Nisin Thuhiltu – 07 September 2017

User Rating: 0 / 5

Star InactiveStar InactiveStar InactiveStar InactiveStar Inactive
 

CM vaidawn ding dan tawh kisai meeting nei

Lamka, Sept. 6 *(Nisin Thuhiltu)* : Chief Minister Reception Organizing Committee saina nuai ah tuni’n Convener, Khaipao Haokip, Chairman, ADC Churachandpur Office Chamber, ADC Office, Tuibong ah September 12, 2017 leh Chief Minister vaidawn ding dan tawh kisai meeting a um a, zia hun chu Organizing Committee ah Department chuam chuam mawpaw te banah Member Organization, Tribe leh Innpi, Philanthropic Organization leh Student Organization chuam chuam puitu te a pang u’i. Meeting a chun Transportation, Gift, Invitation leh Program mat ding dan tawh kisai a genkhawm u’i. Meeting zaw ah Convener Khaipao Haokip in Media Briefing a nei na a chun, Chief Minister gari a pat kumthâk tawh kitawn a Minister, MLA, MDC leh DLO te’n Public Ground chan zui ding leh zia chu a mu thei ding Cultural Dance chuam chuam suklat hi ding in a gen a, ziana’ pang ding te chu nampuan tawh kizem ding in a chial kawm in Chief Minister in a munawp bîk, Bamboo Dance a hileh public ground ah um ding hi’n a gen hi. Tribe leh Innpi chuam chuam in Memorandum piakna nei ding uh hi ah taklang kawm in Memorandum a chun District mipi’n a phatchuampi thei ding thil chuam chuam - Churachandpur Government College, University piting ah kawi ding; District ah Medical College khat sak ding leh mipi’n kumtung ah haksatna a tuak, tuinek leh kikawm tuana lampite siam hawi ding phutna hi tangpi ding hi’n a gen hi. Co-Convener Thangkhosuanmung Guite in, Chief Minister vaidawnna ding chu Political Party vai a hilo ziak ah kuama’n politicize lo ding ah chial kawm in a lawting theina ding ah kithuapina pia zaw ding in a dawn hi. Secretary Paul Lalchhanhima in dawtna chuam chuam a dawnhuna a chun, Stage Decoration tawh kisai YPA khut ah mawpuakna piak ah um in Arun Enterprise, Imphal te le mat hiding in a gen a, Kangvai ah Welcome Gate a hileh KKL leh YVA mawpuakna a bawl hiding in a gen hi. Usher ding ah Philanthropic Organization chuam chuam a pat numei leh pawsal 5 chiat, Cultural Dress tawh pang ding leh Cultural Item te Philanthropic Organization te ma mawpaw ding hi’n le a gen hi.

Ph. D muthak

Imphal, Sept. 6 *(Nisin Thuhiltu)* : Lamzolian Suantak s/o Thiankhualun Suantak of A. G. Colony, Lamphelpat, Imphal in September 4th, 2017 ni a khan North Eastern Hill University (NEHU) Shillong nuai in Ph. D a mu thak hi. Ama thesis ahileh “Social History of the Vaiphei” a hia, a supervisor in Professor Vanlalruata Rengsi, Department of NEHU, Shillong a pang hi. Dr. Lamzolian Suantak ahileh Zillai Shillong Block President lui leh society ah kimang mi mama khat a hia, seminar leh conference tamtak ah paper present bawl in le a la pang ngai hi.

NT 7sep2017

India in Myanmar tawh relation siamhawi ding ngaikhawk mama: PM Modi

Nay Pyi Taw, Sept. 6 *(Nisin Thuhiltu)* : Myanmar vena nei India Prime Minister Narendra Modi in tuni’n Myanmar capital Nay Pyi Taw ah Myanmar State Counsellor Aung San Suu Kyi kimupi in India leh Myanmar delegation te uapna tawh kihona a neipi hi. Zia hun a chun Prime Minister Narendra Modi in land leh maritime borders ah bitna leh muanna a um ding pawimaw a hidan a gen a, gam kinaicha um India leh Myanmar kal siamhawi ding chu India in ngaikhawk mama a hidan taklang kawm in Act East Policy kituptak ah chiapi ding dawi hin a gen hi. India government in a chiapi Sabka Saath Sabka Vikaas initiative nuai ah Myanmar khantona ding ah panlak ding dawi a hidan taklatna neipum in Rakhine state buaina ziak ah khawhelo nautang tamtak in thina a tuakna chung ua India chu Myanmar tawh dingkhawm zing leh buaina sukven ding dawi hin le a gen a, India in a kisaipi thuneitu te’n Myanmar's unity leh territorial integrity a hawizawk sem theina ding ah panlakna a nei ding uh dawi hin a gen hi. India ve-nuam Mynamar mi te chu grant gratis visa piak hiding ah puang in India jail ah tâng Myanmar citizens 40 te chu thasuak pai hiding in le a puang hi. Ms. Suu Kyi in a thugenna a chun, India in terrorism lam thil ah panlakna kituptak a neina chung ah Myanmar in terrorism lam thil ah tunaicha lauthawnna a tuak teu bittak ah um thei a hidan uh taklang pum in India chung in kipakthu a gen a, India leh Myanmar in a gam sung gel ah terrorism kiti him him a umsaklo ding dawi a hidan a gen hi. Zia meeting hun a chun, healthcare, culture, science & technology, election leh media lam thil te panna gam 2 in panlak khawmna a neina ding in Memoranda of Understanding (MoUs) 11 chung in kinawptuana suai a kai ua, Prime Minister Narendra Modi in Myanmar's State Counsellor Aung San Suu Kyi tawh kihona a nei nung ah ziagual kinawptuana suai chu kai ah um a hi.

8th September ah news suaklo ding
Manipur Hill Journalist Union (MHJU) ding ah 7th Sepetember 2017 chu Anniversary/ Foundation Day a hi ziak in MHJU nuai ah um Media House te’n nit (observe) hi ding a hi. Zia chu tawh kitawn in 7th September ah Nisin Thuhiltu office le kikhak ding a hia, 8th September issue newspaper umlo ding a hi.

Awareness & Registration Camp nei

Lamka, Sept. 6 *(Nisin Thuhiltu)* : Khuga dam a um Khuga battalion ah 27-Sector HQ Assam Rifles kituapina tawh College Veng, New Lamka ah Mobile Interactive Terminal for Rural Areas (MITRA) nuai ah Mobile Career Counseling Cell in Awareness & Registration Camp a nei u’i. Khuga battalion in tuni’n Zuihnuam Road ah College Veng huapsung a um student leh khangthak sepna neilo te a ding in lampi kawkmuna a nei ua, Central leh State Government nuai ah scheme leh policy chuam chuam um te hilchetna anei ban ua Indian Army nuai ah student leh khangthak te sep thei ding um te banah Government sepna mu thei ding dan te a hil u’i. Zia hun a chun Taj Hotels Palaces Resorts Safaris leh Tata Institute of Social Sciences, School of vocational education in Golden Threshold Program nuai ah hospitality management zilnuam te a ding ah registration bawl in form a fill up piak ban ua thakit October sung ah Indian Army kilakna’ pang nuam te a ding in le registration a bawl piak ui. Awareness & Registration Camp nei hun ah YPA College Veng Unit leh College Veng Village Auhotiruy te’n kithuapina a piau a, Registration hun ah Leimakhong ah Indian Army kilakna ding in mi 48 in min a khumlut ua, Golden Threshold Program nuai ah hospitality management zil ding in mi 26 - Pawsal 16 leh numei 10 in min a khum lut ui. Khuga battalion in a hileh maban ah le khawpi sung mun chuam chuam ah khangthak leh student sepna hawl nalai te’n sepna a mu ding uh dawisakna liantak tawh Career counseling neito zel ding uh hi’n a kigen a, zing, September 7 leh Gouchinkhup Veng ah nei ding a hiu.

NT 7sep2017b

Awareness & Screening on Prevention & Control of Deafness chia tha-zing

Lamka, Sept. 6 *(Nisin Thuhiltu)* : National Health Mission (NHM) nuai ah National Program for Prevention and Control of Deafness (NPPCD), CCpur District saina’ government school chuam chuam ah “Awareness & Screening on Prevention & Control of Deafness” neito zel in tuni’n Saidan JB School ah nei in a um hi. Zia hun a chun, Dr Jire Pudiate, District Nodal Officer, NPPCD in student te lak ah khawhiatna, bil pawimaw dan leh vengbit ding dan tawh kisai ah ziltilna a nei banah bill ma ah buaina nei te’n a kinthei lam ah a kisai pi doctor te etsak pai ding a hi dan a gen hi. Ziltilna hun mat zaw in NPPCD, Ccpur district a pat Margaret Mangte, Audiologist in Audio machine mang in student te bil etthâkna a nei hi.

Anti-Tobacco School Awareness Campaign nei

Lamka, Sept. 6 *(Nisin Thuhiltu)* : District Tobacco Cessation Cell, District Hospital, District Tobacco Control Cell, Churachandpur Police leh Narcotic Cell, Churachandpur Police kithua in tuni’n Gandhi Memorial High School, Molnom ah ‘Anti-Tobacco School Awareness Campaign’ nei in a um a, zia hun a chun CL John, Headmaster a pat School dinmun genlatna a um banah Shyam Lal Poonia, IAS, DC Churachandpur, Dr. Kimngaihching, CMO/ Churachandpur leh Narcotic Cell, Churachandpur Police te a pat thugenna a um hi. Hun matna achun, Lunkhomang Khongsai, MPS, Additional SP (Law & Order), Churachandpur in District Tobacco Control Cell, Churachandpur ah Police leh VDF personnel te mel lakna nei in Dr. Chingnunsiam, District Nodal Officer, NTCP in tobacco hawilo dan tawh kisai genna a nei hi.

Special General Body Meeting a nei

Lamka, Sept. 6 *(Nisin Thuhiltu)* : M/S Civil Officer Pensioners’ Society (CoPS), Churachandpur in tuni’n CoPS Office, Eden Huan, Hiangtam Lamka ah a 2-veina Special General Body Meeting a nei ua, zia hun ah a chiakhawm member te’n Agenda puaklut a umte genkhawmna nei in huntawp lam ah S. Vungsing, Secretary in thupukna te puandawna a nei hi. Meeting ah chiakhawm member te’n Annual membership fee chu Rs. 400 a pat Rs. 500 hisak ding; member thak laklut hun ah capital donation tawh kisai; Executive Committee Member 9 a pat 12 hisak ding; Society a ding ah Officer ding tawh kisai; Executive Committee chutkhawm hun ah sitting allowance Rs. 100 a pat Rs. 200 ah kalsak ding; Office Bearer te office kai hun sung ding; Treasurer leh Finance Secretary thuneina tawh kisai; Society sum muna tawh kisai, Financial Sanctioning Power banah thu dang dang genkhawm na a nei u’i. A khat-veina, CoPS Special General Body Meeting a hileh April 12, 2017 ni’ Executive Committee thupukna dungzui ah By-Law bawlthak ding dawina ziak ah nei a um hi’n a kigen hi. Civil Officer Pensioners’ Society ah a hileh register kibawl member 193 um maleh thina tuak leh suspend a um khenkhat a um ua, tuni mi 2 a ki register thak uh tawh kitawn in tu dinmun in member 139 a um hi.

Bisanmual khua a le ‘hydrocephalus’ vei um

Lamka, Sept. 6 *(Nisin Thuhiltu)* : Chandel district sung Moreh leh Burma gamgi ah "hydrocephalus" natna vei naupang khat mudaw a hi nung ah Manipur state sung mundang ah pani mudaw ahi kit nung in Churachandpur district, Bisanmual khua ah le zia natna vei naupang khat mudaw a hikit hi. Lamka a kipat 5KM vel ah gamla Bisanmual khua ah cheng Genthianlian leh Veineichin te chapa kum khat leh tha ni ah upa Master Lamminlun chu June 2, 2016 ni khan Dist Hospital, CCpur in nausen pangai gualma'n la piang a, himaleh, tha khat vel nung in a lu chu khang in a lian deudeu hi. Zia phat a chun Oct 1, 2017 ni chun RIMS, Imphal ah a lu operation a la bawlsak ui. Zia kipat a chun hawilam nawt in kilang maleh check-up leh kikaituana bawl zawlo ziak in tukum in a khang kit a, tutiang ah a letdan chu 70 CM lam val ding in a kigen hi. "Hydrocephalus" natna veikha-te chu a thuak sung ua ‘cerebrospinal fluid’ kikhawl khawm in midang banglo in alu uh a khang lian sek hi. Lamminlun operation kibawl lai ah doctor te'n a lu sung apat tui lakdawna ding ah 'stent' kiti a la thua ua, zia chule tunaicha a kha pawtdawk hi'n anu'n a gen hi. Lamminlun keng changlam kai in tha a neilo ban ah alu (head) ah stent kikawi pawtdaw ziak ah langkhat lambep a delna'n a sam bang a pul hial a, na a sak phat leh kapsek a hi dan a nu'n a gen hi. Insung haksat a hina chung ua amau bawl thei khamkham ah inn mun ah ki enkawl le a hiu.

Bank A/C tawh Aadhaar link thei
Lamka, Sept. 6 *(Nisin Thuhiltu)* : State Bank of India (SBI) account neite’n September 7-8 sung ah bank account tawh Aadhaar number a link thei na ding ua hun hawn ah um hi’n Pauneihthang Valte, Chief Manager, State Bank of India (SBI) Churachandpur Branch a pat thutut a kidawng hi. Zia tawh kitawn a chun, SBI Account nei zosia’n Churachandpur District sung ah SBI Branch a kinaipi pen ua Aadhaar Card Xerox copy ah Bank Account Number leh Mobile Number zik in pelut thei ding a hiu a, Bank lam te’n link ding tawh kisai maban mawpaw ding uh hi’n a gen hi. Bank Account leh Aadhaar Number link ding a hileh Centre Government thupiak umsa dungzui ah nei hi ding tu ah puang kawm in ni 2 hun kipia sung ah kuamasap in ngai pawimaw ding in a dawn hi.

IMI tawh kisai Workshop
Lamka, Sept. 6 *(Nisin Thuhiltu)* : Intensified Mission Indradhanush (IMI) matna ding tawh kisai Workshop chia to zel in, tuni’n DFWO Conference Hall, District Hospital, Churachandpur ah District sung Block 5 a pat PHC leh CHC ah Medical Officer te’n a nei ua, Dr. Pranay Dutta, SMO, WHO Consultant, NPSP, Imphal Unit, Dr. Nandi Kishore, Joint Director, State Immunization Officer, Manipur, Dr. VC Pau Tonsing, District Immunization Officer, Churachandpur leh Zenngaihlun, District Program Manager, NHM Churachandpur te’n ziltilna a piau hi. Workshop a hileh District sung ah lawting tak ah Intensified Mission Indradhanush (IMI) sepdaw a hi ding dawina ziak ah Centre Government thupiak dungzui ah nei ah um a hia, zia na ding a chun Block chuam chuam ah ASHA Worker te kithuapina tawh PHC/CHC ah numei nauvawp leh nausen piangtil a pat kum 3 nuailamte hawldaw ah Routine Immunization hawitak neisak ding ti a hi. Workshop a hileh zing, September 7 a pat September 12, 2017 sung National Health Mission (NHM), Churachandpur a pan District sung Block 5 ah Nurse te’n Batch a kikhen in Workshop nei ding a hiu a, September 13, 2017 in Intensified Mission Indradhanush tawh kisai Vaccine leh Cold Chain Handler te’n nei ding a hiu. Mission Indradhanush a hileh Indian Prime Minister Narendra Modi in 2014, Christmas ni’ a la patdaw a hia, matna ding ah India sung district 201 teldaw ah um lak ah Churachandpur le pangkha a hi. Mission Indradhanush in nausen piangtha pan a pat kum 2 nuailamte target deu maleh kum 2 chunglam le damdawi piak nailo a hiuleh piak thei ding hi’n a kigen a, project in nausen te natna chi 9 - TB, Diphtheria, kikhu, Tetanus, Polio Militis, Sensi, Japanese Encephalitis, Haemophilus Influenza Type B leh Hepatitis B ti te dâl kha a hi. Damdawi a hileh a dawnsak leh kapthaw a hia, kap 4 ah course zaw thei a hi.

Thanmual suthiang di
Lamka, Sept. 6 *(Nisin Thuhiltu)* : Hiangtam Lamka thanmual mangkha “Lamka Cemetery Board” nuai ah Philanthropic Organisation umte; YPA-Lamka Unit, YPA-Central Lamka Unit, YMA-Lamka Branch leh HYA-Lamka Branch puitute’ lemsak dungzui in, a hungtung ding September 9, 2017 leh Lamka thanmual sukthianna um ding a hia, zia hun a chun member a tam theilam kuan ding in Philanthropic Organization te’n chialna a bawl u’i.

Seminar on "Media and Parliamentary Reporting"
Imphal, Sept. 6 *(Nisin Thuhiltu)* : Manipur Legislative Assembly Secretariat ah tun’n One Day Seminar on "Media and Parliamentary Reporting" kiti Conference Hall, Manipur Legislative Assembly in a um hi. Zia seminar chu print leh electronic house chuam chuam ah journalist hun khawp te’n a uap ua, zia gual seminar chu Manipur Legislative Assembly in organize a bawl masakna pen a hinalai hi. Inaugural session hun chu Speaker, Manipur Legislative Assembly Y. Khemchand Singh, President, Manipur Pradesh Congress Committee leh MLA T.N. Haokip, former Chief Minister Radhabinod Koijam, former Minister O. Joy Singh leh Secretary, Manipur Legislative Assembly Ramani Devi te’n khuallian hina tawha uap ua, Technical session ah T.N. Hoakip in "Relation between Legislature and Media", Dr. N Pramod Singh, Associate Professor, LMS Law College in "Constitutional Provisions on the Priviledge and Parliamentary Reporting", Radhabinod Koijam in "Parliamentary Procedures" leh O. Joy Singh in "Reporting of the Proceedings of the House and Breach of Priviledge and Contempt of the House" ti thupi mang in thugenna a nei ui.

Minister Biswajit in VIII Sirarakhong Hathei (Chilli) Phanit hawng

Imphal, Sept. 6 *(Nisin Thuhiltu)* : Commerce & Industries Minister Thongam Biswajit Singh in tuni’n Sirarakhong Village ah VIII Sirarakhong Hathei (Chilli) Phanit hawnna a nei hi. Ama’n a thugenna a chun, Government in malacha chiing mi te panpina thei chan ah panpi ding a hidan puana a nei a, malcha chiing mi te chu nasatak in tilkhona a bawl hi. Chief Minister tawh kithu hiat ah VIII Sirarakhong Hathei (Chilli) Phanit kiti festival chu promte bawlna ding ah panla ding leh malcha chiing mi te product kibelap theina ding ah panlak ding leh market khat siamdaw theina ding ah panla ding hin a gen hi. Sirarakhong Village ah malcha piang te chuambik leh tui-chuam bik hin le Minister Thongam Biswajit Singh in a gen a, himaleh government in malcha chi chuam bik um te promote bawlna ding ah panlakna a neilo chu khawk a sakthu a gen hi. Kituptak ah Common Facility Centre (CFC) hawn theilo ah a um le ngaikhawk mama a hidan gen in, Government sepna bep chu sepna hilo a hidan gen in khangthak te self employment hithei ding ah panla ding in chialna a bawl hi. Zia hun matna chu Keirao MLA L Rameshwor Singh in le a uap hi.

National Nutrition Week kipan

Imphal, Sept. 6 *(Nisin Thuhiltu)* : State Bal Bhavan, Khuman Lampak ah tuni’n "Optimal Infant & Young Child Feeding Practices: Better Child Health" ti thupi mang in National Nutrition Week (NNW) & One Day State Level Workshop kiti a um hi. Zia hun chu Social Welfare and Cooperation Minister Nemcha Kipgen in khuallian hina tawh a uap a, ama’n a thugenna a chun, childsurvival, healthy growth leh development a ding ah naupang te kituptak ah nek leh chak piak pawimaw a hidan gen in, naupang te kituptak ah nek leh chak bawl piakna a pat khanletna lam le hawi leh society a ding ah thil pha chuam bawl dawk ding ah um thei ding a hidan uh a gen hi. Zia programme chu kum sin leh and NutritionBoard, Ministry of Women and Child Development, Government of India panlakna nuai ah annual nutrition - National Nutrition Week (NNW) ah 1st September - 7th September mat a hi sekna chung ahCommunity Food & Nutrition Extension Unit (CFNEUS), Ministryof Women & Child Development, Government of India leh Department of Social Welfare, Government of Manipur kithua ah orgainsed a bawl uh a hia, hun matna chu Officer-in-charge (CFNEUS), Ministry of Women & Child Development Apurba Das, Joint Director Social Welfare Surrender A Shishak leh Mingthingla te’n le a uap ui.

Education Minister in Residential School, Shangshak hawng pai ding ah official te hiatsak

Imphal, Sept. 6 *(Nisin Thuhiltu)* : Education Minister Thokchom Radheshyam Singh in tuni’n Ukhrul ah North East Foundation For Education and Culture in Education & Environment (for ED&EN) leh Manipur Education Society (MES) tawh kithua ah organized a bawl Edufest 2017, State Level Inter – School Competition hawnna a nei a, zia hun a chun, a kisaipi thuneitu te chu a vaima theipen ah Ukhrul District ah Residential School, Shangshak hawn a hitheina ding ah panlakna nei ding in hiatsakna a bawl hi. Zia residential school chu numei leh pawsal total seat capacity 100 tiang um theina ding ah kisiam a hi. Education Minister in MLA, Ukhrul Alfred Kanngam Arthur, Deputy Commissioner, Ukhrul Dr. Harmit Singh Pahuja leh School Management leh Development Committee (SDMC) member te le kimupi in Residential School, Shangshak chu avaima theipen ah hawn ding leh kituptak ah a function ding pawimaw hin a gen hi. Edufest 2017 hawnna hun chu Principal Secretary Education (S) Vineet Joshi leh Deputy Commissioner Ukhrul Dr. Harmit Singh Pahuja te’n le a uap ui.

Indo-Myanmar border ah PREPAK cadre 3 mat a um
Imphal, Sept. 6 *(Nisin Thuhiltu)* : India-Myanmar border Moreh ah Nilaini zingkal a khah banned People’s Revolutionary Party of Kangleipak (PREPAK) cadre pathum mat in a um hi. Sarangthem Ibomcha, Superintendent of Police of Tengoupal district in a genna a chun, intelligence inputs dungzui ah Police leh 12 Assam Rifles personnel te’n Sun Rise club ground, Moreh town ah self-styled PREPAK corporals te chu a matdaw uh a hidan a gen a, Myanmar camp a pat Manipur hung lut a hidan uh taklang kawm in mat ah um te a pat galvan bangma mudaw umlo in a gen hi.

AR in gul in a chuk mi 1 hukdawk

Imphal, Sept. 6 *(Nisin Thuhiltu)* : Noney Market ah cheng Imbomach Singh, s/o Late Netra Singh (55) chu gul (snake) in a chuuk nung in Noney ah um Assam Rifles te kiang tut in a um a, zia chu tawh kitawn in Unit Hospital ah Medical officer te’n gulgu –thana dawi dawi pia’n a zen dam in a um a, zia nung a chun discharged bawl in a um hi. A hun tak ah AR te panlakna chung a chu mi tamtak in pakchat thu a gen ui.