Download our Android App | Contact Us at This email address is being protected from spambots. You need JavaScript enabled to view it. | Timeline

S5 Box

ZOGAM.COM Login

ZOGAM.COM Registration

*
*
*
*
*
*

Fields marked with an asterisk (*) are required.

Zogam Thupuak | 27 June 2013

Council Sitting ah thu poimawh tuamtuam genkhawm uh
Lamka, June-26: Tuibuong a om Dist Council Hall ah ah zinglam dak 11:30 in Langkhanpau Guite, Chairman ADC/CCpur makaih in Council member te’n ‘District Council Sitting’ 6 veina,tukum adia 2013 masapen nei in agenda tuamtuam 11 genkhawm uh a, huaite thupukna leng la uh hi.

Agenda masapen ah khawthak(new village) 5- G.Khomunnom, Tallan, K.Phaijang, K. Joar leh Tlangnem khua theihpihna(recognition) bawl uhi.Huaibanah Lamdan Kuki JB School leng Phaihel khua a kisuan ding thu ah ADC office lamte’n study bawl lai ding in thupuk uhi. ADCC nuai a Mid Day Meal atuam a hawmkhiat ding thu ah govt order dungzui in Mid Day Meal Nodal Officer CEO/CCpur in hawmkhe ding in thupuk uhi. Council member leh Employee-te adia Pensioon Benefit tawh kisai in Manipur govt in kum 2007 a gazetted order a suahkhia akintheipen a sepsuah(implement) din govt phutdingin thupuk uhi.

Council nuaia sepna awng (vacant post) leh post thak bawlkhiak(creation of new posts) tawh kisai in tulelin ADCC nuai ah post awng 273 om a, post awng-te leh post behlap ding omte akinlama hukdim ding leh post thak bawlkhiat dingin govt a ngetdin thupuk uhi.
CCpur district a Land records khenkhat Bishnupur a omte leng CCpur district maha transfer kik dingin thupuk uhi. CCpur district inch 1 leng keklou a humbit ding in member-te thupuk in uh a, Sagang village leh Torbung village leng CCpur district sunga om ahih dungzui un gam record teng leng Bishnupur te’n CCpur district ah a piakkik ding uh chi’n thupuk uhi. Singtang gam ah leinuai a thautui zonsuahna ding (Oil exploration) thu ah local govt(MDCs) leh mipite theisaklou a govt in Jubilan Oil Company tawh MoU suai akaih uh poisakthu puang uh a, maban ah local govt leh mipi lungtunna tan a panlak di’n thupuk uhi.

6th Scheduled Demand tawh kisai ah Central Govt in 6th Scheduled provision diktak a piak bangbang CCpur district ah a omtheihna ding in govt ah phut din thukim uhi. Amendment of Council Act 1971 amendment thu ah behlap leh bawllem tuak omteng Chairman makaih in EM leh member te’n June 2013 sung study bawl ding uh a, huchi’n govt a submit di’n thukim uhi. Sitting allowance leng mi 1 in ni 1 in Rs 1000 zel mu dingin bikhiah uhi. August 1, 2013 a Council Day ding lopna ding ah Chairman leh EM teng in hoih asak bangbang ua programme bawl ding in mawhpuakna pia uhi.

International Day Against Drugs Abuse
Lamka, June-26: DSWO, DAPCU, NYK/CCpur leh District Police a Drug Cell-te kigawm a saina in tuni’n Synod Hall, IB road ah ‘International Day Against Drugs Abuse and Illicit Trafficking’ kizang a, huai ah Chief Guest in L. Mangkhogin, IPS, SP/CCpur pang hi.

SP/CCpur in agenna ah khua leh veng teng ah khamtheih zuak om a, inn tamzaw phial ah drugs addict a om ziakin tuailaite maban ding lungzinhuai mahmah hi'n gen hi. Miteng in sum-le-pai deih in poimawh chiat a, himahleh khenkhat te'n mahni sum muhna ding ahih aleh midang’ tate sihna ding leng poisalou tamtak om hi'n gen a, sum-le-pai muhdan leng kivelthak poimawh hi'n gen hi.

Seminar hun ah Police a Drugs Cell te’n Drugs Trafficking sinsak uh a;‘Drugs Abuse &Prevention’chih pansan in IRCANGO leh Drugs & HIV (outcomes of Drugs Abuse) chih pansan in T.Benzamin in sinsak hi.Zing dak 9:00 a painting competition om a result puan banah kipahman hawmna om hi. Category ‘A’ class V-VIII ah Kamliansang of Dawn school, Thangliansiam of Dawn school leh Lunhoihching of Don Bosco Hr Sec School te’n 1st, 2nd leh 3rd la uhi. Category ‘B’ class VIII-X ah Thangthianzo of Dawn school, Jolly Vungthianniang of Children Training Hr Sec School leh Nangminlian Guite of Dawn school te’n 1st, 2nd leh 3rd la in kipahman in trophy + certificate chiat ngah uhi.

Video Album thak latna leh honna om
Lamka, June-26: H Pau Za Cin of New Lamka(G) in a laphuahte Video Album a kibawlkhia tuni in Simveng a SYO Hall ah Rev Dr Sut Khan Thang, Executive Secretary, CBA in lan (dedicate) a, huaizawh in Zomi Council Chairman LB Sonna in hongkhia hi. Huai hun ah Functional President in T. Goukhomang, President, ZYA Gen HQ pang hi. Album honna ah mi poimawh tamtak tel uh a, H.Pau Za Cin in alaphuahte pulakna nei in atamzaw kum 40 vel paisa hunlai a aphuah hi'n gen a, lasiam tuamtuam 6 in la 18 a sak uh Video album ah kikhum hi.

LB Sona in agenna ah gam ngaihla in mi tamtak lungsim ah Nam leh gam itna pia hi'n gen a, laphuakte'n gam ngaihla tamtheipen phuakdin hasuan hi. Global Zomi Council kichi Oct 2013 kha a om ding hi’n gen a, Zomite khawvel pumpi ah kithehdalhta a, laibu bawlte leh Album bawlte’n a siamtheipen a lasading telkhia a, nidang sangin market leng lian ahihziak in kuapeuh lasiam, album bawl leh laigelh siamte’n panla thakdin hasuan hi.

T.Goukhomang in agenna ah H.Pau Za Cin la leh music lunglut hi’n gen a, nam leh gam adia gou manpha la hoihtaktak a phuahna tungah kipahthu gen hi.

DC office leh DIC ah PMEGP loan form ngah theih ding
Lamka, June-26:Govt in PMEGP loan 2013-14 patkhiat sawm a, CCpur dist a target allocation leng bikhiah uhi. Huai dungzui in KVIC ah 31, KVIB ah 31 leh DIC ah 26, aveka a kigawm 88 hi’n kigen hi. PMEGP loan 2013-14 a common application form (KVIC, KVIB, DIC) Tuibuong a DC’s office leh DIC office ah ngahtheih a, applicant te’n a deih pen uh tickmark bawl ngai ding a, June 30, 2013 tan in DIC/CCpur office ah submit ding in S.Khaikhopau Ngaihte, BO Hq, DC’s office in theihsakna bawl hi.

Doctorate Degree ngahthak
Lamka, June-26: S.Lianzathang Ngaihte s/o(late) S. Paukhovung Ngaihte leh Gouzaching of Bungmual’ tate laka sagihna in June 25, 2013 in Manipur University nuai ah Doctor of Philosophy(Ph.D) ngah hi. Aman Prof. M. Jitendra Singh, History deptt, Manipur University in a guide-na nuai ah a thesis gelh ‘The Ngaihtes : An Ethno Historical Study’ chih tungtawn in Ph.D ngah hi. S. Lianzathang Ngaihte in tulelin Manipur University ah Section Officer sem a, a pension na ding kum 4 val deuh lel omta hi.

PTC Gen HQ in chialna bawl
Lamka, June- 26:Pearsonmun Community Hall ah June 27, 2013 zinglam dak 11.00 akipan Paite Tribe Council (PTC) Gen HQ kiphuhkhiak nung kum 64 chinna Raising Day lopna thupi theipen in om ding hi. Huai hun ah Paite Nam sung a Organisation tuamtuam a makaite, Hausa, V’A member teng leh mipite tel ding in PTC HQ in chial hi.

Dr. HH Mate in Award sang
Lamka, June-26:Dr. HH Mate in June 23, 2013 in Hyderabad khawpi sung Westminister Hall ah National award ‘Jewel of India’ leh ‘Outstanding Performance Excellence Award’ sang hi. Dr. Mate in tuni tanin Award tuamtuam 85 vel sang hi. New Delhi a Speaker Hall ah July 29, 2013 in leng ‘Social and Public Service Award’ kichi National Award piak hiding chihthu om hi.

Accident ziakin liam
Lamka, June-26:Tuni zinglam dak 9.00 velin Lamka zuan Auto sunga tuang Samanda (33) s/o Mami of Kwakta a tuanna Auto sung apan kia in liam a, Dist. Hospital puaktung a om in doctor-te’n admit uhi.

SUUNNA
Ms Niangzavung(70) d/o(late) Chinthang of Venglai,Pearsonmun kumzawn ziaka sawttak damlou a om tuni nitak dak 8.45 velin si a, S. Thangkholian Ngaihte’ inn pansan in June 27, 2013 in Pearsonmun hanmual ah kivui ding hi.

ASSEMBLY NEWS
Demand tuamtuam 3 pass
Imphal, June-26:Tuni’n Manipur Assembly session ah Demands for Grants,2013-2014 nuai ah department 3 in March 31, 2014 tana a sum zat ding demand tuamtuam 3 kigawm Rs.5,27,17,07,000 passed uhi. Huaite
1.Demand No. 6-Transport :Rs. 6,54,41,000
2.Demand No. 8-Public Works Deptt :Rs.488,65,96,000 3.Demand No. 50-Information Technology :Rs. 31,96,70,000

Mt Everest a kalte sepna piak ding
Imphal, June-26: K. Sarat Singh,MLA in tuni’n Assembly Session ah dotna bawl in Mount Everest tangdawn kaltung Manipur tuailaite govt in sepna piak sawm hiam chih dotna a bawl Chief Minister in a dawnna ah state govt in kipahpihna ziakin sum pechiat a, sepna iak ding tungtang tunung in govt in ngaihtuah ding hi’n gen hi.

MBBS/BDS Entrance Examination
Imphal, June-26: L. Ibomcha Singh,MLA in MBBS/BDS Entrance examination tawh kisai dotna a bawl Health Minister in a dawnna ah cancelled a om Combined Entrance Examination,2013 a teldia applied candidate 5756 hi uh a, Supreme Court thusuak dungzui in Combined Entrance Examination,2013 omlou in cancelled hi’n gen hi.Minister in Janghemlung Panmei,MLA in lupna 50 om ding Chandel district Hospital dinmun a dotna a dawnna ah Rs. 2136.31 lakh bei ding Hospital bawl zawh hinailou hi’n gen a,tu dinmun ah leng huai District Hospital ah specialist doctor koih(posting) theih hi’n gen hi.

Khuga Project leh Right side Canal
Imphal, June-26: Manipur Assembly session ah tuni’n S. Bira Singh,MLA in Khuga Project leh Khuga Rightside Canal adin kum 2012-2013 sunga sum sanctioned zah a dotna ah Planning Commission in Khuga Multipurpose Project adin investment clearance a bawl Rs.433.91 crores hi a,kum 2012-2013 sung adin Annual Plan lak apan huai Project adia bikhiah Rs.41.28 crores hi’n Minister in gen hi.Khuga Right Main Canal adia tender amount Rs. 13,83,72,233 hi a,kum 2012-2013 sunga sanction zah Rs. 8,27,81,446/- hi’n Minister in gen hi. Contractor 72 in nasem uh a, huaite nasepna tender amount Rs. 12,83,72,233 lakah IFCD in Rs. 8,27,81,446 pekhin hi’n Minister in gen hi.

IMPHAL NEWS
Manipur ah mei dinmun azia om
Imphal, June-26: Ni tamlou paisa sungin Manipur ah vuah tamtak azuk ziakin nawngkaina om zek mahleh electric meivak dinmun bel zuah zuk ziakin azia om zawdeuh hi’n kigen hi. Huaiziakin Manipur khawpi sung leh mun tuamtuam a electric meivak la(consumer) te’n ni khat sungin dakkal 8 akipan dakkal 10 sung electric meivak ngahthei tamtak om chih ahi hi.
Hibang kalah Manipur in electric meivak 42-Mega Watt a ngahna ding Tripura a Pallatana Power Project apaisa June 21, 2013 a India President in a hon himahleh meivak piakkhiakna Gas pipeline a buai ziakin tulai in electric meivak ginatak in pekhe theilou chihthu om hi.

Imphal-Ukhrul road hihbuai
Imphal, June-26: NSCN(IM) te’n May 27, 2012 ni a Irungbam Irabanta a pimang ziak ua Joint Action Committee (JAC) kibawlkhiate’n tuni’n dakkal 24 sung bandh puang uh a, volunteer te’n Imphal-Ukhrul ah gari tai ding a kham uh a, huai lakah bandh khauh mahleh mundang ah bandh khauhlou hi’n kigen hi. Bandh supporter te’n Napet leh Yourbung ah gari khamkhawl uh a, police te’n huai thu azak theihphet uh zinglam dak 10:00 velin tear gas leh mock bomb zangin bandh supporter- te’ hawldalh uh hi’n kigen hi.

Scholarship muloute’ account update ngai
Imphal, June-26: Tribal Affairs & Hills thusuak in a gendan in Post-Matric Scholarship 2012-13 apply ST applicant khenkhat in minor (kum 18 phakma) a Bank account a hon uh kum 18 nung in account details a update louh ziakun SBI Imphal Secretariat branch in applicant- te’ bank account ah scholarship thun sawm mahle uh a system in automatic in transaction khawlsak a, applicant-te’n account ah scholarship a lut theihna dingin minor hihlai a account hongkhate’n a Home Branch chiat uah Major account a update sak dingin theisak hi.

Advertisement rate khangsak ding
Imphal, June-26: K. Meghachandra, Parliamentary Secy(IPR) in tuni’n Secretariat North Block ah media-te’ kimuhpih in a genna ah Govt. apan advertisement rate khansak hiding chih a gen banah media te’n haksatna a tuahte’ uh enkai ding hi’n gen hi. Tulel a Assembly session pailel leng media-te’n ruling leh opposition te’ khentuam omlou in hoihtak a coverage bawl dingin leng ngen hi. Huai ah W. Rajen,Director(IPR), Asst. Publicity Officer(Press) Th. Shamo, AMWJU President W. Shamjai banah print/electronic media apan member tamtak leng tel uhi.

Tuni apan Admit Card kihawm
Imphal, June-26: BSEM saina in July 2, 2013 in HSLC(Compartmental) Examination, 2013 om ding a, Admit card leng BSEM in tuni akipan in hawmkhia(issued) hi. CCpur Private Centre te’n IB Road a Lamka Central School ah June 27, 2013 zinglam dak 10.00 akipan in Admit Card hawmkhe ding uh chihthu om hi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING

Kuateng Online

We have 647 guests and no members online

Lamka Weather
Temperature: 22.2 °C
Dew Point: 21.4 °C
Humidity: 95%
Rainfall (last 1Hr): 0.0 mm
Wind: 6.1 km/h - 80° E
Recorded @ 05:00 on 21 September 2014