* L Mangkhogin IPS, SP Churachandpur in Police Officer te Crime tawh kisai in Meeting neihpih.
* JAC on District Medical Department in Khaloh ki-Cut tungtang genkhawm.
* CDSU in District sung a SSC Examination Centre om theihna dia panlakpih te tung ah kipah thupuang.
* District Social Welfar Office ah Disable Persons Un-employment Allowance laktheih ding.
* Churachandpur District Shaktiman Owner's Association in General Body Meeting neiding.
* YPA General Headquaters Hall Hiangtam Lamka ah 26th World Population Day kizang ding.
* T Manga Vaiphei MLA and Chairman MTDC in (Late) Khaikhanlian District First Division League 2012 hong ding.
L Mangkhogin Haokip IPS, SP Churachandpur makaih in tuni sunma dak 10:30 in SP Churachandpur Office Chamber ah Crime tawh kisai in Police Officer te'n Meeting nei uhi. Hiai hun ah Police Station tuamtuam OC te'n Crime tawh kisai a Case om te report pia in maban a panlak dingdan in Law and Order leh Drugs tawh kisai genkhawm ua, Additional SP, SDPO Churachandpur leh Police Officer hunkhop tel uhi.
JAC on District Medical Department in tuni sunnung dak 2 in Chief Medical Office huangsung a District Medical Store ah Meeting nei in Khaloh ki-cut tungtang genkhawm uhi. JAC on District Medical Department te gendan in Pay bill te Chief Medical Office apan diktak in Treasury Office lut a, Treasury Department in Pay Bill passed in Bank a lut chiang in khaloh a phading zah pha nawnlou chi uhi. Aban a genzelna uah, Grade IV te khaloh apan 100 ki-cut a, Grade III te khaloh apan 150 ki-cut chi uhi.
Churachandpur District Students Union CDSU in tuni'a thusuah a bawlna uah, Churachandpur District sung a Staff Selection Commission SSC Examination Centre hon koihsak NK Raghupathy IAS Chairman Staff Selection Commission Govt. of India tung ah kipah thugen ua, huaiban ah SSC Exam Centre District sung a om theihna dia panlakpih MLA, MP, District Administrator, College leh CDSU makai masa te tung ah kipah thupuang uhi. CDSU thusuak in agenzel dan in Churachandpur District in sawttak lunggel a, aneih mualsuah ahihman in Examination Centre hoihtak a pai theihna ding in kuapeuh mah in kithuahpih ding in ngetna leng bawl ngal uhi. Huaiban ah SSC in LDC leh DEO lakna ding in tunaizek a Advertisement abawl tawh kisai a lunglutna nei student te ading in CDSU in Online application ah kithuahpihna peding ahihdan leng taklang ua, Exam penuam student te'n CDSU Information Centre, Ground View Building Opposite Lamka Public ground, Tipaimukh road ah July 23 akipan July 28,2012 tan in zinglam dak 10:30 akipan sunnung dak 2:30 sung in Online in Application piaklut theih ding hi.
Churachandpur District sung a vualphalou (disable person) te lak a Un-employment allowance ngah dia telkhiak a om te ading in District Social Welfare Office ah Allowance laktheih ding hi. Huaiban ah Scholarship for disable students, Scheme to regulate Un-employment allowance to person with disabilities leh Section 66 of persons with disabilities Act. 1995 nuai a Scheme for providing economic assistance to differently abled person, ading in application form kihawm ding a, lunglutna nei disable person te'n District Social Welfare Office ah application format la in August 31,2012 tan in piaklut theih ding a, thuchian kimzaw thei nuam te'n A Umarani Devi District Social Welfare Officer Churachandpur kiang ah kanchet theih ding hi.
Churachandpur District Shaktiman Owner's Association in zingchiang sunma dak 11:30 in Synod Hall IB road ah General Body Meeting neiding uhi. Hiai hun ah Churachandpur District Shaktiman Owner's Association sung thu leh Election neiding tawh kisai ban ah thu poimoh tuamtuam genkhawm ding ua, District sung a Shaktiman nei teng telkim ding in LD Simte Information Secretary Churachandpur District Shaktiman Owner's Association in theihsakna bawl a, a tellou te'n Meeting thupukna nial theilou ding chi hi.
District Health Society leh District Family Welfare Office Churachandpur saina in July 20,2012 sunma dak 10:30 in YPA General Headquater hall Hiangtam Lamka ah 26th World Population Day kizang ding hi. Hiai hun ah "Universal Access to Reproductive Health Services" kichi leh Indian Slogan " Khushhali Ka Aadhar, Chhota Parivar" chih pansan in Programme kizang ding hi. Langkhanpau Guite Chairman ADCC, Chief Guest in pang ding a, Functional President in Dr.HL Liensang Chief Medical Officer pang ding hi. H Doungel Co-ordinator Nehru Yuva Kendra Churachandpur leh a team te'n World Population Day tawh kizawitawn a khangthak te poimohna tawh kisai in show neiding ua, ASHA leh PPC Staff te'n Family Planning tawh kisai in Skit show ding uhi. Hiai World Population Day zatna hun ah Town Area, Saikot Area, Henglep Area leh Block dang a ASHA te ban ah District Family Welfare Officer nuai a ANM teng telkim ding leh zinglam dak 9:30 a registration bawl chiat ding in Dr.VC Pau Tonsing District Family Welfare Officer in theisak hi. Hiai ni a, Office staff teng telkim ding deihna in District Immunization Office kikhak ding hi.
Churachandpur District Sports Association CDSA saina in July 21,2012 in Lamka Public Ground ah (Late) Khaikhanlian District First Division League 2012 kipan ding a, T Manga Vaiphei MLA and Chairman MTDC in tournament hong ding hi. Tournament kipatna ding in kum paisa a Winner team Ngathal Youth Club leh Lamka Sports Club kimawl ding uhi.