Hornbill News Network | 07 July 2012

Hornbill News | Saturday, 07 July 2012 15:44 | David R. Tonsing | Hits: 460

* H Mangchinkhup Executive Member ADCC in Bungmual ah Multi-Purpose Hall hong.

* Evangelical Prayer Fellowship in Kum 100 chinna lawm.

* Kuki Nampi Kipumkhatna Maicham Kum khat chinna lawm.

* Churachandpur District Congress Committee in District sung a Congress MLA 6 te kipahpihna nei.

* ZRO Cabinet Council in mi 2 Terminate.

* CDSU Election July 17,2012 in om ding.

* Eternal Life Ministry in Paite pau a, a bawlkhiak Gospel Film " End of Spear" kichi a honna om ding.

TANCHIN KIMZAW:

H Mangchinkhup Executive Member ADCC in Bungmual ah Multi-Purpose Hall hong.
H Mangchinkhup Executive member ADCC in BRGF 2011-2012 fund zang a Bungmual playground kiang a Multi-Purpose Hall ding a bawlsak zawhsiang ahihtawh kiton in tuni zinglam dak 7 in a honna nei uhi. Hiai hun ah H Mangchinkhup executive member ADCC in Multi-Purpose hall hong a, Pastor M Ginzatun Local Pastor EBCC Bungmual in Pathian kiang ah lan hi. H Mangchinkhup Executive Member ADCC in a thugenna ah BRGF nuai ah hall liantak bawlna ding in sum kidaihlou a, Bungmual a khaw sung mipi kikhop theih nang Hall liantak bawlsawm in pan kila a, NLCPR nuai ah Lakh 75 bei a hall bawl ding in proposal kipelut chi a, huaiban ah Bungmual ah district nuai a Junior High School khat koih ding in proposal kipelut khin ta chi hi. Aban a genzelna ah Solar Street Light system thuahna ding inleng provision kibawl ta chi'n gen a, public property te mahni a bang a ngaihsun a kepbit dan siam poimoh chi in, Multi-Purpose hall etkol ding in khaw sung a, a poimoh bang a zatding in
Bungmual Youth Club te khut ah Hall chabi pekhia hi. Hiai hun C Hangshing Executive Director ADCC, LT Puii SDO Churachandpur leh Zodingliana MDC ban ah Saptuam Upa leh pastor hunkhop tel uhi.

Evangelical Prayer Fellowship in Kum 100 chinna lawm.
ECA Headquater Pastorate Area a Mission and Evangelism Department nuai a, Evangelical Prayer Fellowship EPF kiphuhkhiak nung Kum 100 chinna tuni zinglam dak 8 in Bijang a Area Office ah zang uhi. Hiai hun ah Rev.Thangkholun Area Pastor in EPF kum 100 chin chiamtehna suangphuh hong in Pathian kiang ah lan hi. Zinglam dak 9:30 in Bijang ECA Headquater church ah mipi kikhopna om nawn a, huai ah Rev.T Janglhun Haokip in Souvenir hong a, Rev.Paozathang Singson Mission and Evangelism Department ECA in hasotna thugen in thumkhawmna makaih hi.

Kuki Nampi Kipumkhatna Maicham Kum khat chinna lawm.
Tuni sunma dak 11 in Suongpi gamsung a, Maicham mun ah Kuki Nampi kipumkhatna Maicham kum khat chin lopna leh mipi thumkhawmna nei uhi. Hiai hun ah Rev.D Jangkholam General Secretary Kuki Christian Leaders Fellowship, thugenpi in pang a, aman a thugenna ah Pathian in ei hong iit bang in ki-it tuah chiat un chi a, kipumkhatna ding in Pathian poimoh pen a, Bible ki-makaih sak ding ahi chi'n leng gen a, huchi hileh tup-le-ngim te tangtung panding ahi chi hi. Nu Parchi in maicham bawl in mipi thumkhawmna makaih hi. Nu Mawi inleng Pathian thu sawtlou gen a, Thangkhosei Haokip President Kuki Innpi Manipur, Rev.Dr.T Lunkim Chairman KUMHR te'n Kuki Nampi sung a tulel dinmun leh maban a thil om dingdan tawh kisai in thugenna nei uhi.

Churachandpur District Congress Committee in District sung a Congress MLA 6 te kipahpihna nei.
Churachandpur District Congress Committee in tuni sunnung dak 1 in Synod hall IB road ah 10th Manipur Legislative Assembly Election a Churachandpur District sung apan Congress ticket a lohchinna ngah te kipahpihna nei uhi. Hiai hun ah Lalnget Hmar President District Congress Committee in MLA te kipahpih thugen a, huaiban ah Thangso Baite MP Outer Manipur leh Langkhanpau Guite Chairman ADCC tel in Churachandpur District sung apan MLA dia telching thak a om Ginsuanhau MLA Singngat, Vungzagin Valte MLA Thanlon, T Manga Vaiphei MLA Henglep, TN Haokip MLA Saikot, Dr. Chaltonlien Amo MLA Tipaimukh and Chairman Hill Areas Committee leh Phungzathang Tonsing Health and Family Welfare, CAD and CADA Minister in thugenna hunzang ua, District Council Member leh Congress worker tamtak in uap uhi.

ZRO Cabinet Council in mi 2 Terminate.
Zomi Re-Unification Organisation ZRO a Kenneth Secretary Information and Public Relation in thusuah a bawl kimu dan in Apaisa June 23,2012 a Organisation apan Suspend a om Khamlunthang @ Thangpu Director GAD, S/o S.Zenzathang of Church Road, Vengnuam, New-Lamka leh Vungkhanpau @ Pauboi Deputy Director GAD, S/o T Hanglamthang of New-Lamka Gouchinkhup Veng te July 1,2012 a Cabinet Council Meeting thupukna dungzui a July 6,2012 akipan tawpsak (Terminate) ahihdan thusuahna ah taklang hi.

CDSU Election July 17,2012 in om ding.
Churachandpur District Students Union CDSU a General Secretary Ginzawmsang Gangte leh Thangkhanlun Samte Secretary Information and Publicity in tuni'a thusuah a bawlna uah July 17,2012 in CDSU Election neih hiding a, President, Vice-President leh General Secretary ding kitelna om ding hi. Hiai ding tawh kisai in Parent Body te'n representative 2 leh Electorate 3 te min July 14,2012 tan a pelut ding in theihsakna bawl uhi.

Eternal Life Ministry in Paite pau a, a bawlkhiak Gospel Film " End of Spear" kichi a honna om ding.
Eternal Life Ministry in Paite pau a, abawlkhiak Gospel film muhnophuai mahmah " End of Spear" kichi a honna zingchiang sunnung dak 1:30 in Nehru Marg a Eternal Life Ministry Office Upa Ricky L Guite tenna inn ah om ding hi. Upa K Dongzalam in Film hong ding a, Rev.Dr Luaichinthang in Pathian kiang ah landing hi. Hiai film ahihleh mimal summet bawlna hilou in khamangthang matna ding tawh kisai a fund drive na dia kibawl ahihman in kuapeuhmah in leisak a teisawn louding in Lalmuan Guite Secretary New-Life Ministry in theihsakna leh ngetna bawl ngal hi.