Premonition (Theihkholhna)

Vungzamuan Valte | Sunday, 08 July 2012 12:26 | Vungzamuan Valte | Hits: 681

Mihingte lungsim leh ngaihtuahna in muhkholhna, mengmuhna, leh hilhlawkna suangtuah thei takpi a, khenkhatte a dingin phatuampi suakthei hi. Huihnung leh nisate tungtawn in gamsa ten thil lauhuai hong tung ding a theihtheih mah bang un, mihing ten zong meipi paidan leh ni, kha leh aksi te tungtawn in khovel khosakna gelmalawk thei mahmah uhi. Pupate hun in khavakdan, aksi omdan, leh meipi kilomdan apat kum hoih a hih ding leh kum sia ahih ding genkhol thei sek ua, vuahtui tam ding leh khawkhal ziaka kial tun ding thei pahpah lawi omsek uhi. Tuamah bangin, huihpi haattak a hong nun chiangin, “zahngai aw, zahngai aw”, hon chisak-sek ua, ei ngaihdan in bel dik sak maimah in aom hi, a hangbel vuahpi gialpi toh huih haattak kithuah pen lauhuai lawtel mahmah ahihna ah, vaanging dumdum leh medium kai nguainguai ten hon patausak a, I lungsim in I muhlouhte kiangah zahngai nget kiphamoh sakna suakdok a, awl in hong dai maimah in kithei thei hi. Loubuuk sechik khong a kibu, I buuk baang, buuk tung leh sual/tuang daap sechik khong lengkhe phialphial a huihpi I thuakkhak chiangin, kithum hithit leltak a, zahngai theitu ki-ngai ngoihngoih mai hi. Kuaten gulpi that ahi ua, poinatel e, ngaidam in, ngaidam in, kichi khazawzen thoksek hi. Suangtuahna paisau thei mahmah.

Hmanlai miten khosakna ding gam, khua mun ding, leh lou neihna ding gam hoih a zon chiang un, aaisaan sek ua, akpa khong zangin gam enkhesek uhi. Gam hoih hi ding a a theihna mun uah akpa khahkhia ua, lei a thai a, a khuan leh gam siangthou, gam him chi in khua sat thei ua, akpa pen a khuanlouh a ann zong zonglou a a om maimah lehbel ten-ngamna dingin koihlou hial uhi. Gamsa tamna leh dawi leh kau tamna khawvel a teng ahihna uah lauh ding leh thoih ding mah tam hihtuak, tuaziakin pilvang thei ngial uhi. Paite tangthu ah China apat a pawtkhiak lai un vok in aaisaan ua, vok paina lam zui in paikhia uhi, chih zong om, mahleh vok pen bangtan paizou ding hiam, chih dotna liantak chu om veve. I pupate hunlai, kum zatampi paita in gulpi khong vualzawl theitu ahih gingta ua, that mawkmawk lou hial uhi. Ka pu Sengvung (T Sangkhum pa) a damlai in, khatvei a loulai uah gulpi kikual reirui mu a, a tungin bel sai-ek ding sa uhi, a veelchet chiang un gulpi ahi chih thei ua, pu Sengvung in, “lawm a, ana kikhinkhia in, ka nasepna mun ah na dongkholh”, chi in paikhesak ziau hi. Mi masa Mangsum Thawmte toh azi Kawmkim ten tapa ngen sal sagih nei ua, khatvei unauten a sabetna lam uah singluang khat zui uhi, a nanungpen a nautum in gulpi mit mukha a asingluang zuih uh gulpi hi a, teipi in khohlum hi, gulpi kipek in a nautum lousiah unaute tui ah kelumsak ziau, anautum pen zong sipah hihtuak, tuaziakin, “ Khawkim leng ta sagih neih nungin nawkik”, chih paunak pawkdok hi. Raja Goukhothang in Mualpi apat a sungpa khua Choithe mun zuana a pailai un, lampi khaak in gulpi vom kikual tuakkha ua, Ngamlhun Thado inbel theihkhawlna nei in paisuak lou dingin kun mahleh Gokhothang in paisuakpih thouthou hi, Chivu mun a Meitei lengpa tuakpetmah ua, sa leh gal dia mat in om maimah hi.

Mengmuhna I mumang lam in zong muhtheih mahmah hi, Zahmuaka zi Lawileri (Sailo suangtu) a gailai in zalmang nasatak nei a, zun a thak leh mual leh tang tampi a zun in buakkawt demduam chi uhi, a ta leh tuten Mizoram leh a kim leh kiang gam lianpi luah takpi uhi. Zosuante bulpi Pupi Songthu (Chongthu)in Nemnep toh ta a neih laitak un nigui lamdangtak mu uhi, tua pen Guite khang kipatna chi uhi, genkhawlna leh muhlawkna chikhat ahi ngei di. I manglam ah gul I muh leh tuahsia kituak ut ahi, chih gingta pawl kiom hi, sisan naisan muh zong kamsiatna tunthei ahi chi ua, pilvang mahmah leuleu uhi. Gamkuan ding nasan in gul lamkaan a tuah ua leh tuahphalou uh chi ua, ken zong hun tampitak ah dik sa lawtel ing, tuaziak mah a diam gul I muh leh thah teitei kisawm. Vaiten bel zohngei vom lamkaan a tuahkhak ua leh puja bawl zutzut ua thuum bualbual uh hi. Manglam a eimah kimuh leh siluang muh zong kamsiatna ahi chi uhi, mang suideuh ten pilvan` kul asak hun uh tam mahmah. Khatvei Ganga luinak lam a lawmte toh gamgiak khia ung, a nitak a mang hoih mahmah lou, zingkar a mood off top, lawmte kia`h ana paimasa n`ung, awlawl in gari ka heek ut chi, munkhat a bawng lamsak kahtouzoulou hong suktuakkik toh kiphutuah ek, bad omen a beita, bawng le silou, kou zong liamlou, huiha. Khualzinna khat ah mumang nei, sihal vunhawk zenhouh, mang hoihlou lua, tuni chu pai lou di chi, mahleh breakfast zoh a mangngilh kha in pai mawk, lamkim ah chu truck toh kimaituah chork mai, sihlouh chu hamphatak akihi, gari hahsiatsim ahihtoh midang khualzin ten a si a om ngeingei di hong chi kuaukuau laitei uh. Mang pan hilhlawkna ka tuakkha mun ngial a ken bel gingta mahmah ta kei bilbel ve.

2004 a Tsunami om ding lai in gamsa chituam tuam patau ngial uhi, ziinling a om dek chiangin gamsa ten mualsang lam naih uhi, huaite apat sintheih, hilhlawkna om chih I muthei. Singngat khokhang lam ah zanglou om hiven, tuiva ke-ke-keu haam sek ua, a hah haam mahmah chiang un leh khopi tungteng a zansawt nungpi a a kivialleh nilouh chiang un sarsihna om ut mahmah hi, Manpi leh a lawmnu tuitha lithuk a a kiak kum un uangsan mahmah. Singtang ah HAZAU zan chiangin om theisek a, meiser leng purpur, leng puatpuat, a ekneng leng ke phungphung a om chiang in khosung ah sihna om naak hi, Singngat ah nihvei huchidan mukha ing, Vanlallian pi sih ding leh U Sanga (Pu Vungluai driver, tangval Bukpi khua) gari xciden a asih ding theikholna ahi. Na manglam a gul in a hong tuk dek golgol leh tuahsia hilawmlawm lou, siatna chikhat tuahkhak a baihlam, na thah lehpen kimai suk lel, lunghimoh louh di. 1997 buailai in manglam a hilhlawkna mu kiom lou hiam, genkhiakna kampau zatam lou kisa ing. Ka pujonpa omlouh ding theikhawl hi awmtak in khatvei, kei mang hoihlouh ziakin kigalbiakna tungtawn in tai kangkang thahah ing, I gintak ngel kei leh hong taksuah peetmah, ka chichi aka, chih khonung in a om maimah a hiven. Kiven theih louh chiang le zaw om lawtel zel, mi khenkhatte sihna I etkik chiang in, thei zenpi a naih doidoi chih mahtak gen di kinei kha veu. Gal a hang leh tui a hang te sihna khong mahtak. Singngat khua gal ah Lancha mi khat sam meipi ka chih uh om hi, a sam kiir lawtel mahmah, tui leuh siam a minthang ahi, futbol pek le hat fuatfuat mahmah, lengthei hileh kilawm hial, tuitha a kelum daih.

I hinkhua pen ei control theih hilou hial hi, himahleh hun tamtak ah I lungsim ngaihtuahna leh I kim I kiang a thiltungte tungtawn in pilvan` na lungsim kichituh theih ahi hi. Gari heek pilvang penpen zong midangte pilvan` louh ziaka tuahsiat theih ahi, mahleh a pilvang na nana chu suahtakna tamtak om hi. Himahleh, pupate theihdan, sim leh hmar a nikhat sung a kikhenlouh ding chih bel um bilbel keng, i mengmuhna toh kituak lahdeuh a diam. Kha-kap chih zong omsak ua, zansawt nunga gamlak, dainawl, leh hanmual khong a thawm lamdangtak a om lehbel, misi om ut diak. Zing phalvak ma deuh a khualzinte zaksek, mitampi pautumtum dandeuh, Chiangpi tou ah tamdiak, lauhuai thousam mahleh gennei taktak lou ade aw, chihdan ahi, muhtheihlouh lah tuahkhaklouh, bil a zaak. Luseite lal khat Sabuta sual lawtel mahmah, nunrawng tawpkhawk khat ahi, a pianna nu hingmat a sial chaihpih, gawllek a hentang a teipi a dawtlum pa, a thangkam na ah dawi tuakkha a lau lawtel, sibup phial, a thaang kam a gulpi awk zawmah, hilhlawkna diktak mu ahi, gou-gam kiikeei in natsetak in si leulou. Khua khat ah sa chang khat in sih gei ah khawmial thiithiai in pitek khat sihlakvel a, a buk teplai toh gamlak, bikawm teng a taiging sulsul mu, a innvengte pitek hizawmah, kaap dia lah hilou, kaap louh dia lah khawmial nung a huai pitek gamlakpi a omlou di chih, buaigawp in a mulsi thou seesuu kawm a a kaap mah leh piteknu akah a kap mai, kin leh buang a sibup dekphial a inn tung zou hamham, kongkaw zui ngal, a invengnu pitek ana si peetmah. Gamlak a pheisam mat, thaang a awk, chih khong tuahsiatna ahi, innlam a taipai vengveng kiphamoh, pheisam mihing thaang kam a awk thahah lou hial di hia aw. Khualzin mi khat in Vasa hoih mahmah, muh ngei hetlou gawlek sangtak a tuang lihliah, etlahhuai ngoihngoih thau in kaap khe ngei, a top dek leh naungek kap dan in kikou zoizoi maimah, theihsakna ahi, sapna aw ahi. Kinlehbuang in a khua uh zuan vengveng a, huaima zaan (nitak) in a inn kaang a a zi leh tate kanglum va maituah maimah, sapna gum tak chu ahi ve, hiailam hichiteng in aw, gelh di tam lai mahleh.

Misi a om chiangin sikha laang sek hi, huaiziakin sawmgiah kiching lou theilou hi, kipanpihna leh kikhawtuahna liantak ahi, kilainatna latsakna sangpen pawl ahi. Damlou a sihna tuak ten a thuchah ut teng uh gen man ua, avaivengna khat om hi, kha gilou mahmah, sungkuante patausak bel omtham mah leh. Sihna mulkimhuai deuh, sarsih ichih dandeuhte kha mangbathuai pi ahi, gen ut leh thuchah ut nei ngei ding un I gingta, neih le a nei ngeingut uhi. Khenkhatte, a zi/pasal in thakhat a a sihsan phut te, hon veh tel lou hia? Ichih chiang in, genchiang utlouh tan nei ut mahmah uhi, kivehna dan chi-khat zaw om ahi di, manglam khong a chiangtak a vakilaak pawl le a om, theih theih ding a insung a thawm nei le a om chi uhi. Dawi hang, kau hang, kha sual le om ua, I theih mahmah Thuangtam a sikha laang pen huaise kholdiak a gen ahi, huchidan deuh sikha laang leh dawi toh kizawl chih mahtak, Parkhuang ten theitam diak uhi.Guite kual a Keuhthang bel a theilou kiomlou phial ding hi, sikha piltak, kheltak ahi, sum leng thei mahmah, zahmoh khong dawmlahlou hial chi uhi, a taktak a diam a, tualte vanglai dandeuh le hithei. Mi tamtak ten misisate a manglam uah mu ua, thuchah, vaikhakna dong uhi, ka pujonpa sih nungin manglam ah thuchah/vaikhaak khat hon nei ut hiding hiven, lupna gei ah a mel diktak, chiang tak in hong kilaak a, Muana hon chikhe kuau hi, ken le hawi, bang a, ka chih leh a thugen ut kamkhat chauh gen in hon mangsan vengveng, hong kilak nawn mahmah lou, gen ut gen manlouh om chu ahi peen mai.

Ahihleh, mihing in destiny I nei hia, I destiny I control thei hia? Chih kidong le, I dawnna akibang kei hial di. Pathian in a bukim sipsip a A honbawl mihing ihih ngal leh, mengmuhna toh tup leh ngiim nei in I taksa leh lungsim zangsiam le I destiny I mu ngei di, hinna leh sihna bel thutuam. Sehsa om a piang himah le, zawngtat tak a ta te a ding in huai singgah leh paak kilawmtak muh a hamsa viau di. Khenkhatte leuleu, a destiny thei kiukiau a huai masuan a pai gelgel, a muh chiang ua, a zarzou manlou, haksatna chauh palsuah a a hinkhua uh bei maimah chih zong thil lamdang om leuleu, ei theih-but di omlou bang maimah. Stephen Hawkings mi intelligeng mahmah ahi, natna khirhdeuh mai neikha in, a tupguhna ziak liauliau in khovel a scientist minthang pawl in pangzou, lah a natna damtheilou penin mibang zoulou suaksak veve, khovel hinkhua nuamtak in a zangzou ding chihna omlou himhim, mi hampha (gifted), lah mi vangtah ahi veve, himahleh siamna neilou hizenhouh henla, a natna ziaka sihna tuak tuanlou hileh, a hinkhua a gentheih dingdan gensenglouh ahi, tuabel a enkol ut mi kituh zawbawn lai uhi. Kamsiatna le vualzawlna suak thei zel, mihing lungsim guhtak in sepsuah theih hau lawtel zel.

Naupang khat a nun`` bazar ah van neng lei ding in sawl hi, cycle a tuang in bazar manoh a, lehlam apat truck hong tai hi, huai truck pei kitol zenhouh a naupang bawhzaak ding dinmun in tuuk bulbul maimah, naupang in a cycle heikoi a kihemkhia hi, mahleh huai truck pei in suang khat phukha chitchiat se hi, naupang pa kiging manlou in nawklum mawk hi. A nun` sawllou hileh, cycle a tailou hileh, minute khat a zekai hileh, minute khat a baihzaw hileh, a truck pei in suang phukha sese lou hileh, a driver in hathek law kei leh, a driver zekai zawdeuh leh, suangtuahna neuh neuh gen theih ding a tam. Mahleh, huai naupang pa sihnang a kisiam mah bang zenhouh hi, a pumpelh theilh vuallouh zaw ahi mai diam maw?