Kabul Laikhak 4na: Dustbin

L.T. Ngaihte | Friday, 02 March 2012 23:30 | L.T. Ngaihte | Hits: 1297

Dustbin a theisiam lou zenzen I omkhak leh, nin koihkhawmna ahi. Kihhuai simtak bang khem in, I omna peuh a nin nei gige I hihman in, tulai khovel ah a lou theilou khat hita mawk hi. Nidanglai hinkhua in bel, dustbin kinei tuam lou a, in-nuai leh kholak teng dustbin in kizang lel hi. Tuang tung ningkhat nin te phiat khiakna ding ki bawl a, tuapen ‘awngvang’ kichi lel hi. Huai vang ah, insung nin teng, an-neng-meh neng,innuai a vok leh ak leh ganhing dangte’n a ut dandan ua abawl ding un, kiphiat khia hi. In-nuai a ui hon saguh kituh a ham gamgam te, inveng leh khopih te kiang a sa ka meh uh chih puanzakna khat himai hi.  Singpek tuang neih tan in leng,’awngvang’ bawl theih lai a, huai a nin I phiatkhiak nak leh, muh zong kimu kha nonlou a, insung siangthou huntawk a ngaih hi zel hi. Huailai in kholak sianthouna lamlam ki lamen nai lou hi hiuhiau hi.

Ahitak in, I khosakna a hong hoih deuhdeuh chiang in, gam leh lei  siangthou deuhdeuh kideih a, dustbin poimohna lian tektek hi. I nidang hinkhua a bel, nin toh tengkhawm petmah ihihman in dustbin ngai tuanlou ana hizaw hi. Huaiziak mah in, nin kichi zong tawmdeuh petmah hi. Pucca inn (Teklei inn) hoih taktak lam khia a, atuang te natan, nidang lai a I annekna kuang sung te sang a le siangzaw nei ihih tak chiang in, nin zawng muh baihlam deuhdeuh a, ‘awngvang’ lah bawltheih mai hinawnlou ahih takchiang in, dustbin in dinmun poimoh mahmah hon luah ta hi. Tuchiang in, insung pindan khempeuh ah dustbin koih detdet hizawta hi. Phetlou in, khawlai ah leng, dustbin lianpipi, mi khempeuh zattheih ding in kikoih panpan ta hi.

Gamkhangtou masa tumlam gam ngial ah,khotang sianthouna sawtpi apan a gen uleh ahih uh hita hi.Kum 25 paita a ka omkhakna uh Italy bang ah zong, huailai pek apan, inn gei ah dustbin nih koih uh a, khat pen ah plastic a kibawl khempeuh paih ding hi a, khat pen a dang teng kipai zel hi. Amau tua plastic te thildang manphatak in hon bawl khezel uhi.Hiai te re-cycle ana chih te uh ahi. Hiai bang leng, ei maban mah hong hi ding hi. Dustbin apan ninte khawnkhawm in, khawpi pawlam ah ahalmang na ding mun bawl in, huaiah va halmang zel uhi. Dustbin omlouhna room, inn leh khua te ah kuamah teng ut nonlou ding hi.

Nin teng khawnkhawmna ahih man in, niteng hinkhua a thil phatuam petmah himahleh, dinmun tengteng lak a ut huai lou pen hi zel hi. Nin potu, asia teng potu hih ding pen a ut ki om lou ding, huai din mun luah omlou alah khovel pai thei lou zah dong hi leuleu. Ahangpen, mihing in I sih matan,nin kinei den hita zen hi. Na neklai an malkhat na kiaksak khak zong, second tamlou nung in, nin hizel hi. Na lutung a na pian apan pou, na sam neng te natan, na lu apan apulh khiak hiam at-tan ahih nung chiang in, nin kihhuai mahmah suak maimah hi.

Tun, dustbin pen hichin ngaih sun leuleu le ut ing. I gei a zattheih dia kimansa dustbin neih nop isak bang in, I damsung a haksatna leh buaina te, nin bang a paihtheih mai hilou te ah, I gei a mohsak ding I neih theih leh a nuam mahmah khat hi leuleu hi. Ase khu ding, minsiatna ek khuk a khu ding mi a om nak leh I om nuam mahmah hi. Ei hih khelh , ei siamlouh ahita zong a, midang khat ngoh ding, mohsak ding I neih nak leh ilungsim nuam hita zen hi. Inkuan khosakna ah zong, I zite hiam, ipasal te hiam I mohsak chian, dustbin bang in pau sese lou in nadoh hithiat le uh nuam mahmah ding hi. Ahitazong in, mihing pen pau thei, ngaihtuah thei leh dustbin dinmun luah ut omlou ihih man in, kiselna piang nak zaw hi. Phetlou in, dustbin bang a phunlou a mohsakna te thuak thei om leh zong, tua pen simmoh leh muhsit hi zawsop hi.

Ka laigelh khat ‘Belam Mohpawpa’ chih thulu ah, sapte thumal ‘scapegoat’ hong piankhiak dan ka gen ngeita. Israel tate kithoihna a Belam khat a lutung a Israel tate mohna tengteng khusak a, gamdai a paimang pihdia a sawlkhiak pen uh minla a scapegoat hong om ahi ichi uhi. Siampu in Isael gamsung a kumkhat sung a thil se khempeuh, a chitlouhna khempeuh uleh a mohna khempeuh uh samkhawm a tua Belam lutunga a khuksak chiang in, tua belam zong, bah zou hial a,khasetak in gamdai lam manoh kichi hi. Mihing bang a pauthei hitazen leh Belam in bang a gen ta diam maw ? A seltheihlouh ziak a zat-theih hizaw hi. Huchibang a hihkhit ahih chiang in, lamdang tak in, Israel ta ten zong lungmuanna khat, siangthouta kisakna khat honnei thei mawk uhi. A khelhna uh tua Belamnou in pawkhe taktak bang in thei uhi. Ngaihtuahna thilhihtheihna lian mahmah. I damsung a asia leh apha te Setan/Pathian I puaksak toh kibang hi.I pau-upa uah zong, hichibang pian in ‘guktak selna’ chih bang na nei uhi. Amohsak ding uh a theihnon louh tak chiang un, ‘lamgei sik khiallou om kei’ chih bang in na kinem lai uhi.

Tulaitak a ka dinmun toh ka hon ngaihtuah zom a, leitung a khosak haksatna mahmah a kigen Kabul ah ka khosa a, nuamlou mahmah ding a ngaihna neisa in ka kuan a, anuam himhim tuak din le ka kikoih kei phot hi. Huchiin, thil normal teng kipahpih ahi pah a, a dang teng Kabul ka ngoh hi. Electrict hong sih guih leh Kabul, Vuk a kiak-kiak leh Kabul, khua a vot luat leh Kabul, Internet a slow leh Kabul, meh alim keh Kabul, singpi a lim kei lele Kabul, ihmut anop ngel kei lele Kabul, ka chim sim chian le Kabul, ka lungkimlouhna tengteng Kabul, ka gintaksa nopkasak khak zenzen lele Kabul thou. Market a Chinese pian mahmah Hindi pau zang bang ka muh chia le Kabul(Mongolian suan tampi na omzel uh e). Mimal dustbin, Inkuan dustbin, Khawtang dustbin leh Khalam dustbin te khatchiat a muh theih hileh,kuapen dustbin alianpen mah diam maw ? Na ngaihtuah ngei hia ?