Kabul laikhak 6na

L.T. Ngaihte | Thursday, 22 March 2012 08:09 | L.T.Ngaihte | Hits: 1446

VUK, VUAHTUI LEH VANGNGAIH

Huihkhua leh asung a thil om tengteng ngaihtuahna ka neih chiang in, asiamtu leh a bawlpa thupina te genvuallouh ahi chih ka phawk a,a gen tuan dan le kathei kei. Laphuaktu khat inle a gendan tuan thei lou ih, 'Na thupi lua, na thupi lua' ana chi mah hi. A omdan tak uh, akisiam dan uleh a nasepte uh theichiang bang hileng,lamdang leh thupi isa deuhdeuh ding un ka gingta hi.Tuate bang leng mihing lungsim ngaihtuahna in banlou himai hi.

Mimawl ngaihtuahna a tuni a igennop tuh Pathian thilsiamte lak a khat 'tui' ichih ahi. Leitung pumpi ichih sehthum suah leng, sehnih te tuipi ahi.Mihingte khosakna leh tuallenna leitang pen, tuipi lak a gam hong dawkkhia lian lou khakha omte ahi. Ahitak a gen in, Genesis a khovel kisiam tungdan a genna ah, '...tui thukpi tung a mial in amial a,Pathian kha intui tungte a opkhum hi' achi hi. Pathian kha in a opkhum I theih masak pen tuh leitung hilou in tuipi tung ahi. Huaiziakin,Pathian omna, Pathian tenna leh a vanzat ahi chih achiang mahmah hi.

Ka Pu Thiankhansiam in nidang deuh in Tui Pengkul Bu(Book of Water Trumpet) kichi a gelh a, huai simkha ten tui thupina tampi na thei ding uh. Amah gendan hituanlou in,tua I tenna khovel 'tawp' dia neu apat zak pen, tua ka ngaihtuah kik chiang in, tuipi nuai a tummang chiang a hiai khovel 'tawp' hi thei lel ding ahi lel mah ve, ka chi hi.

Tui bang a gim neilou, latzia leh melpuak neilou lah haihvual hilou,kham taktak a duh non mahmah lou chih om theilou, a rong hitak le omlou, muhtheih lah thah theihlouh, neem mahmah lah zohlah neilou, huailou a thil nin ki siangsak theilou, huailou a dangtak pha theilou, tam dawn lawleng lah sihna hithei zel,a ki fawn nak ten insang mahmah leh lawnglian mahmah te bang leng phelen zou khop a tha nei, lah tak khat in hon theh leleng bangmah tham kisalou, a totkhak gige na mun a suangtak tak leng kuak zou hilhial. Hichibang a thilsiam lamdang,thildang a om theih a gintak huai kei hial hi. A deihhuai tawp lah alauhhuai tawp hijel hi.

I pupa hinkhua a tui kizatna poimoh mahmah leh lamdang mahmah tuh thukhenna a azat uh ahi. Thil hihkhial tu zonkhiakna ding in 'tui-lut' achi ua,a kikhing mi nih te tui a lutsak uhi. Siampu in phuisam zen a, adik loupen pen tui in hon lamkhe ding a thu apiak khit chiang in, tua mi nihte a kitawn in tui ah alut uhi. Adikloupa tui siam mahmah a theih, nidang a leng ngamatna a tui nuai lut siam mahmah, tui nuai a hakthei kichi hial bang leng, adiklouh hun in, tui nuai ah om thei mahmah lou, sawt-om sawmin suang bang pawm mah leh, asuang toh hong kilam khemai, chin agen uhi. Lamdang kasa mahmah. Scientific tak in bel, amipa a kisiamlouhna gu thupitak om in,a khuak hia, a lungtang hia, a sin hia, a gilpi hiam khat zangsak in,tui in lam khepah mai hi kha ding. Ipu ipa te theihchet mahmah tuh: tui a thillamdang selvuallouh om ahi chih a hi.

Tui lamdanna thupi kasak mahmah nawn tuh, Eklesiasti a 'van nuai ah thil thak himhim a om kei' ci a agen bang geih in,tuipi a meihu te lengtou te munsang a khovotna mun a tung chiang un,hong tuisuak ua,hong kesuk in, huaite vuah I na chi uhi.Vuah khempeuh atawpin, mun tuamtuam, bel tuamtuam ah meh tuamtuam a huan min khit chiang, lamlian tuamtuam,sing leh lou tuamtuam te ban a mihing pumpi tuamtuam a tot khit chiang in, lei ah kiknawn a, huai apan akipatna tuipi va tung non zel uhi. Anhuanna a i zat te zong, ahu a lengkhe pah pawl om hi. Tuate zong mangthang hituan lou hi. I nek leh dawn te zong kitha khe vek zel a, atui in akipatna uh tung zel uhi.

Tua ka omna Kabul ka tun a pan vuk hah kiak in kia a, kum 30 sung a atampen kum chi uhi. Lampi ding vuk tung ah sial ngai hial a, lamgei ah lamlian isial tung a leisai bang in vuksai sah mahmah hi. Leitual a gari te delhkhum te a tawpciang in suang mah bang in tak thei uhi. Lamdang tak bang khem in, khua a hong lum a,lei in lumna neukhat ahon suah chiang in,tuimang khin thei uhi. Akhal a sawtpi omte zong, akipatna uh tuipi zuan in tummnang veve uhi.

Bouruak a hong lum sim chiang in, nidang a vuk a hong kete hong tuisuak in vuah in a hong zu uhi. Vuk kiak sang in a gin ngaih zaw a, tukverh kongkhak te ahon den khak a, intung bikha kai te bangziak hiam a kal lak a hong ngaih deuh zel te,insung apan izak chiang in, bangdang teng sang in, neulai hinkhua hon phawksak in,huai phawkna in bangdang teng sang in lungzuanna hon tun hi. Singtang loubuk apan, lounawl a tuiging I ngai a,khat veivei chiang in a gin hong ngaih a,a khonung zekin hong dai mahmah thei zel hi. Kuahiam khat in a khut a v aching a, khah zel bang sak theih a, akhenchiang in thawmhauna bang hon tun thei hi. Huchibang in, luidung a zan giah chiang in zong, aziakding hoihtak theih hilou in,tui luan ging tuamtuam thei hi. Ei va giah louh zan chiang a leng huchibang a gin tuamtuam nei thou ding uhia chih khong ka ngaihtuah chiang in,laphuah siam khat in, 'Zing in vasa ten Pathian a phat uh' achih bang deuh in,tui in leng asiamtu phat a gindan tuamtuam nei hiding hitah, chih ka ngaihtuah hi.

Hiaite ka ngaihtuah sung in,katheihlouh kal in tung sunni na kihei zel hiding hiven, khua hong mial kuanta. Vuk leh vuah kithuah lah a zuk ngei in zulai,tukverh apan leitual ensuk leng kang phikphiak,denzek a mikhat paina khekhap te kilang mahmah. Huih lah vot mahmah tenten, ka tukverh tung a Vakhu te inkuan lah votsa mah hisam di hive un,akha khap ging uh akal lak teng in ging khaipkhiap.Ka intung a pan vuahtui hong ke tiltil ten lah ka tukverh glass hon deng in, kituak takin luangsuk ziahziah uhi.

Kava houpih di lah om geih kei ven,puanphah leh silh samul tuak kaal ah, awl in kakitholh lut suk a,ka gei a VUK (Vangaitang Unau Kipawlkhawm) te magazine hoihtak ka la a, DM College New Boy's Hostel a ka ompih khak K.Vumzathang, tua EBCC te Pastor hita laigelh ka telkhia a, kei kia a nuih zat mahmah na mun bang tampi kamu hi. Vangaitang mite leh agam, a gal a thei maimai te ngaihdan leh koihna sang a ngaihhuai leh gamnuam pi mahmah ahi chih ka gingta a, midanglak a taksap mahmah,amau lak a muhtheih tuh kingaihnatna leh kiitna ahi. Ka lawmpa Vumzathang in phaklouh a akoih pawl om mah leh,tumalam sawtpi hita a, Kristian Thukizakna a hong kitak lang 'Pastor VZT in agam neih teng saptuam a din athoh khia' chih ka sim khak apan,phaklouh gimnam a kana koih tak a hi a, Hostel a ka omlai ua, Gospel tanchin chain letter a bawl ka sawmlai khong uapan tuh gamlapi na tungta hita e,ka chi lel hi. Khanvual te khong Pathian nasem a ginomtak a omte khong mah in, nasepdang neite sang mah in,ngaihnatna leh lametna hon pezaw uhi, hiai khovel khemna te a kisun let tektok tel lou dua gintakna om man in. Khua hong mialtak tak hita ahihman in, VUK kakawih khia a, zan dangkhat khattang a ihmu bei din kong kisa hi.