Zongsang

Vungzamuan Valte | Friday, 13 July 2012 14:17 | Vungzamuan Valte | Hits: 615

Ganhing leh mihing te khempeuh in lungsim pianpih neichiat ua, ngaihtuah theihna, hoih leh hoihlou khentheihna amau phaktawk chiat ah paai iim eem uhi. Ganhingte nasan in nekding leh neklouh ding, lauhuai leh lauhuai lou, melma leh lawm, dawn ding leh dawnlouh ding, sep hun leh tawldam hun, huk hun leh khai maimai hun, leh adang dang, a poimohte uh a hun hun a khentel theihna, pianpih pilna lungtang neivek uhi. Ngakuai a sanga na matkhelh vanglak leh khemkhiak nawn mawkmawk a haksa, sava thaang a awkkhial a pilvang mahmah, guul ngialhouh dak gakgakin a pil viau mai, bawngpa in a zohlouh di a chou mawkmawk kei hial, vangvot, lit, uihik, sahik leh gulhik te`n ngialhouh a duhna mun uh thei vial ua luh vengveng uhi. Ui, ak, kel, bawng, vok leh sial te singtangpa vulh ahi deuh, zohngeu in bel mihing a beel, hiaite`n a neitu (apu) theitum mahmah ua, zong kingeksak ut vial laizang uhi. Uipi gilkial in a nekding zong a, gilvah pingpeng a kep ahih chiangin, thadah a, sunnilouh in kual ngeunguau maimah hi, tuaziak mah in ann piakding kiphal lou sek a, sii uuii chiin kinohdok zihzeh, munphiah a zep tuakmun ngial hi. Zohngeu leuleu lah chu, duatsual khakding lauhhuaipi ahi, sazu nasan manpeih lou a I khoizualna in a phattuamna a beisak. Piak zongsat leh duatluatna in thau eemuumna a tun a, a nasep ding uh mangngilh hilhel thei zenhouh uhi. Phattuamna bei ngiingei a ganhing kep leh kol in haksatna a hon tun zaw hi.

Mihing toh kinaih diak ui ahi, ui pen pil mahmah a, apu suklungkim dan siam peuhmah hi, apu khem lumlet zihzeh thei ganhing ahi. Himahleh, a chin`zongsatte, a kikhuat gige pen ninhuaipi suak a, a maikhak teng a deh gotgot chiang in apu zahlaksak thei hi. Sangak in aii nei kichi a, pilvang mahmah, himahleh a chiin zongsat khat, a paina lam teng a akmul a botkhiakte apaih zel ziakin zonsuah theih leuleu hi. Bawng chilgehsa in a zahmoh a phoikhiak veu leng phattuamna bei ahi, a zongsang chihman thu. Zawng sungkuante I muhchiang in pilvang mahmah ua, galmuan` deuh khakleh chi in giakkhawm tiltel uhi, kilainat ngial ua hik kietsak diudeu muhkhak ding tam mahmah, a chin`zongsat khat uh kinakna suak thei, a utloupipi hik kietsak luih sawm teitei chih. A neute neksa a gawl uapat sawkkhiaksak chih khong a chindan khat uh hi a, zawngte hinkhua maktak ahi leuleu, a pianpih pilna uh khangtou lou mah bang hi.

Mihingte I pianchil uapat khua thei, mu thei, kap thei, gilkial thei, nui thei, heh thei, lau thei, dah thei, lungkham thei ihi zenhouh a, nute hehna aw ngial houh a za thei ngial uhi. Duattak a a kemtute a ngai ua, a hih leeloo leh ahih vokvokte ngaihbawl lou hial ua, kahkhum ekek zawmah laidep uhi. Naungek nasan in anuam leh nuamlou khentel thei ua, nau nawitep lai nangawn in mite pom ngaina mahmah uhi, huaiziak tak ahi, naungek pompom ke`n, na suzongsang kha di ikichih looloo sekna chhan. Puak zongsat te`n lupna ngailou ua, nau puapua ke`n, lupna ah sial maimai in kichi khanak hi. Aziak chu, lupna a ngaihlouh chiang un nu leh pate nasep leh mohpuakna tuamtuamte nawngkai sak takpi thei. Naungek kap zongsang vanglakte a ninhuai mai bak uah a amhaihuai tuanse, hehna tuntu, kinakna tuntu ahi naknak uh. Naupang zaan a ihmu lou a suun a ihmu zongsangte`n a nu leh pate a peibuai ua, tawldamna muh malak ah patauhna lianpi tun uhi. Zun-teh zongsangte bel namse bulom laka sungkuante omsak a suak ua, drain gim nam vutvut a nute a paina lamlam ua gimneih theih suahtu suak uhi. Napnit utlou naupangte leuleu bel kihhuai pha ngial ua, keplouh donlouh bangin om ua, nu leh pa mualphosak suak uhi. Hiai naupangte chinzongsat tamlou I taklatte enkik vengveng le, nu leh pate chin`zongsat sak ahi deuhvek, I kepdan leh I thunun dan ah tampi mahmah kinga hi, etsakna dingin, a hun hun in zun nawnsak gige le zunteh chih a vang mahmah di. Khenkhatte leuleu lah naupang neuchik lai pomkawm a gari heksak maimah zong kiom, bang zirtir ihi diam a, hon heksiam pah le uh nu le pa kipahna a hontun diam, chih ahi. Naupang paukhe leelaa, zahtakna pianpih lou ichih le om.

Neulai in lawmte khat in a khut singpuak ruprup sek a, kai/suuk guihguih sek hi, nuamtuan sa ahi maithei, hunsawt nungin a habit hongsuak a, pichinnung tanpha in kisat zokzok a piansualna khat suak hi. Khenkhat lah chu amit uh hoihlou le hisam lou, suuk ekek ua, mitsuk pa/nu suak ua, kilawm lahdeuh aka. Khekor sakhau sawksa a pai zongsang khate`n singbul suangbul a palkhak chiang un kiveng manlou ua tuahlouh ding tantan tuakkha uhi. Neulai a chillouh hi awmtak a zuaugen leh guktak laktak ching khate`n zongsang ua zuaugen a nekzon leh guktak laktak a nekzon maimah ngai hialthok hi. Laizial tep zongsang te`n a phatuamlou in sum paih ua, a tuap uh puaksak roprop uhi, damtheihlouhna kiguan uhi. Heh hat te`n a lungsim leh khuak uh gimthawnsak ua, a taksa un thuak zawmah lai hi, zi/pasal, unau sangam, lawm leh khanvualk toh kituahlouhna piangsak a, hinkhua nuamlouchik in zangkha ut mahmah lai uhi. Midangte ngeingaih lou, mahni butbut a bu, mi houpihna, thuhilhna, phatuanngaihna limsaklou te, haksatna a tuah khak chiang un panpihtu ding tasam ua, buaihuaipi suakthei zenhouh hi. Kampau dukdaklou zat ching kha vanglakte a kamsuak uh kha vial in, midangte sukheh, choutuah, gensiat, eengbawl, leh kou ekek zongsang ua, a khonung chai`h a guun kilehbut ut mahmah hi. Thil peuhpeuh hihkhelh khak hiam, kisukkhak hiam chiang a, Oh! my God, Oh! Jesu, Oh! Na zang, Oh! Na nu su, Oh! Thangkhai, etc. chizongsangte, a liakkhak vilvel hun uh om lawtel, pasalte toh kisalh, maigum muh leh vuak tuahkhak theihna tuntu le ahi. Pau khe maimai, zite khong a poimoh lou pipi a kon ma ek de, pasalte khong chou gige, kon paisan ek de, chih kampau hingzongsangte, paisak, mak a tuakkha ut viau uh. Numei zawlgai chingte a vaal ut viau uh, pasal kawmthawi mahmahte a zulhzau luat ziak un a thutak lak taktak theih kei uh. Numei pawthat in thusia lasia a bawl, sungkuante toh kimelmakna a tun, a vaal zawmah ut uh. Apoimoh lou a tate salh leh vuak chingte`n a lohtak ding uh, tate etsan, taisan, leh vuakthuk a tuak ut viau uh. Music a poimoh lou tantan a hihpuak dumdum chingte, a invengte huat leh hehsan in a om ut uh. Paina lam teng a Pathian thugen gige chingte mi ninhuai a suak thousam uh. Pulpit a din`khiak teng a thohlawm thu gen veute mi zaknuam lam gen ahi kei uh, spiritual thil toh a kituak lawmlawm kei a mite`n a ngeina seh ut viau uh, zongsang ahipen uh. Midangte thugen ngaikhe lou a mahni kia pau teitei sawm vettakte mi ngaihhuai ahi kei, zongsatna hoihlou ahi. Kiim leh paamte huat ding khual lou hial a laizial tep khulung lungte mi zahtathuai leh kizen ahi kei. Muh khak, tuah khak teng kianga a mahni mimal haksatna, a domlouhna, a tate, a pasalte, a sungkuante gen pahpah, kuamah kup le hilou a kamzol viaute, midangte hehpihna ngah malak ah, ninhuai a suak daih thei uh. Mi inn a pawt, thoukang va beng nilouhte lengla deihhuai ahi vek kei uh. Naupai zihzehte, lamsak lamkhang boh pahpahte leng kidekna lungsim leh tupna a neihlouh ziak uh ahi ut mahmah.

Hiai a tung a I taklat khenkhat, mihing omzia leh lungsim paizia ah a kinga pen, misiam te`n “na lungsim kithuzohsak ke`n la, na lungsim nang` thuzoh zaw in” chi uhi. Lungput leh ngaihtuahna te ziakin mihing te`n omdan leh gamtatdan tuamtuam kinei chiat a, I lungsim ngaihtuahna ah, I lunggel vengveng hun neih zelzel poimoh mahmah hi. Meditation nei zelzel in, I thulimlouhna te kienkik zel le, I taksa, lei leh kam, leh ngaihtuahna te kikhek mengmeng thei hi. A hoihlou himhim a piang khia, number four kham himhim dia Pathian seh, zu a si dia belseh, nupi tampi nei zelzul dia piangtuam himhim, guta lata ding a suakdok rengreng, nu leh pa peibuai himhim dia khovak mu, khut leh khe, mit leh muk sat guihguih leh soisak puaipuai dia siamtu samsuih kiom lawmlawm lou maimah ding eingal ve. Ui leh ak bang a siam ihikei hial, I zahmoh zatna leng a huntawk chiang thei dingin siamtu`n pilna lungtang hon pia hi, na lungsim ngaihtuahna thuzoh in la, huai hileh, na pumpi kahiangte na thuthu in hong gamtang leltak ding uhi. Duh vulvul, ngawlzou mahmah lou hial chihte zaw, lungsim leh khuaktheihna power exercise lou himhimte ahi ut viau uh. Muk leh kam, khut leh khe control tu na khuak in thuhoih lahoih hon muamden a, na ngaihkhiak louh ziak ahi ngei ding. Na taksa a sisan zaaam tengteng midangte a toh kibang thousam hi`n maw. Mihingte lamdang tak a siam ihi a, ganhingte sang in I tungnung zaw, chiing-zongsang chihte zuaupi ahi zaw maimah diam maw? Lawm aw, hong lunggel vengveng mah dih. “ You are the master of your life, the image of your soul”, hehe.