Tapa Taimang

Vanlallian Valte | Tuesday, 10 July 2012 15:44 | Vanlallian Valte | Hits: 713

ZANKHAT SUNG VINGVENG TAPA TAIMANG KA NA HI

Deidanna omlou in nu leh pa it tuaktuak mahleng, zuapa tuk a ka muan leh ngaihsan simlei zilza ah om lou hial hi. Himahleh, tunnu ka ngai zaw deuh cheuh. A sulnung ka zuih tam zawk ziak ahi khamoh kei ding. Lusam leh mul kawmthawite hong palngou khen silsial khit nasan in tuunu leh amah aa lamte siang ah kingeksak ka bang moh e! Pi leh pu kiang a kituklut leh nuneute duat dia om khawng a khiklahhuai bek a le eive. Akuakua’n nute kingaina zaw deuh chiat le bang sa ke.

Ka nu’n kei leh laigui zoppih giatte hon itdan kibang sapsap lai ah, kei hon duat deuh se ahihlam ka haih het kei. Putelam dungsun a ka vommam hiuhiau ziak ahih zaw ka gingta chiah kei. Adiktakin, mi ngaihhuai zaw, uinou leh naupang gentaklouh, piching in le thei mahmah hihtuak hi. Unau lak a thumang moh tuam ana hih bang le kisik tuntun ni hong tung zel mahleh, thuhilhna, thumsakna, khitui-naptui lungsim leh a ngaihtuahna uh dong tam pen kihi vial inchin chia thaldak mawk di lah, ehem! hi kei venchin. Kolkata kipan Singngat khua kikal kha khat sung vingveng ka pai thu zaw ka gen peih dah di.

Bangteng hileh, tukum Pate’ Ni tunkim zan hong tun in sabang ka tatna phaksap gam – Delhi gamdai ah hon suangtu papa ngai in ka kuiki-ngik hi. Sikkhau sat kangkang mawk di zaw aw, inlamte zanlai ta ding uh. “Papa kon ngai lua!” chi teitei leng, aman iik numnum kawm in “Akhai! Na fuh nawnta a hia? Zankim-zankhang in bang na chisim a? Bawi aw tukum Fathers’ Day zaw hon gui ken aw…” hon chih puaklek di theihsa. Ka khotheih tung a paunak hon sinsak: “Wealth is lost, nothing is lost; Health is lost, something is lost; Character is lost, everything is lost.” Chih bang bilkha’n zaza hi.

Delhi Gamdai: Delhi ka tuntung lai in Munirka vangkhua ah unaupa Singa, Lealyan Thomte leh Roua te lawi ana Raja thei gouh uhi. Tung solkha a tangphat theih toh tawlkhat Roua hi-ngeingai vial hi veh aw, “Chiamnuih a dawl thou a,” chiin lawmta te hong kipan uh. Roua’ lungzuan zaila di phuahsak gawp uhi. Lealyan in chinglit tum a, Singa in laa vik. A kipatna leh a thunon “Lailung zuang veng Delhi Gamdai ah” chih hi tel veh e! A dang teng zaw a lungsim ua om bangbang, ut dandan in sa kawi kual vel uhi. Hiai thu heutupa LT Ngaihte in a theih chiang in NLDD hi.

Laisiangthou a gentehnathu; makhai mang, belam mang leh tapa taimang khawng zaw kikum dah ni – nalusu pah duauduau kha ding uh. Tangval dekkuan ka hih lain in zankhat ka dailen hong suak guih hi. Vuahmal phin chichip a, khua mialbing petmah hiven, ka pa kawlphe khawnvak, a ann kithun thak siksek tawi in dailen buk ah ka dianglut zeuh hi. Ka hihdi hihkhin, khekol kaitou dia ka kisak laitak in ka meivak tawi tolhkhe puat! Kuakpi sung ah tang pempom maimah.

Tinpi sung a tui a tawm sim chianga suah-khiakna dia kibawl umkeu-kungsau zang a suahkhiak tum in ka kipeibem ten hi. Ka pa’n hong phawk a, hon sal zialzial, “Koita, ken…” chi inchin, kisiamsak deuh a suahkhiak nelh tum hizenpi, katei! kawlphe khawnvak holh tum kha thahah. Thaikual nilouh mahleh thaidok bun mawngsan lou. Ka kisuanlah toh a hon salhna kampau chiiktakte thuaklah lungmawl in, “Nuamtak in hong khosa siausiau uau!” chih leh taipawt ka thuah hi.

Sanggam numei te’n a meivakte uh de in hon nungdelh ua, inn kikal khawng a dawk cheuh, tummang zouh zel in ka om tadih hi. Khaipau te hulliap ah hon mankha ua, himahleh ka kipek tol thei. ‘Field tou’ a buannawi lak khawng ah ka puk zelzul uhi. Awl in ‘Field’ khang dailing buk lak a kihemlut, Khamzavung’ gam leh Vungzathang’ gam tawn in khokhung, mawltual sak a YPA Hall (a omlai) kongtual ah ka suaksuah hi. Mial bikbek mahleh dumde hong leng zelzel te vang in thil muhtheihna ka tang ta. Kongkhak ka khiin hong a, tutna te kaikhawm in zan tawldamna nuamtak ka suah hi.

Ak khuan masa in ka khanglou a, ka puansilhte a nom niangnuang toh votsa in ka vuang khenkhen hi. “Himahmah kei e lawm!” chiin pangkhang a ka nu’ naseppuan leh lukhum phou te gukkhiak tum in ka diangsuk mai ta. Himahleh, kuamah ihmu thei ana om lou chu, tanau-laina kipunkhawm in ka tanchin kikum ua, (insung dongta level ah khawng chi mawkmawk le), ka tupna lohsam hi phot.

Huih vot in hon mutkhaklouhna mun ka theih, inmai a tupa deihtak H. Pauzamang te phaitam a bempi sung loungal a om kei. Dongzaliante innuai lah uihik tam lua chih ka theihsa. Inka-khuam a kaltou in huaisung ah ka va kual ngiungiau hi. Naupangte’ nipi in “Huai Vanlallian reurou zaw, melsiat leh gitlouh a thuah a, lungtang pha viau zawmah! Ka haw-ngoihngoih, hon lunggim sak sawt ta, vuak vakvak; chil noknok diin ka iplah tuntun mai!” a chih in ka sinlai vut vilvel hiven, kidek zou zouzai lou in, “Lalzam na ** hinave!” chiin ka kikou khia. Hong delh-huan pah uh, “Huai lam ah a om…” chiin. Taisuah vual ahi nawn hauh kei.

Singpi sipisial huntawktak nou thum hon dawnsak khit un, sawtlou sung bekbek maimit siin lunggulh ahi dua, dainawl hilou laikhun phahnem tung ah sambang hon zalpihta uhi. Hun thoveng ah hon ngaikhia unla, mansuah baihlam thil khenkhat: (1) Peklum, (2) Silipar langkhat, (3) Phim & pin, (4) Mainulna & tawnzau, (5) Koppih, (6) Halem, (7) Mitbulh leh adg.dg kikum khawm le chih kon vaikhak theih hi henla, omnuam leh mangpha!