Hornbill News Network | 19 June 2012

Hornbill News | Tuesday, 19 June 2012 16:09 | David R. Tonsing | Hits: 428

* Covenant Children's Home in Felicitation leh Graduation Service zang.
* Police leh VDF kithuah in Khopi sung ah Drive hahbawl.
* Tuibuang ah tui kaihoih, khopi sung ah kailou.
* District Council member te'n SGSY leh IWMP tawh kisai in training nei.
* District ah Sungkhoh, Santen leh Typhoid natna tam.
* Palkhuang ah Sungkhoh ziak in Nupi 2 si.
* District Level Science Seminar om ding.
* Churachandpur District mi 4 in Dr.Ambedkar National Merit Award ngah ding.
* Christian Fellowship Church ah Kuki Holy Bible Anniversary lopna om ding.

TANCHIN KIMZAW:

Covenant Children’s Home in tukum a, Class XII zouthak mi 7 khakkhiakna leh Class X examna a lawhchingte kipahpihna tuni  zinglam dak 11:00 in New Lamka YPA Hall ah nei uhi.Huai hun ah Rev Khen P.Tombing in graduation hun zatpih a,Rev. Kham T. Valte in Graduate thakte kipahpihna in thil piak pia a,Pastor G.Suanzalam, Coordinator (Institution) PCI (R) in graduation te thumsak hi. Elder T.S Hangzo , Vice chairman Covenant childrens home managing board in HSLC exam 2012 a lohching mi 22 te pahtawina pia hi. Huai hun ah Rev Khen P Tombing Chief Coordinator PCI (R) in thugenna nei a, Managing Board sik leh tang in Rev K.Thongzagou in thugenna nei hi.

L Mangkhogin Haokip IPS SP Churachandpur thupiak dungzui in Lamka Police leh VDF te'n tulai in khopi sung ah gari document kimlou leh kum chinglou a gari hek te drive hahbawl mahmah uhi. gari mat a om te challan cut in sum liausak zel uhi.

Lamka khopi sung ah tulai in tuisiang muhding vang mahleh tuibuang ah tui siang hoihtak in kai a, sun khua in tui kaiden nawn hi. Tui kaina mun ah puansawp pawl leng om in naupang te'n kimawlna ding in zang lel uhi.

District rural development agency DRDA churachandpur saina in tuni sunma dak 10:30 in tuibuang a district training centre ah district council member te'n SGSY tawh kisai in training nei uhi. Hiai hun ah C Hangshing ED/DRDA in keynote address gen a, Kaikhanthang chief manager SBI ccpur in concept of self help group and account implementation tawh kisai sinsak a, Grace Zamnu MDC Muallum in basic concept of self help group tawh kisai sinsak hi. Hiai training programme neih zawh in integrated watershed management programme tawh kisai in district council member te'n training neinawn ua, hiai hun ah langkhanpau Guite chairman ADCC in welcome address gen in, jacintha lazarus IAS DC ccpur in keynote address gen hi. C Hangshing ED/DRDA in course introduction bawl a, technical session hun ah, M Jugindro Assistant engineer Horticulture and soil conservation, K Hnunliansang Assistant engineer DRDA leh Joyce Lalrinpui Project officer DRDA in thupi tuam chiat pansan
 in sinsak uhi.

Dr H.L Liensang CMO makaih in zingchiang zinglam dak 11:00 in CMO office Conference Hall ah Male Health Superviser, Male Health Worker, Multipurpose Worker leh Malaria Technical Superviser te'n meeting neiding uhi. Huai hun ah Department te nasep dingdan genkhawmnna leh mohpuakna kihawm ding uhi.

Kum dang tawh kibang lou in tukum tuktui luan hun (rainy session) inleng tui tawm a, tui tawm ziak in mihing te tuinek sianthou zawhlouh ziak in CCpur Dist sung ah sungkhoh, santen leh typhoid natna tam mahmah hi. Huai tawh kisai in kuapeuh in tui suansou sa kia dawn a, bazar leh lampi zul a theigah chi tuamtuam kizuak te' sopsianglouh a nelou ding leh kuapeuh in mahni damtheihna kembit ding in Dr HL Liensang, CMO/CCpur in mipite ngen hi.

Palkhuang khua ah tulai in sungkhoh tam mahmah hi'n kigen a, tunai zek in nupi 2 in sungkhoh ziak in sihna tuakta uhi. Huai tawh kisai in Palkhuang khua ah District Council etkolna nuai a damdoi inn ah Doctor leh Nurse om mahleh Dr HL Liensang in Bukpi PHC a Doctor H.Ginthianmung va enkhe ding sawl a, apoimawh bangbang a panpih ding in theisak hi.

ZEO,Office a Science unit saina in ahongtung ding August, 1st Week, 2012 in District Level Science Seminar, 2012 om ding hi. Huai hun ah, district sung a school 15 apan candidate 2 zel telding ua, Mathematics in India, Past, Present and Future chih thupi in zang ding uhi. Huai ding toh kisai in school headmaster teng in amau school apan tel ding candidate te list ban ah, forwarding letter te July 22, 2012 tan in ZEO office ah submit ngai ding hi. Hiai seminar a siampen 2na tan teel khiak hiding ua, amau te Imphal a State Level ah  district ai-oh in kuan ding uhi.

Dr. Ambedkar Foundation Ministry of Social Justice and Empoweerment, Government of India in Dr. Ambedkar National Merit Award Scheme ngah theih ding in BSEM nuai a Class X examination, 2010-11 session ah, ei district apan mi 4 teel khia uhi. Teel khiak a om te, T.Khaiminlal Haokip, S/o Ngamkhokam of District Headquarter, Tuibuang, Henry H.Vumjou, S/o Kailal Suantak of Red Cross Lane, Sangneihlu Sanate, S/o Romeo Sanate of Shan Veng, Rengkai leh Serto Awar Kom, S/o S.Rewangson Kom, Lower Komkeirap, Loktak Project, Churachandpur te hi ua, amau te ading in zingchiang sun dak 12:00 in DC office ah award hawmna om ding hi. Hiai kipahman sang ding peuhmah in mahni guardian te tonpih ngai ding hi.

Christian Fellowship Church, District Headquarer, Tuibuang ah, ahongtung ding June 24, 2012 sun dak 12:00 in Kuki Holy Bible Anniversary zatna om ding hi. Hiai hun ah, Rev. Nguljathang Pastor, Christian Fellowship church in thumna in hun hong ding a, Dr. T.Lunkim in Pathian thugen ding hi.

Jacintha Lazarus IAS DC Churachandpur makaih in tuni sunnung dak 2 in DC Lamka Office Chamber ah Drugs Abuse tawh kisai in meeting  om hi. Hiai hun ah Chief Medical Officer, District Social Welfare Officer, District Family Welfare Officer, District Aids Control Officer leh Committee on NGO Member te tel in June 22,2012 a International day against drugs abuse and illicit traffic, observe na ding tawh kisai genkhawm uhi.

Churachandpur District Private school association in tutung BSEM leh CBSE nuai a lohchinna ngah te lak ah District Topper Award piakna programme June 21,2012 sunma dak 10:30 in Sielmat Christian Higher secondary school ah neih sawm uhi. Hiai hun ah M Okendro Singh Education, CAF and PD Minister, chief guest in pang ding hi. guest of honour in TN Haokip MLA leh langkhanpau guite chairman ADCC pang ding ua, chief host in Jacintha Lazarus IAS DC Churachandpur pang ding hi. Hiai ban ah H Mangchinkhup EM/ADCC, Khaipau haokip MDC, Joseph lalrothang ZEO leh L mangkhogin IPS/SP Ccpur in special guest hihna tawh uap ding uhi.