Ruth Hauching Mualliam

Ruth Hauching Mualliam

Nu Ruth Hauching w/o Neng Joel Khuptong of Zenhang Lamka tu (July 13, 2012) zingkal dak 3 velin diipna in si hi. Amah Nu Ruth ahihleh mi polhnuam mahmah ahihban ah chiamnuih ut mi hi a, October 9, 1981 in piang hi. St Mary’s School, Blue Star Academy, Foundation School leh JN Model School te ah ana kai kha in, 1997 kum in JN Model apan Class X, zou a 1999 in Class XII zou hi.Tuabanah 2004 in RIMS, Imphal apan in General Nursing Midwifery (GNM) zou hi. Sepna tawh kisai in Delhi a SAHARA ah kum 1 sung a sep zawh in Medicins Sans Frontier (Doctors Without Borders), Lamka ah kum 3 sung sem hi. Apasal K Neng Joel s/o K Tuanzahau tawh March, 28, 2009 in kiteng ua, tapa kum 2 a upa K Munggousuan nusia hi. Nu Ruth in 2007-09 sung SSPP Lamka block ah committee member ahihbanah anungak lai in Hiangtam Lamka BYF/EBCC ah leng committee member in ana pang hi. A pasal Joel ahihleh Srinagar (J&K) a seppaih pang hi a, aman Delhi tawnin tuni’n aluang hon delh a, nitaklam dak 4 vel a Lamka a hongtun zawh lamet ahi. Nu Hauching ahihleh tuma deuh apan am hai leh luaksuak in om a, himahleh, huchi lua a gimsia hilou, zan nitak dak 12 vel apan diip na sa a kipeek, zingkal dak 3 a bei hiau mai hidanin kigen hi. Ata neihsun uh Munggousuan in anu ngai mahmah in, hun tomchik amuh louh chiang a le om theilou in zongzong mai ahihna ah hehpih huai mahmah hi