Hornbill News Network | 4 July 2012

Hornbill News | Wednesday, 04 July 2012 14:43 | David R. Tonsing | Hits: 446

* ZEO leh DI of School Churachandpur in SSA School Bag pekhia.
* DC makaih in SDO teng in Hill House Tax leh Village Recognition tawh kisai genkhawm.
* Lamka khopi sung ah National Institute for Electronic and Information and Technology koih hiding.
* Thanlon leh Singngat a SK Oil Dealer te Permit Sub-Divisional Headquater ah piak hiding.
* DC Churachandpur in Bio-Metric Collection Camp neih sawm.
* Govt. Department 4 ah Land Encroachment nasa mahmah.
* DC Churachandpur in Sangaikot, Saikot, Samulamlan, Tuibuang, Vangai BDO Meeting ding in sam.
* DC Churachandpur Office ah RKS tawh kisai in Meeting om ding.
TANCHIN KIMZAW:

ZEO leh DI of School Churachandpur in SSA School Bag pekhia.
Churachandpur Block sung a Govt. School 11 ading SSA School Bag 1400 leh Singngat Block sung ading Bag 650 piakkhiakna tuni sunma dak 11 in Churachandpur Govt.high school ah nei uhi. Hiai hun ah Joseph Lalrothang Zonal Education Officer leh kaikhanlian Guite Deputy Inspector of School in School bag te headmaster leh headmistress te kiang ah pekhia ua, Zonal Education Officer in Nikum a tangkhalou, laisiam leh khawsak haksa deuh school naupang te kiang ah peding in school thuneitute theisak hi. school bag te kihawm dan ahihleh Phungkhothang High school ah 200, Gandhi Memorial High school ah 200, Vungzagen High School ah 200, Tuibuang Junior High School ah 70, Vimala Raina High School ah 50, Lanva Model High School ah 150, Rengkai Higher Secondary school ah 100, Kangvai secondary school ah 100, Churachandpur High School ah 30 leh Lamzang High School ah 50 hidan in kigen hi. Tunung sawtlou in Tipaimukh block ading school bag 700 pekhe nawn ding uhi.Pumsong Hangshing Deputy Inspector of School Thanlon in zingchiang in ZEO Office ah Thanlon Block Sung a Govt. School Headmaster te kiang ah School Bag pekhe ding a, Headmaster te'n Seal tawi in valak theih ding hi.

DC makaih in SDO teng in Hill House Tax leh Village Recognition tawh kisai genkhawm.
Tuni sunnung dak 12:30 in Jacintha Lazarus IAS DC Churachandpur makaih in amah Office Chamber ah Sub-Divisioner Officer SDO teng in Meeting nei in Hill House Tax leh Village Recognition tawh kisai genkhawm uhi. Hiai thutawh kisai a DC Churachandpur in a gendan in SDO teng in Hill House Tax pia khua phazah leh Village Recognition phazah kiakhawm in hon submit ding uh chi a, British te hunlai a village recognised a om te bel kichiamteh khin a, British te hunlai in churachandpur circle ah khua 173 leh Thanlon Circle ah khua 76 vel recognised a om hidan in gen a, tulel in Churachandpur District sung ah khua 600 vel om chi hi.

Lamka khopi sung ah National Institute for Electronic and Information and Technology koih hiding.
Churachandpur District sung ah National Institute for Electronic and Information and Technology in Institution khat hong koih ding uhi. Hiai ding tawh kisai in tuni'n Natiional Institute for Electronic and Information and Technology apan Official 2 in Lamka hongpha ua, Jacintha Lazarus IAS DC Churachandpur kimuhpih uhi. Hiai thu tawh kisai a DC Churachandpur in a gendan in Official 2 te'n Institution tunding ahihma a, building luah thawh a Institution koihna munding Headquater veng ah hong enkhia ua, building luah ding a om chiang in temporary in Institution kihong ngal ding a, september 2012 in class kipan ding a, permanent ahih nailouh ziak in Short Course training in kipan phot ding a, Institution building ding bawlzawh ahih a permanent ahih chiang in residential training course leng kipan ngal ding chi a, Institution hoih mahmah ahihziak in Laboratory 2 neiding ua, Laboratory khat ah computer 30 zel koih sawm ua, hiai ding in mun lian poimoh petmah chi'n gen hi. Aban a genzelna ah Churachandpur District ki-hampha petmah a, Central Govt. in Manipur a hiai bang institution koihna ding in Senapati leh Churachandpur District kia telkhia chi'n leng genbeh hi.

Thanlon leh Singngat a SK Oil Dealer te Permit Sub-Divisional Headquater ah piak hiding.
Jacintha Lazarus IAS DC Churachandpur in tuni'n Thanlon leh Singngat a SK Oil dealer leh District Supply Office meeting neihpih in Thanlon leh Singngat ading SK Oil permit Lamka mun a piak nawnlouh a, Sub-Divisional Headquater mun a piak dingdan genkhawm uhi. DC churachandpur in agendan in Agent te permit Sub-Divisional Headquater ah piak hiding a, akisaipih SDO leh Police ban ah District Supply Officer staff khenkhat in enkai ding chi hi. Thanlon leh Singngat Sub-Division ah lamzang tak a paitouh theih leh maban ah Henglep leh Tipaimukh ah leng sutzop hiding chi a, SK Oil tawh kisai a, hiai bang paidan a kizat theih leh Anntang leh Sub-Divisional Headquater ah kihawm ding chi'n leng gen hi.

DC Churachandpur in Bio-Metric Collection Camp neih sawm.
Jacintha Lazarus IAS DC Churachandpur in Bio-Metric lakna pailel ahihdan gen a, Tipaimukh, Henglep leh Thanlon Sub-Division sung mi Lamka zang a om Bio-Metric kila khalou leh Khaw sung a om ngal a, Bio-Metric kila khalou te khualna in July 28,2012 akipan Churachandpur ah Bio-Metric Collection Camp neih hiding chi hi. Tipaimukh Sub-Division ading in Rengkai Community Hall ah neih hiding a, Henglep Sub-Division ading in Bijang Community hall ah neih hiding a, Thanlon Sub-Division ading in SDO Churachandpur Office huangsung a MNREGS Training hall ah neih hiding chi hi.

Govt. Department 4 ah Land Encroachment nasa mahmah.
Jacintha Lazarus IAS DC Churachandpur in tuni sunnung dak 2:30 in amah Office Chamber ah PHED, Vetenary department, District Transport Officer leh Zilla Sainik Board thuneitute meeting neihpih in mimal leh Organisation tuamtuam in Govt. gam a lak (encroachment) tungtang genkhawm uhi. Hiai thu tawh kisai a DC Churachandpur in agendan in Govt. department 16 te gam omdan a guk in survey kibawl a, report kingah dan dungzui in PHED te gam mi 12 in laksak ua, District Transport Office leh Zilla Sainik Board te gam teng bei vek in Tuibuang Bazar suakta chi hi. Huaiban ah tulel a B Vengnuam Community hall omna leng Vetenary te gam hikha chi'n leng genbeh a, vaihawm dingdan a buaihuai in a lungkham huai mahmah chi'n leng Media te kiang ah gen hi.

DC Churachandpur in Sangaikot, Saikot, Samulamlan, Tuibuang, Vangai BDO Meeting ding in sam.
Zingchiang sunma dak 11:30 in DC Churachandpur in amah Office Chamber ah Sangaikot BDO, Samulamlan BDO, Vangai BDO, Saikot BDO leh Tuibuang BDO te meeting neihpih ding a, Hill house tax leh village recognition tawh kisai genkhawm ding uhi.

DC Churachandpur Office ah RKS tawh kisai in Meeting om ding.
Zingchiang sun dak 12 in DC churachandpur Office a BRGF resource centre ah RKS tawh kisai in Meeting om ding a, huai ah Dr.N Paulginthang Medical Superintendent District Hospital leh Dr.HL Liensang Chief Medical Officer leh akisaipih Officer te telding ua, District Hospital puahna dia hongpai RKS tawh kisai leh District hospital a vanzat kitasam te tungtang ban ah district hospital a ISO Consultant nuai a post vacant tawh kisai genkhawm ding uhi.