Anu' Tanu Ahi Lawtawk Mah Ve

Vanlallian Valte | Sunday, 25 March 2012 19:21 | Vanlallian Valte | Hits: 1701

Tukum Fepbuar ni sawmlehnih phalvak daitui kai nipnep nuah ah, Khawlni ahihtoh bawngsa mehlouhna le sawtgawpta chiin ka siksakol khawlbu nei ka tuanhing a, New Lamka, Zion Veng a om ka paneu’ tapa Lianzamung ka manoh hi.  “Zing-ann ne khawm ni uh” chih ka changvom ahi ngal a.  Sa lei didan: A awmguh, ngum guhbawk, a pheisatak, a lei, a sin, a lung, tuap, kal, a laa (lingkai), gilpi, gilkha, eknelbu leh a pengnal kigawm ser nga.  Bang chi huan di?  Kang zenzen lou e!  Saptheinah, pasikhawm, lengmasel, siing, aienghing tamlou leh chi toh kia huantop di himai.

Damkam Bazar a leituak teng leikhin, meltheih khenkhat in, “Lut tou ziau le eivoi…” chi uhi.  Kou, “Zingbeih zaw peih thahah khang!” chiin singpi zuakna khat ah ka lutsan uhi.  Ngaidih!  Api’ puanmong len kawma hong pai naupang deihhuai tak khat ka galmuh hi.  Naupangnu’ mit-hah chim kilkel, maibuang thiuthiau, muknou chikchek, samtang zitzet, maitai siusiau, awsuak nem ngi-ngei leh a gamtat-khohei nalhna chiteng tehpih luat ka nei hi.  Kei mitnauta hiip lawt zou hial leh kilawm khop in lawp-huai ka sa.

“Munga, endih huai nu, anu’ tanu ahi ngeingei di” ka chih leh, enlou in, “Himahtak inte…” chi kawm in Manipur Express sim zom hi.  Amah buaina DCnu leh ‘proxy vote’ chihte ahi.  “Enve, anu’ tanu ahihlouh tak leh!” chiin a tanchinbu sim satkhia in midang ka pesawn hi.  Hon chimtak tongkhong a diam, mit haklum kike in, “Anu’ tanu ahi mah houh ke!, atapa hiinte chikha ka hiam?  A himhim in, nang le numei kigolh hulhual lou in tanu-tapa nei thei di kisa maw” chi.  Ken, “A hi chiang lua…” chi teitei mahleng, vaigam a khawsate tubang kum lakloh lai a hong pai uh ginhuai chiahlou.

Fepbuar ni sawmlehguk zing khovak etlawm tak in kimkiang tanvak singseng hi.  Sunchiang’ lah Gurdaspur (Punjab) pan hong kipan, hunloutaka maimit hon sinsan sanggam ittak khat luang hong tung di hiven, ka huandai sia zingbawl ngai maimah.  Vanzat poimoh sikkilh, sikjai leh gawpum leidiin Munga ka tawntou nawn hi.  “Numei naupang gep nimnem khat ziak leltak khawng a news-paper sim lakloh lai kisahkhiaksak chihte a om nawn kei dia leh poilou pi” chi nemnum kawm in hon zui hi.

Singpi zuakna ah lut nawn phot peuhmah, “apipi toh hi nawn kei henla, a nunu toh hitaleh” ka chi lua.  ‘Amau’ ka sak te enchian leng, bangmahlou mai ana hi zel.  Hong kilat louh man un, “Gam hiaitan pha vanglak, Kolkata omlai a ka kitheihpih lawm David Hauzel polh kawm in vengpi lam pha ni” chiin khe in ka paitung uhi.  Ka siksakol bawlhoih dia nusia ka’ihchia! David Hardware Store a bawldi teng ka zoh un New Lamka lam zuan autolian ‘stail tahtah in’ ka boh uhi.

Thakhat thu’n genchian vuallouh hih lamdangna ka tang.  Hun paisa a kilehkik hia kitheihna ka nei mawk hi.  Hon khim – hon zen om a bang bialbual.  Ah! Nutate malam ah a tu ve uai!  Zennu in, Oi! U Lian lah na hia…” chiin chibai hon buk hi.  Ka naupa’n, “Nou kia kilen den tel kei unla… chi.  Ken naupangnu biang meksak kawm in, “Na nu’ tanu hidia kon gintak mah nahi” chiin deihzawng lei na’ng sumnen: zanga dal khat ka pia hi. Houchim man lou in hon kumsan uh ngai a, “Zennu bang tan nituang thei lai di?” ka chih leh, “U Lian, thu thei kei tak chia maw!” chi man lel hi.

Sunkhua sawt zavei zong leh, zankhua daidam kei bekh leh maw! Kum tamkuam pailiamsa a Zogam Artist Association toh pangkhawm a ‘concert’ ka saikhawm nitak uh, ahi Zennu toh puanza khat ka kizawn laite uh ngai in ka ihmu moh hi.  Poimoh hileh, huai nitak’ a kicheina van teng nounel tak in ka sekhe thei lai tham. Hon mualliam santa, Thangboi Mangte leh Muana Ngaihte phawkna leh Zennu vangngaih nalua sa’n ka phaphet kei hi. Khut kilen kawma Zennu toh kholai ka pawt khawm ngam masa nitak uh ka geldok phong:

Tung si-al simsenglouh nuai ah anglai paibang pom in vangngaih simthu ka sut uhi.  A besam etlawm tak kimawlna’n ka zang.  A biang langnih ah ka khutpekte tawlnga ta.  Hong dak tou a; kei ka kun suk.  Nak nihte kiphulep helhel.  Vot sak ziak hiam lauhthawngna nei hilou pi, aneh vuang dedelh hi, a hat lah kin dedeuh.  A ngawng, veilam ah heisawi cheuh a; ken taklam ah.  Khovel leh a sung a om thildang zousiah mangngilh a kitawp kawm in louhing dipdip tung ah ka puksuk ngeingai uhi.  Huai hunlai khawng a ngaihhuai ngei mai, tu’n lah…tu’n lah!

Zennu i chih, mi kizen, pilvang, van kemsiam leh ngaihzawng mawk khen thithe lou chihmahtak, cellphone nambat le a laih louh diing gingta chinten in:

“Zan khosawt zalna laikhun ah, sambang ka zal lai in,

Liamsa noplai nite gel in, maimit ka siing moh e.

Kei aw zuang ing, zuang naveng e,

Sengual na vang ngai in…”  chih ka ‘text’ hi.

Vaiveih tuk a kin in hon ‘reply’ akaa.  Thu leh laa ngaina, zawl ngai ngeita leh Muana Ngaihte lasakte deihna nei (ngei) mihing khat na hih sam leh Zennu hon dawnna na suangtuah thei tham dia, hon phoulang tuan dah ning maw.  Bang ngaihdan na nei?