Singngat Special Muut, Phuilouh Special Meet

Kimbawi' Pa | Wednesday, 18 April 2012 02:45 | Kimbawi' Pa | Hits: 1344

Hiai ‘Special Meet’ a dia kua teng in tha seng a, bangchi bang a panla a, awlmohna taktak a tha-le-zung seng uh ahia, chih ka theizou kei. A hun a hong tung dek a, ‘Souvenir’ bawl di bang a hong ging zawmah a, ka na ngaikhe dide a, article ngetna a hong tung phut mawk hi. Phur deuh, hilele gelh di thei manglou in ka om dedu hi. Muang a hong ngen ahih ngal uleh chia ka ngaihtuah chiang in bang pen gelh di, chih dotna in a zui zel hi. A tawp in, personal mahleh ka tanchin ka gelh daih hi. Singngat reflex kha thou hi’n ka thei a, (K)hemhem sa a om leh thutuam. Meet ah ka va hoh ngei a, huaite a nuai ah…….

‘Singngat Special Muut, taget aw, ‘Meet’ gensual nawnlou di, a hong piankhiakna dia kua teng in pan ana la uh ahia, chih ka ngaihtuah chiang in thupi ka sa petmah hi. Hichi’n k’on pan di.

Gospel/Tanchinhoih Johan in ana gelh a, ‘A tung in Thu a om a, huchi’n Thu tuh Pathian toh a omkhawm a, huan Pathian mah thu toh a omkhawm hi. Thu (Amah) thil tengteng kipatna Pathian toh A omkhawm hi. Thil tengteng Amah a kipan a kisiam ahi a, Amah tellou a thil kisiam himhim a om kei’ ( John 1:1-5). ‘Huchi’n Thu pen mihing a hong suak a I lak uah a tengta a, huchi’n a thupina eite’n I mu ua, huai thupina pen Pa in a Tapa neihsun a piak ahi a, hehpihna leh itna a dim ahi,’ chih gelh ahi. Hiai a ‘chihgelh’ chih bang deuh a Singngat Special Meet kichi neih theih a om ahi, chih ka ngaihtuahna ah a hong lut zungzung hi.

Kua teng in pan la? Ka thei zouzai kei, awlmoh leh phatuamngai a tam ziak a hiai bang thil piang ahi, chih ka ngaihtuah a, ka kipak semsem hi. Atung a LST in a gen bang a thu pen sa a suah theihna dia panlak ngai tak ahi. Gospel John in a gelh, leitung pianma thil a kipan a thu pen sa a hong suahna dia kum bangzah kivei ahia, chih i thei kei uhi. Bible suitute’n leitung kisiam  kipan a kum 6000 a val zek nung, hiam ma hiam a Jesu hong piang a, tua a hongpian nung kum 2000 valta hi’n a gen uhi. Hiai pen thutuam ahi. ‘Thu pen sa a hong suah toh kisai’ Bible in a gen toh  kibang deuh a ka tehkhin thu ahi. Tua Singngat Special Meet bangle ‘thu’ pen ‘sa’ a suahna dia panla tute’n hun leh tha bangzah seng a buai ahi d’ua aw, chih ka ngaihtuah chiang in a sai tute thupi ka sa mahmah hi. Ka pahtakna thu hiai ah k’on pulak ngal!

Phur ka hi dia, oh! Sorry, ka hi di ua, Kimbawi’ Nu leh ka nau tum uh bang ana ut uhi. Huan, ‘Tongluang’ Editor bang chial ahih toh kiton in a lawi’nu bangle ana phur tei a, kou ‘Tongluang’ inkuan, chihdan in kou inkuan 3, Editor-pute nupa-2 leh Singngat Special VL Mangzou-1 k’ong VIP kuan ringot ua, ‘Getz’ car in ‘aksa’ Kg.(?) k’on pua uhi. Singngat tung chu ki-VIP sak lailai, Pa Mangthankhumte’ in a ka aksa puak uh, ‘ana huan uah’ chi’n car in ka pawtkhiak san nawn uhi. Meet lopna mun di, bazar, veng tuamtuam, chihte pha kual in nuam deuh in ka thutum un ka pawt vel uhi. Hiai hun khawng nuam I sak mah ken, chi ua!

Kithunei sak tak in ‘gilkialta, ann neta di’ chi’n mahni huansa hilou pi maingal deuh mai in ann nekna di mun  ka zuan uhi. An nekna dim un ka tun un a hon thuk ua, ka ‘aksa’ puak uh sang mah in manta leh bal thaksik a bai pen kou, Kimbawi’ Nu toh ‘Singngat Special Bai’ in ka ngai ua, him ka sa mahmah uhi. Pa Mangthankhumte nupa hi meh bai a siam mahmah uhi. Aksa sang a himzaw a bal leh manta thaksik a bai thei ahi uh. A baina thaksik uh him himhim ahihleh chi’n ka ham trok a, inn ka tun ua ka bai uleh a him chuang kei.

Zing-an nekhin chu programme kipan ahita a, vah deuh mai in car in ka kuan nawn vel uhi. Ka tung chiah uh chih di’n ‘evergreen singer’ Ms Vungngaihching in ‘Zuanhuai ngoumei in bawm e, I zougam nuam’ ana chi riahriah hi. Mipi lah phur, ann ne utte lah phur, a huante lah phur, singpi awmte leh a hawmtute lah phur! Insung khat bang in ngaihtuah le ‘phur sungkuan’ hih toh kituak inkuan hih thuah ahi mai hi. Hiai bang a Singngat mite kituak a vaihawmkhawm thei mawk ngei d’un ka gingta ngei kei a, gin-le ka gingta kei. Lah a tak ahi a, ‘thu’ pen sa suak ahi mai hi. Kipahhuai ka sa petmah.

Hausa pu leh pi bang pahtawi in Singngat mipite, kua mi leh sa, chih omlou in a zawng ua, huai mahmah le thupi ka sa hi. Huan, Hausa pu’n a thugenna ah Singngat mipite a deihsakna thu kia a gen lou in nidanglai la ngei mai a a hon samkhia a, huai mahmah a thuk in a gil hi. Tulai khangthak tampite’n huai a ‘lavui’ samte a khiakna/meaning a thei khol kei di uhi. Huaite bang hoih tak a a-context toh kaihkhawm di’n ka deih mahmah hi.

Mihing hihna a hihkhelh omlou theilou ahi a, kuamah mohsakna hilou in, a ‘plate-form’ ngatdan a diklouh deuh man in et a haksa mahmah a, nisa thuak bang a haksa diak hi. Huai pen mah thuak haksa sa tam a diam ah mipi kikhin a niliap hiam, a muh baihna di hiam lam zong a tam mahmah hi. Kou le haksa sa ka hi di ua, a thugen uleh banghiamte kia ana ngaikhia in ka om uhi. Huai bang a haksa sa sim a ka om lai un a pawlam ah ka pawt ua, Editor Son toh a zi toh kou nupa toh ‘lemon grass farm’ et ka ut phut uhi. Singngat mite ka dot chiang un ‘naichikdan’ in a gen uhi. Huchi ahileh chia khe a ka pai uleh ka ‘tamsawl dek hial uh. Lemon Grass kichi ana vuai pianta a, etlawmna di nei kei mahleh a gim namtuina a mang tuan kei hi. Huai mah bang a Singngat mite a tul leh vuai bang in lang mahle i gim namtuina uh om den henla, mansuah kei le, ka chi mahmah hi.

Announcement lam a bangmah ka zak lou man in ‘Appreciation Certificate’ ka lak di bang theilou in lemon grass lam ka hoh san thethup a, ka kisuanglah mahmah hi.

Singngat kichi Zomite’ a dia a maimai khua ahi kei. Kang mun in khangmoh mahleh a ding kip a; sikdenna tuak in mite’n nenniam sawm mahle uh a ding tang a; tui haksa in keu mahleh a sung a tengte’n taisan a sawm kei uhi. Huai ahih dungzui a lamet-louh phial a hiai bang a ‘Singngat Special Muut’ kizang thei hi’n ka koih hi.

Programme a hong bei a, ann nek a hong hun a, a kidaih kei leh ne lou a pai mai poi ka sa kei hi. Aziak chu, a ‘Special Muut’ teng zang khin in ka kikoih a, ann nek pen a thupi in ka koih kei hi. Himahleh an bang ana kidaih mahmah lai a, ka ne ua, a lim petmah hi. Vah deuh mai a pai in ‘kuva’ ‘sikret’ khu phulphul in car in NL dak 6 vel in ka kiknawn uhi.

Singngat toh kisai ‘Special Meet’ Souvenir ah tampi a kigelh a, a khosung a tengte maimai lou a hihdan uh tampite’n na mu di uh. Ken le ka theihte hon gelh leng tampi a om sam di. Hilele huaite k’on gelh kei di. Khat chauh. Souvenir a kigelh, football pekna a goal-keeper, a goal dailen san a goal tuanlou kichi, Tunzalian kha Singngat a dia tangthu hau pawl ahi dia, ni khat Police-te’n mat di’n a zong uhi. Pa Nengzapaute’ in ah a om a, huai a Police-te’n ‘Tunzalian lei bara?’ chia a va dot uleh mahmah (Tunzalian) ‘leitre’ chia dawng in a phaitam lam uah a kihemmang hiau hi.

Singngat thu gen di chileng ka gen seng mawk kei dia, tua ka gelh lel ‘Special Meet’ toh kisai bang le galh di a tam petmah hi. Gelh di a tam luat ziak in ka pat didan leh zoh didan bang ka thei zou kei. Hiai bang a Singngat toh kisai a meet a om theih mahmah thupi sa in a sai tute ka pahtak thu ka gen thakthak hi.

Chikmah a mu ngei nawn lou dia ka kigintakna munte ka mu a, chihmah chiang a amel mu mu dia ka kigintaklouhte’ mel ka mu a; a lehlam tak in ka khasiat a suak hi. Ka theihtheihna a hatlouh ziak bang in ka theihsa bang ka haih a tam mahmah a, huaite bang in kisathei a hon chi maithei uh. Huai ahi hetkei, a hon houpih tute ka thei pahpah zel hi. Huaite mah ahi hiai Meet kei a dia lohchingsak tute. Ka mitkha ah a mang kei dia, ka ngaihtuahna in a taisan bok kei di. Singngat kichi khua om keileh ka hinkho tanchin a tuam daih di’n ka gingta hi. Saupi ngaihtuah dia ka khasiatna tampi om di himahleh ken zaw Singngat khua ka mangilh kei di.