Hornbill News Network | 13 July 2012

Hornbill News | Friday, 13 July 2012 14:22 | David R. Tonsing | Hits: 325

* Churachandpur Govt. College kong a Culvert bawlna ding ah nasep kipan nawn.

* P Sianzadong Chairman Finance Committee makaih in Finance Committee in Meeting nei.

* ZYA Central Cabinet Committee leh Constituent Unit a makai teng in Meeting nei in Consutltant ding in mi 4 guang.

* Churachandpur District ading Women Constable 50 in Joining Report bawl ta.

* Police Drugs Cell in Thonkhanmuan tawh Heroin No.4 mankhawm.

* Education Department nuai a Die in Hardness fellou khenkhat om.

* H Mangchinkhup Executive Member ADCC in New-Lamka Gouchinkhup veng ah Water Tanky hong ding.

TANCHIN KIMZAW IN:

Churachandpur Govt. College kong a Culvert bawlna ding ah nasep kipan nawn.
Tipaimukh road leh IB road kisuktuahna a Culvert bawl thak ding a BRTF te'n hunbangtan hiam paisa a, a lampi a tawhtan nung in nasem khawl vengveng mahleh tuni'n nasep kipan nawn a, Culvert bawlna ding mun a tui vung teng tawpkhia in JCB in lei khuak beh hi. BRTF official te gendan in vuah a zuk keileh sepnawnni vel in cement work kipan thei ding a, a tuang ding bawl masak hiding chi uhi.

P Sianzadong Chairman Finance Committee makaih in Finance Committee in Meeting nei.
Tuni sun dak 12:00 in P.Sianzadong Chairman Finance Committee, ADCC makaih in amah office chamber ah, District Council nuai a finance committee in meeting nei uhi. Meeting hun ah, khopi sung a dawr tuamtuam District Council nuai a ki-register zah toh kisai genkhawm in, toll-tax lakding thu leng kikumkhawm uhi.

ZYA Central Cabinet Committee leh Constituent Unit a makai teng in Meeting nei in Consutltant ding in mi 4 guang.
Zomi Youth Association ZYA General Headquater Emergency Cabinet Committee Meeting thupukna dungzui in tuni sunnung dak 2 in SYO Hall Simveng ah ZYA Central Cabinet Committee leh ZYA Constituent Unit a President leh Secretary teng in Meeting nei uhi. Hiai hun ah, ZYA Election paidan ding kikumkhawm in ZYA Election tuhtheih ding in kum 21 sang a naupang zawlou lh Politics a kibuallou mi ahiding chi in thupukna bawl ua, ZYA Constitution tungtang leng genkhawm in, ZYA Consultant ding in Ginzalian Assistant Agriculture Officer, Kamsuanlun Executive Member ADCC, Dr.Nengngaihlian leh Thangzamang Ex-General Secretary ZYA General Headquater te guang uhi.

Churachandpur District ading Women Constable 50 in Joining Report bawl ta.
Manipur ah District tuamtuam ading Women Police constable tamtak in amau District chiat ah joining report bawlta ua, Churachandpur District ading women constable 50 in SP office ah joining report bawl uhi. Churachandpur District a Women Constable thak mi 50 te Women Police Sub-Inspector Chinneilam in enkai ding a, zingkal dak 9:30 in SP office ah roll call omding a, kuamah roll call hun a absent theilou ding in SP Churachandpur in order suah hi.

Police Department nuai a Drug Cell te'n zan nitaklam dak 3:00 vel in New Bazar ah Thonkhanmuan (48) s/o Nengdouthang of Zion Veng, New Lamka mankhia ua, amah apan in Herion No.4 gram 9 mukhia in Police station ah pekhia uhi. Police te'n tuni'n Chief Judicial Magistrate mai ah dingsak in, FIR No.70 (7) 2012 ccp-PS U/S 21 DN & PS (Narcotic Drug & Psychotropic Substance) Act registered uhi.

Education Department nuai a Die in Hardness fellou khenkhat om.
Education department nuai a semtu te lak a Die in hardness toh kisai in a fellou bangzah hiam om a, hiai thu tawh kisai a Pumshong Hangshing, Deputy Inspector of School, Thanlon apan thu kiza dan in, Die in hardness toh kisai a a fellou om kha te akisaipih peuhmah in, akinthei lam a, lai poimoh te tawi a, amah kiang a va ensak ding in theisak hi. Huaiban ah, lai poimoh te, DC kiang ah verification a bawlsak thak uh ngai ding hidan in gen hi.

H Mangchinkhup Executive Member ADCC in New-Lamka Gouchinkhup veng ah Water Tanky hong ding.
New-Lamka Gouchinkhup Veng a PCI(R) huangsung a kibawl water tanky zawhsiang ahihtawh kiton in zingching zinglam dak 7 in ahonna om ding a, H Mangchinkup Executive Member ADCC in Water Tanky hong ding hi. Hiai water tanky ahihleh bialtu MDC H Mangchinkhup in fund a piak zang a kibawl hidan in kigen hi.

Churachandpur district students Union, CDSU in apaisa July 6, 2012 a General Body Meeting nei in, tukha sung a CDSU election neih ding in thupuk uhi. CDSU thupukna dungzui in July 17, 2012 in CDSU Election neih hiding a President, Vice President leh General Secretary ding kiteel ding uhi.

Directorate of Education (S) Govt.of Manipur in kum paisa a, ahihbang in tukum inleng Teachers Day chiang in State Teachers Award piaksawm nawn hi. Hiai ding tawh kisai in Joseph Lalrothang Zonal Education Officer in thusuah bawl a, Govt. School leh Aided school Headmaster te'n mahni teacher te lak a, apply thei ding te theisak a, Zonal Education Office a Prescribe form la a, apply ding in theisak hi. Prescribe form te fill-up khitnung in July 20,2012 tan in piaklut theih ding hi. Hiai State Teachers Award apply peuhmah District Level Screening Committee in selection bawl ding ua, telkhiak a om teng Directorate of Education (S) ah khak ding uhi.