Hornbill News Network | 06 July 2012

Hornbill News | Friday, 06 July 2012 14:37 | David R. Tonsing | Hits: 421

* Demmang Haokip Vice-Chairman ADCC in Inn 20 ading Langva pekhia.

* District Horticulture Department in Khuai bawm 30 hawmkhia.

* CMO leh DMO in Microscopics te Meeting neihpih.

* One Day District Level Consultation on Right to Education Act. neih in om.

* YPA Diamond Jubilee lopna ding tawh kisai in Laphuah kidemna om ding.

TANCHIN KIMZAW:

Demmang Haokip Vice-Chairman ADCC in Inn 20 ading Langva pekhia.
Demmang Haokip Vice Chairman ADCC in amah Constituency sung a khawsak haksa deuh te khualna in inn 20 ading Langva bundle 5 zel in tuni zinglam dak 10 in amah tenna inn ah pekhia hi. Demmang Haokip Vice-Chairman ADCC in amah Constituency sung a Langva 4 vei a hawmna hita a, tutan in inn 100 phial Langva peta hi.

District Horticulture Department in Khuai bawm 30 hawmkhia.
District Horticulture Office ah Khuai bawm tamlou hongtung a, tuni'n ngetna pelut te kiang ah Khuai bawm hawm uhi. Khuai bawm kihawm khe teng 30 pha hi. Khuai bawm deih tam mahmah in kidaih zoulou hi.

CMO leh DMO in Microscopics te Meeting neihpih.
Dr.HL Liensang Chief Medical Officer makaih in Dr.P Nengzadou District Malaria Officer leh Microscopics mi 11 in tuni sun dak 12 in Chief Medical Officer Office Chamber ah Meeting nei in Microscopics te'n khaw tuamtuam a Slide a lakkhawm chiang ua haksatna tuamtuam a tuah te uh genkhawm in panlak dingdan kikumkhawm uhi.

One Day District Level Consultation on Right to Education Act. neih in om.
Child Rights and You, Kolkata kithuahpihna nuai a Kuki Students Organisation Churachandpur District leh New-Life Foundation, Bishenpur saina in tuni sunma dak 11:30 in Kuki Innpi Churachandpur Office Tuibuang ah One Day District Level Consultation on Right to Education Act kichi nei uhi. Hiai hun ah Langkhanpau Guite Chairman ADCC, Joseph Lalrothang Zonal Education Officer leh LT Puii SDO Churachandpur in Right to Education Act tawh kisai in thugenna nei ua, Student leader, School Headmaster, Womens Organisation leh mi poimoh hunkhop tel uhi.

YPA Diamond Jubilee lopna ding tawh kisai in Laphuah kidemna om ding.
Young Paite Association YPA General Headquater in kumnawn March kha a Diamond Jubilee lopna ding tawh kisai in Music Sub-Committee in Lapawl leh Solo a saktheih ding Laphuah kidemna saisawm uhi. Laa kiphuak in a thutuun ding te ahihleh Gospel, Gamngaih la, YPA motto tawh kituak, khamtheih tawh kisai, lungleen la, tulai I gam leh khotang a puaknat leh kipahna te kigenkhiakna laa khat peuh hithei ding hi. Hiai kidemna a kipahman te category 2 in kikhen ding a, khatna apan thumna tan kipahman piak hiding a, khatna a pang te Jubilee Album ah tuangsak hiding hi. Laphuaktu in lagelh solfa tawh thuah in audio voice record CD in piakkhawm theih ding a, Audio pen studio record ngai se-se lou in Mobile phone a record leng pomtheih ding hi. Laaphuaktu in August 15,2012 tan in Laizom Musika Tedim road, Kimbawi Pan Shop opposite Dorcas Hall, New-lamka leh Mawii Dawr Bungmual ah piaklut theih ding hi.

Zingchiang zinglam dak 9 in Bijang ECA biakinn ah Pastor Thanglal Haokip Director Saraighat Community Church Guwahati in a gelh " Judaism and Christian Tahsan" kichi Laibu honna om ding hi. Hiai Laibu ahihleh Pastor Thangkholun Headquater Pastorate Area, ECA in hong ding hi.

Eugene H Chinzahau in a bawlkhiak laibu simnop mahmah "Chingnou Aw Chingnou" kichi Nupi a simkha peuhmah in nuam a sak mahmah uh, tuma deuh in Copy 1500 sutkhiak himahleh a deih a tam ziak in kidaih zoulou a, tun copy 300 sutkhiak beh hinawn hi. A deih te'n veng tuamtuam a hong zuak te kiang ahihkei leh Laibu zuakna tuamtuam ah cheng 50 pia in leitheih ding hi.