Khikhikhikhi….. Ka Nuih A Nak Zat Chilua!

Singngat Special | Saturday, 10 March 2012 09:33 | VL Mangzou | Hits: 1324

“Tulai zaw sum leng ka nei mahmah kei a, ka ek leng a uih zoukei”
- Paokholal Guite, Tuibuong.

Mihing te’n leitung a i damsung un nasemhoih leh thilhoih hihtu hi a theih a om i utchiat ding un a gintakhuai hi. Huaiziak tak in i sepkhiak, i lawhsuah leh ei’ bawlkhiak hilou pi khawng ah a minhoihna (credit) i delh ua, hun khenkhat ah houh i kituh zezen hial sek uhi. Gul Kawng Naa ka gelhlai a, ka lawmte’ khut a gul mat ka sawm tawh kilamdang luatna a omkei. Mihingte’ pianken duh-amna, angmasialna leh hoih hih utna lungtang a pat hong piangkhia ahi lel a, a lamdanglua zaw hikei. Himahleh, mahni sepsuah hilou pi khawng a minhoihna va delh chih zaw thil thupi ahi tuankei.

Khatvei, mi khat in “Ngaisuanching thattute kha CDSU te’n police te nawh kei le uh mankhe nai hetlou di eive ua maw” a chih ka zakha hi. Khawtang pawlpite’ kithuahpihna lou in police te kia’ adi’n tualthahna thu khawng suikhiak a khutkhate (khutkhial hilou) Dan tawh kituak a vaihawmkhum, eilawi’ lak ah thil haksa ahihman in mipi leh khawtang pawlpite’ kithuahpihna poimawh mah hi. Huchibang kar ah, police lam in leng theihtawp suah a pan a lakna uh kitheihmawh bawl a, kuate hiam nawhhat ziak va chih sese kha dikvek tuanlou hi. Thubuai suina kichi kintak a hih puatpuat theih hi khollou a, zenei leh paidan nei ahihman in ngakzawh a ngaih hun leng om hi. Nu Ngaisuanching mulkimhuai tak a thah ahihna tawh kisai in police in tualthahna a kigolh mi 6 (guk) a matkhiak lak ah mi 5 (nga) te suangkulh a khum in om uhi. Huai tan a police panlakna a lawhchin nung in leng kuamah in semhoih uh sa tuanlou hi leng kilawm hi.

Adiktak in, Nu Ngaisuanching’ tualsihna tawh kisai in Hiangtam Lamka Village Authority leh ZMA lou ngal mawhpaihthu suahkhia om ngellou hi. Ka theihkhelh ahihkei leh omlou hi zawmah hi. Amah hi inkuan-khawsak a mi hithei deuh leh zahhuaitham ahihlouh ziak a, a ek a uih zawhlouh ziak a, kuama’n thudonlou uh hidan a ahong kilat sim a, internet khawng a soiselna ahong dawktam deuh apat police te nawh a kinei, ngaikhawk a kinei hilel un ka mu hi. Huan, hiai sihna tawh kisai in, tualthattute kha a neizou, a khawsathei leh milian-milalte’ kihelkhakna hileh police te kamhum a, thusuina bingtawpsan ding leh mat a omte kin-a-kin a khahkhe dia thu pethei khawtang pawlpi leh kithuneisak mihing bangzah a om tel dia chih bang leng ngaihtuah khaklouh theihlouh hi, hun paisa et in! Bangteng i gen hang un, i paidan uh zaw a zawng leh a hausa kikar a zawp theihlouh guam thukpi a khen a om hi lailai ve hang aw, leltak in. Huaiziak in, nuihzathuai nii-niaih i bat na chiang uh om ka sa, khikhikhikhi…….ka nuih a nak zat chilua!

MLA Cup mah nuam veh aw, genchim la’ng e….chih hial di hia? Tutung MLA Cup a MLA hilel lai a chingnawnte (defending champion a title uh humbit zou te) leh a chingthak (newly promoted) te, amasa in ka hon kipahpih mahmah chih ka puang hi. Huan, Congress-1 (Congress One) mah in sorkar bawlthei ding a ahat uh leng kipahhuai ka sa hi. Manipur ah Congress (I) hilou party kigawm khawng in vai a hawm chiang un semtute’ khalawh nangon pe zoulou maimah uhi. A mi (candidate) deihluat ziak hi khollou in leng Congress (I) ticket in phattuamna (advantage) lianpi nei ahihziak leng hi’nteh Churachandpur District bang ah Congress (I) chingvek (solid) hilhial hi. Ka chihziak chu, adiak in, upa lamte bang in khutpek mah chi tinten mawk uh ahihman in, huai mah mek ziau lel ding un ka gingta hi. Hiai tawh kisai in keimah mimal’ muhdan leh ngaihdan ka kum ut zek hi.

Lamka, Henglep leh Saikot constituency te ah a ngeite mah chingnawn uh ahihman in masawnna ombeh tuanlou ding a, tui (water supply), lampi (communication) leh mei (electricity) tawh kisai in tulel leh hun paisa a giautauna i tuahdan mah uh kituak zel lai ding hi in ka mu hi. Tipaimukh constituency (bialsung) mipite vangsia uh ka sakna ahihleh, zi maaksa tung a lungleng thak tawh ka teh hi. Term bangzah hiam mipi’ palai dia ana neih uh, adang in hon khengkhia ua, huai a leng masawnna leh khantouhna om tuan a theilou ahi ding ua, a ngeibok ah tukik nawn uhi. Huaiziak in, khantouhna leh masawnna huchipi a om tuan ding in ka gingta kei hi. Singngat ka etnawn chiang in, kitelna a om-ma apat mipite bumhai a om uh hi in ka mu hi. Aziak chu, bial mipite it kichi a, khantouhsak a sukmasawn ut tuntun hi a kigen mi bangzah hiam te ahuntak in tumkik ua, thakhat thu a gentheite a itna uh leh Singngat bial khantouhsak a tupna uh a beiguih ‘lamdang’ ka chilou theikei hi. Match fixing houh om hia leh? Thanlon bial ah mithak khat vawkching in ahong om a, huai bial kia ah lametna mei-ek phe leplep in ka mu!

Tutung a lawhching zoulou , a foundation lempan lel hi a kigen, Pu C.T.Lian tung ah, hun hong paizel ding ah lametna leh muanna ka nei hi. Vote khiatni in Polling Booth te ah vakkual a, “Aw, mi hiai zahzah in hon deih a vote khe dia na hong kuan mahmah uh kipahhuai na e” chi ahi, a chi uhi. A lawhsap in leng puakdan siamtuak ka sa a, a vote muhzah ah lungkim mahmah hi a theih in om hi. Himahleh (chih omzel veh aw), newspaper tungtawn a kipahthu a genna a, amah vote tute kipahman piak a utthu ka simkhak in ‘khaih!’ chihna ka nei hi. A chinlouh a bawn amah adia pangte kipahman piak ut ahih leh, ching hitaleh, amah adia pangte huituam law lou ding adia aw chih ka ngaihtuahna ah ahong lut a, midangte mahbang a mahni lampangte kia’ adia palai hithei eive ka chisim hi. Bangteng hileh, tutung MLA Cup kha game spirit neitak a zawh a a omtheih kipahhuai mahmah a, lawhchindan leh lawhsapdan i siamna uah kuapeuh pahtakhuai ka sa hi. Ahi a, buaina bangmah a omlouh na dia theihtawp suah a panlatu, security te’n bel kuamah pahtak a lawh tuankei uh!

Tutung MLA Cup a vuallelte’ lak a ka thuakpih leh poi ka sakpih mahmah chu Pu O. Joy Singh, veteran opposition leader ahi. Amah hi, ruling party te suhattu ahi a, tu-a amah a chinlouh pen Congress (I) adi’n kipahhuai viau mahleh mipite’ adi’n bel it-huai mahmah hi. Assembly sitting om chiang a dotna bawltampen hi gige a, amah ziak in ruling party te leng naktak a kisang in theihtawp suah in pang ding un ka gingta hi. Huaiziak in, vuallel sapsap di’n chu Joy-a kha pammaih ka sa in ka it mahmah khanglang ve. Khaih, na huchi deuh ngal a; bangchi lawmlawm tel e; a ngaihna na om ngalkei, chih dandeuh khawng a kitaihilh leh kithuhilh ding i omlouh hial chiang in chu a kichaivawt lam ki-hita hi. Huchibang bok in, sorkar vaihawmtute bang leng soiseltu leh bawlhoihtu a omlouh chiang in vai hawmdik gige biiklou uh a, a diklouhna uh, a felzawhlouhna uh bawldik a piidiktu ding poimawh gige uhi. Ka Huan Ua Bawng Lut Act hon puaklutsak ding omlou maimah eivoi!

A tawpna ding in, tutung a mipi’ palai dia telching a omte’n mahni lampangte kia’ adia palai hilou a, a bial mipi tengteng’ adia telching leh palai ahong hih mahmah uh duhthusamhuai ka sa a, term beikuan chiang a ‘bangmah kisem manlou’ chi nemnum lou a gamsung khantouhna ding leh masawnna ding a theihtawp ahon suahpah uh ka ngen hi. Huan, constituency delimitation tawh kisai bang leng tu term sung in hon saikhe thei le uh uthuai mahmah hi. Kou, Gangpimuol leh Tangnuam bang Saikot constituency a ka om lehluh uh nalh leng nalh lou pi! Sangaikot lamte Singngat a abelh uh bangleng kilawm duaiduai lou hilou maw? Huchibang zel in, constituency dangdang leng heituah a peirual deuh di’n hoih veh aw…. ‘Hou maimai’ chi a, development scheme neukhah-khah khawng peuh a mahni lampang ding bawlkhiak leltak kum 5 sung mawngmawng n’on buaipih tazen uh leh lah, nou thu ake!

©mangzouvl/9-3-2012