Hornbill News Network | 05 July 2012

Hornbill News | Thursday, 05 July 2012 15:40 | David R. Tonsing | Hits: 442

* Thanlon Block a School 17 ading School Bag 650 kihawm.
* Manipur University nuai a College Development Council Official 3 in Rayburn College hong enkhia.
* Halleluiyah Prayer Band in Anngawl Thumna nei.
* Police Drugs Cell in Ngaikholhing tawh Herion No. 4 mankhawm.
* Hospital Management Society Governing Body in Meeting nei.
* Directorate of Education (S) in State Teachers Award piaksawm.
* Chief Medical Officer makaih in Microscopist te'n Meeting neiding.
* Khuai bawm deih te'n District Horticulture Office ah ngetna piaklut theih.
* KSO Samulamlan Block in Felicitation Programme zang ding.

TUN TANCHIN KIMZAW IN :

Sarva Shiksha Abhiyan nuai a Govt. School naupang te adia hongpai School Bag te hawmkhiakna pailel a, Thanlon Block sung a teltuam Govt. School 17 ading School Bag 650 piakkhiakna tuni sun dak 12 in Pumsong Hangshing Deputy Inspector of School Thanlon leh Thanlon MLA nominee Lalpu in Headmaster te khut ah pekhia uhi.

New Lamka a Rayburn College in Manipur University nuai a permanent affiliation ngah theihna dia ngetna a bawl tawh kisai in tuni sun dak 12:00 in Manipur University apan official 3 in Rayburn College hongpha in inspection bawl uhi. Tuni a Manipur University apan official 3 hong paite ahihleh Proffesor. N. Deva Singh, Head of Department, Geography; Dr. MC Arun, Head of Department, Anthropology leh Dr. I. Gambhir Singh, Head of Department, English hi ua, amau te'n Rayburn College a student omzah, faculty omzah leh college building toh kisai hoihtak in etkhia uhi. Huaiban ah, Rayburn College in Geography, English, Sociology leh Commerce Stream a honours subject alak theihna dia Rayburn College in ngetna a bawl tungtang leng genkhawm ngal ua, Rayburn College a department tuamtuam a faculty-te samkhawm in houlimpih uhi. Manipur University nuai a College Development Council Official te'n Rayburn College 2 vei a etkhiakna uh hita hi.

Halleluiyah Prayer Band pawl in tuni zinglam dak 7:30 akipan Tuibuang ECA Biakinn ah anngawl thumna nei uhi. Hiai hun ah Upa Thangzakhen Zomi Home New-Lamka in anngawl a, nektang kithoh te kaikhawm in Pathian kiang ah lan a, Hemkhomang M.Th Lecturer Evangelical College of Theology in thumna a theih dia poimoh te puang in mipi'n thumkhawmna nei uhi.

L Mangkhogin Haokip SP Churachandpur thupiak dungzui in Drug Cell OC Thangpu Tonsing Sub-Inspector makaih in Lamka khopi sung mun tuamtuam ah Police te'n damdawi khamtheih naktak in doudal ua, tuni sunnung 2 vel in Old Bazar ah Ngaikholhing (45) D/o Siemkholun of Ukha Gate near Kwakta taksa tung ah Heroin number 4 gram 2 ding plastic a kitun mukhia uhi. Sum a tuat in sang 2 leh za 8 vel manzou ding in kigen a, Ngaikholhing in Lamka a number 4 hong supply zel hidan in Police te'n gen ua, tun Police custody ah om lel hi. Police Drug Cell ah OC Thangpu Tonsing Sub-Inspector makaih in Police pasal 5 leh numei 2 om uhi.

Tuni sun dak 12:00 in DC Churachandpur office a BRGF Resource Centre ah Rogi Kalyan Samiti (RKS)/Hospital Management Society governing body meeting neih in om hi. Hiai meeting ahihleh RKS a chairman DC Churachandpur Jacintha Lazarus in makaih a, Member Secretary Dr. Paulginthang, Medical Superintendent in District Hospital toh kisai in report pia a, RKS Governing Body member thak ding guanna leng nei uhi. RKS Governing Body member thak dia guang a omte ahihleh PRI Representative ding in Dr. F. Tusing, N. Ginsianlal Advocate, J. Lhungdim, IRS (Retired), Goihzachiin, Female Helath Worker Training School Principal, D. Khuala Vaiphei, District Program Manager, Seiboi Mate, District Data Manager, Baria judin Shah, District Finance Manager leh Mannuamching Chief Executive Officer ADCC te hi uhi. Huaiban ah, Executive Member a Chairman ding in Dr. Paulginthang, Medical Superintendent leh Member Secretary ding in Dr. Paulunmang , Deputy Superintendent a guang
 ban uah Monitoring Committee chairman ding in Dr. Tualkhankham, Medical Superintendent (Retired) leh member Secretary ding in D. Khuala Vaiphei, District Program manager guang uhi. Tuni a RKS Governing Body Meeting neihna hun a member thak te tuni mah in theihsak hingal ua, amaute toh July 10, 2012 in meeting neih hinawn ding hi. Huai meeting ah ISO Consultant, Instrument Calibration, staff shortages leh waste management toh kisai leng genkhawm ding uhi.

Directorate of Education (S) Govt.of Manipur in kum paisa a, ahihbang in tukum inleng Teachers Day chiang in State Teachers Award piaksawm nawn hi. Hiai ding tawh kisai in Joseph Lalrothang Zonal Education Officer in thusuah bawl a, Govt. School leh Aided school Headmaster te'n mahni teacher te lak a, apply thei ding te theisak a, Zonal Education Office a Prescribe form la a, apply ding in theisak hi. Prescribe form te fill-up khitnung in July 20,2012 tan in piaklut theih ding hi. Hiai State Teachers Award apply peuhmah District Level Screening Committee in selection bawl ding ua, telkhiak a om teng Directorate of Education (S) ah khak ding uhi.

Malaria Department nuai a Microscopist teng in zingchiang sunma dak 11:00 in Chief Medical Officer Dr. HL Liensang makaih in CMO Office chamber ah meeting nei ding uhi. Hiai hun ah Microscopist te'n amau sepna mun chiat a ava om theih dingdan utoh kisai leh amau mohpuakna leh slide etna toh kisai a haksatna a neihte uh genkhawm ding uhi. Tulel in Malaria Department nuai ah Microscopist mi 11 om hi'n leng kigen hi.

Khuai bawm (Bee Box) bangzah hiam hongtung  a, a deih te'n application gelh in District Horticulture Office ah piaklut theih ding a, a pelut masa in khuai bawm tangkha masa ding hi'n kigen hi.

Kuki Students Organisation KSO, Samulamlan Block in July 7, 2012 sunma dak 11:00 in Lukhumbi Community Hall ah, Samulamlan Block sung a om kha, KSO member, tukum a class X leh Class XII, 1st leh 2nd division a lohchinna ngah te kipahpihna nei ding uhi. Huai hun ah, Joseph Lalrothang, ZEO, Churachandpur in chief guest hihna toh uap ding a, Peter Lienjela, BDO, Samulamlan in Functional president hihna toh uap in, Thangpi, EO, Samulamlan leh Reikhupsong Kom, Social worker in Guest of Honour hihna toh uap ding uhi. Programme sung in tutung a KSO Samulamlan block sung a KSO member lohchinna ngah te ading in Rev. P.Mangte in Vualzawlna ngetsak ding hi.