Kal (Kidney) A Poimohna

KAL (KINDEY) A POIMOHNA !
By Vungzamuan Valte

vungzamuan valte new

THUMAPI
Tulai in kidney failure ziakin sihna leh manna tampi ituak ua, kidney buai ziaka sih theih mah hi hiam? Bang hang a kidney poimoh khaten ahia chih kikum sinle chidan ihi!
Singtang ah i khosa a, nektak lah hoih hetlou hinapi in i taksa gintaksangin a damthei vanglak hi. Kum 80 valval i pipute'n ahon dampih ua, bangziak a huchi damtheih tuanse ahi duam aw ichi lou thei kei. Nileng leng a loukuan ua, nisanuai a omden ua, khaw-ul kai zoihzoih khop a nasem ua, tuithawl neuchik khat kikop zawmah lai ua, huchipi a le damthei mahmah mawk uh hiveh aw.

Lou ikuan chiang hiam, leh gam ikuan ding chiangin buhtun khal el ol kipua a, mehthak neuchik toh kitunkhawm chiltel a, tuithawl aom leh kipua a, aom keileh luitui aom dandan kidawn a, huchia kikhosa thei thei vanglakte ihi uhi. I tuap leh isin, ikal leh sunglam khawng keu gaivek leh kilawm hinapi in, huchi hehu khollou ahihna ah, sekdoupi khat chu ahi chihna ahi hi.

Khawpi zawdeuh leh khut nasep a poimoh louhna mun ah i khosa a, i taksa ahong tawldam a, huchi in inek bang ahong hoih hiaihiai a, ihong thau em-am mai uhi. Huchia, ihong thau em-am chiangun i taksa sunga nasemtute ahong gim mahmah mai ua, sisan gui leh lung, tuap leh la, kal leh zunbu ichite kizom vek ahihna uah ahong mangbang panta uhi. Physical tak a gamtang nawnlou ihihna uah sedentary life ichi ua, tawldam hiuhiau in i om uhi. Huchia i tawldam hiuhiau chiangun i taksa ahong gik keihkuih ta a, iguh itang te'n adeih bangun apoimoh dingte uh ahon muphaban nawn kei ua, natna neuhneuh leh kisoiselna ding tampitak ihon neita uhi. I vital organs kichi, tuap, sin, lung, kal leh adangdangte a buai panta ua ahong naksam dekdek pah mai uhi.

ZUNKHUM KHEMKHUM
Khawlum gam ah ihong khosa ua, singtang meh leh ann nekdan kikheng tuan lou in i hinkhua uh ihon zangta ua, lupding kuan khawng in gilvah pengpung in i gil uh izutzut maita uhi. Singtang ah dak 4 pm a ann ne ihi ua, dak 8 a ilup chiangin a kikar ah dakkar 4 kia hi. Khawpi ah bel huchidan hilou hial! Nektak ihon deihtel zawmah lai ua, amui a al, leh athak siksek mah ihon deihtel ua, sa khawng mantawm chi in ine tawih tawih mai uhi. I taksa in a poimoh lou thil tampi iguanglut ua, over deuh mah leng ahi ngei ding, blood sugar, BP leh problem tuamtuam i theihkhiak ma un ina nei der mai uhi. A huntak a theikhia hile bel hoih mahmah ding hinazenpi in, a kikhelnung ngen in itheikhia ua, ZUNKHUM ipai lemlumta mai uhi (zunkhum kichi a aungluate chihna ahi hi). Lawmte khat in ahuntak in mukhia a borderline achi uhi, a control zou mahmah mai hi. A borderline ahon pelhkhak chiangin tuibawsa kiluakkik theilou chihdan in irreversible ahong suak a, kikhelta, kikhel dimdem chihna ahi mai, abuai pa, abuai nu kihi vek sim ihih uhchu! Hiaithu gen dingin ka kualify e !!

Kidney sukhatna ding aom diam chia daktor khat ka dot zenzen leh, omlou hial ahon chisan daih zawmah hi. Tonic kichi om tellou maw; ka chih teitei leh, problem aom leh a sukdamna ding zaw om sam mah inteh achi leltak hi. Kidney stone kichi kal a suang om chihdan in ithhei ua, suang asuahma in theipah hile bel beisak theih dingdan hileh kilawm. 2014 in annual medical test ka bawlsak leh ultrasound in ka kal ah banghiam khat achiang zoulou om ahi chi in detect mawk a, lamdangsa takin Homeo damdoi ka kan leh kha 6 nek ding ahon chi ua, tui tampipi toh drop 3 nek ding chihdan ahi hi. A kumnawn in a beisiang hiau a ka nuinui mai. Tui dawn tam ding chihna ahihtuak e!

A NASEPTE
Mihingte hinna nak ilung ahipah kholkei a, ilung in na asep theihna dingin ikhuak a chidam angai a, khuak chidam i neitheihna dingin i taksate a chidam angai hi. Huaidan hileh, sin, lung, tuap, spleen (la), pancrease leh Kidney te'n khuang a kituak a abet khawm kauhkauh uh ngaidan ahi hi. Khat in khuang beng utkei mawk leh adangte'n beng thei tuanlou dan anahi ua, isin in inekte sisan suakthei dingin glucose bawl kei mawk leh, ikal in huai sisante ana khisiang ut kei mawk leh, huai sisante ilung in pump utkei mawk leh, ikhuak mangbang mahmah ding a, zatna bei in om belbul ding hi. I sin in nnasem ut mahleh, ingoi in tui leh thau (I ann nekte leh tui dawnte) hip ut kei mawk leh isin le sepding neilou in nuak leulou thei zel hi. Kiguizop vek ahihna uah, a music tumtu khat a khawl leh sihna nai mahmah dingdan mah ahi a, avekpi ua nasem khawm thei dingin a damtheihna uh a kituah petmah ngai hituak sa ing.

Kal ichih Kidney pen i hinna kembittu ahi a, natna tuamtuam apat hon humbittu ahi a, tuisiang i dawn ding filter bangmai a i taksa filter dentu ahi hi. Mihingte taksa a sisan paizungzung tengteng khisiang gigetu leh taksa sung a ninbulom tampi petmahte khisiang a paihkhetu ahi hi. Dakkar 24 sungin sisan 200 quarts (188 litres) khisiang man hialthok a, sisan sianglou bel a lauhuaidan zunkhum nei a buaizakte dinmun apat kithei thei mai ding hi. Pulse anei lai hia, chia damloute i kan kheukhou khawng kidney in a control ahi a, BP bang le kidney in control (lungphu) pha a, i body temperature control room ahi hi. Sisan a thil sianglou tampi omte khikhia in khisiang den a, nephrons kichi filter mit a muh theih leng hilou million tampite nasep ahi hi. Huchia i taksa a ding a thil hoihloute hon khikhia in zunbu ah ahong kikholkawm a, zun itha huahhuah theita uhi. Zun-im kichi khawng aom chiangin tui taksap ziak ahi a, i kidney khawngaihhuai thei mahmah ahi hi (tui dawn mengmeng loute hive hang). Mihingte taksa a tui-tamlua a paikhia a, a balance hungeih in koih hi, tui a tamluat chiangin i taksa vung-theithuai thei hi. I taksa in a poimoh minerals leh chemicals tuamtuamte ahungeih dingin balance maintain a, i taksa leh lungsim ngaihtuahnate chidamsak hi. Hormone tuamtuam a bawlkhiak theih ziakin phatuam mahmah mai a, sisan bawlkhetu inzong pang ban hial hi, RBC kichi sisan a itaksap chiangin anemia kinei a hiai RBC bawlna dingin kidney in panmun poimohtak nei hi. Hiai Kal in inekte apat vitamin D absorb a, huaite apat calcium bawlkhia in guh-le-tang, hapi-le-hatu hatsaktu leng ahi hi.

Huchitel a KAL poimoh ahihleh bangchi kep ding ahi dia?
1. Tuisiang dawn dawn di himai, kal in nna asep hoih theihna dingin tuisiang a tamtheilam dawn gige ahoih (baltin dimdim dawn ding chihna bel hilou).
2. Dawmdoi hatlua leh toxic lam mawk neknek louh dingdan ahi. Pain reliever ichi ua, damdoi khamtheih leh ihmut suahna khawng, calcium khawng, vitamen khawng a poimoh loupi a mawk neknek pen I kal in process zoulou thei ahi, toxic chemical tampi om ahihna ah.
3. Ihmut hun a ihmut ding, i ihmut hoih chia i ihmut kar a i kal ana kibawl hoih (repair) zel ahi chih theih ding.
4. Soda nektam leh soda drinks dawn tam luat pen ahoihna omlou ahi, kal in thuak lua ahi chih theih ding.
5. Chi (common salt) nek tamluat pen ahoihna omlou kikei ahi, mehthak nete ihi ua, mehthak ah chi tampipi kisoh nakkhem a, chi pen i taksa a dingin poimoh mahleh, kidney in zoulou a (dilute theilou, i taksa a omden), huchia i lung in thuak zawmah in BP bang pianloh kha ahi hi.
6. Mawk tut kehkuh louh ding, dinkhiak khiak ding, phiat velvul ding, exercise a tamtheilam lam lak ding, i taksa kahiang tuamtuam te oxygen muhna ahi, adiakkhol in ikal in poimoh mahmah dan ahi.
7. Zu leh khamtheihte toxic mahmah ahihna ah ikal in deih khollou hial hi, wine, beer tamlou lou dawn bel a poiluatna omlou ahi ngei ding tumlam gam te’n ahah-hih tuk un a damtheihna in thuak lawmlawm khollou bang hi. Khenkhat te'n kidney keu zenzen in i dawn ua hiven.
8. Vitamin B6 leh Magnesium taksap ziakin leng kal buaithei a, Vitamin leh Magnasium omtheihna beans, nahtang, nuts, aksa leh green vegetables nektam ahoih chi uhi.
9. Protein nektamluat ahoih kei a, Red meat (voksa, bawngsa, kelsa etc) mawk neknek hoihlou hial hi, ahuntawk lek theite a dingin bel protein i taksa in poimoh veve ahihna ah phamoh lou ding hi.
10. Nazun asuah chiangin ipip se ken, zun-ip ziakin na kal in nasatak a thuakkha ahi chih thei in. A pawtkhe utlou hileh hon noh hehu louhial ding ahi chih thei in.
11. Zunkhum kichi a medical term in diabetes ahia, blood sugar i control zoh keileh bel, hiai atunga i gente tengteng phatuam zoulou ding a, i Kidney in deihbang a nasem zoulou in pukse veve ding hi.
12. Achang changin KFT hihsak zelzel in, blood test nabawlsak chiangin KFT le, LFT le chicheuh lechin, sisan latu te'n theisiam mahmah ve uh aw !!