 1 paihkhum mahle uh puakzak louin tuni zingsang in Kakching police lakhia uhi. M. Koireng bel Social Worker hi’n kigen hi.

   Huailouin tuni zinglam dak 9:30 velin kuatehiam chih kitheilou pawlkhat in Langol a Shija Hospital compound ah hand-grenade khat pailut uh a, canteen kiang tu mahleh puaklou hi. Police te’n zinglam dak 10.00 velin huai bomb lakhia uh a, Shija Hospital a nin paihna mun ah hihsia uhi.

Combined team in numei 1 man

Imphal, July-5:Thoubal Commando leh 15-Assam Rifles kithuah combined team in  tuni sun dak 12:25 velin Wangjing bazar lak operation a bawlna uah Prepak atel numei khat mankhia uhi. Thusuak in a gendan in amah (O) Indu Devi (41) w/o Yaima Sharma of Tamaram Mayai Leikai hi a, thudotna apan akipuan dan in Prepak a a Finance Commander Surchandra nuaia sem hi’n kipuang hi.

Assembly News

Assembly in Rs. 1017 crores val pass

Imphal, July-5: Tuni’n Assembly Session ah department tuamtuam in March 31, 2012 tana a sum zat ding uh demand tuamtuam 7 kigawm Rs. 10,173,655,000/- crores passed uhi. Huaite

1.Demand No. 6-Transport  : Rs. 5,69,71,000

2.Demand No.8-Public Works Department :Rs.5,68,95,62,000

3.Demand No. 17-Agriculture : Rs. 1,99,50,26,000

4.Demand No. 26-Administration of Justice:Rs.19,93,99,000

5.Demand No. 37-Fisheries : Rs. 30,14,74,000

6.Demand No. 43-Horticulture & Soil Conservation : Rs.47,95,10,000

7.Demand No. 44-Social Welfare: Rs.1,45,17,13,000

Educated Unemployed Allowance

Imphal, July-5: Assembly session ah tuni’n Labour & Employment Minister I. Hemochandra in Manipur in ‘Educated Unemployed Allowance Scheme’ patkhiak sawmlou hiam chihthu Dr I. Ibohalbi,MLA apan dotna a dawnna ah tulelin govt in huchibang policy bawl neilouh hi’n gen a, hileleng laisiam sepna neilou Employment Exchange a ki-registered Matriculate leh a tunglam siamna neite allowance piak ding tawh kisai govt in tunung in policy bawl luinglut hi’n gen hi.

Imphal ah diesel-auto 3500 om

Imphal, July-5: L. Nandakumar,MLA in tuni’n Assembly ah Imphal khawpi sung a Contract Carriar Permit nei a service Diesel-auto om zah dotna a bawl Transport Minister Dr Kh. Ratan Kumar in a dawnna ah Mega-diesel Auto rickshaw 3500 om hi’n gen a, huaite’n passenger drop na ding leh pick-up na ding parking 7 zang uh hi’n gen hi. Transport Minister in a genzelna ah Imphal khawpi sung ah Semi-low Floor Bus 14 tulelin service uh a, tunung zekin Bus 11 hong tun beh hun ah area lianzaw leh mun tamzawsem cover kawmin service ding uh chi’n gen hi.