Nisin Thuhiltu – 11 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

PHC Behiang in thiantho ziak ah Kayakalp Award 2016-2017 sâng

Lamka, Oct. 9: National Health Mission (NHM) Manipur organised bawlna’n tuni, October 10, 2017 sunnung dak 2:00 in JNIMS Auditorium, Porompat ah 2016-2017 a ding, Kayakalp Award hawpdawna a um hi. Zia hun chu L. Jayantakumar Singh, Minister, Health & Family Welfare, Manipur in Chief Guest hina tawh a uap a, S. Subaschandra Sing, Parliamentary Secretary, Health & Family Welfare, Manipur in Functional President hina tawh uap in, Sumant Singh, IAS, Secretary, Health & Family Welfare, Manipur leh Professor Th. Bhimo Singh, Director, JN. Institute of Medical Sciences te’n Guest of Honor hina tawh a uap ui. Kayakalp Award 2016-2017 ah Manipur damlo-inn thiangtho pen in PHC Behiang a pang a, L. Jayantakumar Singh, Minister, Health & Family Welfare in Award piakdawna a nei hi. Award chu Citation leh Rs 2 lakhs a hia, PHC Behiang thasik ah MO in-charge, PHC Behiang Dr. M Steve Tunung in a sâng hi. Chun, hun matna chu Dr Kim Simte, Chief Medical Officer, Churachandpur District in le a uap hi.

World Mental Health Day 2017 mang

Lamka, Oct. 10 *(Nisin Thuhiltu)* : Rayburn College in tuni’n Rayburn Chapel ah World Mental Health Day 2017 matna a um a, zia hun a chun teacher chuam chuam a pat thugenna a um ban in student te a pat skit lakna a um hi. Hun matna a chun Teacher leh Student te Group 8 ah kikhen in, Mental Health tawh kisai Breaking Session um in zia hun a chun “Depression & Anxiety”, Physical Health, Substance Abuse, Psychological Testing, Suicidal Awareness, Art Therapy, Relaxation Therapy banah Parents Guidance and Counselling ti te tawh kisai ah teacher chuam chuam in hun a matpiu hi. Hun matna chu student leh nu-le-pa hunkhawp te’n le uap in phatchuampi mama uh hi’n a kigen hi.

PTC demna leh sawiselna um te tawh kisai ah PTC GHQ in thusua bawl
Lamka, Oct. 10 *(Nisin Thuhiltu)* : Paite Tribe Council (PTC) General Headquarter in October 17 – 20, 2017 sung Bukpi khua’ um ding General Assembly-cum-Election 2017 chung chang ah social media leh networking site chuam chuam thu kigen te tawh kisai thusua a bawlna a chun, WhatsApp leh social networking/ media chuam chuam ah PTC demna leh sawiselna ding hawl ah nampi vaihawmna te mimal vaihawmna suak sak gua ah panla te, kisuk minsiat utna/ tupna ziak leh mimal huatna ziak ah a lang- a lang ah tai te, khawmpi lawtin ding dawilo ah panlatu te chu nasatak ah nam gensia, musit leh sukmualpho gua hi un a taklang a, nampi vaihawmna leh nam in a zui ding dân a bawl te kal ah tawi te ziak ah kuama lung hei ziang lo ding banah social media chuam chuam ah admin te’n zia gual thute chu thulâk ah nei lo ding in chialna a bawl hi. Chun, nampi kipumkhatna susia thei ding thil te post lo ding ah dawn kawm in khawmpi lawtinna ding ah pauchapna’ pangchiat zaw ding in le chialna a bawl hi.

SSA Primary teacher te 5 days training kipan

Lamka, Oct. 10 *(Nisin Thuhiltu)* : District Project Office (DPO), Sarva Siksha Abhiyan, Churachandpur District saina’ tuni’n DTC Hall, Tuibong ah SSA primary teacher 100 a ding “5-days training on early reading and writing with comprehension and early mathematics under Padhe Bharat Badhe Bharat” hawnna nei ah um in training a kipan ngal hi. Training hawnna hun chu Thienlaljoy Gangte, MCS, AC To DC, DC Office in chief guest hina tawh a uap a, N Chingkhei Singh, ZEO/DPO SSA CCpur leh Ch Bobichand Singh, Program Officer/ DPM SSA CCpur te’n Functional President leh Guest of Honour hina tawh a uap u’i. Function President Ch Bobichand Singh in vaidawnna thu leh ni-5 sung training neina ding ziak genna a nei a, Chief Guest Thienlaljoy Gangte, MCS AC To DC in training hawnna nei in thugenna hun le a mang hi. Ni 5, October 10 - 14, 2017 sung um ding training hun sung a chun Resource person chuam chuam - Science teacher Lokee Thiyam, Mathematics teacher Gospel Laltranthang, Social Science Teacher Kimneihat Gangte, Khuollien Gangte leh Sovarani Deive te’n thupi chuam chuam mang ah ziltilna pia ding ahiu a, zia hunsung a chun SSA Primary Treacher 100 pang ding a hiu.

PO ah Canopy Campaign kipan

Lamka, Oct. 10 *(Nisin Thuhiltu)* : Postal Services, Churachandpur saina’ tuni, October 10, 2017 in Tuibong Post Office mai ah ni 2 um ding ‘One Stop Solution for Saving, Insurance and Mail & BD Needs’ tawh kisai Canopy Campaign tuni’n a kipan a, zia hun a chun Post Office ah Saving Account, Recurring Deposit, Insurance leh a dang dang tawh kisai buaina neite leh Post Office in Scheme chuam chuam a neite hianuam te’n a kanchian ua, tuni’n a account chi 3 – Savings Account (SA), Recurring Deposit (RD) leh Sukanya Samriddhi Account (SSA) te tangpi ah chiapi hideu zia hun a chun Mohammed Nasir, Sub-Divisional Inspector of Post Offices, Churachandpur Sub-Division in le amun in nasepna ethâkna a nei hi. Post Office Savings Account ah a hileh Simple Interest 4% a hia, minimum balance (ordinary account ah) Rs. 50 leh Cheque account ah Rs. 500 a hi banah maximum balance chu fixed umlo a hi. RD a hileh kum 5 sung, kum khat a 4-vei compound interest tawh percent 7.1 ah pung ding a hi. SSA a hileh numei naupangte a ding a hia, kum 21 a hiloleh numei naupang in pawsal a nei hun, amasa zaw penpen tiang, kum khat ah compound interest tawh percent 8.3 ah pung ding leh numei naupang account ah a tawm pen a kum khat ah Rs. 1,000 kawi ngai ding a hi. Canopy Campaign a hileh zing leh sutzawp hi ding a hia, zia hun chuleh Monthly Income Scheme (MIS), Senior Citizen Savngs Scheme (SCSS), Time Deposit (TD), Public Provident Fund (PPF), National Savings Certificate (NSC), Kisan Vikas Patra (KVP) leh Post Office a Savings Account banah Postal Life Insurance ah phatchuamna chuam chuam hiatnuam neite’n kanchian thei ding a hiu a, a mun ah le account hawn thei ngal ding a hi.

Nek leh châk siamna mun te entha

Lamka, Oct. 10 *(Nisin Thuhiltu)* : Food Safety and Standard Wings, Churachandpur in tuni’n khawpi sung ah nek leh châk zuakna mun chuam chuam a phakual u’i. Food Safety and Standard Wings in a hileh tuma lam a pat nek leh châk zuakna banah thingpi hotel tite a thiangtho huntawk nam ti etthâkna a nei hun ua, nek leh châk bawldan tawh kisai lungtun umlo a sakna mun te uh tuni’n etthâkna a nei kit ua, zia hun a chun etthâkna a nei masak hun uh sang ah damthei huai zaw hi ah mu in lungtung mama uh a hidan a mudawk u’i. A hinla, dawr khenkhat ah ‘fssai’ trade mark a umlo banah mihing damtheina ding ah lau um nekthei hunkhawp le a susiau hi. Thudang khat a, Churachandpur District sung ah PDS Rationing Agent chuamchuam in Food Safety and Standard Wings, Office, CMO Campus ah license dawtna form a la tau a, tuni tiang ah Churachandpur Assembly Constituency a pat Agent 79 in form a lâkna lak ua 59 in a pelut ua, Singngat Assembly Constituency a pat form la 20 lak ah 9, Thanlon Assembly Constituency a pat 23 lak ah 17, Henglep Assembly Constituency a pat khat in la a pelut ta, Tipaimukh Assembly Constituency a pat agent khat in form a la pan hi.

NT11oct2017b

DMO in staff te meeting neipi

Lamka, Oct. 10 *(Nisin Thuhiltu)* : Dr Phirthanglien Buhril in District Malaria Officer (DMO) Churachandpur mawpuakna a lak nung ah amasa pen ding in Malaria Office, CMO Campus ah Churachandpur district Malaria Department a sem Staff te tawh meeting nei in department nuai ah Male Health Supervisor, Health Supervisor, Microscopist leh DMO staff te a pang u’i. Meeting a hileh Dr Phirthanglien Buhril in DMO dinmun a lua tawh kitawn ah Malaria department in damtheina lam tawh kisai ah maban panlak ding dan leh staff te tawh kimel hiattua na ding banah PHC tin ah staff-te nasepna leh haksatna a tuakte uh genkhawmna ding ah DMO thak in meeting a ko a hia, zia hun a chun tulai ah malaria natna pua thokang beikuan a hitawh kitawn ah Malaria Rapid Action Team kiti a chawlsak phawt u’i. Maban ah Malaria department in nasatak ah panlak gua in thakit, November a pat End Malaria ti thupi chiapi ah Supervisor tin in amau mawpuakna sung chiat entha ding leh thasin leh DMO Office ah report pe zing ding a hiu. Dr Phirthanglien Buhril in a hileh September 28, 2017 in tukum sung a ding ah a 4 na ding in CCpur Distirct Malaria Officer (DMO) mawpuakna tu ding in a zawm a, ama’n Pherzawl DMO tawh a tuk khawm a hi.

PTC GHQ General Assembly –cum- Election 2017 tawh kisai ah lungkimlo thu puang
Lamka, Oct. 10 *(Nisin Thuhiltu)* : Young Paite Association (YPA) General Headquarters in, Paite Tribe Council (PTC) General Assembly-cum-Election 2017 um ding tawh kisai ah PTC kivaipuakna Dan kal ah vaisai a hina chung ah Chairman/ Secretary, Central Working Committee (CWC), PTC General Headquarters kiang ah lungkimlona leh hiatsakna a bawl hi. PTC General Headquarters in Bukpi khua ah General Assembly -cum- Election 2017 a matna dinga program a bawl chung chang leh Candidate leh Delegate ding tawh kisai ah thu leh la umte ah lungtun um saklo thu a taklang a, Election Commission in September 11, 2017 ni’ PTC General Headquarters, 2017-2020 sung ah Central Working Committee (CWC) member ding puitu 21 kitelna ding Election Notification, a a suadawna thu taklat ah um te bang ziak ah zuilo a hi em ti’n dawtna a siam hi. Aban a genna ah, Election mawpaw ding ah guat ah um te’n election tawh kisai zosia a sai fel ua kikhut san tiang ah maw a puak ding uh hinapi ah bang ti dan ah CWC in election a ding ah candidate te scrutiny a bawl uh a hem, Election Commission in candidate te chung chang leh Election tawh kisai ah amau ma in kivai puakna dân zui ah sai ngamlo a hiu leh a phiat ah a dang guat ding hilo a hem, banah, PTC Election ah PTC kivaipuakna dan bupi mat hi ding maw a hilo leh Customary law ti’n le a dawng hi. Chun, puitu khenkhat in khawlai ah “YPA in ZRO/ ZRA phûkgua a hi” ti leh “Political Dialogue sukbuai gua a hiu” ti ah a thezak uh chu thuzuau hi ah YPA GHQ in kawm in YPA in ZRO/ ZRA hawitak ah a chiato zel ding a dawisak banah zathuap zing ding hi’n a gen hi.

Annual Games & Sports, 2017 hawnna nei

Lamka, Oct. 10 *(Nisin Thuhiltu)*: The Salvation Army - Children’s Training High School (CTHS) School in school huangsung ah October 10 - 13 sung Annual Games & Sports, 2017 a nei ding uh tuni hawnna nei in a um a, zia hun matna chu K Vungzalian, Chairman, School Managing Board (SMB) in special guest hina tawh a uap hi. Hun matna a chun K Vungzalian, Chairman, SMB in Flag kaipal in, thugenna a nei a, zia na a chun, mihing hinkhua ah taksa sawizawi pawimaw mama in a diak ah student hilai ah taksa leh lungthim sawizawina chu lekhasimna lam ah panpi tu hawipen hi ah taklang kawm in student te’n lungthim thiangtho tak nei kawm ah hinkhua a mat ding uh dawithu gen in, Annual Games & Sports 2017 hawnna a nei hi. Hawn a hi tawh kitawn in Letminthang Mate, In-charge, Game and Sports in house tin ah captain te kitiam sakna a nei a, Captain David Lalthazuala, CO, Lamka Corps in Annual Games and Sport 2017 latna leh Pathian khut ah kawlsakna a nei hi. Sports hun ah student te house 4 - blue, green, yellow leh red ah kikhen in item chuam chuam - mathematical race, basketball, futsal, volleyball leh a dang dang te kitetna nei ding a hiu.

NT11oct2017c

Tutha sung ah differently-abled person leh meithai ding ah govt. in special scheme hawng ding: Chief Minister

Imphal, Oct.10 *(Nisin Thuhiltu)* : Manipur Chief Minister N Biren Singh in thasin date 10, Hill Leaders’ Day ah a mat sek tawh kitawn in tuni, 10th October in le zingkallam dak 9:00 a pat nitaklam dak 1:00 kikal in civil society organisation leader, village authority executive leh village chief 500 tuam te a kimupi a, complaint 191 um te ngaithakna a nei hi. Hill Area a pat leader chuamchuam te a kimupi zaw ah thuthak lakhawm mite kiang ah a holimna a chun, Chief Minister N. Biren Singh in hill area ah Government official umlo, infrastructure hawilona tawh kisai a tamzaw ten a kiang tut a hidan uh a gen a, differently-abled person leh meithai hun tiang in le a kiang ah haksatnau tut a hidan uh a taklang hi. State sung ah differently-abled person leh meithai te a ding ah government in tutha sung ah Special Scheme hawng ding in le a puang a, himaleh scheme chu International Day of Disabled Persons (December 3, 2017) a pat chiapi pat ah um ding hin a gen hi.

Hill Leaders’ Day ah mitamtak in inn sakna kithuapi ding ah panpina dawn a hidan uh le taklang in, scheme chuam chuam te a hiding gualtak ah a tunna ding tunglo um a hidan kilang in a gen a, Central Government in a chiapi, rural area ah inn neizo lo migenthei te kithuapina ding ah Pradhan Mantri Gramin Awaas Yojana (PMAY) scheme tawh kisai ah review meeting nei ah um sek leh etzuina nasep umzing a hidan genkawm in, kituptak ah office kailo official te chu explanation call bawl ding ah a kisaipi thuneitu te thupiak nei a hidan a taklang hi. Chuleh,
State budget siam hun ah infrastructure pawimaw te a vek ah huapsak theilo ah a la umna chung ah a kisaipi Deputy Commissioner te chu a pawimaw dungzui ah State Planning Department ah proposal pelut ding ah thupiak nei in le a gen hi. Hiatthei khat chu, Chief Minister in April 11, 2017 ni ah Ukhrul district vena a nei hun ah thasin ni 10 chu Hill Leaders’ Day ah mang ding a hidan a taklat tawh kitawn ah May 10, 2017 a khah Hill Leaders’ Day masapen a la matpat hi a hia, tu ah Hill Leaders’ Day chu a 6 vei tinna a hi.

State in astro turf 2 /3 nei ding: N. Biren Singh

Imphal, Oct. 10 *(Nisin Thuhiltu)* : Manipur Police,125th Anniversary matna ding tawh kisai ah 2nd MR Ground, Imphal ah Manipur Police Department saina’ Manipur Police Quasquicentennial Football Cup 2017 a la um chu tuni’n khak in a um hi. Closing ceremony chu, Chief Minister N. Biren Singh in khuallian hina tawh a uap a, Minister for PHED Losii Dikho, Chairman of Manipur Pollution Control Board L. Radhakishore Singh, Parliamentary Secretary (Planning) Khasim Vashum, Parliamentary Secretary (Home) L. Sushindro Meitei, DGP L.M. Khaute leh top police official tamtak ten le hun matna a uap ui. Chief Minister in a thugenna a chun, state sung ah astro turf (artificial turf) ground 2 /3 umsak pai hita ding in a gen a, Guwahati in World Cup match a zintun thei leh bang ziak ah Manipur in zintun theilo ding a hi em? ti kawm in a chiatha zing FIFA U-17 World Cup 2017 match khat le zintun ding ah Manipur chu dawisakna piak hilo in a gen hi. Manipur chu match khat hiziang leh le U-17 World Cup 2017 zintun ding ah kilawm hin a hidan le gen in, U-17 World Cup 2017 ah Indian Football Team te performance hawisa mama a hidan a taklang hi. Chief Minister in state sung ah police te panlakna thupi mama in a gen a, hun dang ah security personnel te civilian ten a mu tak ua le lauthawnna dim mai sek himaleu tuhun ah security personnel te chung ah mipi’n muanngamna neita a hidan a gen a, Police te mipi humbittu a hidan uh mipi te’n hiathiam ta a hidan le a gen hi.

Hun matna uap, Minister for Youth Affairs & Sports, Letpao Haokip in a thugenna a chun, U-17 FIFA World Cup 2017, India team player ah Manipur mi mi 8 a pan uh chu ki aan mama hin a gen a, Manipur chu sport lam ah talent tamtak umna hin a gen hi. Chuleh, mipi te’n buaina a tun hun ah a vengbittu police te a hidan uh a hiatthiam theina ding ua Police personnel te’n panlakna a nei ding uh pawimaw in a gen hi. Manipur Police Quasquicentennial Football Cup 2017, final match a chun, Imphal East District Police leh Thoubal Kakching District Police team te a kihel ui.

Naupang te bitna ding tawh kisai ah dan (law) hatlo: Acting Chief Justice

Imphal, Oct. 10 *(Nisin Thuhiltu)* : Imperial Hall, The Classic Grande ah tuni’n One day Regional Consultation on ‘Child Rights – Gaps & Challenges in North Eastern States’ kiti a um a, zia chu Juvenile Justice (Care and Protection) Act, 2015, Protection of Children from Sexual Offences (POCSO) Act, 2012 leh The Child Labour (Prohibition and Regulation) Act, 2016 hiathiamna ding ah kisai a hi. Inaugural session chu Acting Chief Justice of Manipur High Court, N. Kotiswar Singh, Social Welfare & Cooperation Minister Nemcha Kipgen, Chairperson, National Commission for Protection of Child Rights (NCPCR), Stuti Kacker, Member, NSPCR, Yashwant Jain, Chairperson, Manipur Commission for Protection of Child Rights (MCPCR), Sumatibala Ningthoujam, Commissioner of Social Welfare, Government of Manipur, H. Deleep Singh, IAS te’n khuallian hina tawh a uap ua, North East India state 8 a pat delegate, Manipur Government department chuam chuam ah official te, Civil Society, NGO leader tamtak in le a uap ui.
Acting Chief Justice N. Kotiswar in a thugenna a chun, naupang te bitna ding tawh kisai ah dan (law) chu hatlo leh chanchum in a gen a, Rabindranath Tagore lekhabu zik ‘On the Seashore’ kiti ah naupang khawhelo te banglam thil hitaleh humbit ding pawimaw a hidan sulang in a gen hi. Social Welfare Minister Nemcha Kipgen in a genna a chun, naupang zosia’n ngaidan leh dawidan banah mudan te gendaw theina ding ah thuneina nei chiat a hidan uh taklang kawm in, “Child Rights – Gaps & Challenges in North Eastern States’ kiti chu tuhun tawh kituak a hidan taklang kawm in consultation ki organised chu kipak mama in a gen hi.

Dy CM in 2- Day National Symposium hawng

Imphal, Oct. 10 *(Nisin Thuhiltu)* : Deputy Chief Minister Yumnam Joykumar Singh in tuni’n Indian Council of Agricultural Research (ICAR), Research Complex for NEH Region, Manipur Centre, Imphal ah Indian Phytopathological Society (NEZ) leh ICAR, Research Comlex for NEH Region, Manipur Centre, Imphal saina, 2- Day National Symposium on “ Emerging and Re-Emerging Plant Diseases in North East India: Challenges and Strategies” kiti hawnna a nei hi. Ama’n a thugenna a chun, North Eastern region ah thaichi piang dawk a hawi zawk sem theina ding ah lo-bawlmi te leh scientist te’n panlak khawmna a nei ding uh pawimaw in a gen a, a hun tak ah thaichi chiin na a pat thaichi lungvei ti te sukven thei hiding in a gen hi. Zia hun matna a chun, Vice Chancellor of Central Agricultural University (CAU), Imphal, Professor M. Premjit Singh in le thugenna a nei a, Deputy Chief Minister in Krishi Vigyan Kendra (KVK) Churachandpur saina nuai ah tha 1 sung, Gardeners Training Programme zota trainee te kiang ah certificate piakdawna le a nei hi.

Bhoomi Pua of Barak and Makru Bridges
Imphal, Oct. 10 *(Nisin Thuhiltu)* : Manipur Chief Minister, Nongthombam Biren Singh in 12th October, 2017, 12:30 p.m leh Barak ah "Bhoomi Puja of Barak and Makru Bridges" uap ding a hi.

Good governance leh democracy sukhatna ding ah RTI mat ding: Karam Shyam

Imphal, Oct. 10 *(Nisin Thuhiltu)* : Lamyanba Shanglen, Konung Lampak, Imphal ah tuni’n Right to Information Week Celebration-2017 khakna programme mat in a um a, zia hun chu Consumer Affairs, Food & Public Distribution and Revenue, Minister Karam Shyam in khuallian hina tawh a uap hi. Minister Karam Shyam in a thugenna a chun, democracy sukhatna ding leh good governance a um theina ding ah kituptak ah Right to Information Act chiapi ding pawimaw a hidan taklang kawm in,
RTI activist ten transparency leh accountability a um theina ding ah panlakna a nei uh chu pakcha mama in a gen hi. Zia hun matna a chun, Dr. Radheshyam Yumnam, Chairman, Manipur Industrial Development Corporation Ltd. & Manipur Electronics Development Corporation Ltd. in le thugenna a nei a, RTI mass awareness programme chiapi ding pawimaw a hidan taklang kawm in RTI matkhial khak ding thil lau um a hiti’n a gen hi. Right to Information Week Celebration, closing function chu RTI activists, Government officials, students leh citizens te’n a uap ui. Right to Information Week (Oct 5th to Oct 10th , 2017) ahileh Manipur Information Commission in Department of Personnel & Training , Ministry of Personnel, Public Grievances & Pensions, Government of India sponsored bawlna nuai ah organised a bawl a hi.

“Ningol Chakkouba” ding ziak ah govt. semtute law, 16 Oct a pat kihawm ding

Imphal, Oct. 10 *(Nisin Thuhiltu)* : Vevek Kumar Dewangan, Principal Secretary (Finance), Govt. of Manipur in tuni governor min ah thusua a bawlna a chun, 21st October 2017 leh “Ningol Chakkouba” mat ah a umna ding ah Central Treasury, Rules (Vol.1) dungzui ah Gazetted Officer te panna Government employee ten pay leh allowances, 16th October a pat October 2017 tha a ding draws leh disbursed thei ding un a taklang hi. Himaleh zia chu DP/Finance Department instruction leh guideline kal ah semtu ding ah kila, adhoc/substitute/officiating/contract/casual/Mr te huapsak hilo ding in a taklang bawk hi.