Lamka a thil tungte pan ngaihdan

Lealyan Thawmte | Monday, 21 May 2012 20:03 | Lealyan Thawmte | Hits: 1293

Zan nitak a tangval nou Jacob Malsawmlien, meltheih louh khat in a hinna a laksak mai kha poi kana sa a. Ka ngaihtuah masak pen chu Lamka ah nidanglai a tem a ki dawt chih te khong mi sual leh goonda ichih te ana hih ua. Huaile, kua hangsan zaw, kua gum zaw chih etsak na khong hi in. Zu dawn khawm in, 'Na ngam leh hon dawt ve' chi in..a khat pan 'Ngam zen zen e' chih tawh dawt thuah suk chih bang. A dang..zukham leh kisel buaiziak, nungak kituh ziak leh tem tawi tuak a kichou tuah khong le ana omhi.

Hichi bang a khelhna neilou, school naupang hichi tuk a huham a hinna lak sak tupa matkhiak a, a kituah pih gawtna piak ka deih lai in..thu kigelh te i sim leh Hospital a 'Casualty Dept.' te fel zawhlouh na le tampi om a theih ahi. Lamka khua leh a sehvel a mi ki tam in ki behlap hiai hiai a, hong ki behlap zel lai ding hi. Beh tuam tuam, nam tuam tuam omkhawm na ahih chiang in, huai a mi ki behlap leh pung hiai hiai tawh ki tawn in sualna, huhamna, tuahsiat tuah leh hichi bang khotaang a thil hong tung chia kitheihsiam louhna bang le, nidang sang in hong uang zaw hiai hiai di ahi.

A nam leh beh pel ah - hichi bang hun, tuahsiatna leh damdoi inn a etkol ngaihna, leh a hun tak a Doctor & Nurse i poimoh lai un - tu lel a Lamka Damdoi inn in Lamka leh a sehvel a om leh teng te adia nna sem zoulou ahi chih muhtheih a a omna sawt simta hi.

Natna thupi lua hilou, hoih leh chitak deuh a etkol a, a natna theih chiang hileh, hoih leh dam thei maidi, a Imphal lam khong kawk muh ziak a sihna tuak bang ahihkeh, tuakdek bang le theih a omnual lai in - Lamka Damdoi inn a sem Doctor leh Nurse ten le, chitak deuh leh a nnasep na uh hon ngai poimoh leh damlou leh panpih ngaite adia amau te seh leh koih a om uh ahi chih i deih lai in - tu in, Lamka ten deih leh muangtak a ana telching uh Pu Pungzathang Tonsing in Health Minister hihna a hon let tawh kitawn in, Lamka Damdoi inn, a hithei tan a hon puahthak(overhaul) a, Damdoi inn muanhuai, leh damlou, a hau, a zawng te leh 'emergency' a poimoh te ki etkol theih na Damdoi inn ahon suah ka lamen in ka ngen hi.

Huai zawh chiah..hiai Jacob sihna tungtang a, Lamka niteng khua sukbuai a om chih kana sim in poi kasa a. Lungsim a vei didan leh, a school kaipih, a lawm leh vual te thuak nat di dan le katheisiam lawtel. Hilele, school naupang, lekha sin di lai, siam leh pilna sin di lai te - tuahsiat na khat ziaka - kholak a singkhuah, chiang tawh sawlkhiak a om a, mi nautang subuai leh 'phuba' lak ut na a lungsim ua piansak mawk kha thil dik a dik lou hi in kathei a. Hiai ah chu a school naupang te mawhsa lou in -Vision Academy a Teachers, Principal etc. ka mawh sa liau liau in Vision Aademy hilou a - BLIND ACADEMY nahi uh.

Student, teirawl leh fuih theih lungsim paw lai te VISION nei a siam leh pilna sinsak di hile uchin, a sing khuah, chiang tawi a Lamka khosung a sawl khe loudi uh chin a.. a Teacher leh Academy min a, Police Station ma hiam a na nuakna uh va ensak di in, ahih kei leh SP/DC Office bang a na Academy pumpi ua sun nitum a tu leh, na lungkim louh thu bang uh lai a gelh a, na Academy naupang te uh suaikai sak a na piak lut di uh hizaw in kathei hi. Jacob thil tuah pen, tuak kha thut(random) le hithei (le hih tuak) ahih keileh a Damdoi inn lam ate fel louh ziak a sihna tuak le hithei chih theih ma a, na Academy naupang te na khah zaak uh thil hih didan hi khollou ahi.

A Vision Academy te kia hilou in, denlam zek a thu zak dan in BLUE STAR a kai School Naupang te bang in Manglalson kichi..a bang hihkhelh ziak hiam chih thei kei mah leng, vuak chih tak a ana vaw mawk uh leh, a School a heutu te bang natan kigolh uh chih thu om in. A ziak leh a khonung thu, ki lem leh lou, a mawh leh lou thu sang mah in - i sinlai, lehkha leh pilna, siamna delh a school a laisin laite, a school a Teachers ten, thagum zat, sisan kisuah, phuba lak, hiam gamtat na khong hanthawh zaw uh bang mawk Mipil, laisiam, theisiam leh khotaang adia mabaan a makai te omdi dan zil sak poimoh hi a katheih lai in - a ei heutu, Teacher, makaai, School neitu te mahmah in - pil leh siamna, theihna, khantouh na, kituahna, khotaang hin dan, thuakzawhna te kisin sak lou a - a lehlam i na ki kawk muhmuh ziak ua..Lamka kia lou, i gam i chih nilnel sam hichi aki kha de aw chih bang ka ngaih tuah hi.