Zogam Thupuak | 29 June, 2012

Zogam Thupuak | Friday, 29 June 2012 06:32 | dosrap | Hits: 502

MLA 6te kipahpihna programme

Lamka, June-28: CCpur District Congress Committee(I) makaite’n June 30, 2012 zinglam dak 11.00 akipan in Synod Hall ah CCpur district apan Congress ticket a MLA ching 6te kipahpihna(felicitation) programme neihpih ding uhi. Mahila Congress akipan kipahpihna thilpiak leh DCC(I) President apan thugenna om masa ding a,huaizawh in Ginsuanhau,MLA (Singngat A/C); Vungzagin Valte,MLA(Thanlon A/C);T. Manga Vaiphei,MLA(Henglep A/C); TN Haokip,MLA(Saikot A/C); Dr Chjaltonlien Amo,MLA(Tipaimukh A/C) leh Phungzathang Tonsing,MLA(CCpur A/C) & Minister in abanban in thugen ding uhi. Thangso Baite,MP(Outer Manipur) in huaihun uap ding a, aman leng thugen ding hi.

DC in Lamka College enkhia  

Lamka, June-28:Tuma a DLCC meeting ah DC/CCpur in kal tengin govt office 1 zel enkhe dinga thupukna om dungzui in Ms Jacintha Lazarus, IAS, DC/CCpur in tuni’n Lamka College enkhia a, huai ah S.Khaikhopau Ngaihte, BO HQ, DC’s office in zui hi. DC in huai college a Head of deptt tuamtuam leh building omdan enkhia a, July 3, 2012 in Head of deptt  te meeting neihpih ding hi’n kigen hi. DC/CCpur in kal paisa ah Sericulture leh SDO/CCpur office veh hi.

Electric naupang 1 man

Lamka, June-28: Ichan Tombi (10) d/o Deva of Saiton village tuni zingsang dak 8:30 velin Saiton khawsung a lui kiang ah electric high tension-gui niamchika omlai chiang (stick) in vasat kha a, electric current in man in sawnkhiak thawh hi’n kigen hi. Ichan Tombi amai (face) leh a khepek kangliam in tu’n Dist Hospital ah om hi

SBI/CCpur Branch te’n ceiling fan pia    

Lamka, June-28: State Bank of India)/CCpur branch kumteng in student-te khualna in school tuamtuam panpihna pia uh a, tuni’n SBI staff te’n Ebenezar Academy vapha uh a, Kaikhanthang, Chief Manager, SBI/CCpur branch in ceiling fan 10 pekhia uhi. Aman SBI kipatdan leh nasepdan taklang a, SBI/CCpur branch in school tamtak omlak ah tukum ading in Ebenezar Academy ah ceiling fan pia hi’n gen hi. Student-te tunung hun a gam nu-leh-pa ding, officer lian taktak hiding leh gam adia kingakna khuampi hiding uh ahihdan leng gen a, kuhkal, chitak leh tupguh hoih neikawm a laisim dingin hasuan hi.Huai hun ah SBI/Pearsonmun branch leh SBI/Thanlon branch a Manager-te banah SBI/CCpur branch staff tamtak tel uhi.

Tipai. road a culvert bawlthak ding

Lamka, June-28: Tipaimukh road- IB road junction (CCpur Govt College kong)a culvert neuluat ziakin vuah azuk chiangin lamlai ah hawktui luang in lamlian segawp hi.DC/CCpur leh Kamsuanlun, EM, ADC/CCpur panlakna ziakin 80- RCC BRFT te'n tuni'n JCB zang in nasep pan uh a, culvert bawlthak dingin hihsia uh a, lamlian toutan uhi. Culvert bawl thakzawh ma in  gari taituah te’n Dist Hospital lam ahihkeileh Thangzam road zuih ngai ding hi’n kigen hi. Culvert hihsiatna kal ah BSNL te’n leinuai a Optic Fibre Cable(OFC) a khun uh hunkhop hihtan in om a, BSLN telephone landline 1600 buai hi’n kigen hi.

Diamond Jubilee suang pawtung  

Lamka, June-28: YPA Gen HQ kiphuhkhiat kum 60 chinna March 3, 2013 a lopna ding tawh kisai in Diamond Jubilee Stone Erection Committee chairman Upa V.Vungzathang makaih in tuni in Shaktiman Gari in Ningthoukhong apan Diamond Jubilee suang ding Lamka pawtung in YPA Gen HQ Hall, Hiangtam Lamka ah koih uhi.

Leaders’ Camp/Seminar om ding

Lamka, June-28: EB C a Baptist Youth Fellowship, Lamka South Divn saina in June 29-30, 2012 sung Elim Veng a New Lamka Baptist Church ah Leaders' Camp/Seminar 2012 om ding hi. Huai ah Rev L.Khamkholun, Gen. Secy EBC in ‘leadership’ chih thupi pansan in leh Pastor T.Thangzasiam, Local Pastor, Sinzawl EBCC in ‘discipleship’ chih thupi pansan in sinsak ding hi. Camp/Seminar ah Lamka South Divn a Bapstist Youth Fellowship makaite tel ding uhi.

Interview ah applicant 4 tel

Lamka, June-28: DRDA/CCpur in Integrated Watershed Management Programmee nuai ah contract basis a Technical Expert ‘A' semding lakna dingin tuni zinglam akipan in ED/DRDA office chamber ah interview om a, huai ah applicant 5 lak ah mi 4 tel uh hi’n kigen hi.

Life Word Seminar for Youth

Lamka, June-28: D. Phailian a ECA Church ah zan nitak in ‘Life Word Seminar for Youth, 2012’  kipan a, Rev. Dr. Ellien Gangte thugenpi apang in Pathian thu gen zelding hi. Huai Seminar ah ECA, D.Phailian apan tuailai 250 vel amun ah giaklut in seminar ah tel uh a, July 1, 2012 in zou ding uhi.

Leisen V/A in kipahthu gen

Lamka, June- 28: Leisen village leh Serhmun ah damlou tampi om in asi tanpha om a, bialtu MLA Vungzagin Valte leh Dr HL Liensang,CMO/CCpur in damdoi tamtak tawh kithuah Medical team a sawl ban uah Dr Chaltonlien Amo, Chairman,HAC in amaute paina ding Gari ngaihtuahsak a, Vula, Social Worker in Medical teamte pi in Leisen khua a tun ziakun Leisan Village Authority a Chairman leh Secretary in haksatna a tuahlai ua panla heutute tung ah kipahthu gen uhi.

Guv thugen kipahpih thu puang

Imphal, June-28: Manipur Assembly Monsoon session ni 2na tuni’n Manipur Governor in March 19,2012 a a thugen(address) bangtanhiam genkhawm nungin kipahpih thu puang uhi.PHED Minister I. Hemochandra leh Works Minister Dr Kh. Ratan Kumar in Governor’ thugen kipahpihna puang ding in motion of thanks pawlut uhi. Huai tawh kiton in L. Ibomcha,MLA(NCP) leh Dr I. Ibohalbi,MLA(Trinamool Congress) in Governor’ thugen kimlou chi’n gen uh bawldik dingin phu uhi.

Chief Minister Ibobi in dawnna pekawm in a thugenna ah govt in Imphal khawpi sung ah water supply scheme ngai poimawh hi’n gen a,PHED leh Power deptt kithuza in Water Supply Scheme tuamtuam ah tui pump khiakna din ahithei tana regular in electric power piak ding a panlak ahihdan gen hi.MGMNREGS tawh kisai a diklou om hiam chih official-te’n sui ding leh govt a report pe dia theihdak ahihdan leng CM in gen hi. Huailou in electric tawh kisai leng govt in ngai poimawh a, ni tenga dakkal 24 sung meivak piakdan ding leng ngaihtuah ahihdan gen hi. Huaizawh in House in Governor thugen tawh kisai motion of thanks pom uhi.

Manipur ah sepna zong mi 7,11,473 om

Imphal, June-28: Directorate of Employment thusuak dungzui in May,2012 khabei tan in Manipur a Employment Exchange tuamtuam a laisiam sepna deih ziaka min pelut teng kigawm 7,12,736 om a, huaite pasal 5,10,639 leh numei 2,02,097 hi uhi.

District tuamtuam ah May,2912 kha bei tana sepna deih a min pelut zah Imphal West district ah 2,28,964; Imphal East ah 1,05,410; Thoubal ah 1,09,466; Bishnupur ah 65,156; CCpur district ah 64,374; Ukhrul ah 28,431; Senapati ah 53,461; Tamenglong ah 22,202; Chandel ah 26,580 hi uhi. Huailou in Special Employment Exchange for Physically Handicapped 2,492 om a, University a Employment Info & Guidance Bureau, Canchipur ah 6,186   om hi.

June 5 zat(observed) zel hiding-GS haupu

Imphal, June-28: Manipur Assembly session ah zan in (late) T. Gougin,ex-Dy Minister suunna(obituary reference) hun ah tuma china UZO President hihna apan kitawp Ginsuanhau Zou @ GS Haupu,MLA in a genna ah T. Gougin sihna Manipur mipite leh singtangmite adin manna thupitak himahleh adiakin Zou community in makai manphatak chan ahihdan gen hi. Aman a genzelna ah ‘Zou Nampi’ Pa(Father of Zou nation)’ chi a minvuah hi a, United Zou Orgsanisation(UZO) Gen HQ in amah theihgigena ding in kumteng in a sihni ‘June 5’ zang(observe) ding a puan ahihdan leng gen hi.

Combined team in Prepak 1 man

Imphal, June-28 : houbal Commando leh 15-Assam Rifles kigawm combined team in tuni zingsang in Sangai Yumpham Palli bazar lak operation a bawlna uah Prepak cadre 1 mankhia uh a,amin Bh. Dinish Sharma(38) s/o Bh. Dijamani Sharma of Khangabok Terapur Khunou Leikai hi’n Police thusuak in gen hi. Combined team in apan akipan in 9mm pistol 1, a tang 4 leh .36 hand-grenade 2 mukhia uhi. Amah kipuandan in May 7, 2012 in Khongjom bazar a Kh. Kulabi Grocery Shop a bomb paihna ah telkha a, May 21 & June 20, 2012 in Khongjom bazar a Th. Dhana Grocery Shop leng bomb paihkhum hi. Kakching area a Oil pump tuamtuam ah demand letter pia hidan in leng kipuang hi.

Assembly Session ni 3 khawl ding

Imphal, June-28: Manipur Assembly Monsoon Session pailel ni 3 sung khawl ding a, July 2,2012(Monday) zinglam dak 11.00 in kipan nawn ding hi.Kanglen ziakin June 29, 2012(Friday) in sitting omlou ding a, June 30,2012(Kiginni) in sitting a omlouh ding banah July 1,2012(Sunday) leng Holiday ahihman in ni 3 sung a kizom in Assembly session khawl ding chi’n Assembly Secretary in thusuah bawl hi.

Mini-ata leh Activa kiphu: mi 1 si

Imphal, June-28 : Lilong PS huamsung Kalikhong ah tuni zingsang dak 6:30 in Mini-Tata (No. MN-05C/0117) leh Honda Activa mi 2 kipua kiphukha uh a, huai ah Honda Activa atuang N. Naba (45) s/o (late) Nageshwar of Khangabok Mayai Leikai si a, azi Mrs N. Aruna Devi (40) liam in Shija hospital ah om hi.Thudang kiza danin tuni sun in Yairipok PS huamsung Keithelmanbi a Dam kiangah meltheihlouhte’n mikhat kaplupsa in nusia uh a, police te’n siluang la in nitaklam dak 4:00 velin JNIMS morgue ah koih uhi.

Nlt. Seminar om ding

Imphal, June-28 : India govt nuaia Ministry of Textile leh Indian Chamber of Commerce, Kolkata kigawmte saina in June 29, 2012 sunnung dak 2:00 in Hotel Classic ah “Seminar on Geotech and Agrotech event in North-East” om ding hi. Manipur Chief Secretary DS Poonia khuallian a pang in Seminar in hong ding a, huai ah J. Lhungdim, IDAS, Planning Adviser NEC leh AB Joshi,Textile Commissioner( Govt. of India) in leng uap ding uhi.

Relief camp ah mi 1189 om

Imphal, June-28: Jiribam a tuilian kiamzek mahleh mun khenkhat tui in tum(submerged) lai a,inn-le-lou tui in a tup ziakin tuni tan in Relief camp tuamtuam 17 ah mi 1189 omlai uhi.

Tuilian in a taih mi 4 laka mi 3 muhkhiak hi uh a, hileleng midang khat pen tuni tan in leng muhkhiak hinailou chihthu om hi. Vuah a zuk nawn aleh tuilian lauhuai thei ding dinmun ah om gige lai hi’n leng kigen hi.