Nisin Thuhiltu – 04 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

DGP Manipur in in KFA Foundation suangphu hawnna nei

Kangpokpi, Dec. 3 *(Nisin Thuhiltu)* : D.Phaihel Village, Kangpokpi ah tuni’n LM. Khaute, IPS, DGP Manipur in IPS officer, Kuki CSO leaders, Church leaders, KFA officials leh area leader chuamchuam te uapna tawh Kuki Football Academy Foundation Suangphu hawnna a nei hi. Kuki Football Academy chu Manipur ah Kuki te lak ah
football academy masapen leh Night Tournament bawl thei masapen in a a kigen hi. DGP LM. Khaute in Kuki Football Academy Foundation Suangphu hawnna a nei hun ah a thugenna a chun, Kuki Football Academy chu local khangthak te leh Kangpokpi District ah khangthak te banah Manipur ah khangthak te’n a phatchuampi ding uh kinem hin a gen a, games & sports culture dawpkangna hiding in le a gen hi. Kuki Football Academy in tunung ah Manipur football nasatak ah a siamhawi chuam ding kinem in le a gen a, Manipur ah football association ahiloleh Governing body AMFA a ding ah khuam pawimaw tak hiding leh Manipur football interest ah masawnna a um ding a kinep thu a gen hi.
Kuki Football Academy in khat leh khat kal a biktak ah khangthak te lak ah peaceful environment a piansak ding kinem in le a gen hi. Zia hun matna chu, Christopher Doungel, IPS, ADGP (HG), Manipur, Clay Khongsai, IPS, IGP Zone-I, E. Priyo Kumar, IPS, DIG Range-IV, Lunsieh Kipgen, IPS, AP-II, Kangpokpi SP, M. Pradip, IPS te’n le a uap ua, Christopher Doungel, IPS, ADGP (HG) in KFA flag kaipalna a nei hi. DGP LM. Khaute in Academy Foundation suangphu hawnna a nei bak in, KFA Lottery hawnna le a nei a, Rev. Paongam Chongloi in Pathian kiang in a latna a nei hi. Chun, Manipur Film Star leh Kuki Football Academy in KFA Foundation suangphu hawnna neizaw in football exhibition match a nei ua, entu tam mama in, Kuki Football Academy in 4-3 in gualzawna a chang hi.

Software Engineer ding ah sepna muthak

Lamka, Dec. 3 *(Nisin Thuhiltu)* Indian Institute of Technology (IIT) Delhi ah M.Tech sim lai, Jasper Lalbuatsaih Vaiphei s/o (L) Thianneilal & Lalsiamkim in 2nd December 2017 ni a khan, Campus Recruitment ah Software Engineer ah sem ding in lawtinna a chang hi. Zia chu tawh kitawn ah ama’n Schlumberger Company ah Software Engineer hina tawh sem ta ding hin a kigen a, ama thiamna ahileh Artificial Intelligence lam a hi.

Sendra ah International Disability Day mang

Lamka, Dec. 3 *(Nisin Thuhiltu)* : District Administration, Churachandpur mapuina ah tuni, December 3, 2017 in International Disability Day mat in a um a, kum dang guallo deu in District sung a Differently Abled person-te chu Sendra, Moirang mun ah hun matpi a hiu. Zia hun matna uap ding Persons with Disability-te chu 32 Bn, CRPF bus 2 mang ah Sendra, Moirang tut a hiu a, nung thak kit le a hiu. Hun mang ding te chu Rakesh Balwal, IPS, SP Churachandpur in DC Bungalow mun ah Flag-off bawlna a nei a, Sendra a tun hun ua, gualnawp chi chuamchuam tawh hun matpi a hiu.

Shyam Lal Poonia, IAS, DC Churachandpur in a thugenna a chun, International Disability Day matna ding tawh kisai ah panla chungchuang diak Bn. CRPF, CCI, PASS, FCC, DSWO, IED/SA, CDDU leh ZEO Churachandpur te panlakna pakcha mama kawm in, ziagual hun mat ah a um chu kipak mama hin a gen hi. Rakesh Balwal, IPS, SP Churachandpur in le person with Disability te tawh hun mangkhawm thei ah a um chu kipak hin a gen a, Rajgopal Singh CO, 32 Bn, CRPF in le kipakthu a gen hi. Zia hun matna a chun, prize chuamchuam piakdawna le a um a, lawting tak ah hun mangzo thei uh hin Shyam Lal Poonia, IAS, DC Churachandpur in thusua a bawlna a chun, a taklang hi.

Gospel Visual Album “Pathen in Ei Sol Ui” kiti hawng
Lamka, Dec. 3 *(Nisin Thuhiltu)* : Christian Fellowship Church (CFC) District Headquarter, Tuibuang ah Kochuam member bangzat a hem te kigawmkhawm “Psalm Singers” kiti te’n a siam uh Gospel Visual Album, “Pathen in Ei Sol Ui” kiti Volume I chu tuni, December 3, 2017 sun nung dak 1:00 in Children Sunday School Hall ah a hawnna leh a latna a um hi. Zia hun chu, K. Thangjason Kom, Social Worker in Chief Guest hina tawh a uap a, Lulund Khongsai, Inspector, Manipur Police Telecom Organization in Functional President hina tawh uap in, M. Jamkhothang Haokip, Social Worker in Guest of Honor hina tawh a uap hi. Chun, Chief Guest in Gospel Visual Album, Pathen In Ei Sol Ui Volume I hawnna a nei a, Rev. Dr. Nguljathang, Pastor, CFC in Pathian kiang ah a latna a nei hi. Gospel Visual Album ahileh S. Haopu Kipgen in Music leh Recording a bawl, Jangkholim Haokop in Video a kap leh editing a bawl, Moria Degitech in cover design a bawl, Album sung ah Pathian chawihawina laa 8 um a hi.

Synod Library hawnna nei

Lamka, Dec. 3 *(Nisin Thuhiltu)* : Central Kristien Khanglai Pawl (CKKP), ESC nuai ah Synod Library Project Committee saina’ tuni, December 3, 2017 sunnung dak 1:00 in ESC Secretariat Building, Chiengkawnpang ah Synod Library hawnna leh a latna a um hi. Hun matna, Thangkhoson, Secretary, Synod Library Committee in amapui a, Rev. T. Kampu, President, AAS, Guwahati in Library hawnna nei in, Rev. Thangkhosiem, Executive Director, ESC in Pathian kiang in a latna a nei hi. Synod Library ahileh April 1, 2014 ah kisa pan, Project zawthianna ding ah Rs. Lakh 20 bithiat ah um, Building sakzaw ah a um tawh kitawn ah LL Muona, Boilal, Kamboi, AE PHED leh Siempu te’n labu kawina ding shelves/rack donate a bawl uh a hia, Library chu Religious Section leh Secular Section ah kikhen in, Religious Section ah mi 10 in laibu 400 leh Secular Section ah mi 5 in lekhabu 179 a donate uh muthei ah kawi in a um hi.

KSO/CCpur in Golden Jubilee hun ding chawn
Lamka, Dec. 3 *(Nisin Thuhiltu)* : Kuki Students Organization (KSO), Churachandpur District in December 8, 2017 leh Peace Ground, Tuibuang ah a thupi theipen ah Golden Jubilee mat ding ah kisingsakna a nei zing himaleh lemchanlona, pumpel theilo thil a um ziak ah December 11, 2017 zawk leh mat ding in Golden Jubilee mat hun ding a chawn hi. Golden Jubilee mat hun ding kichawn chu a kuakua’n hiatthiam ding in, Kuki Students Organization (KSO), Churachandpur ah Secretary Information & Publicity in thusua a bawlna a chun a taklang hi. KSO/CCpur Golden Jubilee lawpna hun ahileh Manipur Chief Minister Nongthombam Biren Singh in khuallian hina tawh uap ding a hi.

Missionary Conference-cum- Golden Jubilee mang

Lamka, Dec. 3 *(Nisin Thuhiltu)* : Gospel Centenary Hall, New Lamka ah Evangelical Baptist Convention (EBC) nuai ah Missionary Conference-cum-Missions Golden Jubilee 2017 kimang chu chiatha zing in tuni, December 3, 2017 sunnung dak 12:30 in Golden Jubilee Celebration mat in a um hi. Sunnung dak 12:30 in 1967 a pat Missions nasepna Projector chuamchuam te vel-etkitna a um a, Rev. S. Vung Minthang, General Secretary, EBC in Golden Jubilee suang hawnna nei in, Pathian kiang ah a latna a nei hi. EBC Central Choir in Hallelujah Chorus sakna a nei ua, EBC Mission Field chuamchuam ah sem te’n Mission Field tawh kisai ah Presentation bawl in, Upa Dr. G. Chinkholian, Chairman, CEC in Golden Jubilee Souvenir hawnna a nei a, Rev. V. Thangkhangin, Director of Missions, EBC in Pathian kiang in a latna a nei hi. Rev. V. Thangkhangin mapuina’n Founder Member-te kipakpina thilpiak piakna a um a, Jubilee Prayer Hall Project hawnna nei in, Rev. V. Khamvum, Principal, GBC in hun khakna a bawl hi. Khawmpi ahileh November 30, 2017 nitak dak 5:00 ah Rev. Paukhanmang Guite, Director of Ministries, EBC in a hawn a hia, tuzan in Ceremony Team te mapuina tawh Closing Ceremony mat in a um hi. Chun, Rev. Ginmalsawm, Director of Social Development, EBC in Missionary Conference-cum-Missions Golden Jubilee Celebration 2017 khakna a nei hi.

CM in Persons with Disability te a ding ah “Chief Minister-gi Shotharabasingi Tengbang” scheme hawng

Imphal, Dec. 3 *(Nisin Thuhiltu)* : Indoor Stadium, Khuman Lampak, Imphal ah tuni’n International Day for Persons with Disability mat in a um a, zia hun chu Manipur Chief Minister N. Biren Singh in khuallian hina tawh uap in, pian bukimlo te ding in “Chief Minister-gi Shotharabasingi Tengbang”(CMST) kiti scheme hawnna a nei hi. Chief Minister in a thugenna a chun, state ah BJP-led government thak in mipi te ngaikhawkna neitak pum ah panlak ding chu amapuakna gual ah kawi a hidan gen in, humanity ahiloleh human service sang ah sangzaw leh chungnungzaw thildang kawilo hin a gen a, government in mipi te lungtup leh thildawi sukpitin theina ding ah panlakna nei zing hin a gen hi. Government thak in thinggam ah um te leh phaigam ah um te kal ah gap um chu suk niam theina ding leh state kipum khat theina ding ah panla zing in a gen a, kamkhat kamni ahiloleh kiphinna nei ah kipumkhatna suksiat ziang thei himaleh mipi te kipumkhat sak ding ti chu thil bailam hilo in a gen hi.

Civil society chuamchuam in government tawh kithua ah buaina chuamchuam um te sukven ding ah lunggel a nei uh chu pakcha kawm in, kikhen zak ding kiti chu hunlui ah lunggel hin a gen hi.
Chief Minister in state mipi te chu tu ah government thak in Manipur kipum khat theina ding ah panlakna a nei support leh panlakpi ding in chialna a bawl a, government in state sung ah society ahiloleh community khenchuam leh kawi chuam neilo hin a gen hi.

Tuhun society ah “persons with disabilities” te’n haksat chi chuamchuam a tuak bak ua, kichuam bawlna leh kikhenchuamna tuak zing a hidan uh gen in, “persons with disabilities” te kithuapi theina ding leh panpi theina ding ah “Chief Minister-gi Shotharabasingi Tengbang” kiti scheme hawn ah um hin a gen a, zia scheme chu socio-economic dinmun leh overall welfare dinmun siamhawitu a pan ding kinem hin a gen hi.

Government employee nu leh pa te kawichuam leh khenchuam ah nei, a inn ah chensak nuamlo te chu a maintenance fund uh lakkhen piak (deduct) hiding leh nu leh pa te kithuapina mat hiding in a gen hi. Government in orphan homes ah um naupang te a ding ah schemes/initiatives thak tunung sawtlo ah siamdawk ding hin le a gen a, Social welfare Department ah official te chu “persons with disability” leh teksia (old aged person) te ngaikhawk ding in chialna a bawl hi.

Hun matna uap, Deputy Chief Minister Joykumar in a thugenna a chun, “CM gi Sotharabasingi
Tengbang” kiti scheme thak hawn ah a umna chung ah Manipur khangthu tuhun mat chu tepte thei a hidan gen in, state sung ah “persons with disabilities” te dinmun dawpkang ding tupna ah zia scheme thak chu kihawng in a gen a, scheme thiltup ahileh “persons with disabilities” te’n thawveng tak ah hinkhua amat theina ding uh hin a gen hi. Chun, zia scheme lawtinna ding a chu panlak khawm chiat ding pawimaw in a gen hi.

Minister for Social Welfare and Co-operation Nemcha Kipgen in a thugenna a chun, state sung ah social welfare schemes chuamchuam chiapi ah um te a lawtin thei ngailona ziak chu - awareness, challenges of inter-sectorial co-ordination etc hin a gen a, Chief Minister N. Biren Singh mapuina nuai ah differently-able leh intellectually disable te ding ah scheme thak chu kituptak ah chiapi hiding in a gen hi.

“CM gi Sotharabasingi Tengbang” scheme ahileh chi 5 ah khen in a um a, zia te chu

1. Care-Giver allowances/Maintenance Grant to Persons with disability: Zia hi 80% disable te thasin leh kithuapina Rs. 1,500/- piak hiding, beneficiary te “Swavlamban Health Insurance Scheme for PwD” le cover sak hiding, State Government in mandatory beneficiary contribution Rs. 366 per annum a piak ding, health insurance cover Rs. 2 lakhs (family khat ah mi 4 tiang) a piak ding leh OPD charges le cover ding a hi.

2. Persons With Disabilities in the Age Group of 19-59 yrs: Zia a hi, kitodel theina ding ah government in Manipur Society for Skill Development (MSSD) nuai ah soft loans a piak ding, zia a pat chu sumkawl veina a bawl thei ding ti a hi.

3. Scholarship scheme to students with Disabilities: Zia chu Class I-V te ding ah scholarships - Rs 3,000/-per annum piak hiding, Class VI-VIII te Rs 4,000/-per annum, Class IX-XII te Rs 6000/-per annum, Graduate leh a chunglam te Rs 8000/-per annum piak hiding a hiu.

4. Free travel and concession to persons with disabilities: Zia hi, Manipur State Transport (MST) gari a chuanna taphawt ua, a thawn ah chuansak hiding a hiu.

5. Maintenance grant for homeless older persons: Zia hih ahileh department hiatpina tawh teksia kum 60 chunglam, chate, mo te etc tawh kituaklo ziak ah inn ah um thei talo, haksa tak ah inn-leh-lo neilo ah khawsa te thasin ah kithuapina Rs. 1,000 piak hiding a hi.

Hun mat sung a chun, khuallian hina tawh hun matna uap te’n sheme nuai ah beneficiary banghem zat te kiang in, monetary allowances, scholarships, free travel card leh maintenance grant piak in a um ua, beneficiary mi 900 te’n Care Giver allowance mu ding, beneficiary 140 in Student scholarships muding, beneficiary 286 ten maintenance grant, beneficiary 700 in free travel card leh beneficiary 5 in soft loan muding uh ti a hi.

Zia ah hun matna chu Minister for PWD, IPR, Power Th. Biswajit Singh, Minister for Health and Family Welfare L. Jayantakumar Singh, Minister for CAF&PD Karam Shyam. Minister for Tribal and Hill Areas Development N. Kayasii, Minister for PHED Losii Dikho, Minister for Agriculture V. Hangkhanlian, MLA Dr. Sapam Ranjan, MLA Khashim Vashum, Chief Secretary R.R Rashmi, Additional Chief Secretary Dr. Suhel Akhtar, Commissioner Social Welfare H. Dileep Singh, Director Social Welfare Jacintha Lazarus te’n le a uap ui.

Nimchip ziak ah thina tuak insungmite ex-gratia pia

Senapati, Dec. 3 *(Nisin Thuhiltu)* : Manipur Government thak in, “Go to the Hills” ti thupi nei ah tanggam ah panlakna chuamchuam a nei zing tawh kitawn in zani a khan, Nagaland state tawh gamgi ah um Tamphung Village, Senapati District ah June 14, 2017 ni ah nimchip (landslide) ziak ah thina a la tuak late Puirangzaile (d/o) of late Namzube leh late Ileulungbe (s/o) Haicanglakpe of Tamphung Village insungmite leh liamna tuak mi 6 te kiang in ex-gratia piakna a nei hi. Thina tuak mi 2 te chu ex-gratia Rs 4 lakh chiat piak in a um ua, liamna tuak a serious diak mi 3 -Nhailang s/o Insalung, Insalungbe s/o Haisubing leh Heintiple w/o Nhailang te chu Rs. 12,000/- chiat piak in a um ui. Zia ah ex-gratia piakdawna chu N. Kayisii, Minister of Tribal Affairs & Hills and Fisheries in a nei a, District Administration of Senapati, DC Athem Muivah, Duna Duo SDC Senapati, Dingauhau, Dy. Chairman education ADC Senapati, Kapani ADC Member Senapati, Ex-MDC member ten le a uap ui.

Assam Rifles convoy attack bawl ah PLA kipuang
Imphal, Dec 3 *(Nisin Thuhiltu)* : Revolutionary People’s Front (RPF) army wing People Liberation Army (PLA) zani, (Dec. 2, 2017) Kamjong district, Aishi Village ah medical camp bawl ding ah chia, 31 Assam Rifles convoy attack kibawl chu amau thilbawl hin a taklang a, attack chu PLA nuai ah Tactical Command cadre te bawl hin a gen hi. Chuleh, November 13 ah PLA in Maha Mani Village, Chandel ditrict ah Assam Rifles te attack bawl in a gen a, November 15 ah 4 Assam Rifles te Sajik Tampak ah attack bawl in a puang hi.

Thangmeiband AC ah TUC in Total shut down puang
Imphal, Dec 3 *(Nisin Thuhiltu)* : NSCN-IM leh Government of India Framework Agreement suklat ahilona chung ah Thangmeiband United Club (TUC) in December 7, 2017 leh Thangmeiband Assembly Constituency huapsung in total shut down a puang a, zia chu lung-awilo suklatna hiding in a taklang hi. Thangmeiband United Club (TUC) Vice president Pratap Leishanthem in Framework Agreement details suklat ding demand a hidan uh a gen a, final agreement suai a kai ding uh dodalna bangma neilo himaleh Manipur a sukkhak leh sukkhaklo ding chu ngaikhawk mama uh hin a gen hi.Manipur state sukhalo ding ahileh bang ziak ah tuni tiang ah Framework Agreement details mipi hiat ah suklat lo ah um a hi em? ti dawtna siam in, gukthim thil ah kikawi chu ngaithiamlo uh hin a gen hi. Kiphinna a nei hun ua, political party zosia chu panla chiat ding ah welcome a hidan uh taklang in, total shut down chu zingkallam dak 10:00 a pat nitaklam dak 3:00 kikal hiding, total shutdown hun sung ah, assembly constituency huapsung ah gari kiti himhim taiphal hilo ding, dukan/dawr, business establishment zosia khak hiding, Media leh emergency service te bep thakawl hiding in a gen hi. Thangmeiband United Club (TUC) ahileh Thangmeiband assembly constituency sung ah club 26 kikhaikhawmna a hi.

Committee in December 16 a pat Imphal-Saikul lampi khak ding ah vauna bawl
Imphal, Dec 3 *(Nisin Thuhiltu)* : Peace and Declopment Co-ordinating Committee kiti te’n December 15 masang ngei ah government in lampi siamna nasep a patlo ahileh December 16 a pat Imphal- Saikul lampi khak ding a hidan uh a puang ui.

Manipur press club ah media persons te kiang ah committee member te’n a gendan un, lampi siatak ah um zing himaleh tuni tiang ah siamlo ah um hin a gen ua, Committee, General Secretary Thoudam Hemjit in a genna a chun, Imphal- Saikul road chu hun sawtpi a pat government in limsaklo ah a kawi, tuchung “Ningol Chakkouba Festival” hun ah lampi siat ziak ah a nu leh pa tawh Activa 2 wheeler ah kipua, naupang khat in lampi nalna gari kithawl ah a nu’n a pailai thasuak kha thi a hidan taklang in, lampi hawilo ziak ah tuaksiatna chuamchuam tung zing sek hin a gen hi. Committee in lampi siam ding ah phutna a nei chu 40 Km ah sau, May 24 2016, ah government lui in work order a sua himaleh tuni tiang ah lampi siam ding contractor pali – M/ S Rangnamei, K. Kalachand Singh, M/S Continent leh L. Tarpon te’n tuni tiang ah nasep panlo uh hin le a gen hi.

Chief Minister N Biren Singh kiang ah “Peoples’ Day” hun ah thil umdan tutna a nei hun ua, chuuk guazuk zaw leh nasep kipan ding ah thutiam a bawl himaleh chuuk guazuk taklo nung a le nasep kipatna ding ah panlakna bangma umlo Mr Hemjit in a gen a, government chu contractors pali te work order cancel piak ding leh December 15 masang ngei ah nasep pan ding in chialna a bawl hi.

Manipur Maoist in State Assembly winter session boycott; dakkal 12 sung general strike
Imphal, Dec 3 *(Nisin Thuhiltu)* : Armed rebel group Maoist Communist Party, Manipur in December 20, 2017 leh kipan ding, Manipur Legislative Assembly winter session chu boycott a hidan uh a puang a, zia chu tawh kitawn ah valley area ah um district 5 huapsung ah December 20, 2017 zingkallam dak 5 :00 a pat nitaklam dak 5:00 kikal ah dakkal 12 sung general strike bawl ding uh hin a taklang hi. General strike hun sung a chu, Electricity, medicals, media leh sakhua thil te relaxed hiding in le a taklang hi. Maoist press release in a taklatna a chun, government in public distribution system (PDS) item –annchang leh thautui ahiding gual tak ah a hawpdawlona chung ah Assembly winter session boycott leh general strike bawl ding ah lemsakna a nei uh hin a taklang a, November 5,2017 ah PDS) item –annchang leh thautui kituptak ah hawp ahilo ziak ah general strike a bawl uh himaleh panlakna bangma um chuam daiklo in a gen a, opposition MLAs te tiang in le migenthei te ding ah panlakna bangma neilo un a gen hi. Manipur Maoist in general strike ziak ah migenthei te ma’n haksatna tuak ding a hiu hiatpi himaleh lampi dang um diaklo a hina chung ah general strike ma chiapi ding lemsa uh hin a gen hi.

Shimray in GPRN/NSCN-IM C-in-Chief mawpuakna la

Kohima, Dec. 3 *(Nisin Thuhiltu)* : Government of the People’s Republic of Nagalim (GPRN)/ NSCN-IM in Lt General Anthony Ningkhan Shimray chu “Longvibu” (Commander-in-chief) of Naga Army ding in appoint a bawl a, Camp Hebron ah “Longvibu” (Commander-in-chief) lui Lt General Phungthing Shimrang tawh zani a khan kikhutna a nei ui. Lt General Shimrag term ahileh 28 November 2017 a khah beita hin a kigen a, “Longvibu” (Commander-in-chief) mawpuakna a nutsia tawh kitawn ah Executive Member of Steering Committee ah pansak in a um hi. “Longvibu” (Commander-in-chief) te kikhutsanna hun a chun, Kilo Kilosner (Home Minister) leh President of CNC in thugenna a nei a, Longvibu lui panlakna pakcha kawm in Longvibu thak ding Lt General Anthony Ningkhan Shimray chu GPRN thasik in kipakpi thu a puang hi.

Meghalaya, Rangsakona AC ah NPP workers 200 val in haina siam
Tura, Dec 3 *(Nisin Thuhiltu)* : Meghalaya Rangsakona constituency ah National People’s Party (NPP) workers mi 200 val te’n party a pat haina a siam ua, party’s high command in worker te chung ah nasep thilbawl a neidan uh a lung-awilo ziak ua, haisan a siam uh hin a taklang ui. Haina siam te lak a chun, Rangsakona constituency ah NPP youth president Rajesh N Marak, working president – Kitson Ch Marak, acting president Larson G Sangma leh executive member tamtak a pang ui.

I ginchak gual thil hikhel khello

Tuzan lampi ah teksia khat chia hawi theilo ka tuakkha, khawthim nung ah a chiana di a gamlat leh chia zo ding ah ka ginchâklo ziak in leh kifelsak deu mai in ke'nle a chiana di dawng in thak ding in ka kisa. Ama chu Lamka ah a chanu kiang a chia gua, a zaw leh a umna Old Bazar ah chia di kisa a hi. Ke'nle gari chutsak in a Chanu nu inn lam chu ka zawtpi hi. A inn uh le he dukdak talo dan a hi ziak in kava hawldawkpi hi. Ka va lut ah, a chanu kiang in thil umdan kava gen hi. Ama le a pawsal tawh ka gari kiang lam a chun a hung pawt ua, "Khawi lam vâk lahi em? tuchanchan, bawi nang a hung thak ngalngal zia Veng saklam a khun, ka ute inn ah vathak mai in" ti'n a chanu chun a gen a, zia phat a chun, ka ngaituana’n, bangtia a pianna nu le limsak peilo a hi diam uh ti a um hi. A nu chun, "zia lam a chun kei kachia nuam puai, “ka hung kipatna mun ma in ei thak in” a hung ti kit mai tai. A chanu tawh kina vang ah a hung kinial phat un ke'n le nuamsalo in a utna mun Chan vathak mai ingka ti'n gari ah chutsak in kataidawpi kittai. Lampi a chun a kisuangla a, a kisuanla thu genkawm in Auto a um leh Auto in chia mai ingka a ti phat in keile bawl di kin dang nei ka hi ziak in lemchang kasa, auto parking ah auto hawl piak in a bahara di pia'n ka va thak dawk tai. "Thil hi I ginchâk gual khelkhel hingailo dan a hi"

Ka gen nawp chu - A chanu te’n gari hawitak tak le a nei ua, a inn chan ka va thak tung khale kipak mai uh henla a pianna nu ngei chu, lampi chia dukdak thei le hitalo chu amau gari in vathak mai or a inn ua chu umsak maileu chu kilawm kasak a hi... Amau kikal vang ka hetpi puai....himaleh teksia te ikawi dan uh leh ibawl dan teu ki-etthak ding pawimaw a hidan muthei in a um a, tu hun I thahat, I bawl thei hun gual ah ki um zing mailo ding, hun khat le ei le I damsawt a hi chun, teksia hinkhua kihung mang ding a hi ziak in, zia hun a chu tu ah en I nu I pa I bawl gual in I chateu in hung bawl taleu tu ah I gen teksia hinkhua haksa chu I tuakto ding a hi.