* Churachandpur District ah Candidate 303 in HSLC Compartment Exam.
* District Social Welfare leh IRCA saina in Student te'n Essay Competition nei.
* Churachandpur District Council Teachers Association Vaipaw thak te'n mohpuakna la.
* DC Churachandpur in ST Chullouphai khua ah Vocational Training Centre Building hong.
* Manipur University apan College Development Council Official team in Rayburn College hong enkhia.
* District Administration leh District Social Welfare Office saina in 25th International Day Against Drugs Abuse and Illicit Trafficking kizang ding.
Board of Secondary Education Manipur BSEM saina in tuni sunma dak 10 in HSLC Compartment examination 2012 neih in om hi. Hiai hun ah Churachandpur District sung a candidate 303 exam uhi. Mathematic ah candidate 146, Science ah 51, social science ah 104 leh English ah 2 hidan in kigen hi.
District Social Welfare Office Churachandpur leh IRCA saina in International day Against Drug Abuse and illicit Trafficking tawh kizawi tawn in tuni sunma dak 11 in Vimala Raina High school ah " Think Health-Not Drug" chih pansan in Student class V to VII leh class IX to XII student te'n Sappau in Essay writting competition nei uhi. Hiai hun ah School tuamtuam apan Class V to VII student 25 leh Class IX to XII student 67 tel uhi. Hiai essay writting competition a, kipahman te June 26,2012 in piakkhiakna om ding hi.
Churachandpur District Council Teachers Association CDCTA vaipaw dia April 14,2012 a telching thak a om te leh Association vaipaw luite, tuni sunnung dak 12:30 in Langkhanpau Guite Chairman ADCC Office Chamber ah Charge kipekhia uhi. Out-going president Tualkhanlal in Association sung in a buaipih te leh thil paidan a vaipaw thak ding te kiang ah taklang a, President thak D Letkholal khut ah Office vanzat leh file ban ah document poimoh tuamtuam te pekhia hi. Langkhanpau Guite Chairman ADCC in teachers welfare awlmoh a mohpuakna kituh kichi thil om theimah ahihdan gen a, awlmohna ziak ahi chi a, kitheih siamlouhna khenkhat om mahleh kingaidam tuah chiat ding in ngen a, huaizawh in thumsakna nei hi. Association vaipaw lui te'n amau mimal sum seng a Assembly 3vei a neihna ua, sum kizang bei Lakh 1 val Langkhanpau Guite Chairman ADCC in vaipaw lui te khut ah pekik hi.
ST Chullouphai khua a BRGF 2011-2012 fund zang a vocational training centre building kibawl zawhsiang ahihtawh kiton tuni sunma dak 11 in a honna nei uhi. Hiai hun ah Jacintha Lazarus IAS DC Churachandpur Chief Guest apang in Vocational Training Centre Building thak hong a, aman a thugenna ah, ST Chullouphai leh a kim-le-kiang a khaw sung mipi'n a lunglutna uh theisak ding in ngen a, trainingna dia vanzat poimoh te peding ahihdan gen a, Govt. in development scheme hon piak te ahiding bangtak a, sepsuah ahihchiang in Govt. in hon piakbeh zel ding chi a, huaiban ah Jairam Ramesh Union Minister Rural Development and Panchayati Raj in ST Chullouphai khua hongphak lai a hon gen bang in ST Chullouphai khaw sung a Lampi teng black topping bawl hiding chi a, huaiban ah Central apan MGNREGS Special Monitoring team in tunung sawtlou a, ST Chullouphai khua a development scheme tuamtuam a naa kisem te hong enkhe ding uh ahihdan leng gen hi.
Manipur University apan College Development Council Official team in tuni sunma dak 11 in New-Lamka a Rayburn College hongpha uhi. Rayburn College a Thadou-Kuki MIL subject om theihna ding leh English, Geography leh Sociology Honors Subject om theihna ding tawh kisai a hong enkhia uh hidan in kigen hi.
District Administration leh District Social Welfare Office saina in June 26,2012 sunma dak 10 in Synod Hall IB Road ah "Think Health, Not Drugs" chih pansan in 25th International Day Against Drugs Abuse and illicit trafficking" kizang ding hi. Hiai hun ah Dr.HL Liensang Chief Medical Officer in " Drugs Abuse and Its Affects in Our District" chih pansan in thugen ding a, Jacintha Lazarus IAS DC Churachandpur in " Administration and Civil Society in Prevention of Drugs Abuse" chih pansan in thugen ding hi. Langkhanpau Guite Chairman ADCC in " Political Leaders as Change Agents Against Drugs Abuse" chih pansan in thugen ding a, Interaction hun ah Saptuam heutu lam apan Rev.Bishop Ginkhanmung Zou in thugen ding a, Tribe Leader lam apan chairman Zomi Council, Chairman Kuki Innpi Churachandpur leh chairman Hmar Innpui in thugen ding ua, Philantrophic Organisation lam ah President YPA General Headquater in thugen ding a, Student Leader lam apan President CDSU, Headmaster lam apan Vunglallian Proprietor Lalpuithluaii foundation School leh District Youth lam apan H Doungel District Youth Co-ordinator NYK Churachandpur in thugen ding uhi. Hiai hun ah tuni'a Essay Writting Competition a kipahman te leng hawmkhe ngal ding uhi.