Zogam Thupuak | 04 July 2012

Zogam Thupuak | Wednesday, 04 July 2012 07:40 | Dosrap | Hits: 436

Budget Estimates,2012-2013 genkhawmna(General Discussion) om

Imphal, July-3:Assembly Session ah zan in Finance tawh lenkhawm Chief Minister O. Ibobi in kum 2012-13 sunga Manipur sum zat ding ‘Budget Estimates, 2012-2013’ a puaklut tuni’n ngentel taka genkhawmna(General Duiscussion) om a, huai ah Chief Minister O. Ibobi in a genna ah Manipur govt in tu financial year sungin lemna leh muanna omna ding banah lamlian leh lei bawlna nasep,meivak leh tuinek kiching ngahna ding tawh kisai ngaih poimawh masak hiding chi’n gen hi.Dr I. Ibohalbi,MLA(Trinamool Congress) in tutung a Manipur Budget mumal lou hi’n gen a, bangbang sep hiding hiam chih kichianlou ahih banah bang nasepna ngaih poimawh masak hiding hiam chih leng bangmah taklat hilou chi’n gen hi.

       Chief Minister O. Ibobi in Dr I. Ibohalbi,MLA thugen dawnna leh hilhchetna pekawm in a genna ah Manipur a lou bawlna lam phatuam ding in Thoubal leh Dolaithabi Project a compoment tuamtuamte nasepkhiakna ding in Minor Irrigation, CADA leh IFCD adingin Rs. 608 crores vel bikhiah(earnmarked) a om hi’n gen hi. Manipur in sum dinmun ah haksatna a tuah ziakin tuailai sepna deihte sepna pekim vuallou ding hi’n Chief Minister in gen a,huai dingin private firm leh company-te’ panlakna poimawh in phatuam petmah ding ahihdan leng gen hi.Gam khangtou leh masawnzawte ah leng private form leh company-te tungtawn in tuailai tamtak in sepna mu uh hi’n leng CM in gen hi.Manipur ah tourist spot leh arts & culture thil tamtak om a,huaite puahhoih zawh ahih hun ah tuailai tamtak in sepna leh mahni kitoudelh theihna ding a phattuampih thei ding uh chi’n leng CM in gen hi.

       6^th Pay Commission in a bikhiah bang Manipur govt in employee-te lawh a piak ziakin maban ah Manipur in sum dinmun tawh kisai haksatna tuak ding hi’n CM in gen a, 6^th pay piak ziaka sum sennate Centre in hong re-imburse kei aleh state govt in kum 1 sung lelin leng lawh a piak ding Rs. 900 crores a bat lak gige ngai ding hi’n gen hi.Kum 2011-2012 sunga lawh tawh kisai a sennate leng Centre in re-imburse tuanlou ahihdan leng Chief Minister in gen hi.

Line bus(Up) leh Direct bus-te kilem

Lamka, July-3: Imphal-Lamka kikal atai line Bus (Up service) nuaia Tata Winger driver khenkhat in June 30, 2012 in Keisampat ah Direct bus (Express bus) driver 1 a soisak ziak un buaina om hi’n kigen a, tuni’n Line Bus (Up service) te’n Kangvai area ah Imphal zuana tai Direct bus-te hihbuai uh hi’n kigen hi. Huai thu ah Elvy Tunglut, OC/CCpur PS in tuni zinglam in Line Bus (Up service) a makaite leh Direct bus a makaite’ samkhawm in kilemna bawlpih hi. Line bus (Up Service ) te’n singpi khai in Direct bus Association makaite kiang ah ngaihdam ngen uh a, maban ah kuamah kihihbuai omlou dinkilemuh hi’n kigen hi. Line bus (Up service) te nuai ah Tata Winger 18 vel om uh a,amau Imphal-CCpur kal ah passenger pua in service uh uhi.

Vuahtui tawmziak in nawngkai

Lamka, July-3: Tukum in Manipur ah vuahtui a tawmluat ziakin mipi tamtak in nawngkaina tuamtuam tuak uhi. Kumdang in June-July lakin vuahtui tam in tuilou(paddy field) te ah buh kisuan mahleh tukum in bel tuni tan in buh suanthei omlou a, tuilou kia hilou in singtanglou (jhumming cultivation) tanpha nawngkhai hi. Lamka khawpi leh a kima khua hunkhop omte Lanva-lui tui ah kingah mahle uh Lanva lui atui tawmlua in kang(dry) phial in om hi. Tulel dinmun banga thil paitouh zel aleh CCpur district ah buhpiang a tawmluat ding ziakin maban ah kialpi tungthei din khop in patauhhuai hi’n kigen hi.

DRDA meeting om ding

Lamka, July-3: Chairman ADC/CCpur makaihna July 7, 2012 zinglam dak 11.00 in a office chamber ah DRDA Governing Body meeting om ding a, huai ah Rural Development nuai a scheme tuamtuamte’ progress omdan genkhawm ding uh hi’n kigen hi

School 11 ading bag hawm ding

Lamka, July-3: CCpur govt H/S ah July 4, 2012 zinglam dak 11:00 apan in CCpur block nuai a school 11 a student-te’ zatding school bag kihawm ding hi. School bag tangkha ding schhol-te Phungkhothang H/S, GM H/S, Vungzagen H/S, Tuibuong Jr H/S, Vimala Raina H/S, Kumbi Pukri H/S, Lanva Model H/S, Rengkai Hr Sec School, Kangvai H/S, CCpur H/S leh Lamjang H/S hi uhi.

Makai lui leh athakte charge kipia

Lamka, July-3: All Lamka Taxi Owners’Society (ALTOS) pawl ah kum 2012-2015 sung vaipaw thak dingte leh vaipaw luite tuni sunnung in Tuibuong bazar a D.Lunkholal tenna inn ah charge kipia uh a, ALTOS Adviser Jam Khua Cin in vaipaw thakte adingin thumsak hi. ALTOS vaipaw thakte ahihleh Chairman-D.Lunkholal, Vice Chairman(Int) -Hegin, Vice Chairman(Ext) -TK Suan Hangzou , General Secy-M.Kaimuanthang, Asst Secy -Th Rokendro, Finance Secy-Dhananjoy, Treasurer -D.Jamkhohau leh Inf Secy -Lalboy hi uhi.

Street light 22 koih hiding

Lamka, July-3: Kamsuanlun, EM/ADC in Bijang a Gedion Enterprises apan Tedim Road zui in Lamka Police Station sak apan Tipaimukh Road tawn in HQ Veng, Lamka West tan ah khawmial hun a vak a, khawvak hun a mit zel street light(automatic solar light) 22 koih sawm hi. Street light post mun dingte ah tuni’n LSC te’n social work in nasem uh a, tunung sawtlou in street light post-te ah street light 22 koih hidin kigen hi.

CT Scan vanzat tung nailou

Lamka, July-3: Dist Hospital a CT Scan vanzat khenkhat a kiguk ziakin Health Minister makaih in Company-te kiang ah vanzat kigumang teng leina din hun sawtsim paita ah Rs 6.25 lakhs deposit himahleh company apan vangmah hongtung om nailou a, mipi adiakin damloute’n ngaklah mahmah uh hi’n kigen hi.

July quota PDS hawmkhia

Lamka, July- 3: HQ Veng, Lamka West a FCS godawn ah zan in Henglep A/C a MLA nominee in agent 50te kiang ah July 2012 quota PDS antang hawmkhia a, tuni in leng sunzom lai uhi. Huaite AAY + BPL antang kigawm quintal 853 hi’n kigen hi. CCpur dist a PDS transport contractor leh DC officete’n ahunhun a thil ahihfel ziakun 2011 apan tunitan PDS antang buaina omlou in hongtung a, kum 2011 a May quota ahihleh National Highway a economic blockade omziak in lapsed kha hi’n Henglep MLA nominee apan kiza hi.

Assembly News

MBBS/BDS Entrance tungtang

Imphal, July-3: L. Ibomcha,MLA(NCP) leh Dr I. Ibohalbi,MLA(Trinamool Congress) in tuni’n MBBS/BDS Entrance tungtang ‘Calling Attention Motion’ a puaklut uh Chief Minister dawnna a piakna ah technical error om ziakin a dikloute bawlding nungin Merit list thak suahkhiak hi’n gen hi.Dr I. Ibohalbi in June 10 a Entrance test om June 11 in merit list suak a, June 22 leh June 23 in leng suak nawn a,huai in thuneitute’n thil diklou hih uh chi’n ngawh hi. CM in Question khenkhat a ‘key’ diklou om ziak a huchibang thil om hizaw in gen a, seat ngah ding ah kichet hun in Open Counselling om ding a,huchi’n Selected list puankhiak hiding chi’n gen hi.Kumlui in JNIMS ah seat 85, RIMS ah 30 leh Central Pool 27 kigawm 142 pha a, tukum in leng huaizah mah ahih ginhuai chi’n CM in gen hi.

Demands for Grants,2012-2012

Imphal, July-3: Manipur Assembly Session ah zan in Chief Minister in kum 2012-13 sunga Manipur sum zat ding ‘Budget Estimates,2012-13’ a puaklut tuni’n genkhawmna(General Discussion) om a, July 4, 2012 akipan in department tuamtuam in a zat ding zah uh bikhiahna leh voting kithuah om ding hi.July 4, 2012 in department tuamtuam 7 in March 31, 2013 tana a sumzat ding uh ‘Demands for Grants,2012-2013’ genkhawm ding uh a, voting in zui ding hi.

Gauhati a Manipur Bhavan

Imphal, July-3: Works Minister Dr Kh. Ratan Kumar in Dr I. Ibohalbi in dotna a bawl a dawnna ah Gauhati a Manipur Bhavan ading furniture leh vanzat poimawhte GAD in a piak phot leh August,2012 sungin hon(inaugurate) theih hiding chi’n gen hi.Works Minister in a genzelna ah Gauhati a Manipur Bhavan bawlzawh hita a, hon ahih theihna ding in akul leh poimawh vanzat tuamtuam kisamlai hizaw in gen hi.Kolkata a Salt Lake mun ah Manipur Bhavan bawlna ding in frame work zawh hi a, fund taksap ziakin nasep zawh hun ding bikhiah theih hilou chi’n leng Works Minister in gen hi.

Delhi Police-te’n Prepak(VC) makai man

Imphal, July-3 : Delhi Police a Special Cell team-te’n tuni’n New Delhi a Gandhi Vihar ah Manipur a helpawl Prepak(VC) a makai poimawh mahmah hi a kigen W. Nanao(30) mankhia uh a,amah taksarung apan document hunkhop banah Manipur a businessmen leh s contractors tamtakte’ phone no. muhkhiak in om hi. Delhi Police te’n Manipur apan helpawl a makai poimawh khat Delhi ah kibu om chihthu azak ziakun hahtakin zong uh a, tuni’n Gandhi Vihar mun apan W Nanao mankhia uh a,mat ahih phetin Manipur police-te theisak uh a, tuni mahin Imphal tut a om hi’n kigen hi.

Police te’n a gendan un W.Nanao in Delhi pansan in Manipur a mihausate lakah sum tampipi demand a, tuate a bank account a thun(deposit) dingin thu pezel hi. Amah kumkhat vel ding Delhi ah om a, National Investigation Agency (NIA) te’ wanted list ah leng tel hi’n kigen hi.

Imphal East district ah I44 Cr PC

Imphal, July-3 : Imphal East district pumpi ah zanhal zingsang dak 6.00 akipan in 144 Cr PC koih hi a, July 27, 2012 zingsang dak 6.00 tan koih hiding chi’n Dist Magistrate/Imphal East in thusuah hi. 144 Cr PC om sungteng pawlam mun khat ah mi 5 sanga tamzaw omkhawm phal ahihlouh banah hiamhei leh galvan tawikhia leng om theilou ding chi’n Dist Magistrate in puang hi. Hileleng 144 Cr PC in Law & Order enkol Police leh Security force-te huamkhalou ding chi’n taklang hi.

Assam Rifles te’n UNLF 2 man

Imphal, July-3: Zan nitak in 9-Assam Rufles te’n Moreh Ward No. 6 lak operation a bawlna uah UNLF atel e O. Naoton Singh (38) of Moreh Ward No. 6 leh O.Bijen Singh Meitei of Moreh Ward No. 7 mankhia uhi. A/R te’n amau akipan in 9mm pistol 1, magazine 1 leh atang 2 banah Chinese handgrenade 2 leh mobile khat mukhia uh a, a vante utawh Imphal West Police ah pekhia uhi.

Meltheihlouhte bomb va koih

Imphal, July-3: Moirang PS huamsung Moirang Lamkhai mun a N Jayanta (35) dukan ah zan nitak sawtnung in meltheihlouhte’n handgrenade khat va koih uh a, huai puaklou in tuni zingsang in police te’n valakhia uhi. Huai bomb kikoih kiang ah ah KCP-MC (Nongrenkhongba) chih kigelhna lehkhathem khat om hi’ kigen hi.

Transfer Posting/

Re-allocation of works

1. 1.V.K. Thakral, IAS, Principal Secretary(RD & PR, Forest and Environment, GAD) as Principal Secretary( RD & PR, Forest and Environment).
2. 2.Norbert Disinang, IAS on return from training as Commissioner( GAD).
3. 3.Kaikhosat Kipgen, MSS, Section Officer(Forest and Environment/DP) as Section Officer( Forest and Environment/DP/MI).