Singtanggam a Thautui Lakkhiak Sawmna

‘Pathian in ei adia thautui hon thawnpiak ahi’ – Aram Pamei

CCpur leh Tamenglong a thautui lakkhiak sawmna thu genkhawm

Imphal, July 17: Manipur Press Club, Imphal ah zanin Citizens Concern for Dams and Development, Zomi Human Rights Foundation, Zeliangrong Baudi, Manipur, All Zeliangrong Students Union, Naga Women’s Union, North East Dialogue Forum, Life Watch, Sinlung Indigneous Peoples Human Rights Organisation, Action Committee Against Tipaimukh Project, Tamenglong Village Authority leh Naga Peoples Movement for Human Rights te’ saina in “One Day State Level Convention on Petroleum Exploration in Manipur “chih thupi zang kikhop om hi.

Manipur singtanggam adiakin CCpur district leh Tamenglong district apan thautui lakkhiak sawmna leh a lakkhiakna mun ding mun 33 tanpha genlat (identified) tawh kisai genkhawmna nei uh chih thu kiza hi. Naga Women’s Union, President, Aram Pamei, ZHRF Secretary General Suanmoi Guite, Pamei Tingenlung, President, AZSU, CCDD Director, R.K. Ranjan, Timothy Zote, Social Worker leh adang bangzah hiam in thugenna hun zang uhi. Aram Pamei in a genna ah, thautui ahihleh, Pathian in ei adia hon thawnpiak ahi a, khangthak te makhua ding gelna a leinuai a a om lai ding ahi chih agen ban ah, India Government, Geo Private Limited leh Jubilant Oil and Gas Private Limited in a kithukimna (MOU) kintak a a zukkik ding uh, ban ah Petroleum Exploation Licences to AA-ONN-2009/1 leh AA-ONN-2009/2 te kintaka a ahihtawp ding uh ahi chi hi.

Suanmoi Guite in a genna ah, GOI, Manipur government leh Jubilant Oil and Gas Private Limited ten tualsuak singtangmiten a leitang tung ua thuneihna uh palzut sak ahi chi a, mipi ten International leh national a rights leh priviledge a neihte uh nelhsiahsak a om ahi, Indian Constitution a Hill Areas Committee thuneihna te nelhsiah sak leh zahsak uh lou ahi chi hi. Khantouhna tawh kisai a tualsuak singtang mite’ leitang a hetkhak ding chiang a, free, prior & informed consent a om masak ding ahih dan, ILO 107, ILO 169 , UNDRIP, ICCPR leh ICESCR ah chiangtakin kigelh chi hi.

R.K Ranjan, Director, CCDD in a genna ah, Oil leh Natural Gas pen international issue ahih dungzui in kikhentuamna omlou in kuapeuh in ngai poimawha, nan leh dal theihtawp a dal hoih ahihdan gen a, hiai pen India government in Manipur hauhsakna te tawpkang sawmna ahih dan gen hi. Timothy Zote in a genna ah, Hill Areas Committee te a ma a hilhkholh, theihsakna omlou a Gas tawh kisai laihkhiak Manipur Government leh India government in a sawmna pen kinuaisiahna ahi chi. Pamei Tingenlung, President AZSU in a genna ah, Indian Constitution Article 371 ah singtangmiten a leitang tung ua thuneihna liantak nei uh ahih dan gen a, hichibang a State Actor leh Non State Actor ten na a sepsawmna uah, pankhawm a I leitang goute uh, humbit poimawh ahi chi in gen hi.

Manipur govt CCpur dist ah Jubilant Oil and Natural Gas te gamtatna ding in tualsuak mite hilhkholhna omlou in gam 4000 Sq miles thautui laikhiakna ding in 2010 kum in ana pekhia uh chih ahi. Hiai thautui laikhiakna a gam suksiatkhak na dia om ding te lak ah, Tipaimukh bial leh Thanlon bial te leng pangkha hi’n kigen hi. Convention a paikhawm mipite’n thukup khawmna hun ah, govt in gam suksiatkhak a om ding leh mipite’ adia haksatna genvuallouh tungdingte bangmah taklang lou uh ahi chi uhi. Hibangkalah, Tipaimukh bial ah Jubilant Oil and Gas ten nasem ding in, local mite hire in nikhat in Rs. 150 lawhpia in semsak uh chi uhi. Project lianpipi Manipur ah bawlkhiak in om mahleh, a gam mite hamphatpih ding bangmah omlou a, Loktak lake bang leng gam lianpi susia in tuni dong hamphatna bangmah om lou chi’n leng gen uhi.

(source Manipur Express July 18, 2012 Issue)