Hornbill News Network | 18 June 2012

Hornbill News | Monday, 18 June 2012 15:56 | David R Tonsing | Hits: 443

* District Level Football Development Programme Organising Committee in Orphanage Home 4 ah Football pia.

* Lions Club Churachandpur Greater in JP Selection Tedim Road ah mipi dawn ding tui siangthou koih.

* Gospel For India saina in Vacation Childrens Development School kipan.

* BYF Central Lamka in Jumble Sale nei.

* Kamsuanlun Executive Member and Incharge Town in Sanitary Worker te Review Meeting neihpih.

* CDSA saina in District pawlam a player te leh District sung a Football Player te Exhibition match kimawl.

* DRDA saina in MDC te'n IWMP tawh kisai in Awareness Programme zang ding.

* DC Churachandpur makaih in Drug Abuse tawh kisai in Meeting om ding.

* ZSP General Headquater in Felicitation cum Award Distribution Function zang ding.

District level Football development programme 2012 a organising committee in lamka khopi sung a naupang te football pek siamsak sawm in zan sunnung dak 1:30 in Lamka khopi sung a naupang tagah kepna orphanage home 4, Sang gah muon inn, Vondei Saulim, Amazine Grace leh Only Grace ah football pia uhi. District level Football development Programme organising committee member te ahihleh S Genlemlal Chief Coach CDSA, Khanthang Paite East Bengal leh Ringsolal Thomte Air India te hi uhi.

Lions Club of Churachandpur Greater in district mipi te khualna in Tedim road a JP Selection ah tui siangthou leh a vot a thon a dawn ding in koih ua, zan nitak lam dak 3:30 in Lion Club member Lion Langkhanpau Guite, Chairman, ADCC in a honna nei hi. Aman a thugenna ah Lamka khopi sung a hongzin te khualna in Police Station sak a traffic point lak ah churachandpur district sung a lampi paidan kigelhna signboard takkkhiak sawm ahihdan gen hi. Hiai hun Dr. Madhu, Patron chairman, Lion Club Moirang leh Lion Club member hunkhop in uap uhi. Hiai tui siangthou koihna khawl ahihleh Lion Club Churachandpur in mipi khualna a sum sing 5 bei a, leikhiak uh hi a, amau mahmah in enkai ding uhi.

Gospel for India, GFI saina in tuni zinglam dak 11:00 in Rayburn Chapel ah, Vacational Children Development School, kipan hi. Hiai hun ah, Rev. S.Vungminthang, Director of Institution, EBC in ahonna nei in Pathian kiang ah lan hi. Hiai hun Jacintha Lazarus, IAS, Deputy Commissioner, Churachandpur in chief guest hihna toh uap hi. Aman a thugenna ah, hun awl a hoih lam a zatsak sawm a, hiai bang programme bawl Gospel for India te tung ah kipah thugen a, hiai programme sung a pathian thu kia hilou a siangthouna lam leng sinsak ding in ngetna bawl a, khopi sung siangthouna ding in theihtawp kisuah mahleh hun bangtan hiam nung in a ngei mah bang nawn a, siangthouna lam tawh kisai kisinsakna uang bawl poimoh chi hi. Huaiban ah naupang a neulai a kipan lampi diktak a tot khak leh huai apan pialkhe nawnlou ahihdan leng gen a, society sung ah khamtheih guih theih leh thil chin hoih lam in masawn mahmah a, Philantrophic Organisation leh saptuam heutu te'n leng theihtawp suah a panla ding in ngen hi.

Baptist Youth Fellowship Central Lamka in Hotdamna Camp fund raise na ding in tuni zinglam dak 10 akipan EBCC Central Lamka Biakinn huangsung ah Jumble Sale nei ua, silh-le-ten, Um-le-bel ban ah computer tanpha kiman taktak in zuak uhi. Mi phatuamngai tamtak in van kizuak te leisak uhi.

Kamsuanlun Executive Member and Incharge Town ADCC in tuni sunma dak 11:30 in Town Office ah Sanitary Worker te Meeting neihpih in tulai a khopi sung siangthouna ding a District Council panlakna tawh kisai a, tunitan a progress om te genkhawm uhi. Kamsuanlun Executive member and Incharge Town in a genna ah, Sanitary worker te'n thuakzou hamham a khopi sung siangthouna dia chihtakna suah ding in ngen a, khopi sung a niin kaihkhawm hun a zatding daak leng ngaihtuah lel ahihdan gen a, huaiban Sanitary worker te ading jungle boot, rain coat leh glove leng peding ahihdan gen hi. Sanitary worker te'n niin kaihkhawm hun in mun khat ah minute 5 khawl zel ding in theisak a, mipi'n leng mahni niin te polythene a khawlkhawm a, sanitary truck hongtai hun a Gari sung a paihlut maiding in ngetna bawl ngal hi. Khopi sung a niin paihthang teitei dawr kaite matkhiak om leh trade license cancell sak hiding a, huaiban ah sum leng liausak hiding chi hi. Khopi sung siangthouna dia District council panlakna mipi'n theihtawp suah a kithuahpih ding inleng Kamsuanlun Executive member and Incharge Town in ngetna bawl ngal hi. Tulel in District Council Town nuai ah Skilled leh Un-Skilled labour 18 vel om uhi.

Churachandpur District Sports Association CDSA saina in tuni sunnung dak 3 in lamka public ground ah district pawlam a kimawl player te leh district sung a club tuamtuam a kimawl player te'n football exhibition match nie uhi. Hiai hun langkhanpau Guite chairman ADCC in chief guest hihna tawh uap hi. Functional President in M Gouzamang executive member ADCC pang a, kimawlna en mipi tam petmah hi.

District Rural Development Agency (DRDA) saina in Members of District Council-te a ding in zingchiang zinglam dak 10:30 in District Training Centre, Tuibuong ah SGSY Scheme toh kisai in traning om ding hi. Hiai hun ah C. Hangshing, Executive director DRDA in keynote address gending a, "concept of Self Help Group and Accounts and Implementation toh kisai in State Bank of India te'n sinsak ding ua, "Basic Concept of Self Help Group" toh kisai in Grace Zamnu, Muallum MDC in sinsak ding hi. Hiai hun ah CCpur district sung a MDC teng tel ding uhi. Huaizawh sunnung dak 1:00 in District Training Centre Tuibuong mah ah Implementation of Integrated Watershed management Program toh kisai in Awareness -cum- training program om ding hi. Hiai hun ah M. Jugindro, Assistant Engineer (Horticulture and Soil Conservation), K. Hnunliansang, Assistant Engineer DRDA leh Joyce Lalrinpui, Project Officer DRDA in thupi tuamtuam pansan in sinsak ding uhi.

Jacintha Lazarus IAS DC Churachandpur makaih in zingchiang sunnung dak 2 in DC Lamka Office Chamber ah Drugs Abuse tawh kisai in meeting om ding hi. Hiai hun ah Chief Medical Officer, District Social Welfare Officer, District Family Welfare Officer, District Aids Control Officer leh Committee on NGO Member te telding uhi.

Zou sang naupang pawlpi ZSP General Headquaters Foundation Trust in tutung Class X leh Class XII Examination a lohchinna ngah te kipahpihna leh Award piakkhiakna June 21,2012 sunma dak 11 in Zogal Memorial Hall Complex Zoveng ah neihsawm uhi. Hiai hun ah Chief guest in Ginsuanhau MLA pang ding a, Functional President in P Sianzadong Chairman Finance Committee ADCC leh Grace Zamnu MDC pang ding ua, Guest of Honour in L Mangkhogin Haokip IPS/SP Churachandpur leh Dr. Robert S Ginlunmang Zou pang ding ua, chief host in Manglianthang Zou Acting President UZO General headquater pang ding hi.

GAMDANG THU

Mexico a G20 Submit om ding tawh kisai in US President barack Obama zan nitak in Los Cabos khopi tungta hi. G20 Submit kipatma a International Monitary Fund Chief in a genna ah tutung G20 submit ah economy leader tuamtuam te tawh gam chih a kimuan ngamna om theihna ding in pan kila ding chi hi. Hiai G20 submit ah world economy leader te telding uhi.

Yemen ah Alkaida te tung a operation bawlna commander minthang mahmah khat tuni'n suicide bomb attack ah si kha hi.Major Salim Ali Katan ahihleh Office kai dia a kuanna lam a, tup tuam a thah a om hidan in kigen hi.

South Western Pakistan a quetta khopi ah motor bike in school bus phukha in bus puakzak a, bus sung a tuang mi 3 si uhi. Police te gendan in Motor bike a bomb kithuah hiding in gen ua, university student dang hunkhop leng liam uhi.