Nisin Thuhiltu – 01 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Offset Printing Machine siat ziak ah ni 3 sung Nisin Thuhiltu hung kihawmdawk theilo
November 27 zan ah 28th November 2017 issue ding newspaper a ki print zinglai ah Offset Printing Machine a siat ziak in newspaper print dawk theilo in a ki um a, Offset Printing Machine siamthiam Mechanic ko ah siam himaleh dawi gual ah machine part mutheilo ah a um ziak in November 28, 29 leh 30 ah Nisin Thuhiltu hung kihawm theilo ah a umna chung in khawk a kisa takzet hi. Mimal hitheina khel ah machine tawh kithua a kihi ziak in news a hung ki hawp theilona chung a hi, simtu te leh dawisaktu te lungkia mailo ding in lahiatthiamnau a hung kidawn a, masawn thei zel ding ah pan hungla zawm chiat ding in chialna kahun bawl ui.
Team Nisin Thuhiltu

CCpur District Hospital ah dân thak chuamchuam siam ah um

Lamka, Nov. 30 *(Nisin Thuhiltu)* : Governing Body,Rogy Kalyan Samiti (RKS), Churachandpur District Hospital in etkawlna tawh kisai ah thupukna chuamchuam a siamteu tawh kisai in tuni, November 30, 2017 sunnung dak 1:00 in Seminar Hall, District Hospital ah Press/Media te kiang in thil umdan taklatna a nei hi. Zia hun a chun, Dr. Vumchinpau Tonsing, Medical Superintendent in Development Plan chuamchuam a nei teu taklatna a nei a, Visiting Hour, Cleanliness Drive/Zone, Hospital Security, Vehicle Parking, Medical Canteen, Bedsheet Color Coding leh Diet te chung ah danthak siam ah um hin a gen hi. Damlote vethei hun (Visiting Hour) ahileh December 1, 2017 a pat zingkal dak 6:00 leh dak 8:00 kikal hiding, nitak dak 5:00 a pat dak 8:00 kikal hiding in a taklang a, damlo khat chung ah visitor card 2 issue hiding, visitor card sumang a um leh Rs. 100 liausak hiding in a gen hi. District Hospital huangsung zosia Cleanliness Drive/Zone ah puan hita a hi dungzui ah kuva tui, muamthei chuamchuam tui hospital huangsung ah siatthak phal hilo ding leh dumzial chep (smoking) le kham a hitak dan a puang hi. Zia ding a chu, CCTV Coverage hospital huangsung ah kawisuak a hitak tawh kitawn ah nikhat ah dakkal 24 sung etzui hiding, dan zuilo a umleh COTP Act 2003 nuai ah Rs. 200 liausak hiding ti’n a gen hi. Hospital Gate ah um Toilet matman ahileh Rs. 10 hita ding, Toilet enkawltu te’n thiangtho tak ah a kawi zing ding uh, zun thakna mun ding siamchuam hiding ti’n le a gen a, Hospital thianthona ding ah a enkawl, Grade IV Sweeper te’n zingkallam dak 9:00 a pat sunnung dak 3:00 kikal ah mun a phiat zing tak ding uh, Hospital Police Outpost ah um Police Personnel le kawibelap hiding, Hospital Gate leh Ward a lut leh pawt enkawl ding ah hiatsak a hidan uh a gen hi.

Vehicle Parking tawh kisai District Administrator panlakna nuai ah Churachandpur Government College leh DC Bungalow kikal ah a pawimaw dungzui ah eviction bawl hiding, zia chu zaw a hi hun hun ah Hospital huangsung ah Staff, Parking Ticket neite bep in gari tawllut theita ding, midang in gate pawlam ah gari a park tak ding uh ti a hi. Medical Canteen le a thiangtho ding leh a kitup thei ding pen ah a um ding, Bedsheet Color Coding ahileh mat ding ah Green, Pink, Blue leh White Sheet, 100 chiat umzing in a gen hi. Zia chu numbering zawthian hun hun ah matpat hita ding, ward a um zosia kigual tak ah a um ding uh ti a hii.

Dr. Thangchinkhup Guite, Consultant, District Hospital, Churachandpur in a genna a chun, India gamsung pumpi ah District Hospital thiangtho pen ah tepte ah um leh award piak ah um a hina chung ah Developmental Plan siamthak ah um a hidan gen in, mipi zui ding ah dan thak kisiam te chu zui bukim thei chiat ding ah panla chiat ding in mipi te chialna a bawl hi.

KKL Complex ah Toilet Shed thak hawnna nei

Lamka, Nov. 30 *(Nisin Thuhiltu)* : Kuki Khanglai Lompi (KKL),Churachandpur in KKL Complex ah Toilet Shed a sak uh zawthian a hi tak tawh kitawn in tuni, November 30, 2017 sunma dak 9:00 in a hawndawna leh a latna a um a, Kamthang Haokip, President, KKL General Headquarter mapuina tawh Onkholun Haokip, Founder President in Toilet Shed hawnna nei in, Ribbon Cutting a bawl a, Pastor Thenjang, KKL Chaplain in Pathian kiang ah a latna a nei hi. Toilet Shed ahileh 2015 ah Manipur State Assembly in tribal te sukha thei ding Bill 3 a passed dawilo ah kiphinna a um hun ah JAC in Office ding ah KKL Complex mat tawh kitawn ah toilet pawimawna liantak a um ziak ah JAC Convener H. Mangchinkhup, Convener Secretary Lalkhohao Chongloi leh Ngahneikim, Spokesperson te’n Deputy Commissioner kiang ah dawtna a siam dungzui ua, Lunminthang Haokip IAS, DC Churachandpur in Toilet sakna ding ah Rs. 1,35,000 sanctioned a bawl mang ah kisa hin a kigen a, zawthian a hi tiang ah Rs. 3,50,000 bei zo in a kigen hi.

Climate Change tawh kisai ah meeting nei
Lamka, Nov. 30 *(Nisin Thuhiltu)* : Rural Women Upliftment Society (RWUS) saina’ tuni’n RWUS Training Hall, Sielmat ah “Improving People’s Access to Sustainable Energy” ti thupi ah nei in Climate Change tawh kisai in meeting a um hi. Zia hun a chun, Devakishore Soraisem, Director Mangaal Enterprise in “Improving Peoples Access to Sustainable Energy leh Improving Peoples Access to Sustainable” ti thupi nei in, ziltilna a nei a, CCpur District a pat CDDU, ECA, ICI, RPC, Forest Department, HYA Saikot, Rengkai Higher Secondary School, For One Life Asia, Shalom, PHED, Radhakrishna Foundation School, Sahei Foundation, Rural Aids Service, Mangaal leh NGO chuamchuam a pat mi 30 val in hun matna a uap ui.

Lamka's Got Talent & Trade Fair um ding
Lamka, Nov. 30 *(Nisin Thuhiltu)* : Team C T Lian saina’ December 9-30, 2017 sung ah Lamka's Got Talent & Trade Fair kiti Rayburn High School Campus ah um ding a hi. A pangnuam te’n Rayburn book store & stationary ah form muthei ding leh thuchian kimzaw kanthei hiding a hi.

Awareness and Registration Camp bawl

Lamka, Nov. 30 *(Nisin Thuhiltu)* : Khuga Dam ah um Khuga Battalion in tuni’n YPA Hall New Lamka ah Mobile Interactive Terminal for Rural Areas (MITRA) nuai in Mobile Career Counseling Cell kiti Awareness and Registration Camp a bawl a, zia hun a chun, khangthak sepna neilo/student te maban lampi ding kawkmuna leh ziltilna a nei ui. Chuleh, Central leh State Government nuai ah scheme leh policy chuamchuam um te le hilchianna bawl in, India Army ah sep ding lunggul khangthak numei pawsal huntiang, a thawn in online registration a bawl piak ui.

KSO/CCpur in Golden Jubilee lawm ding

Lamka, Nov. 30 *(Nisin Thuhiltu)* : Kuki Students’ Organization (KSO) Churachandpur in Golden Jubilee a lawpna ding tawh kisai in tuni, November 30, 2017 sun dak 12:00 in KSO Administration Office, KIC Complex, Tuibuang ah Media Briefing bawlna a nei hi. Lalkhohao Haokip, President, KSO Churachandpur in Golden Jubilee a lawpna ding uh tawh kisai a genna a chun, December 8, 2017 leh Peace Ground, Tuibuang ah Golden Jubilee lawpna um ding a hidan taklang in, zia chu subuai thei ding a chu kuama’n Bandh leh Strike bawllo ding in chialna a bawl a, hun matna uap ding ah chial ah um te’n zia hun chu pello ah uap chiat ding in le chialna a bawl hi.
Chun, Golden Jubilee lawpna hun chu Manipur Chief Minister N. Biren Singh, Cabinet Minister chuamchuam leh MLA hunkhawp ten khuallian hina tawh uap ding, Semjakam Touthang, Founder President in Jubilee Pa hina tawh uap ding hin a gen hi. KSO Churachandpur ahileh December 8, 1956 ah kiphutdawk a hi.

Comedian Hunt, Elimination Round kipan ding
Lamka, Nov. 30 *(Nisin Thuhiltu)* : Lamka Core saina’ a chiatha zing, Comedian Hunt 2017 ah Elimination Round, December 1, 2017 nitak dak 5:30 ah YPA GHQ Hall, Hiangtam Lamka’ kipan ding a hi. Zia Elimination Round chu December 2 nitak tiang ah um ding a hia, zia hun chu Judge te lak ah Sumpi@Sumpandi in special appearance hina tawh tawt bawlna nei ding a hi.

15th Women Prayer Meeting nei

Lamka, Nov. 30 *(Nisin Thuhiltu)* : Women Prayer Fellowship Churachandpur in tuni’n EFCI Church Muollhum Rengkai ah Thy Kingdom Come ti thupi nei in 15th Women Prayer Meeting a nei hi. Zia hun a chun, Women Prayer Fellowship CCpur member te leh prayer team chuamchuam ah member te a chiakhawm ua, pauchapkhawmna nei in, Nu Sangpuii Lawngtlai Mizoram, Rev Dr. Robinson S. Zote, Regional Director, Overseas Missions International Cambodia ten Pathian thugenna a nei ui.

Imphal ah IED bomb 1 mudawk

Imphal, Nov. 30 *(Nisin Thuhiltu)* : Imphal ah tuni zingkal dak 6:30 tuam ah IED bomb khat mudaw ah um in Manipur police bomb disposal squad in a supuak hi. Bomb a hileh Khoyathong Pukhri Achouba simlam ah um Kamdhenu TMT kiti thîk godown shutter kikamna ah kitua a hina ah bomb expert te’n a lakdaw theilo un mipi zosia a mun a pat kithialsak a hi nung ua sukpuak in a um hi. Godown neitu a hileh West Bengal a pat Ajay Patni â a hia, ama’n Dharmasala, Thangal Bazar lak ah dawr 3/4 a etkawl a hi na ah bomb chu sum demand lam tawh kisai ding in a muangmaw u’i.

State Cabinet in Govt employee te ding ah Transfer & Posting Policy thak approve; December 20 ah Assembly Winter Session/Third Session kipan ding ah lemsa

Imphal, Nov. 30 *(Nisin Thuhiltu)* : Chief Minister N. Biren chairman hina nuai in tuni’n Chief Minister Secretariat, Imphal ah State Cabinet meeting a um a, zia hun a chun, Cabinet in Government employee/ servants te ding in Transfer & Posting Policy thak approve a bawl hi. Transfer & Posting Policy thak dungzui a chu, a tangpi mun khat ah posting hun kum 2 sung hiding, a sawtpen ah kum 5 tiang a hiding ti a hi. Government employee/ servants kua hitaleh Transfer & Posting Policy thak zuilo ah politician te ahiloleh thildang mang ah mun khat ah sepden theina ding ah panlakna nei a um leh Civil Services Conduct Rules, Rule 20 kal hi ah kawi hiding, a chung ah action lak hiding ti le a hi. Mun haksa, Hill area ah total period of posting chu kum 9 sang ah tawmzaw/niamzaw ahilo ding, alotheilo ah hill area/ a haksatna mun ah rotation basis ah posting a um tei tei ding, recruitment rules zosia leh Transfer & Posting Policy thak tawh kituak ah heituak hiding a hi.

Schools/Higher secondary schools/colleges leh institutions chuamchuam ah Teachers/lecturer te Transfer & Posting ahileh teaching/learning activity a buailona ding ah academic sessions kichai sin leh um ding ti a hi.

Manipur Governor in December 20, 2017 ah 11th Manipur Legislative Assembly Winter Session/Third Session summon a bawl ding in le State Cabinet in lemsakna a nei a, zialo a chu December 1, 2017 a pat kum khat sung Imphal Municipal Area huap ah Manipur ah Disturbed Area status keklian ding in le lemsakna a nei hi.

Chun, Department of Personnel in 11/11/2016 tiang ah appointment tawh kisai ah applications/proposals um te die-in-harness scheme nuai ah 20 per cent rules tawh kituak ah sukfel ding in lemsakna a nei a, Manipur Police Department nuai ah temporary ah Additional Director General of Police (ADGP) ex-cadre posts pani siamdawbe ding in le lemsakna a nei hi.

Chuleh, Kaikao village leh Khongshang Tri-junction, Tamenglong-Khongshang road ah 15/11/2017 ni, accident ziak ah Manipur Rifles personnel 3 thina tuak insungmi te ex-gratia Rs. 20 lakhs chiat piak ding, liamna tuak te Rs 5 lakh chiat piak ding in lemsakna a nei a, High Court of Manipur nuai ah post 31 siamdawbe ding in lemsakna a nei hi.

Zialo a chun, Right to Fair Compensation & Transparency in Land Acquisition, Rehabilitation and Resettlement Act, 2013 tawh kituak ah Thoubal leh Kakching district ah NH-102 (Imphal-Moreh) lampi keklianna ding gam lak ding in lemsakna a nei hi.

Manipur Sangai Festival 2017 khak hita

Imphal, Nov. 30 *(Nisin Thuhiltu)* : Bheigyachandra Open Air Theatre(BOAT) ah tuni’n ni 10 sung mat ah um Manipur Sangai Festival 2017 khakna (closing ceremony) a um hi. Zia hun chu Manipur Governor Dr. Najma Heptulla in Chief Guest hina tawh a uap a, Meghalaya Governor Ganga Prasad leh Deputy Chief Minister Yumnam Joykumar te’n Guests of Honour hina tawh uap in, Chief Minister Nongthombam Biren in Functional President hina tawh a uap hi.

Meghalaya Governor Ganga Prasad in a thugenna a chun, Manipur siamhawina ding leh tradition, culture leh sports lam ah minthan theina ding ah panlakna a um ding pawimaw in a gen a, Sangai Festival kimatna a pat Manipur hawina khawvel ningtin hiatthei ah um a hidan taklang kawm in, Chief Minister N Biren in hills leh valleys te kal ah kipumkhat theina ding ah panlakna nasatak a nei chu pakcha mama hin a gen hi.

Manipur Governor Dr. Najma Heptulla in a thugenna a chun, Manipur state chu Sangai Festival a pat mitamtak in chawndan lam thil ah a hausakna leh a gam hawina muthei a hidan uh taklang kawm in, Sangai Festival chu traditions leh culture suklatna ding ah platform pawimaw mama ah pang in a gen hi.
Chief Minister N Biren panlakna pakcha kawm in, North East Development Summit ah MoU suai 39 kai thei ah ah a um chu lawting mama a hidan gen in, 11th Manipur Polo International 2017 ah winner team India B Manipur chu kipakpi hin a gen hi.

Manipur Sangai Festival, Closing Ceremony hun a chun, Rajani Ranjan Rashmi, Chief Secretary; L.M. Khuate,DGP;Dr. Suhel Aktar;Additional Chief Secretary(Agri/Adult Education); Shambhu Singh, Additional Chief Secretary(PHE/Forests & Environment);Dr.Suresh Babu, Additional Chief Secretary(Home); K Angami,Principal Chief Conservator of Forests; Paulunthang Vaiphei, Principal Secretary(Commerce & Industries); Vineet Joshi, Principal Secretary(Edn-S/Planning); V.K. Dewangan, CEO,Manipur; H.Deleep Singh, Commissioner(Hr & Tech Edn); M Lakshmikumar, Commissioner(Transport); Th Chittaranjan Singh,Secretary to Governor; K Radhakumar, Commissioner(IPR); Sumant Singh,Secy(IT); Dr.Prem Singh, Commissioner(MOBC); N Ashok Kumar, Secretary to Chief Minister; Clay Khongsai,IGP; Kabib K,SP,Imphal East; Themthing Ngashangva,SP/Imphal West; Chiphang Arthur Worchuiyo, Director(Transport); M Luikham, Director (Commerce & Industries); N Geoffrey, DC Imphal West; Th Chitra Devi; DC Imphal East; N Praveen Singh, Director(YAS); N Gitkumar,Director(MAHUD);Smt Kh Sushila,Director(Arts & Culture), L Priyokumar,MD(MSPDCL); Meghachandra Kongbam,Director(IPR); Dr. K Rajo, Director(Health & Family Welfare); Th Harikumar, Commissioner(IMC); H Sunil Singh, Chief Engineer (PHED), Dr.Th Dhabali,MD, Classic Group of Hotels, Senthur Kumaran,Manager, India Tourism & Bagaton,Project Director(LDA) & Th Joykumar Singh , MD(MANIDCO) te chu lawting tak ah Sangai Festival 2017 mat a hitheina ding ah panlakna a neina chung un chawihawina piak in a um ui.

Protected site ah Moirang Kingdom huapsung puan ah um
Imphal, Nov. 30 *(Nisin Thuhiltu)* : Government of Manipur in Bishnupur district ah Moirang Kingdom huapsung chu Manipur Ancient and Historical Monuments and Archeological Sites & Remains Act, 1976 tawh kituak in “protected site” in a puang hi. M. Laksmikumar Singh, Commissioner (Arts & Culture , Government of Manipur in Governor min ah thusua a bawlna a chun, objection bawl nuam a um khak leh ti ah June 5, 2017 ni, notification sua a hinung ah objection bawl a umlo ziak ah “protected site” ah puan ah um hin a gen hi.

Cycle ah Minister Karam Shyam office kai

Imphal, Nov. 30 *(Nisin Thuhiltu)* : Consumer Affairs, Food and Public Distribution Minister Karam Shyam in Ningani sin leh cycle ah office kai ding ah November 26, 2017 ni, Malom Oil Depot ah Cyclothon hawnna a nei hun ah a puan dungzui in tuni’n cycle mang in, office a kai hi. Old Secretariat ah a office a tun ah Minister Karam Shyam in cycle ah a taina ziak a genna a chun, thautui itchak ding pawimaw a hidan suklatna ding leh mipi te’n thautui a itchak theina ding ua awareness bawlna hin a gen hi. Mi tamtak in cycle ah tai te migenthei dan ah lunggel a nei uh chu san ding pawimaw in le a gen a, state sung ah khangthak te chu school/college leh coaching class ah cycle tawl zachatna gello ding in chialna a bawl hi.