Nisin Thuhiltu – 13 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Naga Framework Agreement chung ah State Congress in kiphinna nei
State Territorial boundary sung ah kivaihawmna chuam pawm hilo ding: Ibobi Singh

Imphal, Nov. 12 *(Nisin Thuhiltu)* : Government of India leh National Socialist Council of Nagaland (Issak-Muivah) NSCN (I-M) in August 3, 2015 ah Framework Agreement suai a kai uh tunung sawtlo ah sukpitin hiding ah gen ah a um zingna chung in tuni’n Manipur Pradesh Congress Committee in Khuyathong Andolan Keithel, Imphal West ah Thangmeiband Block Congress Committee mapuina’ sit-in-protest nei in Framework Agreement taklat ding phutna a nei hi. Opposition leader Okram Ibobi Singh in thuthak lakhawm mite kiang ah a genna a chun, State leh Centre ah BJP mapui government chu Frame Work Agreement suklat ah a umnlona chung in demna a bawl a, government of India leh NSCN-IM in Frame Work agreement tawh kisai Parliament ah khatvei le luidaw ah neikhalo a hina chung ah Framework Agreement chu a kisaikhakpi te ahiloleh parliamentarian te hiatpina panglo hin a gen a, Prime Minister leh NSCNIM in Framework Agreement chung ah selguk nei in a gen hi. Okram Ibobi Singh in a genbelapna a chun, NSCN-IM demand dungzui ah state territorial boundary sukkha, Manipur gamsung ah Naga te ding ah kivaihawmna chuam piak ahileh state mipi’n pawm theilo ding leh solution hilo ding hin a gen hi.

Zia sit-in-protest bawlna a chun, Chief Minister lui leh Opposition leader Okram Ibobi Singh, CLP Leaders JoyKishan Singh, MLA Thangmeiband AC, AK Mirabai Devi , MLA Patsoi AC, Th Lokeswar Singh, MLA Khundrakpam AC, Okram Henry Singh , MLA Wangkhei AC , K Meghachandra Singh , MLA Wangkhem AC , Debabrata Singh , Gen Secy MPCC leh Block Congress leader te le a pang ui.
Hiatthei khat chu, Nagaland Governor PB Archarya in Framework Agreement chung ah tha 2/3 zaw leh final settlement zawthian hiding in a la gen a, thulamleng kit khat chu, Nagaland Assembley election kum kit 2018 March tha leh um ding a hi ziak ah Government of India in NSCN-IM issue chu Christmas masang ngei ah sufel ding ah gen a hi.

Governor in AR Tri-Nation Motorcycle Expedition Team Member te Interaction neipi

Imphal, Nov. 12 *(Nisin Thuhiltu)* : Manipur Governor Dr. Najma A Heptullah in tuni’n Assam Rifles (AR) Tri Nation Motorcycle Expedition team members te Raj Bhavan, Imphal ah kiholimpi in tilkhona a nei hi. Dr. Najma in a thugenna a chun, expedition team member te chu a taivel nau ah experience a neiteu zikdawk ding ah chialna bawl in, lekhabu sua ding pawimaw in a gen a, zia ah experience um te pat chu a hialo ten hiatthiamna nei ding uh hin a gen hi. Freedom fighter Sardar Vallabhbhai Patel hiatzingna ding ah Tri-Nation Motorcycle expedition chiapi ah a umna chung ah guanggaltu te pakcha thu a gen hi. Expedition team member Col. PKS Gaur in Tri-Nation Motorcycle expedition thiltup a genna a chun, (India, Myanmar leh Bangladesh) sepai gamgi venbitna nei te kal ah kihiatthiamna kihiat mat zingna hawitak a um theina ding ah expedition chiapi a hidan uh taklang kawm in, AR Tri-Nation Motorcycle in approximate distance 2150 kms cover ding hin a gen hi. Officer 7 leh rank dang dang 26 te panna team member 33 um in le a gen a, 20th October, 2017 ah Motorcycle expedition kipan chu 17th November, 2017 leh Shillong ah zo thiang ding uh hin a gen hi. Chuleh, Bangladesh leh Myanmar borders te le cover in a gen a, Nagaland leh Assam state 1600 Kms huapsung a le taikual ding a hidan uh a gen hi.

Lilong leh Andro Panchayat, Municipality Status piak hiding: Minister Shyamkumar

Imphal, Nov. 12 *(Nisin Thuhiltu)* : Panchayat Community Hall, Lilong, Imphal West ah Campaign & Observation of Swachh Bharat Mission (Urban) under IEC 2016-2017 hun matna ah tuni, Thounaojam Shyamkumar, Minister of MAHUD, Town Planning, Forests and Environment and Horticulture and Soil Conservation in a thugenna a chun, Lilong Nagar Panchayat, Imphal West leh Andro Nagar Panchayat, Imphal East chutunung sawtlo ah municipality status ah upgrade bawl hiding in a puang hi.

Langthabal Assembly Constituency panna lui (river) sukthianna nasep December-January leh pat hiding in a gen a, department in lui (river) sukthianna ding Centre ah Detailed Project Report (DPR) pelut zota a hidan gen in, lui (river) sukthian hileh tui-let ziak ah haksatna um te veng chuam ding hin a gen hi.

9th Seikam Memorial Tournament khakna um ding
Lamka, Nov. 12 *(Nisin Thuhiltu)* : Kholmun Youth Club saina’ Kholmun playground ah a chiatha zing, 9th Seikam Memorial Open Football Tournament, 2017, Final Match 14th November 2017 leh um ding a hi. Zia hun a chu United Khawzim Brothers’ (UKB) leh Konsam Football Club te final ah kihel ding a hiu a, nitak lam dak 2:00 ah match kipan ding a hi. Final match kipat masang ah Closing Ceremony um ding a hia, zia hun chu Thangboi Gangte, MCS SDO Churachandpur, Joel Haokip, MCS SDO Kangvai, Lalkhohao Chongloi, General Secy. Kuki Inpi, Churachandpur te’n khuallian hina tawh uap ding a hiu. Chun, laa sathiam - Miss Hoineilam, Mr. Muan Hangzo, Mr. Boijang Haokip ten le laa sakna nei ding a hiu a, Miss Esther Nengpilhing Haokip, State Level Miss Kut, 2017 in le hun matna uap ah thugenna nei ding a hi.

Declaration Competion um ding
Lamka, Nov. 12 *(Nisin Thuhiltu)* : Nehru Yuva Kendra (NYK) Churachandpur leh National Service Scheme, Churachandpur saina a hung tung ding 15th November 2017, 10:00 AM leh Churachandpur Government College ah “Patriotism and Nation Buiilding” ti thupi mang ah “Declaration Competion” kiti um ding a hi. Competition ah Winner te chu Rs 5000/- 2nd Rs 3000/- 3rd Rs 1000/- leh certificate piak hiding a hiu a, first winner chu State Level Competition ah District min ah pansak hiding a hi. Zia “Declaration Competion” ah pangnuam Class XI-5th Semster TDC student te’n min, class, roll number leh student identy card Xerox copy Prof SR Gangte District Cor-ordinator NSS.,CCpur kiang ah November 14, 2017 tiang ah piaklut thei hiding a hi.

EBCC Dimapur in Silver Jubilee lawm ding
Dimapur, Nov. 12 *(Nisin Thuhiltu)* : Evangelical Baptist Convention Church (EBCC) in a hung tung ding, November 26, 2017 leh Kochuam kum 25 tinna, Silver Jubilee, "Toupa'n hiai tan hon tun...." 1Samuel 7:12 ti thupi mang ah lawm ding a hi. Zia hun a chu Jubilee Suangphu, Souvenir magazine leh T-Shirt hawnna um dinga hi. Silver Jubilee hun ah Rev. S.Vungminthang, General Secretary, EBCC in suangphu hawnna leh a latna nei ding, Rev. M.Zalian Guite, Field Superintendent, Karbi Anglong Mission Field in Jubilee Souvenir hawng ding a hi. Chun, November 25 nitak leh Jubilee musical Nite ti minvua ah kipawl khawmna leh Pathian chawihawina hun um ding a hi. EBCC, Dimapur ahileh 1992 ah a la kiphutdawk a hi.


MHJU President thak ding Ramkung Panmei

Lamka, Nov. 12 *(Nisin Thuhiltu)* : Manipur Hill Journalist Union (MHJU) in zani 11 November 2017 a khan’ ADC Hall, Chingmeirong, Imphal in General Election a nei hi. Zia hun chu Chief Election Commissioner ding ah guat ah um Sobhapati Samom in a mapui a, kum 2017-20 sung ah MHJU President ding ah - Ramkung Pamei, Editor , The Cham (Tangmenglong); Vice President - Lalmalsawm Sellate, Editor Hmasawnna Thar (CCpur); General Secretary - S. Nengkhanlun, Editor Zogam Today (CCpur); Asst. Secretary - K. Kopham, Reporter, Newmai News Network (Chandel); Finance Secretary -cum- Treasurer- Timothy Z. Zote, Editor Manmasi Digest (CCpur) leh Information & Publicity Secretary - Peter Adani, Hills Hornbill Express (Senapati) te tel tin in a um ui. Zia ah MHJU election ding ziak a hi’n MHJU nuai ah um Media House zosia ding ah 11th November 2017 suty puan in a um a, zia chu tawh kitawn ah 12th November 2017 ah news hung suaklo a hi.

Special Contractor T. Lala Vaiphei in tawmngai thil ah lampi siampha
Lingsiphai, Nov. 12 *(Nisin Thuhiltu)* : Lanva Lei a pat Lingsiphai khua kikal, Tedim Road lampi hawilo tak ah um zing chu Special Contractor, Tinkholal @ T. Lala Vaiphei in ama van mat mang in November 11, 2017 in suanghum (ballu single) a sung hi. Tedim Road ahileh National Highway 102B, Guite Road tawh kizawp mat, lampi luuntak himaleh etkawl hawi ahilo ziak ah hun sawtpi mimal leh phachuamngai te’n a kal lak ah a siamphat sek uh a hi. T. Lala in tuma deu a khan le Lingsiphai – Thingkangphai kikal ah lampi suang hum sung in lampi siamhawina nasep a nei hi. A langkhat lam ah, Government a pat lampi siam ding a hithu hiat hisek maleh tuni tiang ah taksualo in a um zing a, tunaicha a le National Highways and Infrastructure Development Corporation (NHIDC) in tender sua ah hiat in a um hi. Zia gual ah lampi kikawmtua lumlet te khualna Special Contractor, Tinkholal @ T. Lala Vaiphei in lampi siatna a siamphatna chung ah mitamtak kipak mama un thudawnna’n a gen hi.

Spot Painting Competition nei
Lamka, Nov. 12 *(Nisin Thuhiltu)* : Churachandpur District Legal Services Authority saina’ tuni, November 12, 2017 nitaklam dak 1:00 a pat dak 3:00 kikal in Class V - Class X Student-te a ding in Greenwood Academy High School, B Vengnom ah Spot Painting Competition a um hi. Spot Painting Competition ahileh category 2 - Category I (Class V- Class VII students) leh Category II (Class VIII - Class X) ah khen in a um a, Category I te’n “Child Labor” ti thupi mang in limzik kidemna a nei ua, student min pelut 83 lak ah student 75 te competition in a pang ui. Category II ah “Crime against Women” ti thupi nei in lim kizik demna a nei ua, district sung ah school chuamchuama pat student min pelut 149 um lak ah student 126 te completion in a pang ui. Churachandpur District Legal Services Authority in ahileh Legal Day matna kawm ah programme chi chuamchuama chiapi a hia, a chiata November 9, 2017 a khan le Imphal to Churachandpur Motor Cycle Rally organised bawl in, District Session Court ah Help Desk a hawn banin mun chuam chuam ah Awareness Campaign nei ding hin le a kigen hi.

SDO Office ah Certificate lanuam tam
Lamka, Nov. 12 *(Nisin Thuhiltu)* : Student te ding ah Scholarship Fresh leh Renewal apply bawl hun a hi tawh kitawn in tulai in Sub-Divisional Officer (SDO) Office te a luun thei mama hi. Scholarship apply bawlna ding ah document - Tribe Certificate, Income Certificate leh Domicile Certificate ti te pawimaw a hina chung ah SDO Churachandpur office ah staff te zingkal dak 7:30 a pat nitak dak 7:30 tiang bang office a kai hun uh um in Thangboi Gangte, MCS, SDO Churachandpur in a gen a, ni khat ah Ball Point Pen Refill thak khat mang zo hial ah zik ding pawimaw um in le staff khat in a gen hi. DC Office in Tribe Certificate, Income Certificate leh Domicile Certificate ti te a piakdaw taklo tawh kitawn ah SDO office chuam chuam ah certificate lak ngai in a kigen hi. A langkhatlam ah Certificate lakna tawh kisai in Siamsinpawlpi Joint Headquarter, Lamka dawtna gual ah November 11, 2017 2nd Saturday suty himaleh student te khualna office ngaina gual ah SDO/CCpur office kihawng in a kigen hi. Hiatthei khat chu, Certificate lak theina ding in, Voter I-Card ahiloleh Aadhar Card ahiloleh Village Authority a pat Address Proof khat pen pen a pawimaw hi.

Student te’n nationalism lunggel a nei ding uh pawimaw: Minister Letpao Haokip

Imphal, Nov. 12: *(Nisin Thuhiltu)* Zou Sangnaupang Pawlpi ZSP- Imphal Block in zani a khan TRI, Chingmeirong in 12th Annual Conference cum Freshers Meet 2017 a mang hi. Zia hun chu Water Resource & YAS Minister Letpao Haokip in Chief Guest hina tawh a uap a, Edmund Munluo, Assistant Commissioner, Cabinet Secretariat Government of India in Guest of Honour hina tawh uap in, Kapmeng Munluo in Functional President hina tawh a uap hi. Chun, Sesei Zou, Chairman ADC Chandel in Chief Host hina tawh a uap a, Th. Joy Lamkang, Vice-Chairman, ADC Chandel , Willingson, EM, ADC Chandel leh Morung Maring, EM, ABC Chandel ten le special guest hina tawh a uap ui. Chief Guest Letpao Haokip, Minister, Water resources & YAS in a thugenna a chun, student zosia’n nationalism lunggel a nei ding pawimaw in a gen a, society a ding ah thilpha chuam banggual tuakdaw thei ding ka nei em ti te student te a ngaikhawk ding uh pawimaw a hidan gen in, “Iron Man of India” ti ah kihia Sardar Vallabhbhai Patel in India masawn theina ding a nationalism a chiapi chu ettawn ding dawi a hidan a gen hi. Zia hun matna a chun, Chief Guest in ZSP T Shirt hawnna a nei a, ZSP-Imphal block huapsung ah lawtinna nei chungchuang bik te kiang ah Outstanding Achievement Award piakdawna le a nei hi.

Manipur Winners' Cup 2017 final ah UKB vs AFC-Thoubal

Leisang, Nov. 12 *(Nisin Thuhiltu)* : United Khawzim Brothers of Churachandpur khangthu tepte thei ding in tuni’n 22nd Manipur State Winners' Cup 2017 ah Imphal East champions Rising Athletic Union chu Leisang playground, Churachandpur in semi-final second leg ah 1-1 in a ki drawpi a, zia chu tawh kitawn ah 2-1 aggregate ah gualzawna chang in Manipur State League ah kihel theita ding in a um hi. UKB, Manipur State League ah kihel thei ding ah a um tawh kitawn ah Churachandpur a pat Manipur State League ah ala kihel ta Rengkai Athletics & Cultural Club (RACC), New Lamka YC leh Zomi FC te sulnung zui ding tina a suak hi. A langkhatlam ah tuni match chu a entu a tam mama a, mi 8000 tuam hiding ah hisap a hi. 22nd Manipur State Winners' Cup 2017 match dang ah Thoubal champions AFC leh Imphal West's NCC a kihel ua, 1-1 draw a hi ziak un AFC-Thoubal in aggregate ah gualzawna chang in, final ah UKB tawh kimaitua ding a hiu. Himaleh 22nd Manipur State Winners' Cup 2017 final match date ding confirm hinailo in a kigen hi.

Dipa in D.Litt degree mu
Agartala, Nov. 12 *(Nisin Thuhiltu)* : India’s gymnast Dipa Karmakar in National Institute of Technology (NIT), Agartala apat D. Lit degree a dawng hi. NIT, Agartala in Rabindra Shatabarshiki Bhawan ah 10th convocation a mat hun ah zia degree chu a piakdaw a hi. Zia lo chun, Dr. Goutam Biswas, IIT Guwahati Director kiang ah D.Sc in engineer leh Jadavpur University Professor – Dr. B Ghosh kiang ah D.Sc in Science piak in a um hi.