Zogam Thupuak | 19 June, 2012

Zogam Thupuak | Tuesday, 19 June 2012 06:38 | Dosrap | Hits: 569

Gospel for India-te saina in tuni’n VCDS honna om

Lamka, June-18: Gospel for India(GFI)-te saina in tuni’n Rayburn College ah ‘Vacation Children Development School(VCDS)’ kipan a, huai ah Ms Jacintha Lazarus,IAS, DC/CCpur khuallian a pang in hong a, Rev Vungminthang, Director of Institutions, EBC in maban a hunzatdan ding Pathian kiang ah thumna in lan hi. Huai VCDS bel June 23, 22012 tan sunzom ding uhi.

     VCDS honna hun a khuallian apang DC/CCpur in agenna ah hibang a student-te hun awl sunga Pathian thu sinsakna ding GFI te’n program a bawl uh kipahpih ahihdan gen hi. Khawpi sung sianthouna dinga panlakna deihbang in lawhching zou nailou a, VCDS hunsung in Pathian thu kia hilou in sianthouna lam tawh kisai leng naupangte lak ah sinsak ahih deihthu leng gen hi. Naupangte aneu lai uapan lampi dik kawkmuh a sinsak ahih ua leh a pichin nung in leng huai sinsakna zui ding uh ahihdan leng gen a, VCDS lawhching taka zawhsiang ahih deihsak thu leng gen hi.

   VCDS om sung in Dr Jamzathang of People’s Health Foundation; Langkhanpau Guite, Chairman ADC/CCpur; David K.Zote, Dy Register of MU leh Rev Khen P.Tombing, Chief Co-ordinator of PCI(R) te’n thupi tuamtuam pansan in sinsak ding uhi.

Chairman,ADC/CCpur in tuidawn ding koihna hong

Lamka, June-18: Lions Club of CCpur Greater te’n Tedim Road a JP Selection(dukan) ah tuisiang dawn ding(pure drinking water storage facility) a koih uh zan nitaklam in Langkhanpau, Chairman, ADC/CCpur khuallian a pang in hong hi. Aman a thugenna ah Lions Club pawlin tui duhte’n dawn ding tuisiangthoutak mipi khualna a a koih uh kipahhuai sakthu gen a, khawpi sung ah lamlian kawkmuhna dia chiamtehna(road nidication) leng Lions Club of CCpur-te mah zangin tunung in sepkhiak hidin gen a, Lions Club te’n mipi khualna a nasep sunzom zel ding in hasuan hi.

Lions Club of CCpur a President Lion T. Gouzadou in a genna ah tuisiang dawnding koihna(pure drinking water storage facility) ah tuisiang(mineral water) litre 200 tan koihtheih hi’n gen a, Lion Club member phatuamngai khat in Lions Club of CCpur tungtawn in huai tuisiang koihna Rs. 50,000 man thawh hi’n kigen hi.Huai ah tuisiang(mineral water) kia kikoih gige ding hi’n leng gen hi. Zan a programme zatna hun ah Lion member hunkhop paikhawm uh a, Moirang akipan in leng Lion member khenkhat in uap uhi. Lions Club od CCpur bel kum 2008 a kipuahthak nawn hi’n kigen hi.

Minister tunga kipahtu genna

Lamka, June-18: Pearsonmun khua in hanmual thu ah kum tamtak STC/BSF tawh kala thubuai a neih lai un Phungzathang Tonsing, Minister(Health & FW, GAD&CADA) in BSF thuneite kiangah Pearsonmun leh Lanva hanmual tawh kikhektuahna dingin amah gam acre 5 val alian a piak ziakin BSF thuneite’n khua 2 a hausate khut ah pucca patta pekhia uhi. Huai tawh kisai in (June 25, 2012 sun dak 12.00 apan Pearsonmun Playground ah hanmual lopna omding hi. Huai ah Minister Phungzathang Tonsing khuallian hiding a,khawsung mipi in Minister tunga kipahthu genna leh hanmual lopna in bawng 3 gou in ankuang luina om ding hi’n kigen hi.

CCC in akisaipih thuneite’ kiang tun

Lamka, June-18: CCpur Consumers’ Club(CCC) in Chairman,ADC/CCpur kiangah khawpi sung a sazuak khenkhat in mihing adia nektaklou leh damlou tanpha gou in zuak uh chihthu om ziakin Dist Council nuai a kisaipih thuneitute panlasak din ngen uh a,tuban gan gawh dingte mihing adia nek tak(fit for human consumption) mah hihiam chih gawh ahihma a enchiansak gige dingin leng zasak uhi.

Huailouin CCC pawl mahin Asst Controller of Weight & Measures deptt ah leng ngetna pia in khawpi sunga dukan/dawr leh bazar a vanzuak khenkhat in tehna(weight) machine diklou zangin consumer tamtak khem uh a, huaiziakin tubanhuchibang kikhemna a om theihlouhna dingin deptt in ngentel taka enzui gige ding in leng theisak uhi.

Farmers’ Training paitou zel

Lamka, June-18: Integrated Community Development Prgoramme(ICDP)/CCpur-te saina in L. Molvom(Kaprang) khua ah “traditional slash & burn system of farming substitution” chih thiltupa nei in Farmers Seminar pailel hi. D. Khaipao Haokip,MDC in June 16, 2012 in training honna nei a, June 16, 20912 tan training sunzom ding uh hi’n thutut kingah hi.

Sanitation tawh kisai meeting

Lamka, June-18: Kamsuanlun, EM, ADC/CCpur makaih in tuni’n Town Office ah khawpi sung sianthouna ding tawh kisai meeting om a, huai ah Town office staff-te leh Sanitary worker-te tel uhi. Niin pawkhia Gari(Sanitary truck) te’ niin khonkhawm dingdan leh Sanitary woker-te’ vanzat poimawh tungtang leng genkhawm uhi. Khawpi sung sianthou ding deihna ziaka dustbin a niin paih nawnlouh ding chih thusuak om nunga apai teitei om a matkhiat ahihleh sum liausak ding ban ah trade licence cancelled sak hidin gen uh a, kuapeuh in niin kholna ding polythene liante neihchiat ding leh mipi lam in Sanitary truck a nasemte panpih chiat din ngetna leng bawl uhi. Sanitary truck taina ding route leng enthak uh a, mun mun khat ah minute 5 sung khawla niin kaikhawm zelding uh hi’n gen uhi.

SGSY tawh kisai training

Lamka, June-18: DRDA/CCpur saina in June 19, 2012 zinglam in Tuibuong a Dist Training Centre ah Autonomous Dist Council Member(MDC)te ading in SGSY scheme tawh kisai training om ding hi. Huai ah C. Hangshing, ED/DRDA in keynote address gen ding a, ‘concept of SHG & Accounts and Implementation’ tawh kisai Bank te'n sinsak ding uh a, ‘Basic Concept of SHG’ tawh Grace Zamnu, MDC(Muallum) in sinsak ding hi. Huai ah MDC teng tel ding uh hi’n kigen hi.

     Thudang kizadan in June 19, 2012 sunnung in Dist Training Centre mah ah Implementation of Integrated Watershed Management Program tawh kisai ‘Awareness-cum-training program’ om ding hi. Huai ah M. Jugindro, AE (Horti), K. Hnunliansang, AE/DRDA leh Joyce Lalrinpui, PO/DRDA te'n sinsak ding uhi.

PTC Raising Day 63veina

Lamka, June-18: Paite Tribe Council(PTC) tuma a Paite National Council kiphuhkhiatna Tangnuam khua ah June 27, 2012 in ‘PTC 63rd Raising Day’ lopna leh Sinzawl khua a 2nd Paite Nam Khawmpi omlai a recording kibawl DVD cassette honna leng om ding hi. Huai hun ah Paite Customary Law puahphat thak ding tungtang leh genkhawm ding uh chihthu om hi. Raising Day lopna ah Paite community sung apan Minister,MLA, MDC-te banah Orgn leh Assn tuamtuam a makaite leng tel ding uh chihthu kiza hi.

Army 1 damlou in si

Lamka, June-18: Parbung Post a om 38-Assam Rifles ( No. G/3800585H) Chandra Kant Jha s/o Purosotam Jha zanhal post June 16, 2012 nitak dak 7:00 velin gilna ziakin Senvon khua ah operation bawl himahleh damzoulou in si chihthu om hi. Siluang tuni’n RIMS ah post mortem bawl hi a, Parbung Police te’n unnatural dealth (UD) case No. 1/2012 PBG-PS U/S 174 Cr PC registered uh hi’n Police thusuak kingah hi.

Suunna

Niangdim(62) w/o Upa M. Khamkholian of Khominthang, New Lamka zanhal nitak dak 7.30 velin awmna in si a, zan in YPA Hanmual New Lamka ah kivui hi.

Central team tuni’n hongzin

Imphal, June-18 : M. Shashidhar Reddy, Vice-Chairman, National Disaster Management Authority(NDMA), Govt. of India in tuni’n Imphal hongpha a, North Eastern Council(NEC)member P. Shrivastava ; KM Singh, member NDMA leh Prof. Harsh Gupta, member NDMA in hongzui uhi. NDMA Vice Chairman leh a nungzuite’n Imphal hongtun nung uh sawtlou in Manipur Governor Gurbhachan Jagat mu uh a, tuazawh in Chief Minister O. Ibobi’ office ah Manipur State Disaster Management Authority te tawh meeting nei uhi. M. Shashidhar Reddy leh KM Singh tuni nitaklam in New Delhi ah kiknawn uhi.

            P. Shrivastava leh Prof. Harsh Gupta in tuni nitaklam in Manipur University a Science dept. vapha uhi. Amau June 19, 2012 zinglam dak 9:45 in Takyelpat ah Community based Disaster Management Training hong ding uh a, tuazawh in Takyel mun mah a State Training hall ah NCC cadet-te adia Disaster Management training uap ding uhi. Huai zawh in khawpi sung mun tuamtuam a Flood Prone Area te phakual ding uh a, nitaklam dak 4:45 in Delhi ah kiknawn ding uh hi’n kigen hi.

HAC meeting poimawh om ding

Imphal, June-18: State Election Commission in Sept 13,2012 in Panchayat 165 ah election om ding in bikhiah a, hileleng singtanggam teng huamDistrict Council gamgi leh phaijang biala local thila kivaipuakna Panchayat gamgi mumallou leh kikop khakna tanpha mun khenkhat a a om ziakin huai tungtang genkhawm ding in June 23, 2012 zinglam dak 11.00 in Assembly Secretariat-lui a Membrrs’ Room ah Manipur Assembly a Hill Areas Committee(HAC) meeting om ding hi’n thutut kingah hi.

MC Mary Kom kipahpihna zang

Imphal, June-18: Red Shield Division nuai a om Loktak Brigade(Army) te’n Bishnupur district a Kanthai mun ah World Boxing Champion hihna 5vei la MC Mary Kom kipahpihna hun zatpih uh a, huai ah Bishnupur district sung mun tuamtuam apan mi 300 val in uap uh chi’n PIB(Defence Wing) thusuak in gen hi. Summer Olympics om ding ah India gam apan Mary Kom dia telthei dingin numei boxing siam amah kia telkhiak ahi hi.         Col GS Reddy, SM Officiating Commander, Loktak Brigade in GOC Red Shield Division sik-le-tang in MC Mary Kom pahtakthu leh deihsakthu gen a, Manipur apan kimawl mite adia etton tham ahihdan gen hi. MC Mary Kom in leng hibang deihsakna a ngahna tung ah Red Shield Division-te tung ah kipahthu gen hi.

Jiribam bial ah Office 1 kihal

Imphal, June-18: Jiribam PS apan mallam km. 2 vela gamla Kalinagar a Sub-divisional Agriculture office tuni zinglam dak 11.00 velin meltheihlouh pawlkhat in hal uh a, office vanzat(furnitures) hunkhop leh document poimawh bangzah hiam kangtum man hi’n kigen hi. Meikuang muhphet in a kiang naia omkha tengin kidelh huan in meikuang phelh uh a, Fire Fire Brigade Gari in leng delh in office pumpi kangtum manlou deuh in phelhmit zou uhi. Huai office hal kuate hiam chih theih ahih nailouh banah aziak leng kithei tuanlou hi’n gen uhi.

BJP in June 22 a strike zom ding

May-31:India gam pumpi ah May 23,2012 apan petrol man litre 1 ah Rs. 7.25 in khang a, June 2, 2012 in Rs. 2.02 in kiam nawn mahleh BJP makaihna opposition party tuamtuam kigawm NDA te’n petrol man Rs. 7.25 mah a kiam nawn ding a phutna in June 22, 2012 in India gam pumpi ah ‘Jail bharo’ chih kiphinna(strike) neih sawm uhi. Huai ah BJP Manipur State Unit in leng strike lawhchinna ding in hahtaka panla ding uh ahihdan President Shantikumar Sharma in gen a, huai dingin BJP Manipur State Unit in thupukna lakhin uh ahihdan leng gen hi.

A/R te’n galvan mukhia: 1 man

Imphal,June-18: PIB(Defence Wing) thusuak in a gendan in 13-Assam Rifles te’n zanhal in Tamenglong district sung a Khongjirom khawkiang gamlak a search operation a bawlna uah AK rifles 1, 303-rifles magazine 1, AK-47 rifles magazine 1 leh atang 30 banah Kenwood Radio set 1 leh charger 1 mukhia uh chihthu om hi.

     Huailouin PIB(Defence Wing) thusuak dangin a gendan in 43-Assam Rifles te’n zan in Kangpokpi apan simlampang km. 4 vela gamla Kalapahar area ah KRF cadre om chihthu zak ziakin operation bawl uh a, huai ah KRF cadre Kamsei Kipgen s/o(late) Ngamkhai Kipgen of Kholjang(Senapati district) mankhia uh a,amah a kipan in sum ngetna(extortion) khat leh SPM capsules 5 mukhia uhi. 43-Assam Rifles te’n a mi matkhiak uh Imphal West Police Station ah pekhia uhi.

Police te’n Rs. 2 lakhs man zu mukhia

Imphal, June-1:City Police station huamsung MG Avenue lak ah zan nitaklam in SP/Imphal West makaihn a in Police team in special drive bawl uh a, huai ah zu zuaka mun tuamtuam a ban luhna ua pan ‘Chadu Dukan’ kichi zu zuakna inn khat akipan in Rs. 2 lakh man zu chituamtuam mukhia uhi. SP/Imphal West K. Jayenta Kumar in a gendan in khawpi sunga zu zuakna omte ahithei tana beisak tupna in special drive pan uh ahihdan leng gen hi.

President candidate dingin SC Jamir deihthu theisak

Imphal, June-18: Congress party in India President dia candidate dingin Pranab Mukherjee a puan matham in Tamenglong dist sung Tamei A/C apan social activist W. Newmai in UPA Chairperson leh Congress President Mrs Sonia Gandhi kiang ah lehkha thon in senior Congress leader kia hilou in Nagaland Chief Minister-lui leh Goa Governor-lui SC Jamir tutunga President telna ding ah Congress candidate dia guang(nominate) din ngen a, June 2012 khabul in leng Congress govt hunlai a Minister-lui ngen RV Minthing, RK Thekho leh L. Lalit Sing banah retired Army officer RS Jaiswal in leng Sonia Gandhi kiang ah joint memorandum thon uh chihthu om hi.

Kekrupat ah martyr-te zahna in programme om

Imphal, June-18: Indo-Naga ceasefire in a huamkhak sung ding mun bikhiah omlou chih ahih hunlai in huai in Manipur gam leitang kipumkhatna hihsethei dia patauh ziakin Imphal khawpi sung leh phaijang bial ah buaina sousangtak om a, June 18, 2001 a buaina thiltung ziaka mi 18 site tuni’n Kekrupat mun ah suunna leh zahna hun zat hi a, huai ah zingsang dak 5.00 akipan nitaklam dak 5.00 tan mipi tamtak in pak(wreath) leh thilpiak tuamtuam koih uh a, sahkhaw tuamtuamte la(religious songs) sakna leh sisan piakkhawmna om hi. Huai ah Minister leh MLA hunkhop ban ah pawl tuamtuam a makaite, civil society organisation tuamtuam leh mipi tamtak paikhawm uhi. United Committee Manipur(UCM) makaihna in “the 11^th Great June Uprising” chi’n zat hi a, All Manipur United Clubs Organisation (AMUCO) makaihna in “the 11st Unity Day” chih minvuah in zang uhi.

         UCM vaisaina in Kekrupat mun ah programme zat hi a, huai ah UCM President Y. Nabachandra in a genna ah Manipur gam kipumkhatna hihsiat theih dingin tutan leng patauh-huai hi’n gen a, mipite’n pangkhawm leh kithutuak in Manipur kipumkhatna humbit poimawh chi’n gen hi.Tuni a programme zatna ah Manipur gam kipumkhatna kepbitna dinga hinna piate’ innkuante pahtawina piak hi uh a, RIMS leh JNIMS a Blood Bank tawh pangkhawm in phatuamngai mi tamtak apan sisan piakna(blood donation) leng om hi.

       Kekrupat a martyr-te sunna leh zahna piakzawh in AMUCO vaisaina in Thangmeiband a ThAU ground ah leng mipi kikhopna om a, huai ah AMUCO President KT Rahaman in a thugenna ah India govt leh NSCN(IM) ceasefire in Manipur gam kipumkhatna hihse thei dia a om ziakin Manipur mipite lungkimlou in kum 2001 kiphinna om hi’n gen a, tuhun leh maban ah leng Manipur singtanggam leh phaijang biala omte’n kipumkhat kawm in Manipur gam humbit chiat ding in ngetna bawl hi. AMUCO makaite’n zan in martyr site innkuanpih khawsakna lama haksatna thuak deuhte sum-le-pai a huhna leng pia uhi.