Hornbill News Network | 06 June 2012

Hornbill News | Wednesday, 06 June 2012 14:43 | David R. Tonsing | Hits: 503

* Lamka College in Foundation Day zang.

* Jacintha Lazarus IAS DC Churachandpur in Sericulture Department te Office enkhia.

* Dr.P Nengzadou in District Malaria Officer ding in Charge la.

* JSY tawh kisai a thaman lanailou ASHA Member te'n Chief Medical Officer kiang ah laktheih.

* DC Churachandpur in Tualnuam khua ah Lanva BDO Office munding enkhia.

* Naunei panpihna JSY sum lalou te'n tunung in Complain bawl theilou ding.

Lamka College in tuni sunma dak 11:30 in College Multi-Purpose hall ah College Foundation Day zang uhi. Hiai hun ah Chief Guest in M Gouzamang Guite Executive Member ADC Churachandpur pang a, Functional President in Dr.M Lokendra, Principal Lamka College pang a, Student te kiang ah Award leh Appreciation Certificate pekhia uhi. Dr.TK Muana Former Principal Lamka College in College in tanchin tomkim gen a, College in NAAC a Accredition a ngah kipahpih thupuang in, Lamka College ah Post Graduate/Master degree tanpha om theihna dia panla ding in Principal kiang ah ngen hi. Dr.Chinzakham Ngaihte Associate Professor in College Faculty leh Governing Body Member aphamsa te sunna hun makaih in minute khat dai di-de in hunzang uhi. Chief Guest apang M Gouzamang Guite Executive member ADC Churachandpur inleng Lamka College in NAAC a Accredition a ngah kipahpih thupuang in College Principal leh Staff te tung ah kipah thugen hi. Aban agenzelna ah Manipur ah NAAC Accredition ngah College 6 kia om a, Hill District teng ah Lamka College chihlouh NAAC Accredition ngah omlou chi a, maban ah Student leh Staff te ading in facility leh vanzat hoihzaw a om ding lam-et huai ahihdan gen hi.

Jacintha Lazarus IAS DC Churachandpur in tuni sunnung dak 1 in Bijang a Sericulture Department te Office enkhia hi. Office huangsung a, Store Room tuamtuam te leng enkhia in Office Staff te Meeting neihpih hi. DC Churachandpur in Ofice Staff te Self Introduction bawlsak a, Office sepsuah leh maban sep ding te aban-ban in kanchian a, Department Office Signboard bek tak ding in theisak hi. DC Churachandpur ahihleh Maniram Sharma IAS Assistant Commissioner Churachandpur, Laltlanpuii SDO Churachandpur, Thianlaljoy Gangte SDC, S Khaikhopau Ngaihte Branch Officer Headquater DC Office te'n zui uhi. DC Churachandpur in maban ah leng Govt. Department Office tuamtuam leng enkhe laiding hidan in kigen hi.

Dr P.Nengzadou in tuni sunnung in District Malaria Officer ding in Dr N.Paulginthang apan charge la hi. Hai hun ah Malaria Office staff te'n District Malaria Officer lui Dr.N Paulginthang mangpha khakna leh District Malaria Officer thak Dr.P Nengzaou vaidawnna in singpi dawnkhawm in houlimna leh kimeltheih tuahna leng neingal uhi.

Numei nauneihna (JSY) tawh kisai athaman ding sum lakha nailou ASHA member te'n Chief Medical Office ah laktheih ding hi'n Dr HL Liensang Chief Medical Officer apan thu kiza hi.

Manipur Cabinet in Lamka North TD Block, Lamka South TD Block leh Lanva TD Block honding a, thupukna a bawl dungzui in District Administration Churachandpur in Block Headquter ding leh Block Development BDO Office ding ngaihtuah lel a, hiai tawh kisai in tuni sunnung dak 3 in Jacintha Lazarus IAS DC Churachandpur in Tualnuam khua ah Lanva BDO Office munding va enkhia a, Laltlanpuii SDO Churachandpur leh Maniram Sharma IAS Assistant Commissioner Churachandpur in zui uhi.

District Hospital a New building ground floor ah June 8,2012 zinglam dak 10:00 akipan in nupi ta 2 tan neite panpihna sum JSY backlog leh sum piak nailouhte lak ah kihawmkhe ding hi. Huai ah Nov 1,2010 apan January 31,2012 kikal a District Hospital a nau neite kiang ah sum piak hiding a, huai hun a sum lakhaloute kiang ah sumpiak hinawnlou ding a kuamah in bangmah gentheilou ding chih thu State govt apan thu om hidan in Dr H.L Liensang Chief Medical Officer apan kiza hi.